Icipandwa 39

Kuti Nafikilisha Shani Ifyo Mfwaya Ukucita?

Pali ifi ifyakonkapo, ni cinshi ico wingafwaya sana?

□ Ukuicetekela sana

□ Ukukwata ifibusa ifingi

□ Ukukwata sana insansa

NA KUBA kuti wakwata fyonse ifi fitatu! Kuti wafikwata shani? Nga uletantika bwino ifyo ulefwaya ukucita e lyo no kufifikilisha. Natulandepo pali ifi fine fitatu:

Ukuicetekela sana. Nga watantika ifishayafya sana pa fyo ufwaya ukucita kabili wafifikilisha, ukaicetekela ukuti ne fimoneka ukwafya kuti wafifikilisha. Ukulaicetekela na lintu ulekwata amafya ya cila bushiku pamo nga kukanaumfwila abanobe ilyo bakupatikisha ukucita ifyabipa.

Ukukwata ifibusa ifingi. Abantu batemwa umuntu uwa kuti nakwata amapange ya fyo afwaya ukucita kabili aleibikilishako no kuti ayafikilishe.

Ukukwata sana insansa. Natulande fye icishinka: Kuti waumfwa icitendwe nga ulelolela fye ukuti ifintu fikawama. Nomba nga wapanga ifyakucita kabili waficita, kulaba ukumfwa bwino sana. Bushe nomba ulefwaya ukutendeka ukulapangila libela ifyo ufwaya ukucita? Ifili pa mabula yakonkapo kuti fyakwafwa. *

 ✔ 1 ISHIBA IFYO ULEFWAYA UKUCITA

1. Tontonkanya pa fyo wingafwaya ukucita. Lemba fye ifili fyonse ifyo watontonkanyapo. Wibika sana amano ku kutontonkanya ifyo wingafifikilisha! Mona nga kuti walemba napamo ifili 10 nelyo no kucilapo.

2. Pitulukamo mu fyo ulembele. Ni cili kwi wingatemwa sana ukucita? Ni cisa icingakwafya sana ukucita? Ni cisa wingatemwa sana nga walicifikilishe? Ufwile ukwishiba ukuti, calyanguka sana ukufikilisha ifyo ufwaya ukucita nga walifitemwisha.

3. Ishiba icifwile ukubalilapo. Tantika ifyo ufwaya ukucita ukulingana ne fyo ulemona ukuti e fyo ufwile ukubalilapo.

 ✔ 2 FITANTIKE

Pali ifi fyonse usalile ifyo ulefwaya ukucita, cita ifi fyakonkapo:

Lemba ifyo ulefwaya ukucita.

Ukusambilila iciFrench

Lemba ubushiku ubwa kufikilisha ifyo ufwaya ukucita. Na kuba nga tawimike ubushiku ninshi ifyo ufwaya tafyakacitike!

July 1

Pekanya ifyo ukalacita.

Ifyo mfwile ukucita

1. Mfwile ukufwaya ibuuku lya kusambililamo iciFrench.

2. Cila mulungu mfwile ukusambililako amashiwi 10.

3. Mfwile ukulakutika ku balanda iciFrench.

4. Mfwile ukwipusha abaishiba iciFrench nga ndelanda bwino.

Ishiba amafya yengabako. Kabili tontonkanya ifyo ukacita.

Amafya ningenekela

Takuli uulanda iciFrench mupepi

Kosapo. Uletontonkanyapo lyonse pa kuti ukafikilishe ifyo ufwaya ukucita. Nomba saina no kulembapo ubushiku.

Ifyo ningapwisha aya mafya

Mfwile ukulakutika ku maprogramu ya ciFrench pa redio.

․․․․․ ․․․․․

Saina Ubushiku

 3 BOMBELAPO!

Tendeka ili line. Ipushe auti, ‘Finshi ningacita lelo ifingangafwa ukuti nkafikilishe ifyo mfwaya?’ Taufwile ukulolela ati mpaka fye ukeshibe bwino bwino fyonse pa fyo ulefwaya ukucita e lyo ukatendeke ukubombelapo. Baibolo itila, “uulolekesha imikuukile ya mwela takatande; no umona imyendele ya makumbi takaseepe.” (Lukala Milandu 11:4) Ufwile ukucitako fimo lelo nangu fimoneke ukucepa shani fikakwafwa ukufikilisha ifyo watantika ukucita.

Ulepitulukamo mu fyo utantike cila bushiku. Uleibukisha umulandu cimo na cimo ico watantika ukucita cacindamina. Ulecongapo ✔ (nelyo ukulembapo ubushiku) nga wafikilisha ifyo walefwaya.

Ule-elenganya. Tontonkanya ifyo cingaba nga walifikilishe ifyo ufwaya ukucita. Elenganya ifyo wingayumfwa. Tontonkanya na kabili pali filya utantike, kabili elenganya pali cimo na cimo. Na mu kulekelesha, elenganya ukuti naufikilisha fyonse, kabili elenganya ne fyo wingatemwa. Nomba tendeka ukubombelapo!

[Futunoti]

ILEMBO ILIKWETE ICISHINKA ICIKALAMBA

“Amapange ya wacincila yamulenga ukubomba bwino.”—Amapinda 21:5.

 IFYO WINGACITA

Wisakamana sana ukukonka fyonse ifyo ulefwaya ukucita. Wilapampamina fye pa cintu cimo cine, kabili ulealulako mumo mumo ukulingana ne fyo ifintu fili ilyo uleya ulefikilisha ifyo ufwaya.

BUSHE WALISHIBA UKUTI . . . ?

Ico ulefwaya ukucita nga nacicindama sana, kulaba ukumfwa bwino sana nga wacifikilisha!

AMEPUSHO YA KUTONTONKANYAPO

● Bushe caliba fye bwino ukufwaya ukufikilisha fyonse ifyo ufwaya ukucita pa muku fye umo?—Abena Filipi 1:10.

● Bushe ninshi ufwile fye ukulabombela pa mabuyo yobe inshita yonse?—Yakobo 3:17.

[Amashiwi pe bula 283]

“Calyanguka ukufuupulwa nga tapaba ifyo utontonkanyapo ukucita ku ntanshi. Nomba nga epo fyaba e lyo wakwanisha no kuficita, cilomfwika bwino sana.”—E fyasosele Reed

[Akabokoshi ne Cikope pe bula 283]

Ifyo Wingatantika Ifyo Ufwaya

Ifibusa Ndefwaya ukupanga icibusa na bakalamba. Ndefwaya ukubukulula icibusa ca kale.

Ubumi Ndefwaya cila mulungu ndetukusha umubili ukucila pa mamineti 90. Ndefwaya ndelaala ama-awala 8 cila bushiku.

Isukulu Ndefwaya ukwishiba bwino insamushi. Ndefwaya ukulakaana abanandi nga balempatikisha ukucita ifyabipa.

Ifya kwa Lesa Ndefwaya ukulabelenga Baibolo pa mamineti 15 cila bushiku. Uno mulungu, ndefwaya ukushimikilako uo nsambilila nankwe pali Lesa.

[Icikope pe bula 284, 285]

Ifyo ufwaya ukucita fyaba kwati ni plani ya ng’anda iili pa fipepala—ufwile ukubombesha pa kuti ing’anda ikuulwe