Ba Crystal, ba mishonari ababa mu cilonganino ca bankomamatwi ku Sierra Leone, balipepele ulucelo ukuti basange bankomamatwi mu ncende balebila imbila nsuma. Ilyo baimine ukuti baye mu kumona uo babilileko imbila nsuma, bapitile mu nshila iyo bashalepitamo lyonse. Baipwishe abena mupalamano nga balishibeko bankomamatwi abaleikala muli iyi ncende,  kabili balibalangile ing’anda apaleikala nkomamatwi. Ilyo baile pali ilya ng’anda, basangile umukashana uwali ne nsansa, uwalefwaya ukukutika ku mbila nsuma kabili uwasumiine ukulalongana mu cilonganino ca bankomamatwi. Lyena abantu ba muli ulya mushi balipwishe ba Crystal nga ca kutila kuti batemwa ukumonako nkomamatwi na umbi. E ico balisangile nkomamatwi na umbi uwalefwaisha ukwishiba icine. Nangu ca kuti ba Crystal balibombeele sana muli ilya ncende, tababalile abamonapo balya bankomamatwi bamwene lulya lucelo. Ba Crystal balishininkishe ukuti Yehova e wabafwile ukuti basange balya bankomamatwi.

Ilyo ba Emmanuel abekala ku Liberia, baleya na motoka ku Ng’anda ya Bufumu mu kulongana, bamwene abaume bamo nabeminina mu mbali ya musebo ninshi nabafwala bwino. Ifyo aba abaume balemoneka fyalengele ba Emmanuel beminike motoka pa kuti beshibe ifyo balefwaya. Ilyo babepwishe ishina, babebele ukuti ni ba Moses. Lyena babebele no kuti balibebiile indalama ubushiku bwafumineko, kabili balefwaya ukuyipaya. Ba Emmanuel balibikileko amano ilyo ba Moses balebalondolwela ifyabacitikiile, kabili balibalombele nga kuti baya bonse ku Ng’anda ya Bufumu. Ba Emmanuel baliile na ba Moses ku Ng’anda ya Bufumu. Ifyo ba Moses baumfwile mwi lyashi lya ku cintubwingi fyalengele balila. Batile: “Nine fye bapekanishishe lilya ilyashi. Inte sha kwa Yehova baliibela.” Ilyo ukulongana kwapwile, ba Moses balisumiine ukulasambilila Baibolo, kabili pali ino nshita balaya mu kulongana lyonse.

Aminata mwana we sukulu uuli ne myaka 15, kabili ekala ku Guinea-Bissau. Ilyo aali ne myaka 13, bakafundisha abalefunda ifya kulenga, baebele abana besukulu ukuti balenge ifya kufisa pa menso ne fintu fimbi ifyo babomfya pa kusefya imitebeto beta ukuti carnival. Lelo Aminata alengele icikope apaali inama ne miti e lyo alembapo ukuti “Paradaise.” Ilyo bakafundisha bapokele amapepala, baebele Aminata ukuti ifyo alengele te fyo alingile ukulenga, kabili balimutobeshe fyonse. Ilyo bainwike, Aminata aileipusha bakafundisha ati, “Ni bani basefya umutebeto wa carnival?”

Bakafundisha bayaswike abati, “basenshi.”

Aminata nao atile: “Nshili musenshi, kanshi nshisefyako imitebeto ya musango uyu. Nalicetekela ukuti nomba line Lesa akalenga icalo ukuba paradaise, kabili ifi fine e fyo nacilenga.” Bakafundisha balandile ukuti bali no kupeela abana besukulu amashindano yambi aya kwasuka amepusho. Ilyo balembele aya amashindano, Aminata akwete amatoni 18 pali 20.

Mu mushi uunono uwaba mu Malawi, mwaliba ibumba ilyabela ukutali umwaba bakasabankanya 7. Balipanga umo bakumanina ukubomfya fye ifimuti, ifyani na matanda. Ilyo kangalila wa muputule abatandaliile, bamunyina balibombeshe ukwita abantu ku Cibukisho ca mfwa ya kwa Kristu. Munyina uwalandile ilyashi lya Cibukisho, alandile ilyashi ninshi nababika na malampi mu muulu. Ilyo alelanda ilyashi, alefilwa no kusela pantu abantu abengi  balishile kabili bamo balimushingulwike. Kanshi kuti mwaelenganya ifyo aba bakasabankanya 7 baumfwile ilyo baishibe ukuti balongene 120.

Mwaliba amapaalo mu kubila imbila nsuma mu fifulo umwaba abantu abengi. Na lyo line, ayo mapaalo tayamoneka fye apo pene. Abanakashi bamo abekala mu Lomé, umusumba uukalamba uwa mu Togo, baile pa kalitebulo ka kubikapo impapulo kabili balisendelepo broshuwa iitila Mu Lupwa Lwenu Kuti Mwaba Insansa. Ba Nte balilanshenye nabo ukubomfya ilembo lya Abena Efese 5:3. Lyena balipeleshenye amanambala ya mafoni. Ilyo papitile imilungu ibili, aba banakashi balitumine foni no kutila: “Kwena nshatemenwe Inte sha kwa Yehova. Na lyo line, nalibelengele ilya broshuwa kabili naliitemenwe. Ilya broshuwa yalingafwa ukupwisha amafya yamo nalekwata mu cupo kabili nalyafwako ne ndupwa shibili ukupwisha amafya balekwata mu fyupo. Nalilubile pa fyo nalemona Inte sha kwa Yehova. Ndelomba ukuti mukese mu kunsambilisha Baibolo.” Aba banakashi balitendeke ukusambilila Baibolo pamo no lupwa lumo ulo bayafwile ukupwisha amafya mu cupo.

Ankasie litauni ilinono ilyaba mu Ghana. Bashimakwebo bamo balashitishisha ifintu mu mbali ya musebo. Lyonse pali Cimo, ba Nte balabika aka kubikapo impapulo aka mawilo mu mbali ya musebo. Ilyo ba Enoch babashimikile kuli munyinefwe Samuel, balipokele broshuwa iitila Mulekutika Kuli Lesa kabili baipwishe munyina Samuel nga alikwete impapulo ishili shonse isha mu lulimi lwa ciKusaal.

Ba Samuel bayaswike abati: “Cabipa tatukwete isho impapulo. Na lyo line, natukwata amabroshuwa mu lulimi lwa ciFrafra.”  Ulu ululimi lwalipalana no lulimi lwa ciKusaal. Ilyo papitile inshiku shinono ninshi ba Enoch bali mupepi no kubwelelamo ku mwabo, balilombele impapulo ishakuyapeela balupwa lwabo.

Ilyo babweleele ku Ankasie, ba Enoch bapeele ba Samuel amapepala. Ba Enoch balipilibwile broshuwa ya Mulekutika Kuli Lesa mu ciKusaal! Balitwalilila ukulongana no kusambilila Baibolo lyonse.