NAKULIILE mu lupwa lwa baKatolika abene bene abalefwaya ukuti nkabe umupatili. Kanshi ilyo nali ne myaka 12, nasambilile amakosi yatatu ku bapatili abapusanapusana. Lyena mu 1990 ninshi ndi ne myaka 14, balinjitile ukuya mu kusambilila pe sukulu lya bapatili ilyacindikwa sana mu calo.

Nalilundulwike bwangu kabili banjebele ukuti nga natwalilila ukulunduluka ifi fine nkaba shikofu. Lelo nshatemenwe ifyalecitika, pantu mu nshita ya kulasambilila Baibolo, baletusambilisha fye ifisambilisho fya bantu abasambilila sana. Na kabili abapatili baali ne misango iyabipa. Ilyo balefwaya ukuulungana na ine, nalyumfwile ububi ica kuti nalefwaya ukuleka ukubombela Lesa.

Pali ilya ine nshita kwali bamishonari, umulume no mukashi, abapeele akauntanti wa pali ili line isukulu icitabo citila, Ifipusho Abacaice Bepusha ne Fyasuko Ifingabafwa. Nalyashime  ici citabo kabili nalicibelengele conse. E co natile, ‘Ifi fine e fyo ndefwaya.’ Nalekele ukusambilila ifya bupatili no kutendeka ukusambilila Baibolo ne Nte sha kwa Yehova no kulalongana nabo. Ilyo papitile imyeshi 8, nalibatishiwe mu July 1991. Natampile bupainiya kabili pa numa naupile María, na o uwali painiya. Ukutula mu 2006 tulabomba bupainiya bwaibela. Mu nshita ya kuleka ukubombela Lesa, pali lelo ndeyafwa abantu abafwaya ukusambilila icine pa kuti babe bakapepa ba cine.