Yehova afwaya ukuti “abantu balekanalekana bakapusuke no kwishiba bwino bwino icine.” (1 Tim. 2:4) E mulandu wine Inte sha kwa Yehova mu Dominican Republic babombesesha pa kuti bashimikile abantu bonse mu calo cabo, ukubikako fye na baba mu fifungo.

Mu 1997, bapainiya baibela babili baleya ku kushimikila cila mulungu ku cifungo ca Najayo, mu San Cristóbal, uko bailesanga Gloria, umukashana uwali ne myaka 23 umwina Colombia uo bakakile pa mulandu wa kushitisha imiti iikola. Alelanshanya na nkashi uo bakakile pa mulandu uo ashacitile. Pa kwasuka amepusho ya mu Baibolo ayo Gloria akwete, bamunyinefwe balimutwalile icitabo ca Ukupelulula Ukufuma mu Malembo ne mpapulo shimbi. Apo alitemenwe ukusambilila Baibolo, abafungwa na bambi batampile ukusambilila, ne ci calengele ibumba baleshimikila cila mulungu mu cifungo ukulakulilako.

Icine calengele Gloria ayaluka sana ica kuti mu 1999 alifikilepo ukuba kasabankanya uushabatishiwa. Cila mweshi aleshimikila mu cifungo amaawala ukucila pali 70 kabili aletungulula amasambililo ya Baibolo ku bafungwa banankwe abanakashi 6 abalelunduluka. Lyena, mu 2000 alipwishe  nga ca kuti bakateka kuti bamubelelako uluse kabili balimufumishe mu cifungo pantu nomba aali ne mibele iisuma. Pa numa ya kumufumya, balimubweseshemo ku Colombia. Ilyo afikile fye ku mwabo mu 2001, alibatishiwe nangu ca kuti balupwa lwakwe tabatemenwe nangu panono ukuti abatishiwe.

Pa numa ya kubatishiwa, nkashi Gloria alitampile bupainiya. Alyupwa kuli munyinefwe eluda, kabili pali ino nshita bonse babili ni bapainiya ba nshita yonse ababombela ukwaba ukukabila mu Colombia mwine. Ba Gloria balisambilisha abantu abengi Baibolo ica kuti bali-ipeela no kubatishiwa. Batila bomfwa kwati balikwata inkongole kuli Yehova, kanshi inshila iyo bengabweseshamo fye ishi inkongole, kwafwa abantu bambi ukwishiba icine.

Nga fintu twaumfwa ku lyashi lya ba Gloria, na bafungwa bene kuti basambilila icine icilenga umuntu apusuka. Abeminishi ba musambo balilanshenye na balashi ba fifungo pa kuti basuminishe bamunyinefwe ukulashimikila no kulatungulula amasambililo ya Baibolo mu fifungo. Ne ci calenga bamunyinefwe 43 na bankashi 6 babasuminishe ukulashimikila mu fifungo 13.

Ku kupwa kwa ba 1900, mu Dominican Republic mwali bakasabankanya ba mbila nsuma 21,684 mu filonganino 342 kabili baletungulula amasambililo ya Baibolo 34,380. Abasangilwe ku Cibukisho ca mfwa ya kwa Yesu baali 72,679. Pa mulandu wa uku kulunduluka, abantu ba kwa Yehova balicincila kabili balakonka amashiwi ya kwa Esaya ayatila: “Kushako incende ye tenti lyobe. Kabili leka batambulule amatenti ya ng’anda yabo iya lulumbi. Wibika apa kupelela. Lefya intambo she tenti lyobe.”—Esaya 54:2.

Ubwafya bumo bwali bwa kusanga Icikuulwa ca Kulonganinamo Ukulongana Kukalamba umo bakasabankanya  abalefulilako fye cila bushiku bengalalonganina. Mu 1996 Icikuulwa ca Kulonganinamo Ukulongana Kukalamba icapalamine ne iofeshi lya musambo mu Santo Domingo calipwile, kabili abali mu musumba ukalamba ne ncende ishali mupepi e mo balelonganina. Na lyo line, Icikuulwa ca Kulonganinamo Ukulongana Kukalamba icali mu Villa González umo abashala balelonganina, calefwaikwa ukuciwamya mu kampampa nelyo fye ukucibongolola no kukuulapo cimbi.

Mu 2001, Ibumba Litungulula lyalisuminishe ukuti bakuule Icikuulwa ca Kulonganinamo Ukulongana Kukalamba umo abantu 2,500 bengalonganina pa ncende iyali mu Villa González. Aba bwananyina balitemenwe nga nshi ilyo baumfwile ukuti bali no kukuula icikuulwa umukalabela Isukulu lya Kukansha Ilya Butumikishi (Pali lelo balita abati Isukulu lya Bakabila ba Mbila Nsuma iya Bufumu). Na kabili, ici icikuulwa cali no kupalamana ne Cikuulwa ca  Kulonganinamo Ukulongana Kukalamba kabili cali no kukwata ikalasi, umwa kulaala, laibrare, kicini, no muputule wa kuliilamo. Mu 2004, ba Theodore Jaracz abali mwi Bumba Litungulula e balandile ilyashi lya kupeela ifi ifikuulwa. Ukutula ulya mwaka, abasambi mu makalasi yonse pamo 15 balipwisha amasambililo ya muli ili isukulu.