Mu 1935, nalimo e lyo ba Pablo González abaleikala mu Cibao Valley batendeke ukubelenga Baibolo. Balipepeleko panono kwi bumba lya baProtestanti, lelo balilekele ilyo basangile ukuti imibele ya baProtestanti yalipusene ne fyo balebelenga mu Malembo. Na lyo line, balitwalilile ukusambilila Icebo ca kwa Lesa kabili batampile no kwebako bambi ifyo balesambilila, babalilepo ukwebako balupwa wabo na bena mupalamano, lyena na bantu bambi mu mushi umo baleikala. Balishitishe farmu yabo ne ng’ombe pa kuti bakwate indalama sha kubomfya pa nyendo shabo isha kushimikila.

Ilyo calefika mu 1942, ninshi ba Pablo balatandalila indupwa ukucila pali 200 ishali mupepi kabili baletungulula no kulongana nangu ca kuti tabatalile abamonanapo na ba Nte. Balekoselesha abantu ukulasambilila Baibolo no kulakonka ifyalembwamo. Abengi balyumfwile ifyo babebele kabili balilekele no kupeepa fwaka, kabili balilekele na ukuupa impali.

Pa bakonkele ifyo ba Pablo balesambilisha pali na ba Celeste Rosario. Ba Rosario batile: “Ilyo nali ne myaka 17, ninshi bayama ba Negro Jiménez, balitampa kale ukulongana  ne bumba limo ilyaletungululwa na ba Pablo González. Balitutandalile no kutubelengela amalembo muli Baibolo, kabili ifyo batubelengele fyalimfikile pa mutima ica kuti nalisalilepo ukuleka ukupepa ku Katolika. Ku calici baletubelengela mu ciLatin ico tushaleumfwa no kumfwa. Papitile fye nshiku ishinono, ba Pablo González balitutandalile no kutukoselesha. Batwebele abati: ‘Tatwaba mu cilonganino ca mapepo nangu cimo ico twaishiba, lelo twalikwata aba bwananyina mu calo conse. Tatwabeshiba bwino ne fyo babeta, lelo bushiku bumo tukabeshiba.’”

Ba Pablo balipangile amabumba ya basambi ba Baibolo mu Los Cacaos, mu Salcedo, mu Monte Adentro, mu Salcedo, e lyo na mu Villa Tenares. Bushiku bumo mu 1948, ilyo ba Pablo baikile mu Santiago pa kuti banine basi imbi, bamwene ba Nte bamo baleshimikila mu musebo, kabili balipokeleko magazini ya Ulupungu lwa kwa Kalinda. Ilyo bali pa bulendo na bumbi, nkashi umo alipeele ba Pablo ifitabo fibili kabili alibetile ukuyasangwa ku Cibukisho ca mfwa ya kwa Kristu mu Santiago. Ilyo basangilwe ku Cibukisho, balitemenwe sana ifyo baumfwile kabili e calengele basondolwele ukuti balisangile icine no kuti  bonse abali ku kulongana, e bo bena ne bumba lyabo balefwaya sana.

Bamishonari balitandalile ba Pablo na bonse abo balesambilila nabo Baibolo. Pa ncende imo apo ba Pablo balelonganina, basangile abantu 27 abakalamba balebalolela. Bamo pali balya bantu baendele amakilomita 25 na makasa; bambi baendele amakilomita 50 pali bakabalwe. Pa ncende imbi abantu 78 e baile mu kulongana, kabili pali imbi napo bali 69.

Ba Pablo bapeele bamishonari amashina ya bantu 150 abalefwaya ukusambilila Baibolo. Aba bantu abafuuka kabili abatemenwe ifya kwa Lesa balitendeke kale ukusambilila Baibolo kabili balekonka na mashiwi yalembwamo. Icalefwaikwa fye kuli bena, butungulushi no kuteyanishiwa bwino. Ba Celeste batile, “Bamishonari balitutandalile kabili twalikwete no kulongana. Baliteyenye no kuti kube ukubatishiwa. Nine nabalilepo ukubatishiwa mu lupwa lwesu. Lyena bamayo ba Fidelia Jiménez, na nkashi yandi Carmen, nabo balibatishiwe.”

Ukulongana kwa muputule ukwa kubalilapo mu Dominican Republic, ukwaliko mu Santiago ukufuma pa 23 September ukufika pa 25 September, mu 1949 kwalengele ukuti umulimo wa kushimikila uleya pa ntanshi. Abengi abalefwaya ukwishiba ifyalecitika balishile, ica kuti abantu 260 balisangilweko ku lyashi lya ku cintubwingi pa Mulungu kabili 28 e babatishiwe. Uku ukulongana kwa nshiku shitatu kwalengele abengi bashininkishe ukuti ici e cilonganino ico Lesa alebomfya pa kuti afikilishe ukufwaya kwakwe.