ILYO nali umulumendo, amalyashi ya kale pa mipepele umwali ulupato yalenenga ndeumfwa sana ububi. Na kabili, nalipelenganishiwe ico Lesa ashapwishishe ubupiina no lufyengo no mulandu abantu abengi abaya ku macalici bashikonkela ifyo Baibolo ilanda. E ico, nalilekele ukusumina ukuti Lesa e ko aba, nasumine fye ukuti ukwalula imitekele e kukawamya ifintu mu calo.

Mu 1962 natampile ukubelenga magazini ya Awake! (Loleni!) Lyena mu 1963 natendeke ukusambilila Baibolo ne Nte sha kwa Yehova. Ifyo nasambilile fyalimfikile sana pa mutima. Naishileiluka ukuti kwaliba umulandu uusuma uo Lesa abumbile abantunse no kuti Lesa te walenga ukuti kube ifyabipa ifyo aba mu macalici bacita. Pa numa ya kusambilila Baibolo pa myeshi ibili, natendeke ukulaebako  abantu ukuti Ubufumu bwa kwa Lesa bukafumyapo imitekele yabipa iya muli cino calo. Mu 1964, nalibatishiwe kabili mu 1966 nasontelwe ukuba painiya waibela. Nalishininkisha ukuti icine e calenga naba no bumi, pantu abashilika bacaice abengi abo naleyangala nabo balifwa bubi bubi, bamo balibakaka, bambi balifulumuka mu calo. Ndatasha Yehova pa kungafwa ukusumina ukuti e ko aba nangu ca kuti kale nalekana pantu nomba ndi mubomfi wakwe uwasumina ukuti kukaba icalo cipya umukaba ubulungami.