Ba Juana Ventura batampile ukusambilila Baibolo ninshi balibinda umulimo wa kushimikila mu calo kabili babatishiwe mu 1960 mu mumana wa Ozama. Pa nshita imo, shimapepo umo mu Santo Domingo alefwaya ukubakakisha pantu alemona kwati “balemusendela abantu aba mwi calici lyakwe.” Pa kuti ashinine ba Juana ukuti ba Nte ba bufi, shimapepo alibetile ku kuyamonekela ku ba mwi calici lyakwe uko babepwishe amepusho pa fisumino fyabo ifipya.

Ba Juana batile, “Anjipwishe amepusho yatatu: ‘Mulandu nshi mushisalilako intungulushi? Cinshi mushilwilako inkondo? Cinshi muyitila amuti muli Inte sha kwa Yehova?’ Ilyo naleyasuka ifi fipusho ukubomfya Baibolo, aba mu calici bonse balekonkamo ukubelenga kabili ifyo babelengele fyalibapapwishe. Abengi balilwike ukuti balisangile icine. Bonse mu calici balitendeke ukusambilila Baibolo kabili mu kuya kwa nshita, 25 pali aba basukile baipeela no kubatishiwa.”  Ici icacitike calengele umulimo ulunduluke bwangu mu Santo Domingo.

Ilyo Trujillo afwile, ifintu ifingi mu mitekele fyalicililemo ukubipa. Lipoti yali muli 1963 Yearbook yatile: ‘Abashilika baleba mu misebo kabili kwaleba ifimfulunganya cila bushiku.’ Nangu ca kuti kwali ifimfulunganya mu mitekele, umulimo wa kushimikila no kupanga abasambi wena walelunduluka kabili ilyo umwaka wa mulimo uwa 1963 walepwa, icipendo ca pa muulu ica bakasabankanya cafikile kuli 1,155.

Lintu ba Nathan Knorr abafumine ku maofeshi yakalamba aya Nte sha kwa Yehova baile ku Dominican Republic mu 1962, balipekenye ukushita impanga apa kukuulila ifikuulwa ifikalamba pa kuti umulimo wa kushimikila uwalekulilako ulebombwa bwino. Icikuulwa ca ntunti shibili ne Ng’anda ya Bufumu fyalikuulilwe pa mpanga iipya. Pa Cibelushi, pa 12 October 1963, ba Frederick Franz abafumine ku maofeshi yakalamba aya Nte sha kwa Yehova e balandile ilyashi lya kupeela ifikuulwa fya pa musambo. Kanshi calimoneke fye apabuuta tuutu ukuti ba Nte baali no kutwalilila ukushimikila mu Dominican Republic. Ilyo papitile fye inshita iinono, ba Harry na ba Paquita Duffield balifikile mu Dominican Republic. Aba e bamishonari abo balekelesheko ukutamfya ukufuma mu Cuba.

Pa 24 April, 1965, kwali ukwaluka ukukalamba mu mitekele. Ilyo mu calo mwali amafya, abantu ba kwa Yehova bena balitwalilile ukulunduluka. Ilyo calefika mu 1970, kwali bakasabankanya 3,378 mu filonganino 63. Abantu abaishile mu cilonganino mu myaka 5 iyapitilepo, balicilile pali hafu. Lipoti iyali mu 1972 Yearbook yatile: “Abantu  abalebomba incito ishalekanalekana balishile mu cilonganino ca kwa Yehova. Pali aba pali ba makanika, abalimi, banamutekenya ba myotoka sha cintubwingi, ba akauntanti, bakakuula, bakabasa, ba loya, badokota ba meno, na baali kale mu fikansa fya calo.”