Impendwa 20:1-29
20 Mu mweshi wa kubalilapo, ulukuta lonse ulwa bena Israele lwafikile mu matololo ya Sini, kabili abantu batendeke ukwikala mu Kadeshe.+ Mu Kadeshe mwine e mo Miriamu+ afwilile kabili e mo bamushiikile.
2 Nomba ulukuta talwakwete amenshi,+ kabili lwalonganiine Mose na Aarone.
3 E lyo abantu balaumanya Mose+ abati: “Kanshi nga twafwilile fye pamo na bamunyinefwe pa cinso ca kwa Yehova!
4 Cinshi muleteele ulukuta lwa kwa Yehova muli aya matololo? Bushe mulefwaya e mo tufwile pamo ne fitekwa fyesu?+
5 Kabili cinshi mwatufumiishe mu Egupti no kutuleta muli cino cifulo icabipa ifi?+ Te kuti tubyale imbuto, kabili tamwaba imikunyu, imyangashi nangu mipomegranate, kabili tamuli na menshi ya kunwa.”+
6 Lyena Mose na Aarone bafumine pa lukuta baya ku mwinshi we tenti lya kukumaninamo na Lesa. Bawile ubukupeme kabili batampile ukumona ubukata bwa kwa Yehova.+
7 Lyena Yehova aebele Mose ati:
8 “Buula inkonto kabili iwe na Aarone munonko mulonganye ulukuta, e lyo mwebe icilibwe icili pa ntanshi yabo ukuti cifumye amenshi ya ciko, kabili mwalabafumisha amenshi ya kunwa mu cilibwe kabili mupeele ulukuta ne fitekwa fyabo.”+
9 E ico Mose abuulile inkonto pa cinso ca kwa Yehova,+ nga filya fine amwebele.
10 Lyena Mose na Aarone balongenye ulukuta pa ntanshi ya cilibwe, kabili Mose aebele ulukuta ati: “Nomba umfweni mwe bacipondoka mwe! Bushe tumufumishe amenshi muli ci cilibwe?”+
11 Ilyo line Mose aimishe ukuboko kwakwe no kuuma inkonto yakwe pa cilibwe imiku ibili, kabili amenshi ayengi yatampile ukufuma, kabili ulukuta lwatendeke ukunwa pamo ne fitekwa fyabo.+
12 Pa numa, Yehova aebele Mose na Aarone ati: “Apo tamwacintetekela kabili tamwacincindika pa menso ya bena Israele, tamwakengishe ulu lukuta mu calo ico nkabapeela.”+
13 Aya e menshi ya pa Meriba,*+ apo abena Israele bailishenye pali Yehova, kabili e po abalangile ukuti wa mushilo.
14 Lyena Mose atumine inkombe ukufuma mu Kadeshe ukuya ku mfumu ya Edomu+ kabili shaile-eba imfumu ashiti: “Munyinenwe Israele+ atila, ‘Mwalishiba bwino amacushi yonse ayo twapitamo.
15 Bashifwe baile ku Egupti,+ kabili twaikele mu Egupti imyaka iingi,*+ kabili abena Egupti baletucusha pamo na bashifwe.+
16 Twasukile twalilila kuli Yehova+ kabili alitumfwile. Lyena atumine malaika+ uwatufumishe mu Egupti, kabili nomba natufika mu Kadeshe, umusumba uwaba mupepi no mupaka wa calo cenu.
17 Shi lekeni tupiteko mu calo cenu. Tatwakapite mu mabala yenu nangu ni mu mabala ya myangashi, kabili tatwakanwe amenshi ya mu fishima. Tukapita mu Musebo wa Mfumu, kabili tatwakapaasukile ku kwa kulyo nangu ku kwa kuso, mpaka tukafume mu calo cenu.’”+
18 Lelo Edomu atile: “Mwikesha ukupita mu calo cesu, pantu nga mwaisa mu kupita, tukamwimina no lupanga.”
19 Abena Israele nabo bamwebele abati: “Tukapita mu nshila iikalamba, kabili ifwe ne fitekwa fyesu nga tukanwa amenshi yenu, ninshi tukamulipila.+ Ico tulefwaya fye kupitamo na makasa.”+
20 Na lyo line atile: “Mwikapitamo.”+ Ilyo line imfumu ya Edomu yalimine na bantu abengi na bashilika* ba maka ku kuyabalwisha.
21 E fyo imfumu ya bena Edomu yaleseshe abena Israele ukupita mu calo ca iko. E ico abena Israele balyalulwike, balola na kumbi.+
22 Ulukuta lonse ulwa bena Israele lwafumine mu Kadeshe lwaya ku Lupili lwa Hore.+
23 Lyena Yehova aebele Mose na Aarone pa Lupili lwa Hore mupepi no mupaka wa calo ca Edomu ati:
24 “Aarone alefwa nge fyafwa ifikolwe fyakwe.*+ Takengile mu calo ico nkapeela abena Israele, pantu imwe bonse babili tamwakonkele ifyo namwebele ukucita pa kupeela abena Israele amenshi pa Meriba.+
25 Senda Aarone na Eleasari umwana wakwe umwaume, uleya nabo pa lupili lwa Hore.
26 Uye ufuule Aarone ifya kufwala fya bushimapepo,+ kabili uye ufwike Eleasari+ umwana wakwe umwaume, kabili Aarone aleyafwila palya pene.”*
27 E ico Mose acitile filya fine Yehova amwebele, kabili baninine Ulupili lwa Hore ninshi no lukuta lonse lulebamona.
28 Lyena Mose afuulile Aarone ifya kufwala fya bushimapepo, afwika na Eleasari umwana wakwe. Kabili Aarone afwilile palya pene pa muulu wa lupili.+ Pa numa, Mose na Eleasari batentemwike ulupili.
29 Ilyo ulukuta lonse lwamwene ukuti Aarone nafwa, aba mu ng’anda ya kwa Israele bonse balooseshe Aarone pa nshiku 30.+
Amafutunoti
^ Ilyalola mu kuti “Ukuumana.”
^ Mu ciHebere, “inshiku ishingi.”
^ Mu ciHebere, “ukuboko kwa.”
^ Mu ciHebere, “alonganikwe ku bantu bakwe.”
^ Mu ciHebere, “aleyalonganikwa ku bantu bakwe.”
