Esaya 8:1-22
8 Yehova anjebele ati: “Buula ilibwe ilyapaapaatala+ ilikalamba kabili ulembepo ati, ‘Maheri-shalali-hashibashi,’* ubomfye akakulembelako akaseeka.*
2 Ndefwaya bakambone ba cishinka aba kulemba* ukuti nabamonako ifyo ulembele. Aba bakambone ni Uria+ shimapepo na Sekaria umwana wa kwa Yeberekia.”
3 Lyena naleele* na kasesema umwanakashi* kabili alimite. Mu kupita kwa nshita afyele umwana umwaume.+ Lyena Yehova anjebele ati: “Mwinike ati Maheri-shalali-hashibashi,
4 pantu ilyo uyu mwana ashilaishiba ukulanda ati, ‘Tata!’ na ‘Mayo!’ abantu bakasenda ifyuma fya mu Damaseke ne fyo bakapokolola mu Samaria, kabili bakafitwala pa ntanshi ya mfumu ya bena Asiria.”+
5 Yehova alandile na ine na kabili, atile:
6 “Apo aba bantu nabakaana amenshi ya mu Shiloa*+ ayapita panono panonoKabili balitemwa Resini no mwana wa kwa Remalia,+
7 E ico mona! Yehova akaleta pali benaAmenshi aya maka kabili ayengi aya mu Mumana,*Imfumu ya bena Asiria+ no bucindami bwa iko bonse.
Ikeshila pa milonga ya iko yonseKabili ikapoosa mu lulamba lwa iko lonse
8 No kupita mu calo conse ica Yuda.
Akaba nge lyeshi ilikapita mu calo, likafika mu mukoshi;+Kabili amapindo yakwe ayafungululwa yakakumana mu bwipi bwa calo cobe,We Imanuele!”*+
9 Baceneni, lelo bakamutobaula.
Umfweni bonse mwe ba mu fitungu fya pe sonde ifyaba ukutali!
Ipekanyeni ukulwa inkondo,* lelo bakamutobaula!+
Ipekanyeni ukulwa inkondo, lelo bakamutobaula!
10 Pangeni ipange, lelo bakalifulunganya!
Landeni ifyo mulefwaya ukulanda, lelo tafyakacitike,Pantu Lesa aba na ifwe!*+
11 Ifi e fyo Yehova anjebele ninshi ukuboko kwakwe ukwa maka kuli pali ine, pa kuti alenge ndeke ukwenda mu nshila sha aba bantu, atile:
12 “Fyonse ifyo aba bantu baletila mapange ayabipa, mwitila mapange ayabipa!
Mwitiina ico batiina;Mwicitutuma.
13 Yehova wa mabumba e o mulemona ukuti wa mushilo,+E o muletiina,Kabili e ufwile ukulenga muletutuma.”+
14 Akaba icifulo ca mushilo,Lelo akaba ilibwe lya kuipununakoKabili cilibwe ca kuipununako+ no kuwaKu ba mu mayanda yonse yabili aya kwa Israele,Akaba ulukose kabili iciteyoKu bekala mu Yerusalemu.
15 Abengi pali bena bakaipununa no kuwa kabili bakaicena;Bakekatwa mu citeyo.
16 Funga ifyo bakambone balembele ifya kushininkishishako;Kakatika amafunde* kabili upeele abasambi bandi!
17 Nkalalolela Yehova+ uulefisa icinso cakwe ku ba mu ng’anda ya kwa Yakobo,+ kabili e o nkacetekela.
18 Moneni! Ine na bana abo Yehova ampeela+ tuli fishibilo+ kabili tuli fipesha amano, ifyo Yehova wa mabumba uwikala mu lupili lwa Sione acita mu Israele.
19 Nga bamweba abati: “Ipusheni ku bomfwana ne mipashi nelyo ku basobela ifya ku ntanshi, abalanda ifishumfwika kabili abatepelesha,” bushe abantu bonse tabafwile ukweba Lesa ukuti abafwe? Bushe aba mweo+ kuti baeba abafwa ukuti babafwe?
20 Lelo bafwile ukumona ifyo amafunde yalanda no bushininkisho ubo bakambone balembele!
Nga balelanda ifyapusana ne fyo Lesa alanda, ninshi tabakwata ulubuuto.*+
21 Kabili umuntu onse akapita mu calo ninshi alecula kabili ninshi ali ne nsala.+ Kabili pa mulandu wa kuti akaba ne nsala kabili akakalipa, akatiipa imfumu yakwe na Lesa wakwe ninshi alelolesha mu muulu.
22 Lyena akalolesha pa calo kabili akamonapo fye ubucushi ne mfifi, ukupelelwa ne nshita isha-afya, imfifi iyafitiisha kabili tapakabe ulubuuto.
Amafutunoti
^ Nalimo lipilibula ukuti “Angufyanya ukuyasenda ifintu fya bantu abo bacimfishe, ukwisa bwangu mu kusenda ifipe ifyo bapokele abo bacimfishe.”
^ Mu ciHebere, “akakulembelako aka muntunse.”
^ Nelyo “abakushinina; abakushininkisha.”
^ Mu ciHebere, “napaleme kuli.”
^ E kutila, umukashi wa kwa Esaya.
^ Shiloa wali mufoolo wa menshi.
^ E kutila, Umumana wa Yufrate.
^ Moneni Esaya 7:14.
^ Nelyo “Ikakeni ifyanso mu misana.”
^ Ishiwi lya ciHebere ilyo bapilibula ukuti “Lesa aba na ifwe” ni Imanuele. Moneni Esaya 7:14; 8:8.
^ Nelyo “ifya kukonka.”
^ Mu ciHebere, “amacaca.”
