Bushe mutontonkanya ukuti ifintu fikawama ku ntanshi? Abantu abengi balesha ukukanasakamikwa sana te mulandu na mafya bakwata pali lelo. Bushe cine cine kuti twaenekela ifintu ukuwama ku ntanshi? Ee! Baibolo ilatupeela isubilo line line ilya kuti ifintu fikawama ku ntanshi.

•  Lisubilo nshi Baibolo itupeela?

•  Bushe ifyo Baibolo yatulaya fyaliwamisha ica kuti te kuti ficitike?

•  Bushe ifyo Baibolo yatulaya fikafikilishiwa shani?

•  Ni lilali amalayo ya mu Baibolo yakafikilishiwa?

•  Bushe amalayo Baibolo yalandapo kuti yamwafwa shani pali ino nshita?

 Baibolo ilasumina ukuti abantunse balakwata amafya ayengi nga nshi. Na lyo line, yalitulaya ukuti aya amafya tayakatwalilile umuyayaya. Moneni fimo ifyo Baibolo ilanda.

•   Ubwafya: Ukukanakwata ing’anda

   Ifyo Baibolo ilanda: “Bakakuula amayanda no kwikalamo.”—Esaya 65:21.

   Ifyo cikaba ku ntanshi: Abantu bakakwata amayanda yabo.

•   Ubwafya: Ukubulwa incito no bupiina

   Ifyo Baibolo ilanda: “Umulimo wa minwe yabo abasalwa bandi bakasekelamo nga nshi.”—Esaya 65:22.

   Ifyo cikaba ku ntanshi: Abantu bonse bakalatemwa ukubomba imilimo, kabili bakalasekelamo mu kubombesha kwabo konse.

•   Ubwafya: Ulufyengo

   Ifyo Baibolo ilanda: “Bacilolo na bo bakatekela ku mulinganya.”—Esaya 32:1.

   Ifyo cikaba ku ntanshi: Takwakabe ukufyenga abantu pa mulandu ne nkanda, ifyo bakwata, kabili takwakabe abapiina. Takwakabe uo bakalafyenga.

•   Ubwafya: Ubulwele Ubwisako ne Nsala ne Fipowe

   Ifyo Baibolo ilanda: “Ingano shikafula nga nshi pano isonde; pa muulu wa mpili shikafula icine cine.”—Amalumbo 72:16.

   Ifyo cikaba ku ntanshi: Abantu bonse bakalakwata ifya kulya ifingi ifisuma. Takwakabe uwa kulaala ne nsala nelyo ukulwala ubulwele bwa nsala.

•   Ubwafya: Ukusansa kwa tupondo no bunkalwe

   Ifyo Baibolo ilanda: “Bakekala umuntu onse mwi samba lya mwangashi wakwe, na mwi samba lya mukunyu wakwe, tapakabe no wa kubatiinya.”—Mika 4:4.

   Ifyo cikaba ku ntanshi: Abantu bonse bakaba abacingililwa pantu umubifi takabepo, “abalungama e bakekala mu calo.”—Amalumbo 37:10, 29.

•   Ubwafya: Inkondo

   Ifyo Baibolo ilanda: “Uluko talwakemishe uluko lunankwe ulupanga, nangu ukusambilila inkondo na kabili.”—Esaya 2:4.

   Ifyo cikaba ku ntanshi: Mwi sonde lyonse mukaba umutende. (Amalumbo 72:7) Takwakabe nangu umo uukalaloosha lupwa lwakwe nelyo cibusa wakwe pa mulandu wa kufwa ku nkondo nelyo ukuba imbutushi pa mulandu ne nkondo.

•   Ubwafya: Ukulwala e lyo na malwele

   Ifyo Baibolo ilanda “Takuli umwikashi uukatila: “Nindwala.”—Esaya 33:24.

   Ifyo cikaba ku ntanshi: Takwakabe abantu abakalemana nelyo ukulwala. (Esaya 35:5, 6) Baibolo yalilaya no kuti “ne mfwa tayakabeko na kabili.”—Ukusokolola 21:4.

•   Ubwafya: Ukonaula isonde

   Ifyo Baibolo ilanda: “Amatololo ne mpanga yauma fikasekelela, kabili iciswebebe cikasansamuka no kubalula nga maluba ya ntongola.”—Esaya 35:1.

   Ifyo cikaba ku ntanshi: Nga filya fine Lesa alefwaya pa kubala, isonde likaba paradaise umo abantu bakulaikala.—Ukutendeka 2:15; Esaya 45:18.

 Kwena, nalimo e fyo mwingamona. Na lyo line tulemukoselesha ukwishibilapo na fimbi pa fyo Baibolo ilanda ukuti e fikacitika ku ntanshi. Mulandu nshi? Amalayo yaba mu Baibolo yalipusanako na malayo ayo abantu balaya e lyo ne fyo balanda ukuti e fikacitika. Amalayo yaba mu Baibolo yafuma kuli Lesa. Moneni ubupusano bwabapo:

•   Tufwile ukucetekela Lesa. Baibolo itila Lesa ‘tabepa.’ (Tito 1:2) Na kabili, Lesa e wakwata fye amaka ya kwishiba ifikacitika ku ntanshi. (Esaya 46:10) Mu Baibolo mwaliba ifya kumwenako ifingi ifilangilila ukuti fyonse ifyo Yehova alanda filacitika. Pa kuti mwishibilepo na fimbi, tambeni vidio itila Bushe Kuti Twashininkisha Shani Ukuti Ifyo Baibolo Ilanda fya Cine?

•   Lesa alikwata amaka ya kupwisha amafya tukwata. Baibolo itila Lesa alikwata amaka ya kucita “fyonse ifyo afwaya ukucita.” (Amalumbo 135:5, 6) Kanshi kuti twatila tapali icingalesha Lesa ukufikilisha ifyo alaya. Cimbi ca kuti, Lesa alafwaya ukutwafwa pantu alitutemwa.—Yohane 3:16.

 Nalimo kuti mwalatontonkanya ukuti, Lesa ‘nga alafwaya ukutwafwa kabili alikwata amaka ya kutwafwa, cinshi tukwatila amafya ayengi nga nshi?’ Pa kuti musange icasuko, tambeni vidio itila Mulandu Nshi Lesa Asuminishisha Ukucula?

 Lesa akabomfya Ubufumu bwakwe, ubuteko bwa ku muulu pa kufikilisha ifyo alaya. Alisala Yesu Kristu ukuba Kateka wa ubu Ubufumu, kabili alimupeela amaka ya kusakamana icalo na bantu abakekala mu calo. Ilyo Yesu ali pano isonde, aliposeshe abalwele, aliliishishe abali ne nsala, alikwete amaka pa miceele, kabili alibuushishe na Lasaro. (Marko 4:39; 6:41-44; Luka 4:40; Yohane 11:43, 44) Kanshi alangilile ifyo akacita nge Mfumu ya Bufumu bwa kwa Lesa.

 Tambeni vidio itila Bushe Ubufumu bwa kwa Lesa ni Cinshi? Pa kuti musambilile na fimbi ifyo Ubufumu bwa kwa Lesa bukatucitila.

 Ni nomba line fye! Mulandu nshi twalandila ifyo? Baibolo yalilandile pa fintu fimo ukuti fya kulacitika ku kulangilila ukuti Ubufumu bwa kwa Lesa buli mu kutendeka ukuteka pano isonde. (Luka 21:10, 11) Ifilecitika muno nshiku filelangilila ifyo Baibolo yasobele.

 Pa kuti mwishibilepo na fimbi, belengeni icipande citila “Ni Lilali Ubufumu bwa kwa Lesa Bukatendeka Ukuteka Isonde?”

 Uwalembeleko Baibolo umo alingenye isubilo Baibolo itupeela ku “nanga ya mweo.” (AbaHebere 6:19) Nga filya fine inanga ilenga ubwato ukukanasendwa ku mabimbi, isubilo Baibolo itupeela pa fyo ifintu fikaba ku ntanshi, kuti lyatwafwa ukulashipikisha amafya. Isubilo kuti lyalenga tulecingilila amatontonkanyo yesu ne fyo tumfwa, kabili no kukanacita ifingatuletelela.—1 Abena Tesalonika 5:8.