MULELOLA!

Ifyo Imipepele Iletungilila Inkondo mu Ukraine—Finshi Baibolo Yalandapo?

TINIKENI

Moneni ifyo bashimapepo abalumbuka balelanda pa nkondo iili ku Ukraine:

“Patriarch Kirill umukalamba we calici lya Orthodox mu Russia, talandilepo ifili fyonse ifilelanga ukuti tatemenwe ifi icalo ca Russia cisanshile icalo ca Ukraine. . . . Icalici lyakwe lyalitwalilila ukulanda amalyashi ya bufi pa calo ca Ukraine kabili aya yene amalyashi e yo Putin alebomfya pa kulanda ico asanshiile icalo ca Ukraine.”—EUobserver, March 7, 2022.
“Patriarch Kirill . . . aleti cili fye bwino ifi icalo ca Russia cisanshile icalo ca Ukraine pantu e nshila imo iyo tulelwishishamo ulubembu.”—AP News, March 8, 2022.
“Metropolitan Epiphanius I uwa mu Kyiv, umukalamba wa calici lya Orthodox mu Ukraine, pali Cimo alipaala abantu bakwe ‘ukuyalwisha abena Russia ababasanshile’ . . . Alandile no kuti ukwipaya umushilika umwina Russia te lubembu.”—Jerusalem Post, March 16, 2022.
“Ifwe [e kutila Ukrainian Council of Churches and Religious Organizations (UCCRO)] tuletungilila abashilika abena Ukraine na bantu bonse abaletwafwa ukucingilila icalo cesu. Tulebapepelako ukuti bacimfye abalwani besu.”—UCCRO a Statement, February 24, 2022.

Muletipo shani, bushe imipepele iitila ilakonka ifyo Yesu Kristu asambilisha ilingile ukukoselesha abantu babo ukulwa inkondo? Finshi Baibolo yalandapo?

Ifyo imipepele itungilila inkondo ukutula na kale

Ukutula na kale, imipepele ilingi line itila caliba fye bwino ukulwa inkondo, kabili tulingile fye ukulwa inkondo. Lelo pa nshita imo ine ninshi ileti ilefwaya kube umutende. Pa myaka iingi, Inte sha kwa Yehova balilenga abantu abengi bamona ukuti ifi imipepele icita bumbimunda. Moneni fimo ifyo impapulo shesu shalandapo.

Mu cipande citila “Ubupingushi bwa kwa Lesa Ukulwisha ‘Umuntu wa Bupulumushi’” mwaba ifyo icalici lya ba Katolika lyacitile ifyo lyatile ni Lesa na Yesu lilebombela lelo ifyalengele abantu abengi ukufwa.
Mu cipande citila “Akayofi ka mu Rwanda Nani—Ashingamwa?” mwaba ifilanga ifyo imipepele ishaleseshe imitundu ukulwa nangu fye ni nkondo ya bana calo.
Mu cipande citila “Ni Shani Fintu Lesa Amona Ukupepa kwa mu Kristendomu?”, “Bushe Lesa Alasuminisha Imipepele Yonse?”, e lyo ne citila “Ifyo Imipepele Yapuswike” balilondolola ifyo bashimapepo ba mwi icalici lya ba Katolika, ilya ba Orthodox, ne lya ba Protestanti batungilila abalelwa inkondo.

Bushe imipepele ya Bena Kritsu ifwile ukutungilila inkondo?

Ifyo Yesu asambilishe: “Uletemwa umunobe nge fyo waitemwa we mwine.” (Mateo 22:39) “Muletemwa abalwani benu.”—Mateo 5:44-47.

Tontonkanyeni pali ici: Bushe imipepele kuti yatila ilakonka amafunde ya kwa Yesu ayalanda pa kutemwa, uku ninshi ilekoselesha abapepamo ukuya mu kwipaya abanabo mu nkondo? Nga mulefwaya ukwishiba icasuko, belengeni icipande citila, “Ukutemwa kwa Cine Ukwa Bena Kristu Takupwa” ne citila “Bushe Kwaliba Uwingatemwa Umulwani Wakwe?”

Ifyo Yesu alandile: “Ubufumu bwandi te bwa pano calo. Ubufumu bwandi abuba bwa pano calo, ababomfi bandi nga balwa ukuti nipeelwa ku baYuda.” (Yohane 18:36) “Bonse ababomfya ulupanga bakafwa ku lupanga.”—Mateo 26:47-52.

Tontonkanyeni pali ici: Nga ca kuti Abena Kristu tabalwile pa kuti fye bacingilile Yesu, bushe kuli umulandu umbi uwingalenga balwako inkondo? Belengeni icipande citila, “Bushe Abena Kristu Balingile Ukulwa Inkondo?” pa kuti mumone ifyo Abena Kristu abaliko mu nshita ya batumwa bakonkele ifyo Yesu alecita ne fyo abasambilishe.

Cinshi cili no kucitika ku mipepele iitungilila inkondo?

Baibolo isambilisha ukuti Lesa tafwaya imipepele itila ya Bena Kristu lelo iishikonka ifyo Yesu alesambilisha.—Mateo 7:21-23; Tito 1:16.

Ibuuku lya Ukusokolola litila imipepele ya musango uyu, e yaipaya “bantu bonse abaipaiwe pe sonde.” (Ukusokolola 18:21, 24) Nga ca kuti mulefwaya ukwishiba umulandu Baibolo ilandila ifi, belengeni icipande citila, “Bushe Babiloni Mukalamba ni Cinshi?”
Yesu atile imipepele yonse iyo Lesa akaana bakayonaula pa mulandu wa fyabipa ifyo icita, nga filya fine ciba ku muti uubi. Umuti uubi uutwala ifisabo ifibi, “balautema no ku-upoosa mu mulilo.” (Mateo 7:15-20) Nga mulefwaya ukwishiba ifyo ifi fili no kucitika, belengeni icipande citila “Impela ya Kupepa Kwa Bufi Naipalama!”

Inte sha kwa Yehova Balipusanako

Inte sha kwa Yehova mu Russia na mu Ukraine, balakonka ifyo Yesu abebele ukuti tabalingile ukuitumpa mu fikansa fya calo nelyo ukulwako inkondo, nga filya fine Inte sha kwa Yehova mwi sonde lyonse bacita. Uyu e mulandu tushiletungilila nelyo ukulwako iyi nkondo. Ifi fine e fyo tucita na ku nkondo ishiba mu ncende ishalekanalekana. Pa mulandu wa kuti tulafwaya ukucita ifyo Baibolo ilanda, ba Nte bamo balabacusha. (Yohane 15:19, 20; 2 Timote 3:12) Ku ca kumwenako, ubuteko bwa Russia bwalipoosa Inte sha kwa Yehova abengi mu cifungo kabili bamo balabacusha. Balitupoka ne fifulo twalepepelapo. Nga mulefwaya ukumfwilapo na fimbi, kabiyeni pa www.jw-russia.org.

Nga mulefwaya ukumona ifyo Inte sha kwa Yehova mu Russia balebacusha pa mulandu wa fyo basuminamo, tambeni vidio ya mamineti 4 iitila, Inte sha kwa Yehova mu Irkutsk Balitwalilila Ukuba ne Cishinka Nangu ca Kuti Balabengilila mu Mayanda.
Ukufuma fye na kale Inte sha kwa Yehova tabaitumpa mu fikansa fya calo. Nga mulefwaya ukumona ifyo bashaitumpiile mu fikansa fya calo nangu ca kuti balebacusha sana ku buteko bwa baNazi mu Germany e lyo na mu fyalo baleita ukuti Soviet Union, tambeni vidio itila, Balishipikishe Ilyo Balebakaanya.

Kabiyeni pa webusaiti yesu pa kuti mwishibilepo ifingi pa fyo twasuminamo, ukubikako fye ne fyo Baibolo yatulaya ukuti ku ntanshi takwakabe inkondo. (Esaya 2:4; Yeremia 29:11) Nga mulefwaya ukwishibilapo na fimbi kuti mwatutumina.

Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images

a Mu kabunbwe ka UCCRO, nelyo Ukrainian Council of Churches and Religious Organizations, mwaba ifilonganino fya mapepo 15 apaba ba Orthodox, ba Katolika abo beta ukuti Greek na Roman Catholic, ba Protestanti, ba Evangelical, e lyo na baYuda na baShilamu.