Pa myaka iingi, abasambilila pa nama balimona ukuti ama barnacle yalalambatila sana ku mabwe, ku malalo babomfya pa kunina mu fimato ifikalamba, e lyo na ku fimato ifikalamba. Glu ya ma barnacle ilekata sana ukucila glu iili yonse iyo abantu bapanga. Ni nomba line fye basayantisti baishibe icilenga ama barnacle yaleikata ku fintu ifyabomba.

 Tontonkanyeni pali ici: Abafwailisha pa fintu basanga ukuti utu ma barnacle nga twakulako ica kuti twatendeka no kusamba tulafwaya apo twingalambata apasuma. Nga twasanga apo twingalambata, tulafumya ifintu fibili mu mubili. Tubalilapo ukufumya fimo ifyapala amenshi ifilenga amenshi yafuma apo tulefwaya ukulambatila. Lyena tulafumya fimo ifyapangwa na ama protain beta ukuti phosphoproteins, ifiya mu kufikila pali filya tubalilapo ukufumya ifyapala amenshi.

 Ifi fibili ifyo ama barnacle yafumya filapanga glu iikata sana ica kuti takuli akashiishi akengayonaula. Caliba bwino ifi glu ya ma barnacle ikata sana pantu ama barnacle nga yalambatila ku cintu, yalatwalilila ukulambatila kuli ico cine cintu mpaka yafwa.

 Kwaliba ifingi ificitika pa kuti ama barnacle yapange glu, ifyo basayantisti bashaishibe nangu fye panono. Umo uwali mwi bumba lya balefwailisha pa fyo ama barnacle yapanga glu atile, glu ya ma barnacle “yapangwa mu nshila ya kupapusha pantu ilalambatila na ku cintu icibombele.” Ifyo basangile kuti fya-afwa abafwailisha pa fintu ukupanga glu iingekata ku fintu ifili mu menshi, nelyo ukupanga glu ukubomfya ifimenwa ifyo abantu babomfya ukukambatikilako ifintu, iyo bengabomfya ku kubikilako fimo mu mubili wa muntu pa kuti bamundape, nelyo iyo bengabomfya kukulambatikilako fimo ilyo balepanga ifyakupangapanga.

 Muletipo shani? Bushe glu ya ma barnacle yaishilebako fye iine, nelyo kwali uwaipangile?