Baibolo ilalondolola ifyo mufwile ukucita pa kuti mwishibe amashiwi yabamo. Te mulandu ne nkulilo yenu, amashiwi ya kwa Lesa ayaba mu Baibolo ‘tayakosa sana kuli imwe ukuyakonka, kabili tayaba ukutali.’​—Amalango 30:11.

Ifyo mufwile ukucita pa kuti mwishibe Baibolo

1.   Beni no mutima uusuma. Mulingile ukulamona Baibolo ukuti Cebo ca kwa Lesa. Muleicefya pantu Lesa acincintila aba matutumuko. (1 Tesalonika 2:13; Yakobo 4:6) Lelo tamulingile ukusumina fye ukwabula ukwishiba icishinka, Lesa afwaya mulebomfya “amaka yenu aya kupelulula.”​—Abena Roma 12:​1, 2.

2.   Mulelomba amano. Baibolo pa Amapinda 3:5 itila, “Wishintilila pa mano yobe we mwine.” Lelo, ‘mwikaleka ukulomba’ amano kuli Lesa pa kuti mukeshibe Baibolo.​—Yakobo 1:5.

3.   Mulesambilila lyonse. Mukalanonkelamo sana nga mulesambilila Baibolo lyonse ukucila ukulashintaukila.​—Yoshua 1:8.

4.   Mulesambilila pa lyashi limo na limo. Inshila iisuma iya kusambililamo Baibolo, kulasambilila pa lyashi limo na limo pa kuti mwishibe ifyo Baibolo yalandapo. Kuti mwabalilapo na “masambililo ya kutendekelako” e lyo mwakonkeshapo amasambililo ‘aya bakalamba.’ (AbaHebere 6:​1, 2.) Mukalalinganya amalembo kabili mukamona ukuti amalembo ayaba mu Baibolo yalalondolola amalembo yambi, ukubikako fye na yalya amalembo ‘aya-afya ukwiluka.’​—2 Petro 3:16.

5.   Ebeni bambi ukumwafwako. Baibolo ilatukoselesha ukwipusha bambi abaishiba Baibolo ukutwafwako ukwishiba Baibolo. (Imilimo 8:​30, 31) Inte sha kwa Yehova balasambilisha abantu Baibolo apa fye. Pa kusambilisha, bakonka ifyo Abena Kristu ba kubalilapo balecita, babomfya Amalembo pa kwafwa abantu ukwishiba ifyo Baibolo isambilisha.​—Imilimo 17:​2, 3.

Ifyo tamulingile ukukwata

1.   Ukusambilila sana. Abatumwa ba kwa Yesu 12 balishibe Amalembo kabili balesambilishako bambi, nangu ca kuti balebamona ukuti bantu “abashasambilile kabili abantu yaweyawe.”​—Imilimo 4:13.

2.   Indalama. Kuti mwasambilila Baibolo apa fye. Yesu aebele abasambi bakwe ati: “Mwapeelwe fye ubupe, na imwe mulepeela fye.”​—Mateo 10:8.