Baibolo ilanga ukuti caliba fye bwino ukuitemwa mu kulinga. Muli uku kutemwa mwaba no kuisakamana, ukuipeela umucinshi, no kuimona ukuti twalicindama. (Mateo 10:31) Na lyo line Baibolo taisuminisha ukuitemwa ukucila mu cipimo.

Ni bani tulingile ukubalilapo ukutemwa?

1.   Tulingile ukubalilapo ukutemwa Lesa. Baibolo isambilisha ukuti ifunde ilya ntanshi lya kuti: “Muletemwa Yehova Lesa wenu no mutima wenu onse.”—Marko 12:28-30; Amalango 6:5.

2.   Ifunde ilya bubili lya kuti: “Uletemwa umunobe nge fyo waitemwa we mwine.”—Marko 12:31; Ubwina Lebi 19:18.

3.   Nangu ca kuti Baibolo tayalanda mu kulungatika ukuti tulingile ukuitemwa, ifunde lya kuti “uletemwa umunobe nge fyo waitemwa we mwine” lilanga ukuti ukuitemwa no kuipeela umucinshi mu kulinga kwaliwama.

Ni bani Yesu atemenwe intanshi?

 Yesu alecita ifyalelanga ukuti alitemenwe Lesa, abantu e lyo no mwine kabili aebele abasambi bakwe ukulacita fimo fine.—Yohane 13:34, 35.

1.   Intanshi alitemenwe Yehova Lesa kabili aliipeeleshe ukubomba umulimo amupeele. Atile: “Pa kuti aba muli ici calo beshibe ukuti nalitemwa Tata, filya fine na Tata ampeela ifunde, e fyo na ine ndecita. Imeni, natufume pano.”—Yohane 14:31.

2.   Yesu alitemenwe abantu, alibikile amano ku bantu ica kuti alipeele no mweo wakwe pa mulandu wabo.—Mateo 20:28.

3.   Yesu aliitemenwe mu kulinga pantu nga anaka aletusha, alelya no kwangalila pamo na basambi bakwe na bantu bambi abali no kuba abasambi.—Marko 6:31, 32; Luka 5:29; Yohane 2:1, 2; 12:2.

Bushe ukutemwa abantu bambi mu cifulo ca kuitemwa kuti kwalenga mwaleka ukuba ne nsansa nelyo mwaleka ukuimona ukuti mwalicindama?

 Awe, pantu twapangwa mu cipasho ca kwa Lesa, uwaba no kutemwa. (Ukutendeka 1:27; 1 Yohane 4:8) Ici cilolele mu kuti atupanga ukuti tuletemwa abantu bambi. Kuti twaitemwa, lelo tulaba sana ne nsansa nga twatemwa Lesa ukucila icintu cimbi kabili twabika na mano ku kucitila bambi ifisuma. Baibolo itila, “Mwaba insansa ishingi mu kupeela ukucila ishaba mu kupokelela.”—Imilimo 20:35.

 Muno nshiku abantu abengi batila nga walacita ifya kuisekesha e lyo wingaba ne nsansa. Bamona ukuti ukuitemwa kwalipyana pa ‘kutemwa abanensu.’ Lelo abantu abakonka amashiwi ya mu Baibolo ayatila: “Mwilafwaya fye ifingamuwamina, lelo mulefwaya ne fingawamina abanenu,” e baba no bumi ubusuma ne nsansa.—1 Abena Korinti 10:24.