Umutumwa Paulo alembele pa fyalecitika mu bumi bwa kwa Yesu ati: “Uwamwene ici, e washimika, kabili ifyo ashimika fya cine, kabili ulya muntu alishiba ukuti alanda ica cine, pa kuti na imwe musumine.”—Yohane 19:35.

 Cimo icalenga tucetekele ifyo Mateo, Marko, Luka na Yohane balembele mu mabuuku ya Mbila Nsuma, ni co balembele ifyaba muli aya amabuuku ninshi abengi abamweneko ifi fintu tabalafwa. Bamo batila, Ibuuku lya kwa Mateo ilya mu Baibolo lyalembelwe nalimo mu 41 C.E., ninshi papita fye imyaka 8 ukutula apo Kristu afwilile. Bamo abasambilila pali ili lyashi batila lyalembelwe mu myaka ya ku ntanshi, lelo abengi balisumina ukuti amabuuku yonse aya mu Malembo ya ciGriki aya Bena Kristu yalembelwe mu nshita ya Bena Kristu ba kubalilapo.

 Abamwenepo Yesu ilyo ali pano calo, no kumonako uko afwile no kubuushiwa, e bengalanda bwino nga ca kuti ifyaba mu mabuuku ya Mbila Nsuma fya cine nelyo iyo. Amuba ifilubo nga balilandile bwino bwino. Ba Professor F. Bruce batile: “Cimo icilanga ukuti ifyo abatumwa balembele fya cine ca kuti, balilanda ifishinka ifilenga abantu basumina ukuti ifyo balembele ifya cine. Tabalanda fye ukuti, ‘Twalimwene ifi fintu,’ lelo basosa no kuti, ‘nge fyo na imwe mwe bene mwaishiba.’ (Imilimo 2:22).””