Lesa apekenye ukuti umwaume no mwanakashi abaupana e balingile fye ukulaala pamo. (Ukutendeka 1:​27, 28; Ubwina Lebi 18:22; Amapinda 5:​18, 19) Baibolo yalikaanya abantu abashaupana ukulaala pamo, nampo nga baume beka beka nelyo banakashi beka beka. (1 Abena Korinti 6:​18) Pa fyo Baibolo yakaanya paba no kwangasha ifya mfwalo fya muntu umbi, ukufifyompa e lyo no kulaalana kwa ku matako.

 Nangu ca kuti Baibolo yalikaanya abaume ukulaala na baume banabo nelyo abanakashi ukulaala na banakashi banabo, tailanda ukuti tufwile ukupata abacita ifya musango yu. Baibolo yeba Abena Kristu “ukucindika abantu aba misango yonse.”​—1 Petro 2:​17.

Bushe kwaliba abafyalwa fye ifi fine?

Baibolo tayalanda pa cilenga abaume ukulafwaya ukulaala na baume banabo nelyo abanakashi ukufwaya ukulaala na banakashi banabo, lelo yalilanda ukuti bonse tulabembuka kabili tulatoba amafunde ya kwa Lesa. (Abena Roma 7:​21-​25) Nangu ca kuti Baibolo tayalanda mu kulungatika pa cilenga bamo ukulalaala na baume banabo nelyo na banakashi banabo, icishinka ca kutila yalikaanya iyi imisango.

Ifyo mwingacita pa kusekesha Lesa nangu mulafwaya ukulaala na baume nelyo abanakashi banenu.

Baibolo itila: “Ipayeni ifilundwa fya mubili wenu umumonekela imibele yabipa.” (Abena Kolose 3:5) Pa kuti mwipaye ifilundwa fya mubili ifingalenga mwabembuka, mulingile ukulatontonkanya pa fintu ifisuma. Nga ca kuti mutontonkanya pa fintu ifisuma, te kuti mucite ifyabipa. (Abena Filipi 4:8; Yakobo 1:​14, 15) Ukucita ifi kulaafya pa kubalilapo, lelo mu kuya kwa nshita cilanguka. Lesa alilaya ukuti akamwafwa ‘ukuleka ukutontonkanya ifya kale pa kuti mukaletontonkanya ifipya.’​—Abena Efese 4:​22-24.

 Ubwafya bwakwata abaume abafwaya ukulaala na banakashi e lyo na banakashi abafwaya ukulaala na baume, ebo nabafwaya ukulaala na baume nelyo abanakashi banabo bakwata. Ku ca kumwenako, abashimbe abashenekela ukusanga uwa kuupana nabo, nelyo aba kuti abena mwabo tabakwata amaka ya kupanga icupo balailama pa kuti tababembwike. Balaba ne nsansa te mulandu no bwafya bakwata, kanshi na baume abafwaya ukulaala na baume banabo nelyo abanakashi abafwaya ukulaala na banakashi banabo nabo bene bafwile ukulailama nga balefwaya ukusekesha Lesa.​—Amalango 30:19.