Umuntu nga ‘afyalwa libili,’ alaba na bucibusa ubupya nelyo ubwaibela na Lesa. (Yohane 3:3, 7) Lesa alapokelela bonse abafyalwa libili ukuti babe abana bakwe. (Abena Roma 8:15, 16; Abena Galatia 4:5; 1 Yohane 3:1) Nga filya fine ciba nga ca kuti umwana uwafyelwe mu lupwa lumo bamusenda ku ba mu lupwa lumbi ukulingana ne funde no kutendeka ukumusunga ngo mwana wabo, abafyalwa libili nabo Lesa alabapokelela ukuba mu lupwa lwakwe.—2 Abena Korinti 6:18.

Cinshi umuntu afwile ukufyalilwa libili?

 Yesu atile: “Umuntu nga tafyelwe libili, te kuti amone ubufumu bwa kwa Lesa.” (Yohane 3:3) Kanshi ukufyalwa libili kulalenga umuntu akwata ishuko lya kuyateka na Kristu mu Bufumu bwa kwa Lesa. Apo Ubufumu bwa kwa Lesa bwaba ku muulu, Baibolo ilanda pa ‘kufyalwa cipya cipya’ ukuti e kulenga umuntu aba no bupyani “bwaba mu muulu.” (1 Petro 1:3, 4) Abafyalwa libili balashininkisha ukuti bakaba “ishamfumu no kutekela capamo” na Kristu.—2 Timote 2:12; 2 Abena Korinti 1:21, 22.

Bushe umuntu afyalwa shani libili?

 Yesu alandile ukuti pa kuti umuntu afyalwe libili alingile ‘ukufyalwa ku menshi na ku mupashi.’ (Yohane 3:5) Aya amashiwi yalola mu kuti alingile intanshi ukubatishiwa ku menshi e lyo pa numa ku mupashi wa mushilo.—Imilimo 1:5; 2:1-4.

 Yesu e wabalilepo ukufyalwa libili. Abatishiwe mu Mumana wa Yordani, lyena pa numa Lesa alimusubile (nelyo ukumubatisha) no mupashi wa mushilo. E ico Yesu alifyelwe libili no kuba umwana wa kwa Lesa uwa ku mupashi kabili alikwete isubilo lya kubwelela ku muulu. (Marko 1:9-11) Ili isubilo lyalifikilishiwe ilyo Lesa abuushishe Yesu nge cibumbwa ca mupashi.​—Imilimo 13:33.

 Abantu bambi abafyalwa libili nabo balatala babatishiwa ku menshi ilyo bashilapokelela umupashi wa mushilo. * (Imilimo 2:38, 41) Lyena balaba ne subilo lya kuyaikala ku muulu ilyo Lesa akafikilisha ilyo akababuusha.—1 Abena Korinti 15:42-49.

Ubufi abantu babepa pa kufyalwa libili

 Ubufi: Umuntu e wingaisalilapo umwine ukufyalwa libili.

 Icishinka: Bonse kuti twaba ifibusa fya kwa Lesa kabili kuti twaisapusuka. (1 Timote 2:3, 4; Yakobo 4:8) Na lyo line, Lesa e usala abalingile ukufyalwa libili nelyo ukusubwa no mupashi wa mushilo. Kanshi ukulingana ne fyo Baibolo ilanda ukufyalwa libili takwashintilila pa “fyo umuntu alefwaya nelyo ifyo acita, lelo caba ku luse lwa kwa Lesa umwine.” (Abena Roma 9:16) Amashiwi ya kuti ‘ukufyalwa libili’ limo bayapilibula ukuti ‘ukufyalwa ku muulu,’ kanshi ici cilanga fye ukuti ukusala abafyalwa libili kucitikila ‘ku muulu,’ e kutila Lesa e ubasala.—Yohane 3:3.