Lesa te ulenga amasanso ayakalamba ayacitika muno nshiku, na lyo line alibika amano ku bantu abaponenwa na masanso ayakalamba. Amasanso ayakalamba yaba pa fintu ifilenga tulecula ifyo Ubufumu bwa kwa Lesa bukafumyapo. Pali ino nshita, Lesa alasansamusha abaponenwe na masanso ayakalamba.—2 Abena Korinti 1:3.

•  Kuti twashininkisha shani ukuti Lesa tabomfya amasanso ayakalamba pa kukanda abantu?

•  Bushe amasanso ayakalamba yalanga ukuti tuli mu nshiku shakulekelesha?

•  Bushe Lesa afwa shani abaponenwe na masanso ayakalamba?

•  Bushe Baibolo kuti yatwafwa ukuipekanya ilyo tushilaponenwa no busanso?

•  Amalembo ya mu Baibolo ayengasansamusha abaponenwe na masanso

 Amasanso ayacitika muno nshiku yalipusana ne fyo Baibolo ilanda pa fyo Lesa alebomfya ifyo abumba pa kukanda abantu.

•   Abantu bonse abasangwa ku ncende ukwaponena ubusanso balafwa nelyo ukucenekwa sana. Ilyo Lesa alebomfya ifyo abumba pa kukanda abantu, aleonaula fye abalecita ifyabipa. Ku ca kumwenako, ilyo Lesa aonawile imisumba ya Sodomu na Gomora, alipuswishe Loti na bana bakwe abanakashi babili. (Ukutendeka 19:29, 30) Lesa alimwene ifyali mu mitima ya bantu pali ilya nshita, kabili aonawile fye abo amwene ukuti babifi.—Ukutendeka 18:23-32; 1 Samwele 16:7.

•   Ilingi line amasanso ayakalamba yacitika ukwabula ukwenekela. Na kabili, Lesa alesoka abantu ilyo ashilabomfya ifyo abumba ku kubakanda. Abaleumfwila ifyo alebasoka balepusuka.—Ukutendeka 7:1-5; Mateo 24:38, 39.

•   Ifyo abantu bacita na fyo fyalilenga kuleba amasanso ayakalamba. Finshi abantu bacita ifilenga kuleba amasanso? Balakowesha umwela na menshi, kabili balakuula ifikulwa mu ncende umuba sana ifinkukuma, mulamba nelyo ku ncende uko imiceele yabipa sana. (Ukusokolola 11:18) Kanshi te kuti tutile ni Lesa e ulenga amasanso ayakalamba ayabako pa mulandu ne fyo abantu bacita.—Amapinda 19:3.

 Ee, Amasesemo ya mu Baibolo yalanda ukuti kukaba amasanso ayakalamba ilyo ‘icalo cikaba ku mpela.’ (Mateo 24:3; 2 Timote 3:1) Ku ca kumwenako, Yesu alandile pa nshita tuleikalamo ukuti: “Kukaba ifipowe ne finkukuma mu ncende shimo shimo.” (Mateo 24:7) Nomba line fye Lesa akafumyapo fyonse ifilenga tulecula, ukubikako fye na masanso.—Ukusokolola 21:3, 4.

•   Lesa alabomfya Icebo cakwe Baibolo ku kusansamusha abaponenwe na masanso. Baibolo ilanda ukuti Lesa alatusakamana, kabili alomfwa ububi nga tulecula. (Esaya 63:9; 1 Petro 5:6, 7) Baibolo ilalanda na pa fyo Lesa atulaya ukuti kukaba inshita ilyo kushakabe amasanso.—Belengeni apaleti “ Amalembo ya mu Baibolo ayengasansamusha abaponenwe na masanso.”

•   Lesa alabomfya ababomfi bwakwe ku kusansamusha abaponenwa na masanso. Lesa alabomfya ababomfi bakwe pano isonde ku kusansamusha abantu nga fintu Yesu alecita. Baibolo yalisobele ukuti Yesu akulasansamusha ‘ababa no bulanda’ na “bonse abaloosha.” (Esaya 61:1, 2) Ababomfi ba kwa Lesa nabo balesha na maka ukusansamusha ababa no bulanda nelyo abaloosha.—Yohane 13:15.

   Na kabili, Lesa alabomfya ababomfi bakwe ku kupeela abaponenwe no busanso ifyo balekabila.—Imilimo 11:28-30; Abena Galatia 6:10.

 Ee. Nangu ca kuti Baibolo te citabo icilanda pa fyo tufwile ukucita ilyo tushilaponenwa na masanso ayakalamba, amashinte ya mafunde ayabamo kuti yatwafwa. Moneni amashinte yamo aya mafunde ayengatwafwa:

•   Mulepekanya ifyo mwingacita nga kwacitika ubusanso. Baibolo ilanda ukuti: “Uwasalapuka nga amona ububi alabelama.” (Amapinda 22:3) Kuti caba bwino nga twapekanishisha libela ifyo twingacita nga kwacitika ubusanso. Nalimo kuti twalongela limo ifikabilwa sana mu cola ico twingabutuka na co, kabili tufwile ukulanshanya na ba mu lupwa ukwakukumanina nga kwacitika ubusanso.

•   Mulebika sana amano ku bumi bwenu ukucila ku fyo mwakwata. Baibolo ilanda ukuti: “Tatwaletamo akantu muli ici calo, kabili teti tufumyemo akantu.” (1 Timote 6:7, 8) Tufwile ukuitemenwa ukusha amayanda yesu ne fyo twakwata pa kuti tupusuke ubusanso. Tulingile ukulaibukisha ukuti ubumi bwesu bwalicindama sana ukucila fyonse ifyo twakwata.—Mateo 6:25.