Labanan an Salang Kaisipan!

KAN nakakaeksperyensia nin kalamidad, an patriarkang si Job dinalaw nin tolong katood nia na si Elifaz, Bildad, asin Zofar. Duminuman sinda tanganing damayan asin rangahon sia. (Job 2:11) An pinakamaimpluwensia asin tibaad pinakagurang sa tolo iyo si Elifaz. Sia an enot na nagtaram asin an may pinakadakol na sinabi. Anong klaseng kaisipan an ihinayag ni Elifaz sa tolo niang pahayag?

Ginigirumdom an saiyang eksperyensia kaidto na lihis sa natural, si Elifaz nagsabi: “Sarong espiritu mismo an nag-agi sa sakong lalauogon; an barahibo sa sakong laman nagpoon na magtirindog. Iyan uminontok, alagad dai ko namidbid an itsura kaiyan; sarong porma an yaon sa atubangan kan sakong mga mata; nagkaigwa nin katoninongan, asin nadangog ko ngonyan an sarong tingog.” (Job 4:​15, 16) Anong klaseng espiritu an nakaimpluwensia sa kaisipan ni Elifaz? An mapagkritikang tono kan suminunod na mga tataramon nia nagpapaheling na an espiritung iyan bako nanggad na saro sa matanos na mga anghel nin Dios. (Job 4:​17, 18) Iyan sarong maraot na espiritung linalang. Ta kun bako, taano ta sinagwe ni Jehova si Elifaz asin an saiyang duwang kairiba sa pagsabi nin mga kaputikan? (Job 42:7) Iyo, naimpluwensiahan si Elifaz nin demonyo. An saiyang mga komento nagpabanaag nin bakong diosnon na kaisipan.

Anong mga ideya an maririsa sa mga tataramon ni Elifaz? Taano ta importante na kita magmaan tumang sa salang kaisipan? Asin anong mga lakdang an puede niatong gibohon tanganing labanan iyan?

“Sa Saiyang mga Lingkod Mayo Sia nin Pagtubod”

Sa tolong pahayag na ini, iprinesentar ni Elifaz an ideya na an Dios estriktong marhay kaya ano man an gibohon kan saiyang mga lingkod dai ninda sia mapapaogma. “Uya! Sa saiyang mga lingkod mayo sia nin pagtubod,” an sabi ni Elifaz ki Job, “asin an saiyang mga anghel inaakusar nia nin pagkakasala.” (Job 4:​18, nota ibaba) Kan huri si Elifaz nagsabi manongod sa Dios: “Sa saiyang mga banal dai sia naniniwala, asin an mismong kalangitan bakong malinig sa saiyang mga mata.” (Job 15:15) Asin sia naghapot: “May pagkaogmang marhay daw an Makakamhan sa Gabos na ika matanos?” (Job 22:3) Oyon si Bildad sa punto de vistang ini, huli ta sia nagsabi: “Yaon ngani an bulan, asin bako iyan na maliwanag; asin an mga bitoon mismo bakong malinig sa . . . pagheling” nin Dios.​—Job 25:5.

Kaipuhan na magmaan kita na dai magpaimpluwensia sa siring na kaisipan. Puedeng magin dahelan iyan na magsaboot kita na sobra an hinahagad sa sato nin Dios. Rinaraot kan punto de vistang ini an mismong relasyon niato ki Jehova. Apuera dian, kun mapadaog kita sa arog kaining klase nin pangangatanosan, ano an magigin reaksion niato kun tawan kita nin kinakaipuhan na disiplina? Imbes na mapakumbabang akoon an pagtatanos, an satong puso tibaad ‘maanggot tumang ki Jehova mismo,’ asin tibaad magtanom kita nin paghinanakit sa saiya. (Talinhaga 19:3) Magigin kapahapahamak nanggad iyan sa espirituwal!

“May Serbi daw sa Dios an Sarong Pusog na Lalaki?”

Konektado nanggad sa ideya na an Dios estriktong marhay an paniniwala na an pagheling nia sa  mga tawo daing serbi. Sa ikatolong pahayag ni Elifaz yaon an hapot na: “May serbi daw sa Dios an sarong pusog na lalaki, kun paanong an siisay man na may pakarorop may pakinabang sa saiya?” (Job 22:2) Ipinapasentido ni Elifaz na an tawo daing serbi sa Dios. Kaagid kaiyan, si Bildad nagtao nin mga argumento: “Paano magigin tama an magagadanon na tawo sa atubangan nin Dios, o paano magigin malinig an saro na ipinangaki nin sarong babae?” (Job 25:4) Oyon sa pangangatanosan na iyan, paanong si Job na saro sanang magagadanon na tawo, mangangahas na mag-isip na sia may matanos na kamugtakan sa atubangan nin Dios?

May mga tawo ngonyan na pinupurisaw nin negatibong mga saboot manongod sa sadiri ninda. Tibaad nakakontribwir digdi an mga dahelan na arog kan paagi nin pagpadakula sa pamilya, pagkalantad sa mga sakit sa buhay, o pagigin biktima nin rasyal o etnikong pagkaongis. Alagad si Satanas asin an saiyang mga demonyo naoogma man na marhay na papanluyahon an sarong tawo. Kun maiimpluwensiahan ninda an sarong indibiduwal na magsaboot na ano man an gibohon nia dai nia mapapaogma an Makakamhan sa Gabos na Dios, sia mas madaling madadaog nin kadaihan nin paglaom. Maabot an panahon, an arog kaiyan na tawo puedeng ianod parayo, bayaan pa ngani an nabubuhay na Dios.​—Hebreo 2:1; 3:12.

An naglalangkaw na edad asin mga problema sa salud naglilimitar sa sato. Tibaad garo baga dikit na sana an kabtang niato sa paglilingkod sa Kahadean kun ikokomparar sa nagigibo niato kan kita mas hoben pa, mas marahay pa an salud, asin mas makosog pa. Importante nanggad na rekonoseron niato na gusto ni Satanas asin kan saiyang mga demonyo na magsaboot kita na an ginigibo niato dai makakapaogma sa Dios! Kaipuhan na labanan niato an siring na kaisipan.

Kun Paano Lalabanan an Negatibong Kaisipan

Sa ibong kan pagdusa na itinao sa saiya ni Satanas na Diablo, si Job nagsabi: “Sagkod na ako magadan dai ko hahaleon sa sakuyang sadiri an sakuyang integridad!” (Job 27:5) Huling namomotan nia an Dios, determinado si Job na papagdanayon an saiyang integridad ano man an mangyari, asin mayo nin makakapabago kaiyan. Yaon digdi an sarong mahalagang panlaban sa negatibong kaisipan. Kaipuhan na magkaigwa kita nin marahay na pakasabot sa pagkamoot nin Dios asin kultibaron an odok sa pusong pag-apresyar dian. Kaipuhan man niatong pararomon an satong pagkamoot sa saiya. Nagigibo ini paagi sa regular na pag-adal kan Tataramon nin Dios asin mapagngayongayong paghorophorop sa nanonodan niato.

Halimbawa, an Juan 3:16 nagsasabi: “An Dios namoot na gayo sa kinaban na itinao nia an saiyang Aking bugtong.” Si Jehova may hararom na pagkamoot sa kinaban nin katawohan, asin an tratamiento nia sa mga tawo sa nag-aging mga panahon nagpapaheling kan pagkamoot na iyan. An paghorophorop sa mga halimbawa kan nakaagi kaipuhan na makaparigon sa satong pag-apresyar ki Jehova asin makapararom sa satong pagkamoot sa saiya, sa siring natatabangan kitang labanan an sala o negatibong kaisipan.

Isipon nindo an paagi nin pagtratar ni Jehova ki Abraham kan panahon na nagdadangadang an paglaglag sa Sodoma asin Gomorra. Si Abraham naghapot ki Jehova nin walong beses mapadapit sa Saiyang paghokom. Dai lamang nagpaheling si Jehova nin pagkairitar o pagkauyam. Imbes, an saiyang mga simbag nakaasegurar giraray asin nakaranga ki Abraham. (Genesis 18:22-33) Kan iligtas nin Dios si Lot asin an saiyang pamilya sa Sodoma kan huri, nakiolay si Lot na dumulag pasiring sa sarong kaharaning siudad imbes na sa kabukidan. Si Jehova suminimbag: “Uya pinapahelingan taka man nin konsiderasyon sagkod digdi, paagi sa dai ko pagpabagsak kan siudad na sinabi mo.” (Genesis 19:18-22) An mga pagkasaysay daw na ini ilinaladawan si Jehova bilang sarong estrikto, bakong mamomoton, autoritaryong namamahala? Dai. Ipinapaheling kaiyan kun ano talaga sia​—sarong mamomoton, maboot, maheherakon, asin mapagsabot na Soberano.

Pinapahimutikan kan mga halimbawa ni Aaron, David, asin Manases kan suanoy na Israel an ideya na an Dios parahanap nin sala asin na mayo nin siisay man na makakapaogma sa saiya. Si Aaron nakagibo nin tolong magabat na sala. Naggibo sia nin bulawan na ogbon na baka, nakiiba sia sa saiyang tugang na si Miriam sa pagkritikar ki Moises, asin dai nia sinantipikar asin tinawan nin onra an Dios sa Meriba. Minsan siring, naheling ni Jehova an marahay na mga kualidad nia asin tinogotan siang  padagos na maglingkod bilang halangkaw na saserdote sagkod na sia magadan.​—Exodo 32:​3, 4; Bilang 12:​1, 2; 20:9-13.

Si Hadeng David nakakomiter nin magabat na mga kasalan durante kan saiyang paghade. Kaiba digdi an pagsambay, pagpakana na gadanon an sarong inosenteng tawo, asin paggibo nin ilegal na sensus. Minsan siring, naheling ni Jehova an pagsolsol ni David asin may kaimbodan niang inotob an tipan para sa Kahadean paagi sa pagtogot sa saiya na padagos na maglingkod bilang hade sagkod na sia magadan.​—2 Samuel 12:9; 1 Cronica 21:1-7.

Si Hadeng Manases nin Juda naggibo nin mga altar ki Baal, pinaagi an saiyang mga aking lalaki sa kalayo, nagpalakop nin espiritistikong mga gibo, asin nagtogdok nin mga altar kan falsong relihion sa mga patyo kan templo. Minsan siring, pagkatapos na magpaheling sia nin odok sa pusong pagsolsol, pinatawad sia ni Jehova, pinaluwas sia sa pagkabihag, asin itinao giraray sa saiya an pagkahade. (2 Cronica 33:1-13) Ini daw an ginigibo nin sarong Dios na dai mapapaogma nin siisay man? Bako nanggad!

An Putik na Parasumbong Mismo an May Sala

Dai kita maninigong magngalas na si Satanas an pangenot na personipikasyon kan mismong mga karakteristiko na isinasahot nia ki Jehova. Si Satanas daing herak asin estrikto. Malinaw na naheheling ini sa ginigibong pag-atang nin aki na konektado sa falsong pagsamba kan nakaaging mga panahon. An apostatang mga Israelita sinosolo sa kalayo an saindang mga aking lalaki asin babae​—sarong bagay na dai man lamang ngani suminabong sa puso ni Jehova.​—Jeremias 7:31.

Si Satanas, bakong si Jehova, an parahanap nin sala. Inaapod si Satanas sa Kapahayagan 12:10 bilang “an parasumbong sa satong mga tugang, na nagsusumbong sa sainda aldaw asin banggi sa atubangan kan satong Dios!” Sa ibong na lado, may labot ki Jehova, an salmista nag-awit: “Kun mga sala an saimong binabantayan, O Jah, O Jehova, siisay an makakatindog? Huli ta yaon sa saimo an tunay na pagpatawad.”​—Salmo 130:​3, 4.

Kun Mawara Na an Salang Kaisipan

Kanigoan na kaginhawahan an seguradong namatean kan espiritung mga linalang na anghel kan si Satanas na Diablo asin an saiyang mga demonyo pinalayas sa kalangitan! (Kapahayagan 12:7-9) Pakatapos kaiyan, an maraot na mga espiritung ini mayo na nin ano man na impluwensia sa mga aktibidad kan pamilya nin mga anghel ni Jehova sa langit.​—Daniel 10:13.

An mga nag-eerok sa daga maggagayagaya sa harani nang ngapit. Dai na mahahaloy, an sarong anghel na naghihilig hale sa langit na igwa kan liabe kan bungaw asin sarong dakulang kadena sa saiyang kamot gagaposon si Satanas asin an saiyang mga demonyo asin ihuhulog sinda sa bungaw nin pagkadaing maginibo. (Kapahayagan 20:1-3) Kanigoan na kaginhawahan an maeeksperyensiahan niato kun mangyari na iyan!

Mientras tanto, kaipuhan na magmaan kita sa salang kaisipan. Basta lumaog sa satong isip an sala o negatibong mga saboot, kaipuhan na labanan niato iyan paagi sa pagpokus kan satong isip sa pagkamoot ni Jehova. Dangan “an katoninongan nin Dios na minalampas sa gabos na kaisipan mag-iingat kan [satong] puso asin kan [satong] mga pag-isip.”​—Filipos 4:​6, 7.

[Ritrato sa pahina 26]

Linabanan ni Job an negatibong kaisipan

[Ritrato sa pahina 28]

Naaraman ni Lot na si Jehova sarong mapagsabot na Soberano