“KADAKUL kan aanihon, pero kakadikit kan paraani. Kun siring, makimahirak kamo sa Kagurangnan kan pag-ani na magsugo nin mga trabahador sa saiyang pagpaani.” (Luc. 10:2) An sinabing iyan ni Jesus mga 2,000 na taon na an nakaagi iyo mismo an masasabi sa kamugtakan sa Myanmar ngunyan. Taano? Sa Myanmar, mga 4,200 sana an parahayag na nagpapaabot kan maugmang bareta sa 55 milyon katawo.

Pero pinahiro kan “Kagurangnan kan pag-ani,” si Jehova, an puso kan ginatos na mga tugang hali sa manlain-lain na kadagaan, asin nagbalyo sinda sa nasyon na ini sa Timog-Sirangan na Asia para tumabang sa espirituwal na pag-ani. Taano ta binayaan ninda an sadiri nindang lugar? Ano an nakatabang sa sainda na bumalyo? Asin anong mga bendisyon an inako ninda? Hilingon ta.

Mga pirang taon na an nakaagi, si Kazuhiro, na payunir sa Japan, inatake nin subi-subi, nadismayo, asin dinara sa ospital. Sinabi sa saiya kan doktor na dai nguna siya magmaneho sa laog nin duwang taon. Nabigla si Kazuhiro. ‘Paano ko maipapadagos an gibuhon na gustong-gusto ko—an pagpayunir?’ an hapot niya sa sadiri. Udok siyang namibi na tabangan siya ni Jehova na makapagpadagos sa pagpayunir.

Sinabi ni Kazuhiro: “Pakalihis nin sarong bulan, nabaretaan kan amigo kong naglilingkod sa Myanmar an dapit sa kamugtakan ko. Inapudan niya ako asin sinabi: ‘Sa Myanmar bus an panginot na transportasyon. Kun mabalyo ka digdi, makakapaghulit ka dawa mayo kang awto!’ Hinapot ko an doktor kun okey lang sa kondisyon ko na magpa-Myanmar. Naugma talaga ako sa sinabi niya: ‘Nasa Japan ngunyan an sarong espesyalista sa hutok na taga Myanmar. Ipapabisto taka saiya. Kun atakihon ka kan hilang mo, siya na an bahala saimo.’ Ibinilang kong simbag hali ki Jehova an sinabing iyan kan doktor.”

Nag-e-mail tulos si Kazuhiro sa sangang opisina sa Myanmar asin sinabi na gusto nindang mag-agom na maglingkod sa Myanmar bilang mga payunir. Pakalihis sana nin limang aldaw, nagsimbag an sangang opisina, “Madya, kaipuhan mi nin dakul pang payunir!” Ipinabakal ni Kazuhiro asin kan saiyang agom na si Mari an saindang mga awto, nagkua nin visa, asin nagbakal nin tiket sa eroplano. Ngunyan, maugma sindang naglilingkod sa sarong sign-language group sa Mandalay. Sinabi ni Kazuhiro: “Huli sa eksperyensiya ming ini, namati ming napakusog an samuyang pagtitiwala sa panuga nin Diyos na nasa Salmo 37:5: ‘Ipagkatiwala mo ki Jehova an saimong dalan; manarig ka sa saiya, asin siya mahiro para sa saimo.’” (NW)

Kan 2014, nagkapribilehiyo an mga Saksi ni Jehova sa Myanmar na mag-host nin espesyal na kumbensiyon. Dakul na delegado hali sa ibang mga nasyon an nag-atender diyan. Saro sa sainda si Monique, na sarong sister na 34 anyos hali sa Estados Unidos. Sinabi niya: “Pakapuli hali sa kumbensiyon, namibi ako ki Jehova kun ano an sunod na dapat kong gibuhon. Ipinakipag-ulay ko man sa mga magurang ko an dapit sa mga pasuhan ko sa espirituwal. Namatian mi na dapat akong magbalik sa Myanmar, pero medyo nahaloy-haloy saka kadakul ngunang pamibi an ginibo ko bago ako nakapagdesisyon.” Iinistorya ni Monique kun taano.

“Sinabi ni Jesus sa saiyang mga parasunod na ‘kuwentahon an gastos.’ Kaya ihinapot ko sa sadiri: ‘Kun sa pinansiyal, kaya ko daw na magbalyo? Masusuportaran ko daw an sadiri ko sa nasyon na iyan dawa dai ako maggamit nin mas dakul na panahon sa sekular na trabaho?’” Inadmitir niya: “Narealisar ko tulos na bakong igo an kuwarta ko tanganing magbalyo sa ibong na parte kan kinaban.” Kun siring, paano siya nakabalyo?—Luc. 14:28.

Nag-istorya si Monique: “Sarong aldaw, gusto akong kaulayon kan boss ko. Ninerbiyos ako ta huna ko tatanggalon ako sa trabaho. Idto palan, papasalamatan niya ako sa marahay kong pagtrabaho. Dangan sinabi niya sako na iinareglo niya na matawan ako nin bonus, na an kantidad eksakto para mabayadan ko an mga kaipuhan kong bayadan!”

Nagpuon na maglingkod si Monique sa Myanmar kan Disyembre 2014. Bilang sarong need-greater, ano an namamatian niya dapit sa saiyang ministeryo? “Maugma akong marhay na yaon ako digdi,” an sabi niya. “Igwa akong tulong Bible study. An saro sainda 67 anyos na babayi. Pirmi niya akong binabati paagi sa ngirit asin higot na kugos. Kan maaraman niya na Jehova palan an pangaran nin Diyos, napaluha siya. Sinabi niya: ‘Sa bilog na buhay ko, ini an primero kong pakadangog na Jehova an pangaran nin Diyos. An edad ko doble kan sa saimo, pero itinukdo mo sako an pinakaimportanteng bagay sa gabos.’ Siyempre napaluha man ako. An mga eksperyensiyang arog kaini an dahilan kun taano ta talagang nakakaugma an pagigin need-greater.” Dai pa sana nahahaloy, nagkapribilehiyo si Monique na magklase sa School for Kingdom Evangelizers.

An saro pang dahilan kaya nagbalyo sa Myanmar an iba iyo an pagkasaysay mapadapit sa nasyon na ini sa 2013 Yearbook of Jehovah’s Witnesses. Si Li sarong sister na mga labing 30 anyos asin dati nang nakaistar sa Timog-Sirangan na Asia. Full-time an trabaho niya, pero napahiro siya kan nabasa niya sa Yearbook na pag-isipan na maglingkod sa Myanmar. “Kan mag-atender ako sa espesyal na kumbensiyon sa Yangon kan 2014, may nakabisto akong mag-agom na need-greater na naglilingkod sa Chinese territory sa Myanmar. Nagtataram ako nin Chinese kaya nagdesisyon ako na bumalyo sa Myanmar tanganing tumabang sa Chinese group diyan. Nakipartner ako ki Monique, asin nagbalyo kami sa Mandalay. Binendisyunan kami ni Jehova nin part-time na trabaho bilang paratukdo sa sarong eskuwelahan, asin nakahanap kami nin apartment harani diyan. Mainit an klima saka may mga kadipisilan, pero maugma ako sa paglilingkod digdi. Simple an buhay kan mga taga Myanmar, pero magalang sinda saka andam na magtao nin panahon para magdangog sa maugmang bareta. Nakakaugmang mahiling kun paano pinaparikas ni Jehova an gibuhon. Nagtutubod ako na kabutan ni Jehova na maglingkod ako digdi sa Mandalay.”

Naeksperyensiyahan kan dakul na need-greater an nagigibo kan pamibi. Halimbawa kaiyan si Jumpei, na 37 anyos, asin an saiyang agom na si Nao, na 35 anyos. Dati na sindang naglilingkod sa sarong sign-language congregation sa Japan. Taano ta nagbalyo  sinda sa Myanmar? Sinabi ni Jumpei: “Kaidto pa, pasuhan mi na ni agom na magin mga need-greater sa ibang nasyon. May kakongregasyon kaming brother sa Japan na nagbalyo sa Myanmar. Kan Mayo 2010, nagbalyo man kami dawa diit sana an tipon ming kuwarta. Maugma an nagin pag-ako samo kan mga tugang sa Myanmar!” Ano an pagmati niya dapit sa sign-language territory sa Myanmar? “Dakul an mga interesado. Pag ipinapahiling mi sa mga kagharong na púla an mga video sa sign-language, napapangalas sinda diyan. Maugma kaming marhay huling nagdesisyon kaming bumalyo digdi para maglingkod ki Jehova!”

Kumusta an kamugtakan sa pinansiyal ni Jumpei asin Nao? “Pakalihis nin tulong taon, haros naubos na an tipon mi asin kulang na an pambayad mi sa arkila para sa sunod na taon. Nagparapamibi kami ni agom. Dangan dai mi linalauman, nakaresibi kami nin surat hali sa sangang opisina na iniimbitaran kaming maglingkod bilang temporaryong mga espesyal payunir! Nagtiwala kami ki Jehova, asin namatian mi na dai niya kami pinabayaan. Inaataman niya kami sa gabos na bagay.” Dai pa sana nahahaloy, nagklase man si Jumpei asin Nao sa School for Kingdom Evangelizers.

Si Simone, sarong brother na 43 anyos na dating taga Italia, asin an saiyang agom na si Anna, 37 anyos na dating taga New Zealand. Ano an nakapahiro sa sainda na magbalyo sa Myanmar? “An pagkasaysay mapadapit sa Myanmar sa 2013 Yearbook!” an simbag ni Anna. Sinabi ni Simone: “Dakulang pribilehiyo na maglingkod sa Myanmar. An buhay digdi talagang mas simple, saka mas nakakatao ako nin dakul na panahon sa gibuhon ni Jehova. Nakakaugmang maeksperyensiyahan an pag-ataman ni Jehova mantang naglilingkod bilang mga need-greater.” (Sal. 121:5) Sinabi ni Anna: “Ngunyan lang ako nagin arog kaini kaugma. Simple an buhay mi. Mas parati kaming magkaibanan ni agom, saka nagin mas dayupot kami sa lambang saro. Nagkaigwa man kami nin bagong mga amigo. An mga tawo digdi dai nagpapalain-lain sa mga Saksi, saka mangalas ka talaga sa interes kan mga tawo sa teritoryo!” Sa anong mga paagi?

Nag-istorya si Anna: “Sarong aldaw, may pinatotoohan ako sa saudan na sarong estudyante sa unibersidad tapos nagkasundo kami na babalikan ko siya. Pagbalik ko, nag-iba siya nin amigo. Dangan kan sunod, nag-iba siya nin nagkapira pa. Tapos kan sunod na man, nag-iba siya nin mas dakul pa. Ngunyan, Bible study ko na an lima sa sainda.” Sinabi ni Simone: “Mainamigo an mga tawo sa teritoryo saka mausyoso. Dakul an interesado. Kinukulang kami nin panahon para mabalikan an gabos na interesado.”

Para makatabang sa pagdedesisyon, naggibo nin praktikal na mga lakdang an nagkapira. Si Mizuho na taga Japan nag-istorya: “Kaidto pa, gusto mi na kan agom kong si Sachio na magin mga need-greater sa ibang nasyon—pero sain? Pakabasa kan pagkasaysay kan 2013 Yearbook mapadapit sa Myanmar, napahiro kaming marhay kan magayunon na mga eksperyensiya na huli kaiyan pinunan ming pag-isipan kun baga  posible na makapaglingkod kami sa Myanmar.” Sinabi pa ni Sachio: “Nagdesisyon kami na magpasyar nin sarong semana sa Yangon, an panginot na siyudad sa Myanmar, tanganing manmanan an lugar, sabi ngani. An halipot na pagpasyar na iyan an nakakumbinsir sa samo na dapat kaming magbalyo digdi.”

Kan 2010, nagpuon na maglingkod bilang need-greater sa Myanmar si Rodney saka an saiyang agom na si Jane, na mga taga Australia asin parehong mga labi nang 50 anyos, kaiba an aki nindang si Jordan asin Danica. Sinabi ni Rodney: “Napahiro kaming marhay kan pagkagutom sa espirituwal kan mga tawo. Talagang irinerekomendar ko sa ibang mga pamilya na purbaran na maglingkod sa lugar na arog kan Myanmar.” Taano? “Marahayon an nagin epekto kaini sa espirituwalidad kan pamilya ko! Dakul na hoben an bangkag sa saindang cellphone, kotse, trabaho, asin iba pa. An mga aki mi sibot sa pag-adal nin bagong mga tataramon na gagamiton sa ministeryo. Hinihinguwa nindang adalan kun paano makikipag-ulay sa mga bako pang pamilyar sa Bibliya asin kun paano masimbag sa mga pagtiripon sa lokal na kongregasyon, saka sibot sinda sa iba pang nakakaugmang espirituwal na mga aktibidad.”

Inistorya ni Oliver, sarong brother na 37 anyos asin taga Estados Unidos, kun taano ta irinerekomendar niya an klaseng ini nin paglilingkod: “An paglilingkod ki Jehova sa mga kamugtakan na dai ko kinatudan igwa nin dakul na pakinabang. An pagbalyo sa ibang lugar na harayo samo nakatabang sako na mas magkaigwa nin kumpiyansa asin tiwala ki Jehova dawa ano man an magin kamugtakan. An paglilingkod kaiba kan mga dai ko kamidbid kaidto pero kapareho ko an mga tinutubod talagang nakatabang sako na mahiling na talagang dai lamang maikukumparar sa ano man na bagay sa kinaban na ini an kahalagahan kan Kahadian nin Diyos.” Ngunyan, si Oliver asin an saiyang agom na si Anna padagos asin maigot na naglilingkod sa Chinese territory.

Nagpuon na maglingkod sa Myanmar kan 2004 si Trazel, sarong sister na 52 anyos asin taga Australia. Sinabi niya: “Para sa mga nasa kamugtakan, talagang irinerekomendar ko an pagigin need-greater. Naeksperyensiyahan ko na kun talagang desidido kang maglingkod, bebendisyunan ni Jehova an saimong mga paghihinguwa. Dai ko lamang naisip kaidto na magigin arog kaini an buhay ko. Para sa sako, ini an pinakanakakaugma asin nakakakontentong buhay.”

Lugod na nadagka ka kan udok sa pusong mga sinabing ini kan mga need-greater sa Myanmar na pag-isipan an pagtabang sa mga tawong sadiyosan an puso sa mga teritoryong dai pa nahuhulitan. Iyo, nangangapudan an mga need-greater, “Bumalyo tabi kamo sa Myanmar asin tabangan nindo kami!”