AN SINASABI KAN MGA TAWO

Iniisip kan dakul na tawo na an pagsugal bako man maraot na libangan, basta legal iyan. May mga sugal na legal, arog kan mga loteriya na pig-iisponsoran kan gobyerno, na naggaganar nin pondo para sa mga programa na nakakatabang sa publiko.

AN SINASABI KAN BIBLIYA

Mayo man nin partikular na sinasambit an Bibliya manungod sa pagsugal. Alagad, nagtatao iyan nin nagkapirang prinsipyo na nakakatabang sato na maaraman an pagmansay nin Diyos manungod sa pagsugal.

An panginot na katuyuhan nin pagsugal—manggana nin kuwarta sa pagkadaog kan iba—kontra sa patanid kan Bibliya na “maglikay sa gabos na klase nin kahanaban.” (Lucas 12:15) An totoo, kahanaban an dahilan kaya nagsusugal an mga tawo. Nag-aalok nin darakulang jackpot an mga institusyon sa pagsugal, pero dai ninda sinasabi sa mga tawo na dikiton sana an tsansa na manggana. Aram kaya ninda na dahil gustong-gusto kan mga nagsusugal na yumaman, mapusta an mga ini nin darakulang kantidad sa mga casino. Imbes na tabangan an mga tawo na lumikay sa kahanaban, lalo pang pinapakusog kan pagsugal an pagmawot na magkaigwa nin kuwarta na dai man pigpagalan.

Nagsusugal an saro huli sa makasadiring pagmawot: an manggana nin kuwarta sa pagkadaog kan iba. Alagad, dinadagka kan Bibliya an saro na “padagos na hanapon . . . bako an para sa sadiri niyang kapakinabangan, kundi an para sa ibang tawo.” (1 Corinto 10:24) Saka sinasabi kan saro sa Sampulong Tugon: “Dai mo pagmawuton . . . an ano pa man na sadiri kan saimong kapwa.” (Exodo 20:17) Pag an sarong parasugal nagmamawot na manggana, garo man sana niya minamawot na madaog an iba para makaganar siya.

Nagpapatanid man an Bibliya na dai ta isipon na an suwerte sarong misteryosong puwersa na puwedeng magtao nin mga bendisyon. Sa Israel kaidto, may nagkapira na nawaran nin pagtubod sa Diyos asin nagpuon na ‘magpuwesto nin lamesa para sa diyos nin Suwerte.’ Inaako daw nin Diyos an arog kaiyan na debosyon sa “diyos nin Suwerte”? Dai, sinabi niya sa sainda: “Padagos nindong ginibo kun ano an maraot sa sakong paghiling, asin pinili nindo kun ano an nakakapaanggot sa sako.”—Isaias 65:11, 12.

Totoo, sa nagkapirang parte kan kinaban, ginagamit an mga pondo hali sa legal na mga sugal para sa edukasyon, pagpauswag kan ekonomiya, asin iba pang mga programa para sa publiko. Pero ano man an paggamitan kan pondong iyan, dai man giraray magbabago kun sain iyan hali—mga gibong hayagan na nag-eengkaminar nin kahanaban asin pagkamakasadiri asin na nagpopromotir kan ideya na makua an sarong bagay na dai man pigpagalan.

“Dai mo pagmawuton . . . an ano pa man na sadiri kan saimong kapwa.”—Exodo 20:17.

AN SINASABI KAN BIBLIYA

Nagpapatanid an Bibliya na “an mga determinadong yumaman nahuhulog sa sugot saka sa siod asin sa dakul na daing saysay saka nakakadanyar na mga pagmawot na minatuklang sa mga tawo pasiring sa kalaglagan asin kapahamakan.” (1 Timoteo 6:9) An pinakaugat kan pagsugal iyo an kahanaban, asin an kahanaban nakakaraot na marhay kaya iiniba ngani iyan kan Bibliya sa nagkapirang paggawi na dapat nanggad likayan.—Efeso 5:3.

An pagsugal nakapokus sa pagmawot na magkaigwa nin kayamanan na dai pinagpagalan kaya nagigin dahilan iyan nin pagkamuot sa kuwarta—sarong bagay na ibinibilang kan Bibliya na “gamot nin gabos na klase nin nakakadanyar na bagay.” An pagmawot sa kuwarta puwedeng mangibabaw sa buhay nin sarong tawo, na nagigin dahilan nin grabeng pagkapurisaw asin pagkaraot kan relasyon nin saro sa Diyos. Ilinadawan kan Bibliya an mga nasiod kan pagkamuot sa kuwarta na garo ninda “pigparasaksak an saindang sadiri nin dakul na kakulugan.”—1 Timoteo 6:10, nota sa ibaba.

An kahanaban minaresulta sa pagkadiskontento—bako sindang kontento sa saindang estado sa buhay saka bako sindang maugma. “An mamumuton sa pirak dai nuarin man makokontento sa pirak, asin an mamumuton sa kayamanan dai nuarin man makokontento sa ginaganar niya.”—Eclesiastes 5:10.

An minilyon na naakit sa pagsugal pag-abot nin panahon nagin adikto na diyan. Lakop na marhay an problemang ini, asin sa Estados Unidos pa sana, kinakarkulong minilyon an adikto sa pagsugal.

Sinasabi kan sarong talinhaga: “An mana na sa kapuon-puuni nakua sa mahanab na paagi dai magigin bendisyon sa katapos-tapusi.” (Talinhaga 20:21) Huli sa pagkaadikto sa pagsugal, may mga nalubog sa utang o nabangkarote pa ngani asin dakul sainda an nawaran nin trabaho saka naraot an relasyon sa saindang agom asin mga amigo. An pag-aplikar sa mga prinsipyo sa Bibliya na nagtatao nin paggiya makakatabang sa saro na malikayan an mga puwedeng magin maraot na epekto kan pagsugal sa saiyang buhay asin kaugmahan.

“An mga determinadong yumaman nahuhulog sa sugot saka sa siod asin sa dakul na daing saysay saka nakakadanyar na mga pagmawot na minatuklang sa mga tawo pasiring sa kalaglagan asin kapahamakan.”—1 Timoteo 6:9.