PAGKAHALI ni Pedro asin Juan sa lulubngan ni Jesus, nawalat si Maria na naghihibi. Nagsirip siya sa lulubngan, arog kan nasa ritrato sa sinundan na istorya. Duman, may nahiling siyang duwang anghel! Hinapot ninda siya: ‘Ta’no ta naghihibi ka?’

Nagsimbag si Maria: ‘Kinua ninda an Kagurangnan. Dai ko aram kun sain ninda dinara.’ Tapos nagbirik si Maria asin may nahiling siyang lalaki. Hinapot siya kaini: ‘Si’say an pighahanap mo?’

Inisip ni Maria na iyo idto su hardinero asin na kinua kaini an bangkay ni Jesus. Kaya sinabi ni Maria: ‘Kun kinua nindo siya, sain tabi nindo dinara?’ Pero an totoo, si Jesus an lalaking ini. Nagsulot siya nin lawas na dai siya mabibisto ni Maria. Pero kan apudon siya kan lalaki sa pangaran, saka naaraman ni Maria na si Jesus ini. Nagdalagan si Maria asin sinabi sa mga disipulo: ‘Nahiling ko an Kagurangnan!’

Kan aldaw man sanang iyan, mantang naglalakaw pasiring sa baryo nin Emaus an duwang disipulo, may lalaking nakisabay sainda. Munduon an mga disipulo ta kagagadan pa sana ni Jesus. Pero ipinaliwanag kan lalaki an dakul na bagay sa Bibliya na nagpagian kan pagmati ninda. Kan magpundo sinda para magkakan, saka sana namidbid kan mga disipulo na si Jesus an lalaki. Biglang nawara si Jesus, asin an mga disipulo nagpa-Jerusalem tulos ’nganing ibareta iyan sa mga apostol.

Nagpahiling man si Jesus ki Pedro asin ugmahon an mga nakaisi kaini. Dangan naabutan kan duwang disipulo an mga apostol sa Jerusalem. Inistorya kan duwa kun paano man nagpahiling sainda si Jesus sa dalan. Kan mismong oras na pig-uurulayan ninda ini, aram mo kun ano an makangangalas na nangyari?

Hilinga an ritrato. Biglang nagpahiling si Jesus sa laog mismo kan kuwarto, dawa nakabarat iyan. Ugmahon an mga disipulo! Mabibilang mo daw kun pirang beses nang nagpahiling si Jesus sa mga parasunod niya? Ano, limang beses?

Dai ninda kaiba an apostol na si Tomas kan oras na idto. Kaya sinabi kan mga disipulo saiya: ‘Nahiling mi an Kagurangnan!’ Pero an sabi ni Tomas, matubod sana siya kun mahiling niya mismo si Jesus. Pakalihis nin walong aldaw, nagkatiripon giraray an mga disipulo sa sarong kuwartong nakabarat asin kaiba na ninda si Tomas. Bigla na sana, nagtunga si Jesus sa atubangan ninda. Nagtubod na si Tomas.