SARONG aldaw, sinabi ni Jesus sa sarong lalaki na dapat niyang mamutan an saiyang kapwa. Naghapot an lalaki: ‘Si’say an sakuyang kapwa?’ Aram ni Jesus na iniisip kan lalaki na an mga kalahi asin karelihiyon niya sana an saiyang kapwa. Hilingon ta kun anong simbag ni Jesus.

Kun minsan, nagtutukdo si Jesus paagi sa pag-istorya. Kaya ngunyan, nag-istorya siya manungod sa sarong Judio asin sarong Samaritano. Aram ta na bagang an kadaklan na Judio habo sa mga Samaritano. Uni an istorya ni Jesus:

Sarong aldaw, may Judio na naglalakaw pababa sa bukid pa-Jerico. Sa dalan, tinambangan siya nin mga tulisan. Kinua ninda su kuwarta niya tapos binugbog siya sagkod na haros magadan na.

Dai nahaloy, may saserdoteng Judio na nag-agi. Nahiling niya an binugbog na lalaki. Ano daw an ginibo kan saserdote? Mala, nagbalyo siya sa ibong na gilid kan dalan asin nagdurudiretso sa paglakaw. Dangan, saro pang relihiyosong lalaki an uminagi. Saro siyang Levita. Nagpundo daw siya? Dai, dai lamang niya tinabangan su lalaki. Uto, parayo na su saserdote asin Levita.

Pero hilinga ining kaiba kan lalaking binugbog. Samaritano siya alagad pigtatabangan niya an Judio. Pigbubulong niya an mga lugad kaini. Tapos, dinara niya an Judio sa sarong lugar na makakapahingalo ini sagkod na magrahay.

Pagkatapos mag-istorya, sinabi ni Jesus sa naghapot saiya: ‘Sa hiling mo, si’say sa tulong ini an nagin maray na kapwa sa lalaking binugbog? An saserdote, an Levita o an Samaritano?’

Nagsimbag an lalaki: ‘An Samaritano, ta nagin mabuot siya sa lalaking binugbog.’

Sinabi ni Jesus: ‘Tama ka. Kaya arog man kaiyan an gibuhon mo sa iba.’

Dai ka daw nagagayunan sa paagi nin pagtukdo ni Jesus? Kun pag-aadalan ta an mga sinabi ni Jesus sa Bibliya, dakulon nanggad kitang manunudan na importanteng bagay!