Pagkatapos na sabihon kan anghel na si Gabriel sa hoben na babaying si Maria na mangangaki siya nin sarong lalaki na papangaranan na Jesus asin mamamahala bilang Hadi sagkod lamang, naghapot si Maria: “Paano mangyayari ini, mantang dai man ako nakikidurog sa sarong lalaki?”—Lucas 1:34.

“An banal na espiritu madatong sa saimo,” an simbag ni Gabriel, “asin an kapangyarihan kan Kahuruhalangkawi malindong sa saimo. Asin huli kaiyan an saro na mamumundag aapudon na banal, Aki nin Diyos.”—Lucas 1:35.

Huling tibaad masakit para ki Maria na paniwalaan an saiyang mensahe, idinagdag ni Gabriel: “Uya! an paryente mong si Elizabeth nangidam man nin sarong aking lalaki maski ngani siya gurang na, asin ini an ikaanom na bulan kan pagbados niya, an baog daang babayi; huli ta dai nin deklarasyon na imposible sa Diyos.”—Lucas 1:36, 37.

Nagtubod si Maria sa sinabi ni Gabriel, arog kan mahihiling ta sa simbag niya. “Uni ako, an babaying uripon ni Jehova!” an sabi niya. “Mangyari lugod iyan sa sako sigun sa deklarasyon mo.”—Lucas 1:38.

Pagkahali ni Gabriel, nag-andam si Maria para dalawon si Elizabeth, na nakaistar kaiba kan agom kaining si Zacarias, sa mabulod na rehiyon nin Judea harani sa Jerusalem. Puon sa harong ni Maria sa Nazaret, kaipuhan niyang magbaklay nin mga tulo o apat na aldaw.

Kan makaabot na si Maria sa harong ni Zacarias, naglaog siya asin nagtaong galang sa paryente niyang si Elizabeth. Huli kaiyan, napano nin banal na espiritu si Elizabeth, asin sinabi niya ki Maria: “Biniyayaan ka sa gabos na babayi, asin biniyayaan an bunga kan saimong tulak! Kaya paanong napasakuya an onrang ini, na magdigdi sa sako an ina kan sakuyang Kagurangnan? Huli ta kan madangog ko an saimong pagtaong galang, an umboy sa sakong tulak luminukso sa kaugmahan.”—Lucas 1:42-44.

Dangan nagsimbag si Maria na may udok sa pusong pasasalamat: “An sakuyang kalag nagpapamuraway ki Jehova, asin an sakuyang espiritu dai mapugulan sa paggaya-gaya nin labi-labi dahil sa Diyos na sakong Paraligtas, huli ta nahiling niya an hamak na kamugtakan kan saiyang uripon na babayi. Asin uya! puon ngunyan ipapahayag akong maugma kan gabos na henerasyon, huli ta an Saro na makapangyarihan naggibo nin darakulang bagay para sa sako.” Maririsa niyato na sa ibong kan pabor na ipinahiling ki Maria, itinao niya sa Diyos an gabos na onra. “Banal an saiyang ngaran,” an sabi niya, “asin sa gabos na henerasyon an saiyang pagkahirak yaon sa mga natatakot sa saiya.”—Lucas 1:46-50.

Paagi sa ipinasabong na makahulang tataramon, padagos na inumaw ni Maria an Diyos: “Ipinahiling niya an saiyang kapangyarihan paagi sa saiyang takyag; iwinarak niya an mga mapalangkaw, na nahahayag huli sa mga intensiyon kan saindang mga puso. Ibinaba niya hali sa mga trono an makapangyarihan na mga tawo asin ilinangkaw an mga hamak; binasog niya nin marahay na mga bagay an mga gutom asin pinahali na daing dara an mga mayaman. Tinabangan niya an Israel na saiyang lingkod, na ginigirumdom an manungod sa saiyang pagkahirak sagkod lamang, siring kan itinaram niya sa satong mga apuon, ki Abraham asin sa mga gikan sa saiya.”—Lucas 1:51-55.

Sa laog nin mga tulong bulan, nag-istar si Maria ki Elizabeth, na posibleng para makatabang durante kan huring mga semana kan pagbabados kaini. Nakakaugma nanggad na an duwang maimbod na babaying ini, na parehong nagbados sa tabang nin Diyos, nagkaibanan sa panahon na ini kan saindang buhay!

Asin mangnuhon man an onra na itinao ki Jesus dawa bago pa siya mamundag. Inapod siya ni Elizabeth na “sakuyang Kagurangnan,” asin an umboy sa tulak niya “luminukso sa kaugmahan” kan inot na magpahiling si Maria. Lain nanggad iyan sa nagin pagtratar kan iba ki Maria pag-abot nin panahon, asin sa saiyang mamumundag pa sanang aki, arog kan mahihiling ta.