Sa halipot na panahon, nasa “ibong kan Jordan” si Jesus, sa lugar na inaapod Perea. (Juan 10:40) Nagbabaklay na siya ngunyan patimog pa-Jerusalem.

Kaiba ni Jesus an mga disipulo, saka an “dakulon na tawo,” kaiba na an mga parasingil nin buhis asin mga parakasala. (Lucas 14:25; 15:1) May mga Fariseo asin mga eskriba man, na nagkukuwestiyon saka nagtatatsar sa mga sinasabi asin ginigibo niya. Dakul sindang dapat pag-isipan pagkatapos nindang madangog an mga ilustrasyon ni Jesus dapit sa nawarang karnero, nawarang aki, asin sa tawong mayaman asin si Lazaro.—Lucas 15:2; 16:14.

Tibaad nagigirumduman pa ni Jesus an mga pagtatsar asin paggurumod-gumod kan mga nagkokontra sa saiya, kaya kinaulay niya an mga disipulo. Sinambit niya an nagkapirang punto na itinukdo na niya kan nakaagi sa Galilea.

Halimbawa, sinabi ni Jesus: “Dai malilikayan na mag-abot an mga bagay na nagigin dahilan nin pagkakasala. Minsan siring, hirak man sa saro na huli sa saiya nagkakasala an iba! . . . Mag-ingat kamo. Kun makagibo nin kasalan an saimong tugang, sawayon mo siya, asin kun pagbasulan niya iyan, patawadon mo siya. Dawa pa pitong beses siyang magkasala sa saimo sa sarong aldaw asin pitong beses siyang magbalik sa saimo, na sinasabi, ‘Patawadon mo ako,’ patawadon mo siya.” (Lucas 17:1-4) An huring mga tataramon na iyan puwedeng nagpagirumdom ki Pedro kan ihinapot niya kaidto dapit sa pagpapatawad nin sagkod sa pitong beses.—Mateo 18:21.

Magigibo daw kan mga disipulo na gumawi kauyon kan mga tataramon ni Jesus? Kan sabihon ninda ki Jesus, “Dagdagi an samong pagtubod,” sinigurado niya sa sainda: “Kun igwa kamong pagtubod na siring kasadit kan pisog nin mustasa, sasabihon nindo sa puon na ini nin mulberi, ‘Magabot ka asin mamugtak sa dagat!’ asin masunod iyan sa saindo.” (Lucas 17:5, 6) Iyo, dawa an kadikit na pagtubod puwedeng makagibo nin dakulang mga bagay.

Itinukdo ni Jesus sa mga apostol na mahalaga an kapakumbabaan asin tama sanang pagmansay sa sadiri: “Siisay sa saindo, kun igwa siya nin uripon na nag-aarado o nagpapastor, an masabi sa saiya pag-abot kaini hali sa uma, ‘Magdigdi ka tulos sa may lamesa asin magkakan’? Imbes, bako daw na sasabihon niya sa saiya, ‘Ihanda mo na an sakong pamanggihan, asin magsulot ka nin epron saka serbihan mo ako sagkod na matapos akong magkakan asin mag-inom, tapos puwede ka nang magkakan asin mag-inom’? Bako daw na dai man siya makakamati nin utang na buot sa uripon huli ta ginibo man sana kaini an saiyang trabaho? Siring man, kun nagibo na nindo an gabos na bagay na iinasignar sa saindo, sabihon nindo: ‘Mga uripon sana kami. Ginibo mi lang an dapat ming gibuhon.’”—Lucas 17:7-10.

Dapat masabutan kan lambang lingkod nin Diyos na mahalaga na inuton sa buhay ninda an intereses nin Diyos. Dapat man na girumdumon kan kada saro na may pribilehiyo siyang sambahon an Diyos bilang miyembro kan saiyang pamilya.

Minalataw na dai nahaloy pakatapos kaini, nag-abot an mensaherong isinubol ni Maria asin Marta. Sinda an mga tugang na babayi ni Lazaro, asin nakaistar sinda sa Betania sa Judea. Ibinareta kan mensahero: “Kagurangnan, may hilang an ugos mong amigo.”—Juan 11:1-3.

Dawa ngani naaraman ni Jesus na grabe an hilang kan amigo niyang si Lazaro, dai siya pinangibabawan nin grabeng kamunduan. Imbes, sinabi niya: “Bako kagadanan an pinakasagkudan kan hilang na ini, kundi kamurawayan nin Diyos, tanganing an Aki nin Diyos mapamuraway paagi kaiyan.” Nagdanay pa siya nin duwang aldaw sa lugar na pinipirmihan niya dangan sinabi sa mga disipulo: “Magduman giraray kita sa Judea.” Nagkontra sinda: “Rabbi, dai pa sana nahahaloy, gusto kang gapuon kan mga taga Judea, tapos maduman ka giraray?”—Juan 11:4, 7, 8.

Nagsimbag si Jesus: “An sarong aldaw igwa nin 12 oras na maliwanag, bako? Kun an siisay man naglalakaw miyentras na maliwanag, dai siya masisingkog sa ano man, dahil nahihiling niya an liwanag kan kinaban na ini. Alagad kun an siisay man naglalakaw sa banggi, nasisingkog siya, huli ta mayo siyang liwanag.”  (Juan 11:9, 10) Minalataw na an buot niyang sabihon, dai pa natatapos an panahon na itinalaan nin Diyos para sa ministeryo niya. Sagkod na dai pa iyan natatapos, kaipuhan niyang gamiton nin lubos an halipot na panahon na natatada.

Sinabi pa ni Jesus: “Si Lazaro na amigo ta nagtuturog, pero mapasiring ako sa saiya tanganing pukawon siya.” Minalataw na iniisip kan mga disipulo na nagtuturog sana si Lazaro asin na mararahay siya, kaya nagsabi sinda: “Kagurangnan, kun nagtuturog siya, mararahay pa siya.” Malinaw na sinabi sa sainda ni Jesus: “Si Lazaro nagadan . . . Pero dumanon ta na siya.”—Juan 11:11-15.

Aram ni Tomas na si Jesus puwedeng gadanon sa Judea, alagad gusto niyang suportaran siya, kaya dinagka niya an kapwa mga disipulo: “Magduman man kita, tanganing magadan kitang kaiba niya.”—Juan 11:16.