Siisay an Maduman sa Langit, Asin Taano?
Kapitulo 14
Siisay an Maduman sa Langit, Asin Taano?
1. Ano an isisimbag nin dakol sa hapot na, Siisay an maduman sa langit, asin taano?
DAKOL an nagsasabi, ‘An gabos na marahay na tawo maduman sa langit.’ Minsan siring, kun hinahapot kun taano ta maduman sinda sa langit, tibaad sabihon ninda: ‘Tanganing makaibanan nin Dios,’ o, ‘Iyan an balos sa pagigin marahay.’ Ano an itinotokdo kan Biblia manongod kaini?
2, 3. (a) Taano ta nakasisierto kita na may mga tawo na maduman sa langit? (b) Anong hapot an kaipuhan na simbagon?
2 Liniliwanag kan Biblia na si Jesus binuhay liwat hale sa mga gadan asin na sia nagduman sa langit. Saro pa, iyan nagsasabi na an ibang tawo dadarahon duman. Kan banggi bago sia nagadan, sinabihan ni Jesus an saiyang maimbod na mga apostol: “Sa harong kan sakong Ama kadakol kan ontokan. Ta kun bako, sinabihan ko kutana kamo, huli ta ako maduman tanganing mag-andam nin lugar para sa saindo. Siring man, kun ako magduman asin mag-andam nin lugar para sa saindo, ako madigdi liwat asin ipag-iiba ko kamo, tanganing kun saen ako duman man kamo.”—Juan 14:1-3.
3 Malinaw na sinasabihan ni Jesus an saiyang mga apostol na sinda dadarahon sa langit tanganing makaibanan nia. Si apostol Pablo parateng nagsasabi kaidto sa enot na mga Kristiano manongod sa makangangalas na paglaom na iyan. Halimbawa, sia nagsurat: “Kun para sa sato, an satong pagkasiudadano nasa kalangitan, na hale man duman kita galagang naghahalat sa sarong paraligtas, an Kagurangnan na Jesu-Cristo.” (Filipos 3:20, 21; Roma 6:5; 2 Corinto 5:1, 2) Basado sa mga panugang iyan, minilyon an naglaom sa langitnon na buhay. Alagad an gabos daw na marahay na tawo maduman sa langit?
AN GABOS DAW NA MARAHAY NA TAWO MINADUMAN SA LANGIT?
4, 5. Ano an pruweba na si David asin Job dai nagduman sa langit?
4 Dai mahaloy pagkabuhaya liwat ki Jesus hale sa mga gadan, sinabihan ni apostol Pedro an sarong grupo nin mga Judio: “[An] patriarkang si David . . . nagadan asin ilinobong patin an saiyang lolobngan nasa sato sagkod sa aldaw na ini. Sa katunayan si David dai nagsakat sa kalangitan.” (Gibo 2:29, 34) Kaya an marahay na tawong si David dai nagsakat sa langit. Kumusta man an matanos na tawong si Job?
5 Kan nasa kasakitan, si Job namibi sa Dios: “O marahay pang ako tagoon mo sa Sheol [an lolobngan], na ako tahoban mo sagkod na umontok an saimong kaanggotan, na tawan mo ako nin talaan na panahon asin girumdomon mo ako!” Si Job naglaom na kun sia magadan sia mawawaran nin pagkaaram sa lolobngan. Aram nia na dai sia maduman sa langit. Alagad may paglaom sia, arog kan ipinaliwanag nia: “Kun an makosog na tawo magadan puwede pa daw siang mabuhay giraray? Sa gabos na aldaw kan sakong obligadong paglilingkod [itinalaan na panahon sa lolobngan] ako maghahalat, sagkod na umabot an sakuyang pagkakalda. Ika maapod, asin ako masimbag sa saimo.”—Job 14:13-15.
6, 7. (a) Ano an nagpapaheling na mayo nin siisay man na nagadan bago si Cristo an nagduman sa langit? (b) Ano an mangyayari sa gabos na maimbod na nagadan bago si Cristo?
6 Si Juan, na nagbautismo ki Jesus, marahay man na tawo. Pero si Jesus nagsabi: “An saro na sadit sa kahadean kan kalangitan orog pa kadakula ki sa saiya.” (Mateo 11:11) Ini huli ta si Juan Bautista dai maduman sa langit. Kan si Jesus nasa daga, na labi nang 4,000 taon pakalihis kan pagrebelde ni Adan asin Eva, sia nagsabi: “Dai nin siisay man na nakasakat sa langit kundi idtong naghilig hale sa langit, an Aki nin tawo.”—Juan 3:13.
7 Kun siring, sono sa mismong mga tataramon ni Jesus, mayo nin tawo na nagsakat sa langit sa laog kan bilog na 4,000 taon kan kasaysayan nin tawo sagkod kan saiyang aldaw. Si David, Job asin Juan Bautista mag-aako nin pagkabuhay liwat sa daga. An totoo, an gabos na maimbod na lalaki asin babae na nagadan bago si Jesus nagadan may paglaom na mabuhay giraray sa daga, bakong sa langit. Sinda bubuhayon liwat tanganing magin nagkapira sa mga sakop sa daga kan kahadean nin Dios.—Salmo 72:7, 8; Gibo 17:31.
KUN TAANO TA MAY MGA MAIMBOD NA MADUMAN SA LANGIT
8. Mahalaga an simbag sa anong mga hapot, asin taano?
8 Taano si Jesus ta nagduman sa langit? Ano an trabaho nia duman? An simbag sa mga hapot na ini mahalaga. Ini huli ta an mga maduman sa langit magigin katabang ni Jesus sa saiyang mga gibohon. Sinda maduman sa langit para sa mismong katuyohan na iyan.
9, 10. Sono ki Daniel, siisay apuwera ki Cristo an maghahade sa gobyerno nin Dios?
9 Nanodan niato sa mas enot na mga kapitulo na si Jesus maghahade sa paraisong bagong daga bilang hade kan langitnon na gobyerno nin Dios. Haloy pa bago si Jesus nagdigdi sa daga, an libro sa Biblia na Daniel naghula na an “aki nin tawo” ‘tatawan nin paghade.’ An “Aki nin tawo” iyo si Jesu-Cristo. (Marcos 14:41, 62) Asin si Daniel nagpadagos na magsabi: “An saiyang paghade sarong paghade na daing katapusan na dai mapapara, asin an saiyang kahadean saro na dai malalaglag.”—Daniel 7:13, 14.
10 Minsan siring, mahalaga na mangnohon digdi sa libro ni Daniel na an “aki nin tawo” dai maghahade nin solo. An Biblia nagsasabi: “Asin an kahadean asin an paghade . . . itinao sa banwaan na mga banal kan Kaharohalangkawe. An saindang kahadean sarong kahadean na dai matatapos.” (Daniel 7:27) An mga tataramon na ini na “banwaan” asin “saindang kahadean” nagpaparisa sa sato na may iba na maghahade kaiba ni Cristo sa gobyerno nin Dios.
11. Ano an nagpapaheling na an enot na mga parasunod ki Cristo maghahade kaiba nia?
11 Sa ultimong banggi na ginamit ni Jesus kaiba kan saiyang maimbod na 11 apostol ipinaheling nia na sinda magigin mga hade kaiba nia sa kahadean nin Dios. Sinabihan nia sinda: “Kamo an mga nakidamay sa sako sa mga pagbalo sa sako; asin ako nakikipagtipan sa saindo, kun paanong an sakong Ama nakipagtipan sa sako, para sa sarong kahadean.” (Lucas 22:28, 29) Kan huri, si apostol Pablo asin Timoteo iiniba sa tipan na ini, o kondisyon, para sa sarong kahadean. Sa dahelan na iyan si Pablo nagsurat ki Timoteo: “Kun padagos kitang magtagal, kita man iribang maghahade.” (2 Timoteo 2:12) Siring man, si apostol Juan nagsurat manongod sa mga magigin “hade sa daga” kaiba ni Jesu-Cristo.—Kapahayagan 5:9, 10; 20:6.
12. Anong bagay manongod sa “banhi” ni Abraham an nagpapaheling na si Cristo magkakaigwa nin kairibang hade?
12 Kaya an mga maduman sa langit minaduman tanganing magin katabang na hade ni Cristo sa langitnon na gobyerno nin Dios. Mantang si Jesus an mayor na “banhi” na ipinanuga, an Dios minapili nin iba pa hale sa katawohan tanganing maghade kaiba ni Jesus sa kahadean. Kun siring sinda nagigin kabtang kan “banhi,” arog kan sabi kan Biblia: “Kun kamo rogaring ni Cristo, kamo sa katunayan banhi ni Abraham, mga paramana mapadapit sa panuga.”—Galacia 3:16, 29; Santiago 2:5.
PIRA AN MADUMAN SA LANGIT?
13. (a) Taano an mga omboy ta dai maduman sa langit? (b) Paano ilinadawan ni Jesus an kabilangan kan mga maako kan Kahadean?
13 Mantang sinda maghahade sa daga, maliwanag na an mga maduman sa langit mga nabalo asin probadong parasunod ni Cristo. Ini nangangahulogan na an mga omboy o aki, na dai pa biyong nabalo sa laog nin dakol na taon nin Kristianong paglilingkod, dai dadarahon sa langit. (Mateo 16:24) Minsan siring, an mga aking iyan na nagagadan may paglaom na buhayon liwat sa daga. (Juan 5:28, 29) Kaya an kabilangan kan mga maduman sa langit magigin kadikit kun ikokomparar sa dakol na mag-aako nin buhay sa daga sa pagsakop kan Kahadean. Sinabihan ni Jesus an saiyang mga disipulo: “Dai kamo matakot, sadangoton na aripompon, huli ta an saindong Ama nag-oyon na itao sa saindo an kahadean.”—Lucas 12:32.
14. Pira an minakompuwesto sa “sadangoton na aripompon” na maduman sa langit?
14 Gurano kakadikit kan grupong iyan nin mga maghahade sa Kahadean nin Dios? An kaiba sana daw dian iyo an mga apostol asin an iba pang enot na mga parasunod ni Jesus? Bako, ipinaheheling kan Biblia na mas dakol pa dian an makakaiba sa “sadangoton na aripompon.” Sa Kapahayagan 14:1, 3 an Biblia nagsasabi: “Asin ako nagheling, asin, uya! an Kordero [si Jesu-Cristo] nagtitindog sa [langitnon na] Bukid nin Sion, asin sa kaibanan nia an sanggatos may apat na polo may apat na ribo . . . na binakal [o, kinua] hale sa daga.” Mangnoha na 144,000 sana an naheling kaiba kan Kordero, si Jesu-Cristo, sa langitnon na Bukid nin Sion. (Hebreo 12:22) Kaya imbes na an gabos na marahay na tawo paduman sa langit, ipinaheheling kan Biblia na 144,000 sanang probado asin maimbod na mga tawo an dadarahon duman tanganing maghade kaiba ni Cristo.
KUN TAANO TA PINIPILI SA DAGA
15. Taano ta pinipili nin Dios sa katawohan an mga maghahade sa Kahadean?
15 Alagad taano ta pinipili nin Dios an mga hadeng ini sa katawohan? Taano ta dai papaghadeon an mga anghel kaiba ni Cristo? Bueno, digdi sa daga na an diretso ni Jehova sa paghade inangat. Digdi puwedeng baloon an kaimbodan sa Dios nin mga tawo sa irarom nin pagtumang hale sa Diablo. Digdi pinatunayan ni Jesus an saiyang lubos na kaimbodan sa Dios sa irarom nin pagbalo asin itinao an saiyang buhay bilang pantubos sa katawohan. Kaya hale man sa daga na iinareglo ni Jehova na kumua nin “sadangoton na aripompon” nin mga tawo na makakaiba kan saiyang Aki sa langitnon na kahadean. Sinda an mga, paagi sa saindang kaimbodan sa Dios, nagpatunay na kaputikan an sahot kan Diablo na an mga tawo naglilingkod sana sa Dios para sa paslong mga dahelan. Kun siring, angay sana na gamiton ni Jehova an mga tawong ini para sa kamurawayan nia.—Efeso 1:9-12.
16. Taano ta makapagpapasalamat kita na an mga hade sa Kahadean nabuhay sa daga?
16 Saro pa, isip-isipa kun gurano karahay na magkaigwa nin mga hade na mga tawo na nagmaimbod sa Dios digdi sa daga, na an kadaklan sa sainda isinakripisyo pa ngani an saindang buhay para sa Kahadean. (Kapahayagan 12:10, 11; 20:4) An mga anghel dai napaatubang sa siring na mga pagbalo. Ni inagihan man ninda an mga problema na uso sa katawohan. Kaya dai ninda lubos na masasabotan kun paano an magin makasalan na tawo asin magkaigwa kan mga problema na inaagihan niato na mga tawo. Alagad an 144,000 makakasabot ta inagihan man ninda mismo an mga problemang ini. An iba sa sainda kinaipuhan na haleon an makasalan na gayong mga gibo, asin aram ninda kun gurano kadepisil na gibohon iyan. (1 Corinto 6:9-11) Kun siring, tatrataron ninda sa mapagsabot na paagi an saindang mga sakop sa daga.—Hebreo 2:17, 18.
AN KONGREGASYON NIN DIOS
17. Ano an kahulogan kan terminong “kongregasyon”?
17 Sinasabi sato kan Biblia na si Cristo an payo kan kongregasyon nin Dios, asin na an mga miembro kaiyan sakop ni Jesus. (Efeso 5:23, 24) Kaya an terminong “iglesya,” o “kongregasyon nin Dios,” dai nangangahulogan nin sarong edipisyo. Imbes, iyan nangangahulogan nin sarong grupo nin mga Kristiano. (1 Corinto 15:9) Ngonyan kita nagtataram manongod sa kongregasyon nin mga Kristiano na nabibilangan niato. Kapareho man kaiyan, nababasa niato sa Biblia an manongod sa “kongregasyon kan mga taga-Laodicea,” asin, sa surat ni apostol Pablo ki Filemon, manongod sa “kongregasyon na [nasa saiyang] harong.”—Colosas 4:16; Filemon 2.
18. (a) Siisay an minakompuwesto sa “kongregasyon kan nabubuhay na Dios?” (b) Ano pa an mga apod sa kongregasyon na ini sa Biblia?
18 Minsan siring, kun an Biblia nagtataram manongod sa “kongregasyon kan nabubuhay na Dios,” iyan napapanongod sa sarong partikular na grupo kan mga parasunod ni Cristo. (1 Timoteo 3:15) Sinda inaapod man na “an kongregasyon kan mga panganay na nalilista sa kalangitan.” (Hebreo 12:23) Kaya an “kongregasyon nin Dios” na ini kompuwesto kan gabos na Kristiano sa daga na may paglaom sa langitnon na buhay. Sa kagabsan, 144,000 sana an sa katapustapusi makompuwesto sa “kongregasyon nin Dios.” Ngonyan pipira na sana sa mga ini, na natatada, an nasa daga pa. An mga Kristiano na naglalaom na mabuhay sagkod lamang sa daga naghahalat nin espirituwal na paggiya hale sa mga miembro kan “kongregasyon kan nabubuhay na Dios.” Inaapod man kan Biblia an kongregasyon na ini na may 144,000 na miembro na “an nobya, an agom kan Kordero,” “an hawak ni Cristo,” “an templo nin Dios,” “an Israel nin Dios,” asin an “Bagong Jerusalem.”—Kapahayagan 21:9; Efeso 4:12; 1 Corinto 3:17; Galacia 6:16; Kapahayagan 21:2.
AN BAGONG BAGAY SA KATUYOHAN NIN DIOS
19. Anong bagong bagay an iinintrodusir nin Dios tanganing maotob an saiyang orihinal na katuyohan para sa daga?
19 Dai liniwat ni Jehova Dios an saiyang katuyohan para sa daga asin katawohan na yaon dian pakatapos na darahon ni Adan an rasa nin tawo sa dalan nin kasalan asin kagadanan. Kun iyan ginibo nin Dios, iyan nangahulogan kutana na dai nia kaya na otobon an saiyang orihinal na katuyohan. An katuyohan nia poon sa kapinonan iyo na magkaigwa nin lakop sa dagang paraiso na pano nin maogma, mabagsik na mga tawo, asin an katuyohan na iyan nagdadanay. An solamenteng bagay na iinintrodusir nin Dios iyo an saiyang areglo para sa bagong gobyerno tanganing maotob an saiyang katuyohan. Arog kan nasabotan na niato, an saiyang Aki, si Jesu-Cristo, iyo an mayor na hade sa gobyernong ini, asin may 144,000 na kukuanon sa katawohan tanganing maghade sa langit kaiba nia.—Kapahayagan 7:4.
20. (a) Siisay an minakompuwesto sa “bagong kalangitan” asin sa “bagong daga”? (b) Ano an kaipuhan na gibohon nindo tanganing magin kabtang kan “bagong daga”?
20 An mga hadeng ini sa langit iyo an makompuwesto sa “bagong kalangitan” kan bagong palakaw nin Dios. Alagad maliwanag na kun magkakaigwa nin matanos na mga hade sa daga, kun siring kaipuhan na igwa man sinda nin paghahadean. Inaapod kan Biblia an mga tawong ini na “bagong daga.” (2 Pedro 3:13; Kapahayagan 21:1-4) Kabale dian si Job, David asin Juan Bautista—iyo, an gabos na maimbod na nabuhay bago nagdigdi sa daga si Cristo. Alagad igwa nin mas dakol pa na makompuwesto sa “bagong daga,” kaiba an mga tawo na makaliligtas sa katapusan kan maraot na palakaw na ini nin mga bagay. Makakabilang daw kamo sa mga makaliligtas na ini? Boot daw nindong magin sakop kan gobyerno nin Dios? Kun iyo, may mga kahagadan na kaipuhan na maotob nindo.
[Mga Hapot Para sa Pag-adal]
[Mga ritrato sa pahina 121]
An marahay daw na mga tawong ini nagduman sa langit?
Hadeng David
Job
Juan Bautista
[Ritrato sa pahina 122]
Sa ultimo niang banggi kaiba an mga apostol, sinabi ni Jesus na sinda magigin mga hade kaiba nia sa kahadean kan saiyang Ama
