Pagigin Sakop kan Gobyerno nin Dios
Kapitulo 15
Pagigin Sakop kan Gobyerno nin Dios
1, 2. Ano an kaipuhan tanganing magin sakop kan gobyerno nin Dios?
BOOT daw nindong mabuhay sagkod lamang sa daga na sakop kan gobyerno nin Dios? An siisay man na nasa toltol na kaisipan masimbag nin, Iyo! Kakamtan an makangangalas na mga pakinabang. Alagad tanganing makamtan iyan dai kamo puwedeng iitaas sana an saindong kamot asin magsabi: ‘Boot kong magin sakop kan gobyerno nin Dios.’ Labi pa dian an kaipuhan.
2 Halimbawa, ipamugtak niato na boot nindong magin siudadano nin ibang nasyon. Tanganing magibo iyan, kaipuhan kamong makaabot sa mga kahagadan na ibinugtak kan mga namomoon sa gobyerno kan nasyon na iyan. Alagad bago nindo ini magibo, kaipuhan na aramon nindo kun ano an mga kahagadan na ini. Kaagid kaiyan, kaipuhan na maaraman nindo kun ano an hinahagad nin Dios sa mga boot na magin sakop kan saiyang gobyerno. Dangan kaipuhan na maotob nindo an mga kahagadan na ini.
KAIPUHAN AN KAARAMAN
3. Ano an sarong kahagadan sa pagigin sakop kan gobyerno nin Dios?
3 An sarong napakahalagang kahagadan sa pagigin sakop kan gobyerno nin Dios iyo an pagkaigwa nin kaaraman sa “tataramon” kaiyan. Tunay na ini rasonable. May mga gobyerno nin tawo na naghahagad man na an mga bagong siudadano makapagtaram kan tataramon kan saindang nasyon. Kun siring, anong “tataramon” an dapat na pag-adalan kan mga mag-aako nin buhay na sakop kan gobyerno nin Dios?
4. Anong “malinig na tataramon” an kaipuhan na manodan kan banwaan nin Dios?
4 Helinga an sinasabi ni Jehova manongod digdi sa saiyang Tataramon, an Biblia: “Huli ta sa panahon na iyan itatao ko sa mga banwaan an pagbago sa malinig na tataramon, tanganing sinda gabos mag-apod sa ngaran ni Jehova, tanganing daramay na maglingkod sa saiya.” (Sofonias 3:9) An “malinig na tataramon” na ini iyo an katotoohan nin Dios na nasa Biblia. Partikularmente, iyan an katotoohan manongod sa Kahadean nin Dios. Kaya tanganing magin sakop kan gobyerno nin Dios, kaipuhan na manodan nindo an “tataramon” na ini paagi sa pagkua nin kaaraman manongod ki Jehova asin sa saiyang areglo sa Kahadean.—Colosas 1:9, 10; Talinhaga 2:1-5.
5. (a) Ano an maninigo niatong maaraman manongod sa gobyerno nin Dios? (b) Anong kaaraman an kaipuhan niato tanganing magkamit nin buhay na daing katapusan?
5 Ngonyan an ibang gobyerno nin tawo naghahagad na an mga tatawan nin pagkasiudadano may aram manongod sa kasaysayan kan saindang gobyerno, patin sa mga detalye manongod sa pagpunsionar kaiyan. Siring man, maninigo nindong maaraman an siring na mga bagay manongod sa gobyerno nin Dios tangani kamong magin sakop kaiyan. An kaaraman na ini puwedeng gumiya pasiring sa buhay na daing sagkod. Sa pamibi sa saiyang Ama, si Jesus nagsabi: “Ini nangangahulogan nin buhay na daing katapusan, an saindang pagkua nin kaaraman dapit saimo, na iyo sanang tunay na Dios, asin sa saro na saimong sinugo, si Jesu-Cristo.”—Juan 17:3.
6. (a) Ano an pira sa mga hapot na maninigong masimbag kan mga sakop kan gobyerno nin Dios? (b) Kaya daw nindong simbagon iyan?
6 Kun napag-adalan nindo an naenot na mga kapitulo kan librong ini, ngonyan maninigo na igwa na kamo nin dakol sa pinakamahalagang kaaraman na ini. Igwa na daw? Ikakapaheling daw nindo na igwa na, paagi sa pagsimbag sa mga hapot na arog kan minasunod: Kasuarin enot na nasambitan nin Dios an saiyang katuyohan para sa gobyerno kan Kahadean? Siisay an nagkapira sa mga lingkod nin Dios na naglaom na magin mga sakop kaiyan sa daga? Pira an magigin hade kan gobyerno nin Dios? Saen maghahade an mga ini? Siisay an enot na mga pinili na magin mga hade sa gobyerno nin Dios? Paano pinatunayan ni Jesus na sia magigin marahay na hade? Alagad, tanganing magin sakop kan gobyerno nin Dios, labi pa sa pagkaigwa sana nin kaaraman manongod dian an kaipuhan.
KAIPUHAN AN MATANOS NA GAWE
7. Kun dapit sa mga gobyerno nin tawo, paano nagkakalaenlaen an mga kahagadan para sa pagkasiudadano?
7 An mga gobyerno ngonyan naghahagad na an mga bagong siudadano makaabot sa sarong pamantayan nin paggawe. Halimbawa, tibaad magsabi sinda na an lalaki dapat na saro sana an agom na babae asin an babae saro sana an agom na lalaki. Pero an iba pang gobyerno igwa man nin laen na mga ley. Tinotogotan ninda an saindang mga siudadano na magkaigwa nin labi sa sarong agom. Anong mga gawe an linalaoman sa mga tawo na boot na magin sakop kan gobyerno nin Dios? Ano an sinasabi nin Dios na tama manongod sa pag-agom?
8. (a) Ano an pamantayan nin Dios para sa pag-agoman? (b) Ano an pagsambay, asin ano an sinasabi nin Dios manongod dian?
8 Sa kapinonan ibinugtak ni Jehova an pamantayan para sa pag-agom kan tawan nia si Adan nin saro sanang agom na babae. An Dios nagsabi: “Babayaan nin lalaki an saiyang ama asin ina asin sia masaro sa saiyang agom asin sinda magigin sarong laman.” (Genesis 2:21-24) Ipinaliwanag ni Jesus na iyo ini an tamang pamantayan para sa mga Kristiano. (Mateo 19:4-6) Mantang an mga mag-agom nagin nang “sarong laman,” saindang linalanghadan an pag-agoman kun sinda nakikidorog sa iba. An aktong ini inaapod na pagsambay, asin sinasabi nin Dios na padudusahan nia an mga parasambay.—Hebreo 13:4; Malaquias 3:5.
9. (a) Ano an punto-de-vista nin Dios manongod sa mga tawo na nagdodorog na bako man na kasal? (b) Ano an pakikisaro?
9 Sa ibong na kampi, dakol an nagsasaro asin nagdodorog, pero dai sinda nagpapakasal. Minsan siring, dai katuyohan nin Dios na an haraning relasyon na ini sa pag-oltanan nin lalaki asin babae probaran sana. Kaya an pagsasaro na dai nagpakasal sarong kasalan tumang sa Dios, na iyo an naggibo kan areglo sa pag-agoman. Iyan inaapod na pakikisaro. An pakikisaro iyo an pakikidorog sa siisay man na bako nindong agom. Asin an Biblia nagsasabi: “Ini an boot nin Dios, . . . na kamo lumikay sa pakikisaro.” (1 Tesalonica 4:3-5) Kun siring, an pakikidorog nin sarong daing agom sa kiisay pa man sala.
10. Ano pang ibang seksuwal na gibo an tumang sa mga pagboot nin Dios?
10 Ngonyan dakol na mga lalaki asin babae an naggigibo nin mga aktong seksuwal kaiba nin mga tawo na kasekso ninda—lalaki sa lalaki asin babae sa babae. An siring na mga tawo inaapod mga homoseksuwal. Kun beses an mga babaeng homoseksuwal inaapod na Lesbian. Alagad an Tataramon nin Dios nagsasabi na an ginigibo ninda sala, na iyan “bastos.” (Roma 1:26, 27) Saro pa, tumang sa pagboot nin Dios na an saro magkaigwa nin seksuwal na relasyon sa sarong hayop. (Levitico 18:23) An siisay man na boot na mabuhay na sakop kan gobyerno nin Dios kaipuhan na lumikay sa inmoral na mga gaweng ini.
11. (a) Ano an punto-de-vista nin Dios manongod sa paggamit nin mga inomon na de alkohol? (b) An mga boot na magin sakop kan gobyerno nin Dios dapat na lumikay sa anong mga gawe na nakadadanyar sa salud?
11 An tama sanang pag-inom nin arak, serbesa o inomon na de alkohol bakong tumang sa pagboot nin Dios. An totoo, ipinaheheling kan Biblia na an kadikit na arak puwedeng ikarahay kan salud nin saro. (Salmo 104:15; 1 Timoteo 5:23) Alagad talagang tumang sa pagboot nin Dios an pagbuburat, o pakikiiba sa ngana-nganang mga parti na dian an mga tawo naggigibo nin mga gaweng inmoral. (Efeso 5:18; 1 Pedro 4:3, 4) Apuwera pa sa paggamit nin mga inomon na de alkohol tanganing maburat o magin “high,” an dakol ngonyan naggagamit nin laen-laen na droga para sa katuyohan na ini. Siring man, para sa kasingawan tibaad sinda magsigarilyo nin marihuana o tabako, mantang an iba tibaad magmama. Alagad an mga bagay na ini nagpaparamog sa saindang hawak asin nakakadanyar sa saindang salud. Kaya kun boot nindong magin sakop kan gobyerno nin Dios, kaipuhan na kamo lumikay sa nakadadanyar na mga bagay na ini.—2 Corinto 7:1.
12. (a) Ano an nagkapira sa madayang mga gawe na tumang sa mga pagboot nin Dios? (b) Paano an saro na naggigibo kan mga ini magkakamit kan pabor nin Dios?
12 Maliwanag na habo nin mga gobyerno nin tawo na magin bagong mga siudadano an mga kriminal. Asin si Jehova igwa nin mas halangkaw pang pamantayan. Hinahagad nia na kita “gumawe nin sadiosan sa gabos na bagay.” (Hebreo 13:18) Kun an mga tawo dai nag-ootob sa mga pagboot nin Dios, dai sinda totogotan na mabuhay na sakop kan saiyang kahadean. Ngonyan an mga tawo parateng nagsasagin sadiosan, pero sinda naglalapas sa dakol na pagboot. Minsan siring, naheheling nin Dios an gabos na bagay. Mayo nin siisay man na makakadaya sa saiya. (Hebreo 4:13; Talinhaga 15:3; Galacia 6:7, 8) Kaya sisiertohon ni Jehova na an mga tawo na naglalapas sa saiyang mga pagboot, arog baga kan mga pagboot tumang sa pagputik asin paghabon, dai magigin mga sakop kan saiyang gobyerno. (Efeso 4:25, 28; Kapahayagan 21:8) Pero an Dios mapasensia asin mapagpatawad. Kaya kun an parakasala pumondo sa saiyang maraot na mga gibo asin gumibo nin marahay, aakoon sia nin Dios.—Isaias 55:7.
13. Ano an maninigong magin punto-de-vista kan mga lingkod nin Dios manongod sa mga ley kan mga gobyerno nin tawo?
13 Alagad kumusta man an pagkuyog sa mga pagboot kan mga gobyerno nin tawo? Sagkod na igwa pa nin mga gobyerno nin tawo, hinahagad nin Dios na an saiyang mga lingkod magpasakop sa “haralangkaw na kapangyarihan” na ini. Kaipuhan na magbayad sa sainda nin mga buhis, dawa pa kun an mga buhis halangkaw asin tibaad dai oyon an saro sa paagi nin paggasto sa mga buhis. Saro pa, an mga ley kan gobyerno maninigong kuyugon. (Roma 13:1, 7; Tito 3:1) An napupuwera sana digdi iyo an kun an pagkuyog sa ley nagpapangyari sa saro na maglapas sa ley nin Dios. Sa kasong iyan, arog kan sinabi ni Pedro asin kan iba pang mga apostol, “Kami kaipuhan na magkuyog sa Dios bilang poon ki sa mga tawo.”—Gibo 5:29.
14. Paano niato ikakapaheling na an punto-de-vista niato kapareho sa punto-de-vista nin Dios manongod sa halaga nin buhay?
14 An Dios nagtatao nin halangkaw na halaga sa buhay. Dapat ining masabotan kan mga boot na magin sakop kan saiyang gobyerno. Malinaw na an paggadan tumang sa pagboot nin Dios. Alagad an pagkaongis parateng nagdadara sa paggadan, asin dawa sana kun an saro magpadagos na maongis sa saiyang kapwa sia dai man puwedeng magin sakop kan gobyerno nin Dios. (1 Juan 3:15) Kaya mahalaga na gibohon an sinasabi sa Biblia sa Isaias 2:4 manongod sa dai paggamit nin armas tanganing gumadan sa satong kapwa. Ipinaheheling kan Tataramon nin Dios na minsan an buhay nin sarong omboy na nasa matris pa kan ina mahalaga ki Jehova. (Exodo 21:22, 23; Salmo 127:3) Alagad ta minilyon na pagpakua sa aki an ginigibo taon-taon. An paglaglag na ini sa buhay tumang sa pagboot nin Dios, ta an tawo na nasa laog kan ina sarong nabubuhay na persona asin dai maninigong gadanon.
15. Anong mga pagboot kan Hade nin Dios an kaipuhan na kuyugon nin gabos na sakop kan Kahadean?
15 Pero, sa mga magigin sakop kan gobyerno nin Dios, labi pa sa dai sana paggibo kan sala o inmoral an kaipuhan. Sinda kaipuhan man na gumibo nin tunay na paghihingoa na gumibo nin maboot asin bakong paslong mga bagay para sa iba. Kaipuhan na sinda mamuhay sono sa diosnon na reglamento na itinao kan Hade, si Jesu-Cristo: “Kaya an gabos na boot nindong gibohon sa saindo nin mga tawo, gibohon man nindo sa sainda.” (Mateo 7:12) Si Jesus nagtao kan halimbawa sa pagpaheling nin pagkamoot sa iba. Itinao pa ngani nia an saiyang buhay para sa katawohan, asin pinagbotan an saiyang mga parasunod: “Kamo magkaminorootmootan; siring sa pagkamoot ko sa saindo.” (Juan 13:34; 1 Juan 3:16) An klaseng ini nin daing kapasloan na pagkamoot asin pagmakolog sa iba iyo an magibo sa buhay na magin tunay na kaogmahan sa paghade kan kahadean nin Dios.—Santiago 2:8.
16, 17. (a) Ano an marahay na mga dahelan sa paggibo nin mga pagbakle sa satong buhay tanganing maotob an mga kahagadan nin Dios? (b) Taano ta makaseseguro kita na kaya niatong gibohon an ano man na kaipuhan na mga pagbakle?
16 Ipinaheheling kan Biblia na an mga tawo dapat na magbakle sa saindang buhay tanganing maotob an mga kahagadan sa pagigin mga sakop kan gobyerno nin Dios. (Efeso 4:20-24) Kamo daw naghihingoa na magibo an mga pagbakleng ini? Tunay na an ano man na paghihingoa na magibo iyan dai magigin basang! Taano? Iyan dai mangangahulogan na kamo magkakaigwa sana nin mas marahay na buhay sa laog nin pirang taon na sakop nin sarong gobyerno nin tawo. Bako, kundi kamo mag-aako nin buhay na daing katapusan sa sangkap na salud sa sarong paraisong daga na sakop kan gobyerno na pinamamahalaan nin Dios!
17 Minsan ngonyan, paagi sa pag-otob sa mga kahagadan nin Dios, kamo magkakamit nin mas maogmang buhay. Alagad tibaad kamo kaipuhan na gumibo nin mga pagbakle. Bueno, an dakol na tawo na dating naoongis o paslo nagkapagbakle. Siring man, an mga parapakisaro, parasambay, homoseksuwal, paraburat, paragadan, parahabon, adikto sa droga asin mga paratabako nakapagbakle man sa saindang pamumuhay. Iyan nagibo ninda paagi sa tunay na paghihingoa asin sa tabang nin Dios. (1 Corinto 6:9-11; Colosas 3:5-9) Kaya kun igwa kamo nin masakit na mga pagbakle na kinakaipuhan na gibohon tanganing maotob an mga kahagadan nin Dios, dai kamo sumuko. Kaya nindo iyan!
KAIMBODAN SA GOBYERNO NIN DIOS
18. Sa anong espesyal na paagi na linalaoman kita nin Dios na ipaheling an satong maimbod na pagsuportar sa saiyang kahadean?
18 Dai niato maninigong ipagngalas na hahagadon ni Jehova Dios sa saiyang mga sakop na maimbod na magsuportar sa saiyang gobyerno kan Kahadean. An mga gobyerno nin tawo naghahagad kan bagay na iyan sa saindang mga siudadano. Alagad sa anong espesyal na paagi na linalaoman nin Dios na itao an maimbod na pagsuportar? Paagi daw sa paggamit nin mga armas kan saiyang mga sakop tanganing ipakipaglaban an saiyang kahadean? Bako. Imbes, kapareho ni Jesu-Cristo asin kan saiyang enot na mga parasunod, sinda kaipuhan na magin maimbod na mga parataram o parabalangibog kan kahadean nin Dios. (Mateo 4:17; 10:5-7; 24:14) Kabotan nin Dios na an gabos makaaram kun ano an saiyang kahadean asin kun paano iyan maresolber sa mga problema nin katawohan. Ipinaabot na daw nindo an mga bagay na nanodan nindo sa Tataramon nin Dios sa mga paryentes, katood asin iba pa? Kabotan nin Dios na iyan gibohon nindo.—Roma 10:10; 1 Pedro 3:15.
19. (a) Taano ta makakalaom kita nin pagtumang kun nakikipag-olay kita sa iba manongod sa kahadean nin Dios? (b) Anong mga hapot an dapat na simbagon nindo?
19 Si Cristo asin an saiyang enot na mga parasunod nangaipo nin kapusoan tanganing makipag-olay sa iba manongod sa Kahadean, ta parate na sinda napapaatubang sa pagtumang. (Gibo 5:41, 42) Totoo man iyan ngonyan. An pinaghahadean kan Diablo na kinaban na ini habo na ikahulit an maogmang bareta kan Kahadean. Kaya an mga hapot iyo ini: Ano an paninindogan nindo? Kamo daw magtatao nin maimbod na pagsuportar sa kahadean nin Dios? An kabotan nia iyo na itao an dakulang patotoo sa Kahadean bago dumatong an katapusan. Magkakaigwa daw kamo nin kabtang sa paggibo kaiyan?
[Mga Hapot Para sa Pag-adal]
[Ritrato sa pahina 128]
An mga magigin sakop kan gobyerno nin Dios kaipuhan na igwa nin kaaraman manongod dian
[Mga ritrato sa pahina 131]
An mga sakop kan gobyerno nin Dios kaipuhan na lumikay sa mga aktibidad na kinokondenar nin Dios
[Ritrato sa pahina 133]
An mga sakop kan gobyerno nin Dios kaipuhan na magsabi sa iba manongod dian
