Kapitulo 12

Kalabot Kamo sa Sarong Mahalagang Isyu

1, 2. (a) Taano ta mahalaga sa saindo an paagi kan saindong pamumuhay? (b) Kiisay pa iyan mahalaga, asin taano?

 MAHALAGA nanggad kun paano kamo nabubuhay. Iyan mangangahulogan saindo magsalang nin maogmang ngapit o miserableng ngapit. Sa kahurihurihi iyan madeterminar kun baga kamo mapapara kaiba kan kinaban na ini o makaliligtas sa katapusan kaiyan pasiring sa matanos na bagong areglo nin Dios na duman kamo mabubuhay sagkod lamang.—1 Juan 2:17; 2 Pedro 3:13.

² Alagad an saindong pamumuhay nakakaapektar bako sanang sa saindo. Napapalabot man an iba. An ginigibo nindo nakakaapektar man sa sainda. Halimbawa, kun buhay an saindong mga magurang, an ginigibo nindo puwedeng magtao sainda nin magsalang onra o kasopganan. An Biblia nagsasabi: “An aking madonong iyo an saro na nagpapaogma sa ama, asin an aking kablas ikinamomondo nin saiyang ina.” (Talinhaga 10:1) Mas mahalaga pa, an saindong pamumuhay nakakaapektar ki Jehova Dios. Iyan magsalang nakakapaogma sa saiya o nakakapamondo sa saiya. Taano? Huli sa sarong mahalagang isyu na dian kamo kalabot.

AN MGA TAWO DAW MAGIGIN MAIMBOD SA DIOS?

3. Ano an ginibong angat ni Satanas ki Jehova?

³ An isyung ini pinalataw ni Satanas na Diablo. Pinalataw nia iyan kan madara nia si Adan asin Eva na lumapas sa pagboot nin Dios asin sa siring umiba sa saiya sa pagrebelde tumang sa Dios. (Genesis 3:1-6) Ini nagtao ki Satanas kan pinaghona niang dahelan na magsabi ki Jehova kan angat na ini: ‘An mga tawo naglilingkod sana sa saimo huli sa nakukua ninda hale sa saimo. Tawan mo ako nin oportunidad asin kaya kong patalikodon sa saimo an siisay man.’ Minsan ngani an mga tataramon na ini dai aktuwal na mababasa sa Biblia, malinaw na si Satanas nagtaram nin arog kaini sa Dios. Ini ipinaheheling sa libro sa Biblia na Job.

4, 5. (a) Siisay si Job? (b) Ano an nangyari sa langit kan aldaw ni Job?

 ⁴ Si Job sarong tawo na nabuhay dakol nang siglo pakalihis kan pagrebelde na nangyari sa tatamnan nin Eden. Sia sarong matanos asin maimbod na lingkod ni Jehova. Alagad mahalaga daw para sa Dios o ki Satanas na si Job maimbod? Ipinaheheling kan Biblia na iyo. Iyan nagsasaysay manongod sa pag-atubang ni Satanas ki Jehova duman sa hokoman nin langit. Helinga an tema kan saindang pag-oolay:

⁵ “Nagdatong an aldaw na an mga aki kan tunay na Dios nagtirindog sa atubang ni Jehova, asin minsan si Satanas nag-iba man sa tahaw ninda. Dangan si Jehova nagsabi ki Satanas: ‘Saen ka hale?’ Si Satanas nagsimbag ki Jehova asin nagsabi: ‘Sa paglibot sa daga asin sa paglakawlakaw dian.’ Asin si Jehova nagsabi ki Satanas: ‘Narisa mo daw an sakong lingkod na si Job, na mayo nin siisay man na nakakaagid sa saiya sa daga, lalaking daing kasalan asin matanos, na natatakot sa Dios asin naglilikay sa maraot?’”—Job 1:6-8.

6. Anong isyu an ipinaheheling kan Biblia na yaon kaidtong panahon ni Job?

⁶ Taano ta isinabi ni Jehova ki Satanas na si Job sarong tawong matanos? Malinaw na igwa kaidto nin isyu kun baga si Job magdadanay na maimbod ki Jehova o dai. Isip-isipa an hapot nin Dios, “Saen ka hale?” asin an simbag ni Satanas, “Sa paglibot sa daga asin sa paglakawlakaw dian.” An hapot na ini asin an simbag ni Satanas nagpaheling na tinatawan ni Jehova si Satanas nin libreng oportunidad na gibohon an saiyang angat na kaya niang patalikodon an siisay man sa Dios. Bueno, ano an simbag ni Satanas sa hapot ni Jehova manongod sa kaimbodan ni Job?

7, 8. (a) Ano daa an dahelan na sinabi ni Satanas na si Job naglilingkod sa Dios? (b) Ano an ginibo ni Jehova tanganing maresolberan an isyu?

⁷ “Suminimbag si Satanas ki Jehova asin nagsabi: ‘Natatakot daw si Job sa Dios na mayo nin kabayadan? Bako daw na ika mismo nagbugtak nin proteksion sa palibot nia asin sa saiyang harong asin sa gabos niang sadiri? Binendisyonan mo an gibo kan saiyang mga kamot, asin an saiyang kahayopan nakalakop sa daga. Alagad tabi unata an saimong kamot asin dotdota an gabos niang sadiri asin helinga kun baga dai ka nia langhadan sagkod sa saimong lalauogon.’”—Job 1:9-11.

⁸ Sa simbag nia ipinananarahotan ni Satanas an kaimbodan ni Job sa Dios. ‘Si Job naglilingkod sa saimo,’ an pangangatanosan ni Satanas, ‘huli sa mga itinatao mo sa saiya, bakong huli ta sia namomoot sa saimo.’ Si Satanas nagreklamo man na ginagamit ni  Jehova an mas dakula niang kapangyarihan sa sarong paaging bakong makatanosan. ‘Permi mo siang pinoprotehiran,’ sabi nia. Kaya, tanganing maresolberan an isyu, si Jehova nagsimbag: “Uya! An gabos niang sadiri nasa saimong kamot. Dai mo sana pag-unaton an saimong kamot tumang sa saiya mismo!”—Job 1:12.

9. Anong problema an itinao ni Satanas ki Job, asin ano an resulta?

⁹ Tolos-tolos pinonan ni Satanas na ribokon si Job. An gabos na kahayopan ni Job magsalang ipinagadan nia o ipinahabon. Dangan sineguro nia na an 10 aki ni Job magadan. Nawara ki Job an haros gabos, alagad sia nagdanay na maimbod ki Jehova. Dai nia isinumpa an Dios. (Job 1:2, 13-22) Alagad ta bako idto an katapusan kan bagay.

10. Ano an nagpapaheling na si Satanas dai suminuko?

¹⁰ Si Satanas uminatubang giraray ki Jehova kaiba kan ibang mga anghel. Sa giraray hinapot ni Jehova si Satanas kun naheling nia an kaimbodan ni Job asin nagsabi: “Nangangapot pa giraray sia sa saiyang integridad.” Dangan si Satanas nagsimbag: “Kublit para sa kublit, asin an gabos na sadiri nin tawo itatao nia para sa saiyang kalag. Alagad ta, unata tabi an saimong kamot asin dotdota sagkod an saiyang tolang asin an saiyang laman patin helinga kun baga dai ka nia isumpa sagkod sa saimong lalauogon.”—Job 2:1-5.

11. (a) Ano pang ibang pagbalo an itinao ni Satanas ki Job? (b) Ano an resulta?

¹¹ Bilang simbag, tinawan ni Jehova si Satanas nin permiso na gibohon an ano man na kaya niang gibohon ki Job, minsan ngani an Dios nagsabi: ‘Dai mo sia paggadanon.’ (Job 2:6) Kaya tinawan ni Satanas si Job nin grabeng helang. Labi-labi an pagsakit ni Job kaya sia namibi na magadan. (Job 2:7; 14:13, 14) An saiya mismong agom tuminalikod sa saiya, na nagsasabi: “Sumpaa an Dios asin magadan ka!” (Job 2:9) Alagad ta si Job nagsayumang gibohon iyan. “Sagkod na ako magadan dai ko hahaleon sa sakuyang sadiri an sakuyang integridad!” sabi nia. (Job 27:5) Si Job nagdanay na maimbod sa Dios. Kaya napatunayan na si Satanas sala sa saiyang angat na si Job naglilingkod sana sa Dios para sa materyal na pakinabang asin bakong huli sa pagkamoot. Napatunayan man na dai kaya ni Satanas na patalikodon an gabos sa paglilingkod sa Dios.

12. (a) Anong simbag sa angat ni Satanas an itinao ni Job sa Dios? (b) Ano an pinatunayan kan kaimbodan ni Jesus sa Dios?

¹² Sa paghona nindo ano an namatean ni Jehova huli sa kaimbodan ni Job? Iyan nakapaogmang gayo sa saiya! An Tataramon nin Dios nagsasadol: “Magpakadonong ka, aki ko, asin paogmaha an sakong puso, tanganing makasimbag ako sa nagduduhagi sako.” (Talinhaga  27:11) Si Satanas an nagduduhagi ki Jehova. Asin paagi sa saiyang kaimbodan pinaogma ni Job an puso nin Dios. Ini nagtao sa Dios nin isisimbag sa maabhaw na pagduhagi o pag-angat ni Satanas na an mga tawo dai maglilingkod sa Saiya sa irarom nin pagbalo. An dakol pang iba nagtao man sa Dios nin siring na ikakasimbag. An pinakadakulang halimbawa iyo an sangkap na tawong si Jesus. Marigon niang pinangaptan an saiyang kaimbodan sa Dios sa ibong kan gabos na pagbalo na itinao sa saiya ni Satanas. Ini nagpatunay na an sangkap na tawong si Adan puwede man kutanang nakagibo kaiyan kun gusto nia, asin na an Dios bakong maraot sa paghagad nin lubos na pagkuyog sa tawo.

ANO AN PANININDOGAN NINDO?

13. (a) Ano an koneksion kan saindong pamumuhay sa isyu? (b) Paa no niato mapapaogma an Dios o matatawan sia nin kakologan?

¹³ Kumusta man an saindong buhay? Tibaad paghona nindo bakong mahalaga kun paano kamo nabubuhay. Alagad ta iyo. Baga man aram nindo o dai, iyan nagsusuportar magsalang sa lado nin Dios sa isyu o sa lado ni Satanas. Si Jehova may pagmakolog sa saindo, asin boot nia na maheling kamo na naglilingkod sa saiya asin mabuhay sagkod lamang sa paraisong daga. (Juan 3:16) Kan an mga Israelitas magrebelde tumang sa Dios, sia nakolgan. (Salmo 78:40, 41) An saindo daw na pamumuhay nagpapaogma sa Dios o iyan daw nagtatao nin kakologan sa saiya? Siyempre, tanganing mapaogma an Dios kaipuhan na maaraman nindo an saiyang mga pagboot asin kuyugon iyan.

14. (a) Kun dapit sa pagdodorog, anong mga pagboot an kaipuhan na kuyugon niato tanganing mapaogma an Dios? (b) Taano ta sarong krimen an paglapas sa siring na mga pagboot?

¹⁴ An pangenot na katuyohan ni Satanas sugotan an mga tawo na lapason an mga pagboot nin Dios na dapit sa paggamit sa saindang kakayahan sa pangangaki, asin sa saiyang areglo nin pag-agom asin pamilya. An mga pagboot nin Dios sa pagprotehir sa satong kaogmahan nagsasabi na an mga dai kasal dai maninigong magdorog, asin na an mga may agom dai maninigong makidorog sa iba apuwera sa saindang agom. (1 Tesalonica 4:3-8; Hebreo 13:4) Kun linalapas an pagboot nin Dios, parate na an mga aki namumundag na mayo nin mga magurang na namomoot asin gusto sa sainda. An mga ina tibaad magkaigwa pa nin aborsion, na ginagadan an mga aki bago sinda mamundag. Dugang pa, an dakol na nakikisaro nagkakaigwa nin makatatakot na mga helang sa sekso na puwedeng makadanyar sa  mga aki na tibaad ipangaki ninda. Sarong akto nin katraydoran, sarong krimen tumang sa Dios, an makidorog sa saro na bako nindong agom. Si Job nagsabi: “Kun an sakuyang puso madara nin sarong babae, asin ako naghalat sa tata kan sakuyang kapwa . . . iyan makababalde, sarong krimen na dapat silotan.”—Job 31:1, 9, 11, The New American Bible.

15. (a) Kun kita makisaro, siisay an pinaoogma niato? (b) Taano ta madonong na kumuyog sa mga pagboot nin Dios?

¹⁵ Dai niato maninigong ipagngalas na an kinaban na ini na pinamamahalaan kan Diablo gigibohon na garo baga normal asin tama na kamo makidorog sa saro na bako man nindong agom. Alagad kun iyan gibohon nindo, siisay an pinaoogma nindo? Si Satanas, bakong si Jehova. Tanganing mapaogma an Dios, kaipuhan na kamo “dumulag sa pakikisaro.” (1 Corinto 6:18) Totoo, bakong perming pasil na magin maimbod sa Dios. Dai man idto nagin pasil para ki Job. Alagad girumdoma, madonong an pagkuyog sa mga pagboot nin Dios. Kamo magigin mas maogma ngonyan kun iyan gigibohon nindo. Alagad, mas mahalaga, susuportaran nindo an lado nin Dios sa isyu asin paoogmahon sia nindo. Asin bebendisyonan nia kamo nin buhay na daing katapusan sa kaogmahan digdi sa daga.

16. (a) Paano binendisyonan si Job huli sa saiyang kaimbodan? (b) Ano an masasabi manongod sa danyos na nagigibo ni Satanas, arog kan paggadan sa 10 aki ni Job?

¹⁶ Totoo, si Satanas pinapagtios si Job asin ikinapagadan an 10 niang aki. Daing duwa-duwa na ini nagtao nin grabeng kamondoan ki Job. Alagad kan si Job magmaimbod, binendisyonan sia nin Dios nin doble sa dating yaon sa saiya bago si Satanas togotan na baloon sia. Si Job nagin ama man nin 10 pang aki. (Job 42:10-17) Dugang  pa, makasisierto kita na an 10 aki ni Job na ginadan ni Satanas bubuhayon liwat sa panahon kan pagbuhay liwat sa mga gadan. Tunay nanggad, mayo nin danyos o problema na itinotogot ki Satanas na itao na dai itatanos kan satuyang mamomoton na Ama, si Jehova, sa saiyang itinalaan na panahon.

17. Taano ta tunay na mahalaga kun paano kita nabubuhay?

¹⁷ Kaya bobooton nindong perming girumdomon na an saindong pamumuhay may halaga. Iyan mahalaga partikularmente ki Jehova Dios asin ki Satanas na Diablo. Ini huli ta kamo napapalabot sa isyu kun baga an mga tawo magmamaimbod sa Dios o dai.

[Mga Hapot Para sa Pag-adal]

 [Ritrato sa pahina 106]

Naatubang ni Job an angat ni Satanas na mayo nin siisay man na magdadanay na maimbod sa Dios sa irarom nin pagbalo

[Ritrato sa pahina 110]

An pakikidorog sa saro na bako nindong agom sarong krimen tumang sa Dios

[Ritrato sa pahina 111]

Binendisyonan ni Jehova si Job para sa saiyang kaimbodan nin labing gayo sa dating nasa saiya