An Maraot na mga Espiritu Makapangyarihan
Kapitulo 10
An Maraot na mga Espiritu Makapangyarihan
1. Taano ta dakol an naniniwala na puwede sindang makipag-olay sa mga gadan?
PARATENG sinasabi nin mga tawo na nakaolay ninda an gadan. An dating si James A. Pike, sarong prominenteng obispong Episcopaliano, nagsabi na nakaolay nia an gadan niang aki na si Jim. Sono ki Pike, an aki nia nagsabi saiya: “Kadakol kan tawo na nasa palibot ko, asin mga kamot na garo baga nag-aalsa sako . . . Mamondoon ako sagkod na dai ko pa ini ikinakapaaram saimo.”
2. (a) Taano ta mayo nin siisay man na puwedeng makipag-olay sa gadan? (b) Kaya anong mga hapot an pinalalataw?
2 Mantang usong-uso an arog kaining mga eksperyensia, malinaw na dakol an may nakaolay hale sa kinaban nin mga espiritu. Alagad dai ninda nakaolay an gadan. An Biblia malinaw na gayo sa pagsabi kaiyan: “Kun dapit sa mga gadan, mayo man lamang sinda nin pakaaram.” (Eclesiastes 9:5) Kaya kun bakong mga gadan an nagtataram hale sa kinaban nin mga espiritu, siisay an nagtataram? Siisay an nagsasaginsagin na mga gadan?
3. (a) Siisay an nagsasaginsagin na gadan na mga tawo, asin taano? (b) Siisay an parateng tinatawan nin impormasyon nin maraot na mga espiritu?
3 An maraot na mga espiritu. An mga espiritung ini, o mga demonyo, iyo an mga anghel na uminiba ki Satanas sa pagrebelde tumang sa Dios. Taano sinda ta nagsasaginsagin na mga tawong nagadan? Sa katuyohan na suportaran an ideya na an mga gadan buhay pa. Giniyahan man nin maraot na mga espiritu an dakol na maniwala sa kaputikan na an kagadanan saro sanang pagbalyo sa ibang buhay. Tanganing ilakop an kaputikan na ini, an maraot na mga espiritu nagtatao nin mga patagolainan, parahimalad asin salamangkero na may espesyal na kaaraman na garo baga hale sana sa mga tawo na gadan na.
NAGSASAGINSAGIN NA AN GADAN NA SI SAMUEL
4. (a) Taano si Hadeng Saul ta desesperado na sa paghanap nin tabang? (b) Ano an pagboot nin Dios manongod sa mga patagolainan asin parahimalad?
4 Igwa nin sarong halimbawa sa Biblia nin sarong maraot na espiritu na nagsaginsagin na iyo an gadan na propeta nin Dios, si Samuel. Ini kan ika-40 taon kan paghade ni Hadeng Saul. An makosog na hukbo nin mga Filisteo suminalakay kaidto sa hukbong Israelita ni Saul, asin labi-labi an pagkatakot nia. Aram ni Saul an pagboot nin Dios: “Dai kamo dumolok sa mga patagolainan, asin dai kamo makihumapot sa mga paratood, tanganing magin marigsok huli sa sainda.” (Levitico 19:31) Minsan siring, uminabot an panahon na si Saul tuminalikod ki Jehova. Kun siring si Samuel, na kaidto buhay pa, nagsayumang makipag-olay pa ki Saul. (1 Samuel 15:35) Asin ngonyan, sa panahon na ini nin kasakitan, si Hadeng Saul desesperado na huli ta si Jehova dai na nagdadangog sa saiyang mga pag-arang nin tabang.
5. (a) Siisay an hinagadan nin tabang ni Saul? (b) Ano an nagibo kan patagolainan?
5 Gustong-gustong maaraman ni Saul an mangyayari kaya nagduman sia sa sarong patagolainan sa En-dor. Napaluwas kan patagolainan na ini an porma nin sarong tawo na naheheling nia. Paagi sa pagkaladawan nia sa porma, sinabi ni Saul na sia si “Samuel.” Sa puntong ini an espiritu, na nagsasaginsagin na si Samuel, nagtaram: “Taano ta rinibok mo ako paagi sa pagpadigdiha sa sako?” Si Saul nagsimbag: “Nasa masakit akong kamugtakan, ta an mga Filisteo nakikipaglaban tumang sa sako.” An espiritu nagsimbag: “Kun siring, ano ta naghahapot ka sa sakuya, mantang si Jehova mismo suminuhay na sa saimo asin kaiwal mo na?” An maraot na espiritung persona, na nagsasaginsagin na an gadan na si Samuel, nagsabi ki Saul na sia magagadan sa pakikipaglaban sa mga Filisteo.—1 Samuel 28:3-19.
6. Taano ta dai puwede na si Samuel an nakipag-olay ki Saul?
6 Malinaw na bako talagang si Samuel an nakaolay kan patagolainan. Si Samuel gadan na, asin pagkagadan an tawo “minabalik sa saiyang daga; sa aldaw na iyan an saiyang mga pag-isip napapara.” (Salmo 146:4) An kadikit pang paghorophorop sa bagay nagpapaheling na an boses bako talagang boses kan gadan na si Samuel. Si Samuel propeta nin Dios. Kaya kontra sia sa mga patagolainan. Asin, arog kan naheling na niato, kan sia buhay pa nagsayuma siang makipag-olay sa masumbikal na si Saul. Kun siring, kun si Samuel buhay pa, totogotan daw nia an sarong patagolainan na iareglo na makaolay sia ni Saul? Isip-isipon man: si Jehova nagsayuma na magtao nin impormasyon ki Saul. Puwede daw na puwersahon nin sarong patagolainan si Jehova na magtao nin mensahe ki Saul paagi sa gadan nang si Samuel? Asin kun an nabubuhay aktuwal na puwedeng makipag-olay sa gadan na mga namomotan, tunay na an sarong Dios nin pagkamoot dai magsasabi na sinda nagin “marigsok” huli sa pagdolok sa sarong patagolainan.
7. Ano an itinao nin Dios na patanid tanganing protehiran an saiyang banwaan tumang sa maraot na mga espiritu?
7 An totoo iyo na an maraot na mga espiritu gustong raoton an mga tawo, kaya si Jehova nagtatao nin mga patanid tanganing protehiran an saiyang mga lingkod. Basahon an minasunod na patanid sa nasyon nin Israel. Iyan nagtatao saindo nin ideya sa mga paagi na ginagamit nin mga demonyo tanganing mandaya sa mga tawo. An Biblia nagsasabi: “Mayo nin maninigong makua sa saimo na . . . siisay man na minagamit nin pagtoodtood, salamangkero o siisay man na parahimalad o aswang, o saro na nag-eengkanto o siisay man na nakikihumapot sa patagolainan o parahula o siisay man na nakikihumapot sa gadan. Huli ta an gabos na naggigibo kan mga bagay na ini nakakabalde ki Jehova.” (Deuteronomio 18:10-12) Maninigo niatong mawoton na aramon kun ano an ginigibo nin maraot na mga espiritu tanganing manraot sa mga tawo ngonyan asin kun paano niato maiingatan an satong sadiri tumang sa sainda. Alagad bago niato maaraman ini, helingon niato kun kasuarin asin kun paano nagkaigwa nin maraot na mga espiritu.
MGA ANGHEL NA NAGIN MARAOT NA MGA ESPIRITU
8. (a) Siisay an nadara ni Satanas na magrebelde man tumang sa Dios? (b) Pakapondohan kan saindang gibohon sa langit, saen sinda nagduman?
8 Paagi sa pagputik ki Eva sa tatamnan nin Eden, an sarong linalang na anghel ginibo an saiyang sadiri na magin an maraot na espiritung si Satanas na Diablo. Dangan pinonan niang sugotan an iba pang anghel na tumalikod man sa Dios. Pag-abot nin panahon sia nagin mapanggana. May mga anghel na ipinondo an gibohon na itinao nin Dios sa sainda sa langit, asin naghilig digdi sa daga asin guminibo para sa saindang sadiri nin mga hawak na laman na kapareho kan sa mga tawo. An Kristianong disipulong si Judas nagsurat manongod sa sainda kan masabihan nia an “mga anghel na dai nag-ingat kan saindang dating katongdan kundi nagbaya sa saindang sadiring tamang erokan.” (Judas 6) Taano sinda ta nagdigdi sa daga? Anong salang kamawotan an ibinugtak ni Satanas sa saindang puso tanganing bayaan ninda an marahay nindang mga katongdan sa langit?
9. (a) Taano ta nagdigdi sa daga an mga anghel? (b) Paano ipinaheheling kan Biblia na an ginibo ninda sala?
9 Isinasabi sato kan Biblia kan iyan magsabi: “An mga aki kan tunay na Dios nagpoon na makamangno sa mga aking babae nin mga tawo, na sinda magagayon; asin nagkua sinda nin mga agom na babae para sa saindang sadiri, an gabos nindang mapili.” (Genesis 6:2) Iyo, an mga anghel nagsulot nin mga hawak na laman. Dangan nagdigdi sinda sa daga tanganing makidorog sa magagayon na babae. Alagad an siring na mga relasyon sala para sa mga anghel. Ini sarong akto nin pagmasumbikal. Ipinaheling kan Biblia na an ginibo ninda kapareho kasala sa mga aktong homoseksuwal kan mga taga-Sodoma asin Gomorra. (Judas 6, 7) Ano an nagin resulta?
10, 11. (a) Anong klase an mga nagin aki kan mga anghel? (b) Ano an nangyari sa mga higante kan umabot an Baha? (c) Ano an nangyari sa mga anghel kan panahon kan Baha?
10 Bueno, nangaki an mga anghel na ini asin an saindang agom. Alagad an mga aki ninda napapalaen. Sinda nagpadagos na dumakula sagkod na sinda magin mga higante, iyo, maraot na mga higante. Inaapod sinda kan Biblia na “mga makokosog kan suanoy, mga lalaking bantog.” Pinagmaigotan kan mga higanteng ini na piriton an gabos na magin arog ninda karaot. Bilang resulta, an Biblia nagsasabi na “an karatan nin tawo labi-labi na sa daga asin an tendensia kan mga kaisipan kan saiyang puso danay na nasa karatan na sana.” (Genesis 6:4, 5) Kaya ipinaabot ni Jehova an Baha. An mga higante, o “Nefilim,” asin an gabos na maraot na tawo nalamos. Alagad ano an nangyari sa mga anghel na nagdigdi sa daga?
11 Dai sinda nalamos. Binayaan ninda an saindang mga hawak sa laman asin nagbuwelta sa langit bilang mga espiritu. Alagad ta dai sinda tinogotan na magin kabtang giraray kan organisasyon nin Dios nin banal na mga anghel. Imbes, sinasabi kan Biblia na “an Dios ngani dai nag-alangan sa pagkastigo sa mga anghel na nagkasala, kundi, paagi sa pag-apon sa sainda sa Tartaro, ibinugtak sinda sa mga bobon nin kadikloman tanganing itagama sinda para sa paghokom.”—2 Pedro 2:4.
12. (a) Ano an nangyari sa maraot na mga anghel kan sinda bumuwelta sa langit? (b) Taano ta dai na sinda puwedeng gumibo giraray nin hawak nin tawo? (c) Kaya ano ngonyan an ginigibo ninda?
12 An maraot na mga anghel na ini dai iinapon sa sarong literal na lugar na inaapod Tartaro. Imbes, an Tartaro, na itrinadusir nin sala na “impierno” sa nagkapirang Biblia, nangangahulogan kan ibinaba o ruminaot na kamugtakan kan mga anghel na ini. Dai na sinda nag-ako kan espirituwal na liwanag kan organisasyon nin Dios, asin daing sagkod na kalaglagan na sana an naghahalat sa sainda. (Santiago 2:19; Judas 6) Poon kan panahon kan Baha, dai tinogotan nin Dios an demonyong mga anghel na ini na magkaigwa nin mga hawak na laman, kaya dai ninda puwedeng direktang panigoan an saindang bakong natural na mga horot sa sekso. Pero puwede pa sindang magkaigwa nin peligrosong kapangyarihan sa mga lalaki asin babae. An totoo, sa tabang kan mga demonyong ini si Satanas “nandadaya sa bilog na ineerokan na daga.” (Kapahayagan 12:9) An labi-labing pagdakol ngonyan nin seksuwal na mga krimen, kadahasan asin iba pang salang gibo nagpaparisa kan pangangaipo na kita mag-ingat na madaya ninda.
KUN PAANO NANDADAYA AN MARAOT NA MGA ESPIRITU
13. (a) Paano nandadaya an maraot na mga espiritu? (b) Ano an espiritismo, asin ano an sinasabi kan Biblia manongod dian?
13 Nanodan na niato na si Satanas, bilang “an dios kan palakaw na ini nin mga bagay,” ginagamit an kinabanon na mga gobyerno asin falsong relihiyon tanganing manbuta sa mga tawo sa mga katotoohan kan Biblia. (2 Corinto 4:4) An saro pang mayor na paagi na dinadaya nin maraot na mga espiritu an mga lalaki asin babae iyo an espiritismo. Ano an espiritismo? Iyan an pakikipagkomunikar sa maraot na mga espiritu, magsalang direkta o paagi sa sarong tawong patagolainan. An espiritismo nagdadara sa saro na mapasairarom kan impluwensia nin mga demonyo. Pinatatanidan kita kan Biblia na lumikay sa gabos na gawe na konektado sa espiritismo.—Galacia 5:19-21; Kapahayagan 21:8.
14. (a) Ano an pagtoodtood? (b) Ano an sinasabi kan Biblia manongod dian?
14 An pagtoodtood sarong usong gayong porma nin espiritismo. Iyan an paghihingoa na aramon an ngapit, o an bagay na dai aram, sa tabang nin dai naheheling na mga espiritu. Ini ipinaheheling kan isinurat kan Kristianong disipulong si Lucas: “An sarong oripon na daraga na may espiritu, sarong demonyo sa pagtoodtood, nagsabat sa samo. Sia nagtatao sa saiyang mga kagurangnan nin dakol na pakinabang paagi sa panhuhula.” Nabutasan ni apostol Pablo an daragang ini gikan sa kapangyarihan kan maraot na espiritu, asin sia dai na nakapagsasabi kan mangyayari sa ngapit.—Gibo 16:16-19.
15. (a) Ano an pirang bagay na konektado sa espiritismo? (b) Taano ta peligroso an pakikikabtang sa siring na mga bagay?
15 An dakol interesado sa espiritismo huli ta iyan misteryoso asin pambihira. Iyan nakagagayuma sa sainda. Kaya sinda napapalabot sa panraratak, voodooismo, hipnotismo, mahika, astrolohiya, Ouija board o iba pa na konektado sa espiritismo. Tibaad sinda nagbabasa nin mga libro manongod sa mga bagay na ini, o nagdadalan sa mga sine, o nagheheling nin mga programa sa telebisyon dapit dian. Tibaad magduman pa ngani sinda sa sarong pagtiripon na duman an sarong patagolainan nakikipagkomunikar sa kinaban nin mga espiritu. Alagad an gabos na ini bakong madonong para sa saro na boot na maglingkod sa tunay na Dios. Iyan peligroso man. Iyan puwedeng magbunga nin dakulang problema ngonyan. Saro pa, hohokoman nin Dios asin isisikwal an gabos na naggigibo nin espiritismo.—Kapahayagan 22:15.
16. Paano ipinaheheling kan Biblia na an mga Kristiano may pakikipaglaban tumang sa maraot na mga espiritu?
16 Dawa kun ginigibo nin saro an gabos niang makakaya na makalikay sa espiritismo, tibaad sia salakayon pa man giraray nin maraot na mga espiritu. Girumdoma na an tingog mismo kan Diablo nadangog ni Jesu-Cristo, na sinusugotan siang lapason an pagboot nin Dios. (Mateo 4:8, 9) An iba pang lingkod nin Dios nag-agi man sa siring na mga pagsalakay. Si apostol Pablo nagsabi: “Kita nakikipaglaban . . . tumang sa maraot na espiritung mga puwersa sa langitnon na mga lugar.” Ini nangangahulogan na an lambang lingkod ni Jehova kaipuhan na gamiton “an bilog na pangalasag hale sa Dios, tanganing makapanumang [sia].”—Efeso 6:11-13.
PAGLABAN SA MGA PAGSALAKAY KAN MARAOT NA MGA ESPIRITU
17. Ano an maninigo nindong gibohon kun an sarong “tingog” hale sa kinaban nin mga espiritu magtaram sa saindo?
17 Ano an maninigo nindong gibohon kun an sarong “tingog” hale sa kinaban nin mga espiritu magtaram sa saindo? Ano kun an “tingog” magsaginsagin na sarong gadan na paryente o marahay na espiritu? Bueno, ano an ginibo ni Jesus kan an “poon nin mga demonyo” magtaram sa saiya? (Mateo 9:34) Sia nagsabi: “Humale ka, Satanas!” (Mateo 4:10) Puwede man nindong gibohon iyan. Siring man, puwede kamong umarang nin tabang ki Jehova. Mamibi kamo nin makosog asin gamiton an ngaran nin Dios. Girumdomon na sia mas makapangyarihan ki sa maraot na mga espiritu. Sunodon an madonong na paaging ini. Dai kamo magdangog sa mga tingog hale sa kinaban nin mga espiritu. (Talinhaga 18:10; Santiago 4:7) Dai ini nangangahulogan na an gabos na makadangog nin mga “tingog” kinakaolay nin mga demonyo. Kun beses an pakadangog nin mga tingog puwedeng susugon sa pisikal o mental na mga helang.
18. Anong halimbawa kan enot na mga Kristiano sa Efeso an marahay na arogon kun an saro boot na lumikay sa espiritismo?
18 Tibaad kaidto kamo nakikiayon sa mga gibo nin espiritismo asin ngonyan boot na nindong lumikay. Ano an magigibo nindo? Bueno, helinga an halimbawa kan enot na mga Kristiano sa Efeso. Pakatapos na saindang akoon an “tataramon ni Jehova” na ihinuhulit ni apostol Pablo, an Biblia nagsasabi: “An dakol sa mga salamangkero nagtiripon kan saindang mga libro asin sinolo iyan sa atubang nin gabos.” Asin an kantidad kan mga librong idto 50,000 na pidaso nin pirak! (Gibo 19:19, 20) Bilang pag-arog sa mga nagin parasunod ni Cristo duman sa Efeso, kun igwa kamo nin mga bagay na direktang konektado sa espiritismo an madonong na gibohon iapon iyan minsan pa gurano kamahal.
19. (a) Ano an dai aram kan kadaklan na nakikikabtang sa espiritismo? (b) Kun boot niatong mabuhay sagkod lamang na may kaogmahan digdi sa daga, ano an dapat niatong gibohon?
19 Mantang makosogon an interes ngonyan sa bagay na bakong normal asin misteryoso, padakol nang padakol an napapalabot sa espiritismo. Alagad an kadaklan sa mga tawong ini dai nakakaaram na sinda sa aktuwal nagkakaigwa nin relasyon sa maraot na mga espiritu. Ini bakong inosenteng aling-alingan. An maraot na mga espiritu igwa kan kapangyarihan na mangolog asin manraot. Sinda mabangis. Asin, bago sinda ibilanggo ni Cristo sa kalaglagan sagkod lamang, ginigibo ninda an bilog nindang makakaya na mapasairarom an mga tawo sa saindang maraot na kapangyarihan. (Mateo 8:28, 29) Kaya kun boot nindong mabuhay sagkod lamang sa kaogmahan digdi sa daga pakahalea kan gabos na karatan, kaipuhan na kamo lumikay na mapairarom sa kapangyarihan nin mga demonyo paagi sa paglikay sa gabos na klase nin espiritismo.
[Mga Hapot Para sa Pag-adal]
[Ritrato sa pahina 91]
Siisay an nakaolay kan patagolainan sa En-dor?
[Mga ritrato sa pahina 92, 93]
Narisa kan mga anghel na aki nin Dios an mga aking babae nin mga tawo
[Ritrato sa pahina 94]
An nagmateryalisar na mga anghel dai nagkaralamos. Binayaan ninda an saindang mga hawak sa laman asin nagbuwelta sa langit
[Ritrato sa pahina 97]
An Biblia nagpapatanid: ‘Lumikay sa gabos na klase nin espiritismo’
[Ritrato sa pahina 98]
An mga nagin Kristiano sa Efeso sinolo an mga libro ninda manongod sa espiritismo—marahay na arogan para sa sato ngonyan
