Bian kun fia nian bian nin bla nna nga be fa fite nzra nun’n. I yi’n w’a trɛ i. Bian’n kpɛtɛli i lele kpɛkun ɔ seli i kɛ ɔ su niɛnmɛn i kun. Yɛ ɔ yoli sɔ sakpa kusu blɛ wie nun. Sanngɛ ɔ wa sɛli i sin niɛnnin i ekun. Kpɛkun i yi wa trɛli i ekun. Blɛ kwlaa nga i yi trɛ i sɔ’n, ɔ kpɛtɛ i yɛ ɔ se i kɛ ɔ su yomɛn i kun. Sanngɛ ɔ yacimɛn i yolɛ.

 ?I sɔ sa’n wie o ɔ su? ?A nian bian nin bla nna nga be fa fite nzra nun’n? Sɛ ɔ ti sɔ’n, ɔ fata kɛ a wun i wlɛ kɛ i sɔ’n kle ɔ yi i yalɛ kpa. Asa’n, ɔ fata kɛ a si like nga a kwla yo naan w’a yaci bian nin bla nna nga be fa fite nzra nun’n i nianlɛ’n. a

Ndɛ nga nun

•  Like ng’ɔ fata kɛ a wun i wlɛ’n

•  Like nga a kwla yo’n

•  Sɛ ɔ wun nian bian nin bla nna nga be fa fite nzra nun’n

 Bian nin bla nna nga be fa fite nzra nun’n i nianlɛ’n kwla saci aja. Yasua ng’ɔ nian’n, ɔ wlɛ i yi’n i klunngbɔ. Asa’n ɔ yo maan i yi’n lafimɛn i su kun. b

 Bla nga i wun nian bian nin bla nna nga be fa fite nzra nun’n, wafa nga i wun yo i’n i wie yɛ:

•   Ɔ yo i kɛ b’a kpɛ i bo waka sa. Be flɛ bla kun kɛ Sara. Ɔ seli kɛ: “Ɔ yoli min kɛ min wun kunndɛli bla min bo kpɛ sunman sa.”

•   Ɔ bumɛn i wun sran kun. Bla kun seli kɛ, kɛ mɔ i wun nian bian nin bla nna nga be fa fite nzra nun’n ti’n ɔ bu i kɛ “ɔ timan klanman kpɛkun ɲannzuɛn kun i.”

•   Ɔ lafiman i wun’n i su kun. Bla kun mɔ be flɛ i Elɛnin’n seli kɛ: “N fa min ɲin n sie i ninnge kwlaa nga min wun yo’n su. Afin n lafimɛn i su kun.”

•   Ɔ koko. Be flɛ bla kun kɛ Katerinin. Ɔ dili i nanwlɛ kɛ: “Min wun i ayeliɛ sɔ’n ti’n n koko dan. Ɔ maan n kwlá faman min ɲin n siemɛn i like uflɛ su.”

 Bu ndɛ nga i akunndan: Biblu’n se yasua’m be kɛ be klo be yi mun. (Efɛzifuɛ Mun 5:25) ?Sɛ yasua kun i ayeliɛ’n ti’n i yi’n i wun yo i kɛ nga e fa wunnin i nglo lɛ’n sa’n, nn ɔ klo yi’n sakpa?

 Bian nin bla nna nga be fa fite nzra nun nianlɛ’n i ase wlalɛ’n timan pɔpɔ. Be flɛ bla kun kɛ Stesi. Ɔ seli kɛ: “Min wun’n kwla wlali siklɛti nin drɔgi ɔ nin nzan nɔnlɛ’n be ase. Sanngɛ, ɔ nin-a kwlá yaciman bian nin bla nna nga be fa fite nzra nun’n i nianlɛ.”

 Sɛ i sɔ sa’n wie o ɔ su’n, afɔtuɛ nga’m be kwla uka ɔ naan w’a wla ayeliɛ sɔ’n i ase mlɔnmlɔn.

•   Ɔ fata kɛ a wun like ti yɛ bian nin bla nna nga be fa fite nzra nun’n i nianlɛ’n ti tɛ’n i wlɛ. Sran ng’ɔ nian bian nin bla nna nga be fa fite nzra nun’n ɔ bu i ngunmin wun akunndan. Kɛ ɔ ko yo sɔ’n yasua’n nin i yi’n be kloman be wiengu kun yɛ be lafiman be wiengu su kun. Kusu nn ninnge sɔ mun yɛ be yo maan be di aklunjɔɛ aja’n nun-ɔn. Asa’n, sran ng’ɔ yo sɔ’n ɔ kle kɛ i ɲin yiman Ɲanmiɛn Zoova m’ɔ kpɛli aja’n i ba’n.

   Ndɛ nga Biblu’n kan’n: “Maan sran’m be kwlaa be bu aja’n i like dan.”—Ebre Mun 13:4.

•   Nán fa ndɛ’n gua sran uflɛ su. Nán se kɛ: ‘Sɛ ɔ ti kɛ min yi kle kɛ ɔ klo min kpa sa’n nn n su nianman bian nin bla nna nga be fa fite nzra nun’n.’ Sɛ a bu ndɛ’n yi ɔ yi su’n i sɔ’n timan su. A su yo sɔ naan sɛ cɛn wie ɔ yo like wie m’ɔ yoman ɔ fɛ’n á jrɛ́n i sɔ liɛ’n su nían bian nin bla nna nga be fa fite nzra nun’n ekun.

   Ndɛ nga Biblu’n kan’n: “Sran kun bɔbɔ i konvi’n yɛ ɔ lɛkɛ i-ɔ. I konvi sɔ’n kaci kɛ aya sa. Ɔ tɔ nun, kpɛkun ɔ trɛ i.”—Zaki 1:14.

•   A nin ɔ yi be koko yalɛ, yɛ yo nanwlɛfuɛ. Be flɛ bian kun kɛ Kevɛn. Ɔ seli kɛ: “Cɛn kwlakwla’n kɛ min nin min yi é kókó yalɛ’n, sɛ n niannin like wie m’ɔ timan su’n annzɛ sɛ n miannin min ɲin naan m’an yoman sɔ’n n kan kle i. Kɛ n yo sɔ’n ɔ wun i wlɛ kɛ n faman like wie n fiɛmɛn i wun.”

   Ndɛ nga Biblu’n kan’n: “E klo kɛ é yó nanwlɛfuɛ sa kwlaa nun.”—Ebre Mun 13:18.

•   Nian ɔ wun su titi. Kannzɛ a yacili bian nin bla nna nga be fa fite nzra nun’n i nianlɛ w’a di afuɛ kpanngban’n sanngɛ a kwla tɔ i sɔ ayeliɛ’n nun ekun. Kevɛn mɔ e kɛnnin i ndɛ’n seli kɛ: “N yacili bian nin bla nna nga be fa fite nzra nun’n i nianlɛ lele afuɛ blu. N buli i kɛ m’an wla ayeliɛ sɔ’n i ase mlɔnmlɔn, kannzu ato-ɔ. Ɔ yoli kɛ blo nnɛn wie yɛ ɔ sa lɛ mínndɛ blɛ nga ɔ́ kwlá trá nnɛn’n sa.”

   Ndɛ nga Biblu’n kan’n: “Maan sran ng’ɔ bu i kɛ w’a jran kpa’n, ɔ niɛn i wun su naan w’a tɔman.”—1 Korɛntifuɛ Mun 10:12.

•   Kɛ ɔ konvi sɔ ninnge tɛtɛ’m be nianlɛ, tra ɔ awlɛn. Atrɛkpa’n a su kwlá yoman naan ɔ konvi w’a sɔman ninnge sɔ mun’n, sanngɛ a kwla fa ajalɛ kɛ á yó annzɛ a yoman. Ɔ maan sɛ ɔ konvi sɔ bian nin bla nna nga be fa fite nzra nun’n i nianlɛ’n, bu like uflɛ kunndan i liɛ’n, ɔ ɲin trán like uflɛ su.

   Ndɛ nga Biblu’n kan’n: “Maan amun si amun bɔbɔ amun wun su nian naan amun yo sanwun naan Ɲanmiɛn i klun jɔ amun wun. Nán maan amun wun yrayra amun bla nin bian kunndɛlɛ nun.”—1 Tesalonikifuɛ Mun 4:4, 5.

•   Nán yo ninnge nga be kwla fa ɔ yi i bian nin bla nna nga be fa fite nzra nun’n i nianlɛ nun ekun’n. Fluwa kun seli kɛ: “Kɛ like kun kle sran kun i yalɛ’n, ɔ ti kɛ wa sɔ kpasin sa. Ɔ ka kannin nzue kan ... nn w’a yo sin dan.”—Willpower’s Not Enough

   Ndɛ nga Biblu’n kan’n: “Nán maan sa tɛ fi tin min su.”—Jue Mun 119:133.

•   Nán ɔ sa sin bubu wɔ. Kɛ ɔ yo ko naan ɔ yi annzɛ ɔ wun w’a lafi ɔ su ekun’n, ɔ kwla fa blɛ. I kpa bɔbɔ’n ɔ kwla di afuɛ kpanngban. Sanngɛ sa’m be kle kɛ, kɛ ɔ́ kɔ́ i ɲrun’n yasua nin bla kpanngban be kwla lafili be wiengu su ekun.

   Ndɛ nga Biblu’n kan’n: “Sran ng’ɔ klo sran’n, ɔ trɛ i awlɛn.”—1 Korɛntifuɛ Mun 13:4.