Nán maan ‘e nian e sin’

“Sran ng’ɔ tra saru nun naan ɔ niɛn i sin’n, ɔ kwlá di-man Nyanmiɛn sielɛ’n i junman’n wie.”​—LIK 9:62.

?WAFA SƐ YƐ AMÚN TƐ́ KOSAN’M BE SU Ɔ?

?Ngue ti yɛ ɔ fata kɛ e ‘bu Lɔt yi’n i liɛ’n i akunndan nian’n’ niɔn?

?Ninnge nsan nga ɔ fataman kɛ e akunndan’n ka be su sa trilili’n, yɛle benin?

?Ngue yɛ ɔ fata kɛ e yo naan e nin Zoova i anuannzɛ’n y’a kwla nanti likawlɛ titi ɔ?

1. ?Ndɛ benin yɛ Zezi kannin ɔn? ?Yɛ kosan benin yɛ ɔ su i su ɔ?

 “ZEZI KLIST kannin ndɛ kun i afuɛ kɔe 2.000 yɛ. Ndɛ sɔ’n i ta’n nin a kpɔman. I waan: “An bu Lɔt yi’n i liɛ’n i akunndan nian.” (Lik 17:32) ?Ndɛ sɔ’n i bo’n yɛle benin? Zuifu mun yɛ Zezi kan ndɛ’n kle be ɔ. Ɔ maan, be si ndɛ sɔ’n nun kpa. Be si sa ng’ɔ juli Lɔtu i yi’n su’n. Yɛ be si ekun kɛ i nun nga ɔ nin i awlobofuɛ’m bé jáso Sodɔmu lɔ’n, be wlali be su nun kpongbongbo kɛ, nán be nian be sin. Sanngɛ w’a fɛmɛn i ti w’a deman. Ɔ maan ɔ kacili njin yɛbuɛ.​—An kanngan Bo Bolɛ 19:17, 26 nun.

2. ?Ngue ti yɛ Lɔtu i yi’n niɛnnin i sin’n niɔn? ?Yɛ i ɲin kekle yolɛ’n i bo’n guali sɛ mɛnnin i?

² ?Sanngɛ ngue ti yɛ Lɔtu i yi’n niɛnnin i sin bɔbɔ’n niɔn? ?Ɔ kunndɛ kɛ ɔ́ wún sa nga ɔ su wa ju’n i nun ti ɔ? ?Annzɛ ɔ lafiman su kɛ Sodɔmu klɔ’n ɔ́ núnnún sakpasakpa ti ɔ? ?Annzɛ kusu i ɲin te o ninnge nga ɔ yacili be siɛn lɔ’n be sin ti ɔ? (Lik 17:31) I kwlaa yoli o, kɛ mɔ w’a faman ndɛ nga be kan kleli i’n su’n ti’n, ɔ isali i ɲin kekle yolɛ’n i bo nzuɛn’n. Ɔ nin Sodɔmu nin Gomɔrufuɛ mɔ be ti sa tɛ yofuɛ’n, be wuli le kunngba sɔ’n nun. Amun bɔbɔ amun nian e! Ɲrɛnnɛn saa o! Nga ti yɛ Zezi seli kɛ: ‘An bu Lɔt yi’n i liɛ’n i akunndan nian’n’ yɛ ɔ o lɛ ɔ!

3. ?Wafa sɛ yɛ Zezi kleli kɛ ɔ nin i fataman kɛ e nian e sin ɔn?

³ Nanwlɛ, ajalɛ nga Lɔtu i yi’n fali m’ɔ niɛnnin i sin’n, ɔ ti ajalɛ tɛ kpa. E kusu, ninnge nga e yacili be yolɛ’n, nán maan e sa e sin e nian be lɔ ekun. Kɛ Zezi tɛ́ bian kun su’n, ndɛ sɔ’n yɛ ɔ tinnin su ɔ. Bian’n seli Zezi kɛ ɔ́ kó kále i osufuɛ mun ka naan w’a su i su. Yɛ Zezi seli i kɛ: “Sran ng’ɔ tra saru nun naan ɔ niɛn i sin’n, ɔ kwlá di-man Nyanmiɛn sielɛ’n  i junman’n wie.” (Lik 9:62) ?Zezi su kan bian’n i ndɛ kekle ti ɔ? Cɛcɛ, afin ɔ si kɛ bian’n i ndɛ nga ɔ su kɛn i lɛ’n, ɔ su kunndɛ kpɛ atinsrɛ ti ɔ. Zezi waan sran ng’ɔ yo kɛ bian sɔ’n sa’n, nn ‘ɔ su niɛn i sin.’ Sran nga ɔ funndan asiɛ’n, ɔ kwla niɛn i sin, annzɛ ɔ kwla yaci saru’n lɛ ɔ kpɛ i wun daan. I kwlaa yoli o, i ɲin nunman like nga ɔ su yo’n su kun. Ɔ maan, i junman’n kwlá diman kpa.

4. ?Ngue yɛ ɔ fata kɛ e ɲin tran su ɔ?

⁴ Nán e sin yɛ ɔ fata kɛ e nian ɔn, sanngɛ like nga ɔ o e ɲrun lɔ’n i su yɛ ɔ fata kɛ e ɲin tran ɔn. Maan e nian wafa nga ndɛ sɔ’n i ɲin fite weiin Nyanndra Mun 4:25 nun’n. I waan: “Sɛ sran su kan ndɛ kle wɔ’n, maan ɔ nyin tɛ i nyrun. Nán nian wa nian wa.”

5. ?Ngue ti yɛ ɔ nin i fataman kɛ e nian e sin ɔn?

⁵ Sɛ e nianman e sin’n, e ndɛ yo fɛ, afin mɛn’n su kɔ ‘i bue nuan.’ (2 Tim. 3:1) Ɔ ka kaan sa’n, Ɲanmiɛn wá núnnún mɛn wunmuan’n. Nán klɔ nɲɔn kɛ Sodɔmu nin Gomɔru sa’n be ngunmin yɛ ɔ́ wá núnnún be ɔ. ?Ɔ maan, é yó sɛ naan sa kunngba nga ɔ ɲannin Lɔtu i yi’n, w’a ɲanman e wie? I klikli nun’n, ninnge nga e yoli be laa’n mɔ e konvi kwla sɔ be ekun’n, maan e wun be wlɛ kpa. (2 Kor. 2:11) Kpɛkun maan e nian wafa nga e kwla yo naan y’a tɔman be nun’n.

BE WLA M’Ɔ KPƐN BE LAA NUN’N

6. ?Ngue ti yɛ e kwlá lafiman e klun akunndan’n su ɔ?

⁶ Kɛ mɔ e klun akunndan’n kwla laka e’n ti’n, sɛ e bu i kɛ laa blɛ’n yɛ ɔ ti kpa’n, i sɔ’n kwla fa e yi i sa tɛ nun. Yɛle kɛ atrɛkpa’n, wafa nga e fa blɔ laa blɛ’n, nán kɛ ɔ yoli sɔ sakpa ti ɔ. Ɔ maan, akunndan bulɛ wafa sɔ’n, ɔ kwla yo maan e ɲin kpɛn e laa nun sa trilili. Sanngɛ Biblu’n se e weiin kɛ: “Nán usa kɛ ɔ yo sɛ ti yɛ laa blɛ liɛ’n ɔ ti kpa tra ndɛ blɛ liɛ nin-ɔn. Ngwlɛlɛfuɛ’n usa-man i sɔ sa liɛ’n.” (Aku. 7:10) ?Ngue ti yɛ akunndan bulɛ wafa sɔ’n ti tɛ ɔ?

7-9. (a) ?Sa benin yɛ ɔ juli Izraɛlifuɛ’m be su Ezipti lɔ ɔ? (b) ?Sa benin yɛ ɔ yoli Izraɛlifuɛ’m be fɛ dan ɔn? (c) ?Ngue ti yɛ Izraɛlifuɛ’m be wa plannin mɔ be ijɔli be konviabo ɔ?

⁷ Sa nga Moizi blɛ su’n, ɔ juli Izraɛlifuɛ’m be su’n, maan e fa e ɲin e sie su e nian. Yɛle kɛ kannzɛ bɔbɔ Zozɛfu blɛ su’n, Eziptifuɛ’m be dun mmua sɔli Izraɛlifuɛ’m be nun klanman’n, sanngɛ i sin’n kɛ Zozɛfu wa wuli’n, “Eziptifuɛ’m be sieli Izraɛlifuɛ’m be su junman kpɛnngbɛn mun. Be waan be man Izraɛlifuɛ’m be junman kekle maan be di.” (Tul. 1:11) Kɛ ɔ juli i ɲrun’n, kɛ mɔ Ezipti famiɛn’n kunndɛman kɛ Izraɛlifuɛ’m be trɛ’n ti’n, ɔ wlali i nvlefuɛ’m be kwlaa be su nun kpa kɛ Izraɛlifuɛ’m be wa yasua nɔnman kwlaa nga be wu be’n, maan be kun be. (Tul. 1:15, 16, 22) I kwlaa sɔ’n ti yɛ Zoova kannin ndɛ nga kleli Moizi ɔ. Ɔ seli i kɛ: “N wunnin min sran nga be o Ezipti lɔ’n be ɲrɛnnɛn nga be fa kle be’n. Kɛ be kle be ɲrɛnnɛn’n, kpanlɛ nga be kpannin’n, n tili. N si afɛ ng’ɔ o be su’n.”​—Tul. 3:7.

⁸ Kɛ Izraɛlifuɛ’m be tuli Ezipti mɛn nun lɔ’n, amun nian aklunjuɛ mɔ be su di i siɛn’n niɔn. Be timan kanga kun. Kɛ Zoova yoli abonuan sa m’ɔ fɛli i tinmin dan’n  yoli maan ɲrɛnnɛn blu be tɔli Ezipti Famiɛn tutrefuɛ’n nin i nvlefuɛ’m be su’n, Izraɛlifuɛ’m be wunnin nun. (An kanngan Ezipt Lɔ Tulɛ 6:1, 6, 7 nun.) Eziptifuɛ’m be mannin Izraɛlifuɛ’m be atin kɛ be wɔ. Sanngɛ nanwlɛ, nán atin ngunmin yɛ be mannin Izraɛlifuɛ mun ɔn, be mannin be sika ɔkwlɛ nin jɛtɛ ufue kpanngban. Ɔ maan sɛ é kwlá sé’n, Ɲanmiɛn i nvle’n “deli be bo ninnge’n” kwlaa. (Tul. 12:33-36) Kɛ Izraɛlifuɛ’m be wunnin wafa nga Zoova nunnunnin Ezipti Famiɛn’n nin i sonja mun jenvie’n nun’n, ɔ yoli be fɛ dan. (Tul. 14:30, 31) Nanwlɛ, ɔ nin i fata kɛ sa dandan sɔ mɔ be wunnin be’n, be wla be fanngan dan!

⁹ Sanngɛ nga ɔ yo kɛnsrɛn’n, yɛle kɛ kɛ be fiteli nun mɔ i osu cɛli kan’n, aliɛ ndɛ ti’n, nvlefuɛ kunngba’m be wa ijɔli be konviabo. Be klun w’a jɔman like nga Zoova mannin be’n su. Ɔ maan, be plannin i su. Be waan: “Ee! E wla kpɛn ninnge nga e di be Ezipt lɔ’n be su: kpatra bɔ e di-ɔ e yi-man dein’n, e di kɔnkɔmbru, nin melɔn, nin puaro nin lai mun. Siɛn’n e yɛ e su yo kokloo yɛ, e nyan-man like sɔ’m be wie fi e di-mɛn i kun. Mani’n yɛ e wun i sa bɔ tititi-ɔ.” (Kal. 11:5, 6) Nanwlɛ, cialɛ yɛ be akunndan bulɛ wafa’n ciali tɛtɛ kpa ɔ. Ɔ maan, be kunndɛli kɛ bé sá be sin kanga nun ekun. (Kal. 14:2-4) Izraɛlifuɛ’m be niannin be sin. Ɔ maan, Zoova wa yili i sa be su.​—Kal. 11:10.

10. ?Afɔtuɛ benin yɛ sa ng’ɔ juli Izraɛlifuɛ’m be su’n, ɔ man e ɔ?

¹⁰ ?Afɔtuɛ benin yɛ sa sɔ’m be man e ɔ? Kɛ kekle’n tɔ e su’n, nán maan e bu i kɛ mɛn nga e dili i laa naan y’a su Zoova’n yɛ ɔ ti kpa ɔ. Sɛ e bu laa sa mun nin afɔtuɛ nga be man e’n be su akunndan’n, annzɛ kusu sɛ e ɲin kpɛn laa sa fɛfɛ kpa’m be su’n, ɔ timan tɛ. Sanngɛ i sɔ yolɛ nun’n, maan e nanti ngwlɛlɛ su. Sɛ ɔ timɛn i ti’n, e ɲin kwla tu Ɲanmiɛn i sulɛ’n su, ɔ maan e konvi kwla sɔ laa blɛ’n.​—An kanngan 2 Piɛr 2:20-22 nun.

NINNGE NGA E YOLI BE LAA’N

11. ?Wafa sɛ yɛ aniaan wie’m be bu ninnge nga be kacili be sin sili be’n niɔn?

¹¹ Aniaan wie’m be niannin be sin, yɛ be wa buli i kɛ ninnge kpakpa wie’m be sannin be wun. I sɔ’n yo annvɔ o! Atrɛkpa’n, amun kwla di suklu be kɔ mmua, annzɛ amun kwla ɲan sasu, annzɛ kusu amun kwla ɲan sika kpanngban. Sanngɛ amun a nianman i sɔ ninnge’m be lɔ. Aniaan sunman be yoli sɔ. Siɛn’n, blɛ’n w’a cuɛn nun sanngɛ mɛn’n i awieliɛ’n nin a juman. ?Ɔ maan, sɛ ɔ ti kɛ amun a fɛmɛn i sɔ ajalɛ’n, sa ng’ɔ kwla ju’n, blɛ wie nun’n, amun bu su akunndan?

12. ?Wafa sɛ yɛ Pɔlu buli ninnge nga ɔ yacili be’n mun ɔn?

¹² Akoto Pɔlu kacili i sin sili ninnge kpanngban naan w’a kaci Klist i sɔnnzɔnfuɛ. (Fil. 3:4-6) ?Wafa sɛ yɛ ɔ buli ninnge sɔ mun ɔn? I bɔbɔ tɛ su kɛ: “Like nga laa m bu i kɛ ɔ ti n like kpa’n, siɛn’n Krist ti’n, m bu-mɛn i like fi kun.” ?Ngue ti yɛ ɔ seli sɔ ɔ? Ɔ kan gua su kɛ: “Kɛ m bu min Min Krist-Jésus i silɛ bɔ n si i’n like kpa sakpa’n ti, ɔ maan n bu-man like’n wie fi like. I ti m’an yaci like’n kwlaa kɛ ɔ́ yó naan Krist a yo n like kpa naan min  nin i y’a kaci sran wunmuan’n ti.” * (Fil. 3:7-9) Wafa kunngba nga sran kun gua wla blo m’ɔ yomɛn i nsisɔ sa’n, mɛn’n nun ninnge nga Pɔlu yacili be’n, b’a yomɛn i nsisɔ. W’a buman be like fi.

13, 14. ?Wafa sɛ yɛ e kwla nanti Pɔlu i ajalɛ’n su ɔ?

¹³ ?Sɛ e te bu ninnge nga e yacili be yolɛ’n i akunndan’n, ngue yɛ ɔ fata kɛ e yo ɔ? ?Wafa sɛ yɛ e kwla nanti Pɔlu i ajalɛ’n su ɔ? Yɛle kɛ ninnge nanndoliɛ nga kɛ é sé yɛ’n e le be’n, maan e bu be akunndan. I wie yɛle Zoova mɔ e su i’n, ɔ nin sran kpa mɔ Zoova bu e’n. (Ebr. 6:10) Ninnge nga Zoova fa man e andɛ’n, ɔ nin nga ɔ́ fá mán e ainman’n, mɛn’n nun ninnge wie fi toman be.​—An kanngan Mark 10:28-30 nun.

¹⁴ Pɔlu boli like kun ekun m’ɔ kwla uka e naan y’a su Ɲanmiɛn titi’n, i su. Ɔ seli kɛ: “N wla fi like ng’ɔ o min sin’n naan ń tínndin maan n sa to like ng’ɔ o min nyrun lɔ’n.” (Fil. 3:13) Maan e sie i nzɔliɛ kɛ Pɔlu kannin ninnge cinnjin nɲɔn be ndɛ. Be nun klikli’n yɛle kɛ ɔ fata kɛ e wla fi ninnge nga e yacili be siɛn lɔ’n mlɔnmlɔn. Nán maan e kle e wun yalɛ e bu be su akunndan kun. I nɲɔn su’n yɛle kɛ maan e yo kɛ sran kun m’ɔ su si wanndilɛ nun akplowa m’ɔ tinndin i sa naan w’a ju i juwlɛ’n sa. Maan e ɲin tran like nga ɔ o e ɲrun lɔ’n su.

15. ?Kɛ e bu Ɲanmiɛn i sufuɛ’m be ajalɛ kpa’n i su akunndan’n, mmlusuɛ benin yɛ e ɲɛn i ɔ?

¹⁵ Kɛ e bu be nga be su Ɲanmiɛn laa’n, annzɛ be nga be su i andɛ’n be ajalɛ kpa’n i akunndan’n, ɔ wla e fanngan naan y’a wɔ e ɲrun titi naan y’a nianman e sin. I wie yɛle Abraamu nin Sara mɔ be tuli Ir lɔ’n, be liɛ’n. Sɛ ɔ ti kɛ be “nyin kpɛnnin nvle nga be tuli lɔ’n su’n, wuun be sali be sin.” (Ebr. 11:13-15) Sanngɛ b’a yoman sɔ. Ninnge nga Moizi yacili be Ezipti lɔ’n, be sɔnnin tra nga i sin’n, Izraɛlifuɛ’m be wa yacili be lɔ’n. Sanngɛ Biblu’n i lika wie fi kanman kɛ ninnge sɔ’m be ti’n, Moizi ijɔli i konviabo. I kpa’n bɔbɔ Biblu’n waan: “Ɔ wunnin i kɛ finfin nga Krist ti be yo i’n ɔ ti kpa tra Ezipt lɔ like kpakpa’n kwlaa, afin like ng’ɔ́ wá nyɛ́n i cɛn wie’n, i nyin tɛ i mmua lɔ.”​—Ebr. 11:26.

E NDAWLƐ LIKE

16. ?Wafa sɛ yɛ ninnge nga e yoli be laa’n, i su akunndan bulɛ’n kwla kle e yalɛ ɔ?

¹⁶ Ninnge nga e yoli be laa’n, nɛ́n i ngba yɛ ɔ ti kpa ɔ. Ɔ ju wie’n, sa tɛ nga e yoli be laa’n, be sinsin e ɲin su. (Jue. 51:5) Sa tɛ sɔ’m be su afɔtuɛ nga be mannin e laa’n, e ɲin te kpɛnkpɛn su. (Ebr. 12:11) Asa ekun’n, sɛ be yoli e sa yaya wie annzɛ kusu e bu i kɛ be buli e lufle’n, i sɔ ninnge’m be su akunndan bulɛ’n, ɔ kwla kle e yalɛ. (Jue. 55:3) ?Ngue yɛ e kwla yo naan i sɔ ninnge’m be ti’n, y’a nianman e sin ɔn? É wá kán sran nsan be ndɛ.

17. (a) ?Ngue ti yɛ Pɔlu seli kɛ ɔ “ti i sran’m be kwlaa be nun kaan’n” niɔn? (b) ?Ngue yɛ ɔ ukali Pɔlu naan i akunndan’n w’a sannganman ɔn?

¹⁷ Sa tɛ nga e yoli be laa’n. Akoto Pɔlu kannin i bɔbɔ ndɛ seli kɛ ɔ “ti Nyanmiɛn i sran’m be kwlaa be nun kaan’n.” (Efɛ.  3:8) ?Ngue ti yɛ ɔ seli sɔ ɔ? I waan: “Afin n kleli Nyanmiɛn i asɔnun’n yalɛ.” (1 Kor. 15:9) Atrɛkpa’n kɛ Pɔlu nin aniaan nga ɔ kle be yalɛ laa be yiali’n, ɲannzuɛn kunnin i dan. Sanngɛ w’a yoman naan ɲannzuɛn sɔ’n ti’n, i akunndan’n w’a sanngan. Ye nga Zezi yoli i’n, i su yɛ ɔ fɛli i ɲin sieli ɔ. (1 Tim. 1:12-16) Ɔ maan, ɔ fɛli i wun wlɛli i jasin fɛ’n junman’n nun mlɔnmlɔn. Kɛ Pɔlu seli kɛ ɔ́ fá ninnge wie mun síe i sin’n, be nun kun yɛle i ayeliɛ laa’n. Sa tɛ nga e yoli be laa’n, e kwlá nunnunman be. Ɔ maan, sɛ e bu be su akunndan titi’n, ɔ ti e wun yalɛ klelɛ ngbɛn. Like nga ɔ fata kɛ e yo’n, yɛle kɛ maan e bu ye nga Zoova yoli e’n i akunndan, naan e wla e wun ase e su i.

18. (a) ?Sɛ afɔtuɛ nga be mannin e’n, ɔ te lo e ngasi’n, ngue sa yɛ ɔ kwla ju ɔ? (b) ?Ngue ti yɛ ɔ ti kpa kɛ e fa Salomɔn i afɔtuɛ’n su ɔ?

¹⁸ Fɔ nga be tu e kekle kpa’n. Atrɛkpa’n, sɛ be tuli e fɔ laa’n, e ɲin kwla kpɛnkpɛn su titi. I sɔ kwla yo maan i ya’n, ɔ wieman e nun le. Ɔ maan e sa sin kwla bubu e bɔbɔ. (Ebr. 12:5) Fɔ nga be tu e’n, sɛ e ka lɛ e kpalo i o, annzɛ kusu sɛ e sɔ nun naan i sin e sa sin bubu e o, i kunngba’n niɔn. Yɛle kɛ y’a faman afɔtuɛ sɔ’n su, ɔ maan ɔ kwlá ukaman e. Ɔ flunman kɛ e fa Salomɔn i ndɛ yɛ’n su. I waan: “Sran nga i waan nán maan be tu i fɔ’n, ɔ kpɔ i bɔbɔ wun. Sran nga be tu i fɔ b’ɔ fa’n, i sɔfuɛ’n ɔ́ yó ngwlɛlɛfuɛ.” (Nya. 15:32) Kɛ loto nun cisanfuɛ kun, m’ɔ nian loto nun cisanlɛ’n i mmla’n su sa’n, afɔtuɛ nga be man e’n, maan e sɔ nun klanman, naan e yo kpa e tra laa’n.​—Nya. 4:26, 27; an kanngan Ebre Mun 12:12, 13 nun.

19. ?Wafa sɛ yɛ e kwla nanti Zeremi nin Abakiki be ajalɛ’n su ɔ?

¹⁹ Sɛ be yoli e sa yaya wie annzɛ kusu e bu i kɛ be buli e lufle’n. Ɔ ju wie’n, e kwla yo kɛ Ɲanmiɛn nuan ijɔfuɛ Abakiki sa. Ɔ kpan flɛli Zoova naan ɔ de i. Sanngɛ like nga ti yɛ Zoova mannin sa yalɛ wie’m be atin naan be ju’n, Abakiki w’a wunmɛn i wlɛ. (Aba. 1:2, 3) Nanwlɛ ɔ ti cinnjin kɛ e nian Ɲanmiɛn nuan ijɔfuɛ sɔ’n i Ɲanmiɛn sulafilɛ’n su. I waan: “Sanngɛ n liɛ’n, n lɛ aklunjuɛ Anannganman dunman nun, kɛ Nyanmiɛn ti min defuɛ’n ti n lɛ aklunjuɛ.” (Aba. 3:18) Sran uflɛ ekun yɛle Zeremi. I waan ‘i wla’n ɔ tɛ o lɛ,’ yɛle kɛ ɔ minndɛli kɛ Zoova yi i wun nglo. Maan e yo kɛ Zeremi m’ɔ lafili Zoova m’ɔ ti Ɲanmiɛn m’ɔ yo sa nuan su sɛsɛ’n i su’n sa. E lafi su kɛ sɛ i blɛ’n ju’n, Zoova síesíe ninnge’n kwlaa be ye.​—Ngw. 3:19-24.

20. ?Wafa sɛ yɛ e kwla kle kɛ ‘e bu Lɔt yi’n i liɛ’n i akunndan’ ɔn?

²⁰ Blɛ nga e o nun yɛ’n, ɔ ti i liɛ ngunmin. Kɛ é sé yɛ’n, sa cinnjin wie’m be su ju, yɛ wie’m bé wá jú e ɲrun lɔ’n ekun. I sɔ’n ti’n, maan e nin Zoova i anuannzɛ’n e nanti likawlɛ titi. Biblu’n waan ɔ flunman kɛ e nian e ɲrun lɔ, naan nán e nian e sin. Sɛ e yo sɔ’n, é klé kɛ ‘e bu Lɔt yi’n i liɛ’n i akunndan.’

[Ja ngua lɛ ndɛ’n]

[Kosan mun]