?Amun si sɔ?

?Ngue ti yɛ sika kacifuɛ’m be o Zerizalɛmu lɔ Ɲanmiɛn i sua’n nun ɔn?

▪ Kɛ ɔ ka kan bé kún Zezi’n, ɔ buli sa kun m’ɔ nin Ɲanmiɛn i sua’n nun fataman’n i fɔ. Biblu’n waan: “Jésus fuannin be kwlaa nga be yo like atɛ lɔ’n, nin be nga be to like’n, yɛ ɔ suli sika mma kacifuɛ’m be tabli’n nin be nga be yo okunmomo atɛ’n be bia’m be bo guali. Yɛ ɔ seli be kɛ: ‘Be klɛli i kɛ: “Bé wá flɛ́ n sua’n lika bɔ sran nin Nyanmiɛn be koko yalɛ nun,” sanngɛ amu’an fa kaci awiefuɛ’m be fiawlɛ.’”—Matie 21:12, 13.

Zezi blɛ su’n, Zuifu nin nvle uflɛ nun sran’m be fin nvlenvle nin klɔ’m be su be ba Ɲanmiɛn i sua’n nun Zerizalɛmu lɛ. Kɛ bé bá’n, be lɔ sika mma o be sa nun. Sanngɛ, sika nga be di su Zerizalɛmu lɔ’n yɛ ɔ ti mɔ be fa tua Ɲanmiɛn i sua’n i ti sika nga ɔ fata kɛ be tuɛ i afuɛ nuan kwlaa nun’n annzɛ be fa to nnɛn nga bé fá yí tɛ’n, annzɛ be fa yi be klunklo like uflɛ be man Ɲanmiɛn ɔn. I ti’n, sika kacifuɛ’m be kaci sran sɔ’m be sika’n Zerizalɛmu lɔ liɛ’n nun. Sanngɛ be fa sika’n i bue sie. Ɔ ti be junman’n i ti akatua. Kɛ Zuifu’m be cɛn dilɛ blɛ’n ko ju’n, sika mma kacifuɛ sɔ’m be siesie be tabli mun Ɲanmiɛn i sua’n nun lɔ lika nga be nga be timan Zuifu’m be le atin be kɔ lɔ wie’n i nun.

Sɛ Zezi seli kɛ sika mma kacifuɛ’m be fali Ɲanmiɛn i sua’n be kacili ‘awiefuɛ’m be fiawlɛ’n,’ ɔ kle kɛ kɛ be kaci sran’m be sika’n, be kpɛ i lɔuun lika sie.