2 E ndɛ loman Ɲanmiɛn ?Ndɛ sɔ’n ti nanwlɛ?
2 E ndɛ loman Ɲanmiɛn ?Ndɛ sɔ’n ti nanwlɛ?
Atrɛkpa’n amun a ti ndɛ nga le: “Sɛ ɔ ti kɛ klɔ sran’m be ndɛ lo Ɲanmiɛn sakpa’n, nn ɔ nunnunnin sa tɛ nin ɲrɛnnɛn nga be o mɛn’n nun’n w’a cɛ. Sɛ bɔbɔ klɔ sran’m be wunmuan’n be ndɛ lo i’n, sanngɛ sa nga be ju e tinuntinun e su’n i ndɛ nunman nun.”
Ndɛ nga Biblu’n kan’n: Ɲanmiɛn Zoova faman ɲrɛnnɛn’n yimɛn i sran’m be su. (Zak 1:13) Blɛ kwlaa nga Ɲanmiɛn klo’n su’n, ɔ kwla yo naan ɲrɛnnɛn’n kwlaa wie. Sanngɛ ɔ yaci mɛn tɛ nga lɛ, kɛ ɔ ko yo naan w’a kpɛ akplowa kun m’ɔ tɔli klɔ sran klikli’m be blɛ su’n, i nun’n ti. Kɛ i blɛ liɛ ko ju’n, ɔ́ fá ajalɛ klɔ sran’m be lika, ɔ́ núnnún sa tɛtɛ nga be nga be kpalo i sielɛ’n be yo’n.—Bo Bolɛ 3:1-6; Ezai 65:17. *
Klɔ sran’m be wunmuan’n be ndɛ lo Ɲanmiɛn. Sanngɛ e tinuntinun e ndɛ lo i kpa wie. Matie 10:29-31 waan: “?Be yo-man ndrofia nnyɔn atɛ bablu kun? Sanngɛ ɔ nin i sɔ’n ngba, sɛ amun Si a kplin-man su’n, be nun kun sa tɔ-man. Amun ti ndrɛ’n bɔbɔ, ɔ si i nuan. Ɔ maan nán srɛ kun amun mlɔnmlɔn, afin an ti kpa tra ndrofia kpanngban.” Ndɛ sɔ’n kle kɛ e su ninnge wie mɔ e bɔbɔ e siman be’n, Ɲanmiɛn fɛ i ɲin sie be su.
Wafa nga nanwlɛ’n i silɛ’n kwla yo amun ye’n: E kunndɛman kɛ e nin sran nga i ndɛ kanlɛ yo ya annzɛ i ndɛ nunman sran ndɛ nun’n, é sán nun. Ɔ maan kɛ be bua Ɲanmiɛn i su ato kɛ i ndɛ nunman sran ndɛ nun’n, i sɔ’n yo maan sran sunman be kunndɛman kɛ bé sí i mlɔnmlɔn. Annzɛ sɛ á wún kɛ bé fá be wun bé mɛ́ntɛn i’n, nn be lemɛn i yowlɛ kun ti ɔ. Sɛ e wun i wlɛ kɛ e ndɛ lo Ɲanmiɛn Zoova sakpa’n, i sɔ’n kwla yo naan y’a suɛn i su like kpa, naan e nin i y’a tra janvuɛ.
Atrɛkpa’n, sa wie ti’n amun srɛli Ɲanmiɛn. Sanngɛ amun siman sɛ ɔ fɛ i su sieli amun srɛlɛ i bo o, annzɛ sɛ ɔ́ tɛ́ su o. Biblu’n gua e awlɛn su nzue kɛ Ɲanmiɛn liɛ’n, blɛ kwlaa nun’n ‘sɛ be srɛ i ɔ, ɔ ti.’ Ɔ fɛ i su sie i be kwlaa nga be tu be klun be srɛ i’n be nuan bo.—Jue Mun 65:3.
Ɲanmiɛn yia amun kɛ ‘an koko sa ng’ɔ o amun su’n i kwlaa kle i, afin i yɛ ɔ nian amun lika-a.’ (1 Piɛr 5:7) Sɛ ɲrɛnnɛn dan wie tɔ e su bɔbɔ’n, e kwla lafi su kɛ e ndɛ lo i naan ɔ́ súan e bo. Afin i Ndɛ’n se e kɛ: “Anannganman mantan be nga be akunndan’n w’a sanngan’n. Yɛ ɔ de be nga be wla’n w’a bo’n.”—Jue Mun 34:19.
[Ja ngua lɛ ndɛ’n]
^ Sɛ amun kunndɛ kɛ amún wún like nga ti yɛ Ɲanmiɛn yaci klɔ sran’m be lɛ mɔ be wun ɲrɛnnɛn’n i wlɛ kpa ekun’n, an nian fluwa ?Ngue like yɛ Biblu’n kle i sakpasakpa ɔ? i ndɛ tre 11 nun.
[Ndɛ kwle, bue 5]
?Sɛ e ndɛ loman Ɲanmiɛn’n, nn ɔ́ sé e kɛ e srɛ i?
