1 Be kwlá siman Ɲanmiɛn ?Ndɛ sɔ’n ti nanwlɛ?

Atrɛkpa’n amun a ti ndɛ nga le: “Be kwlá siman Ɲanmiɛn mlɔnmlɔn.”

Atrɛkpa’n amun tili i kɛ wafa nga Ɲanmiɛn fa yo ninnge mun’n sran fi kwlá wunmɛn i wlɛ. Naan kɛ mɔ e nin i e afiɛn’n ti nun dan’n ti’n, e kwlá simɛn i naan se kɛ é fá e wun é mɛ́ntɛn i. Atrɛkpa kusu’n, sran wie’m be seli amun kɛ Ɲanmiɛn ti atre nsan naan be kwlá yiyiman i sɔ liɛ’n nun weinwein.

Ndɛ nga Biblu’n kan’n: Zezi kannin Ɲanmiɛn i ndɛ seli kɛ be nga bé ‘sí i bɔ i kunngba cɛ yɛ ɔ ti Nyanmiɛn’n’ bé ɲán suralɛ kpanngban. (Zan 17:3) ?Sɛ be kwlá siman Ɲanmiɛn’n, é yó sɛ naan y’a fa Zezi i ndɛ’n su? Ɲanmiɛn fɛmɛn i wun fiaman. Afin ɔ klo kɛ sran kwlaa si i.—Zeremi 31:34.

I yo, e su kwlá siman Ɲanmiɛn i su like kwlaa le. Maan e lafi su sɔ afin wafa nga Ɲanmiɛn yo ninnge mun’n ɔ nin i klun akunndan’n be nin e liɛ’n be ti nun kpa fuun.—Akunndanfuɛ’n 3:11; Ezai 55:8, 9.

Wafa nga nanwlɛ’n i silɛ’n kwla yo amun ye’n: ?Sɛ be si Ɲanmiɛn ɔn ɔ yoman ye’n, nn ngue ti yɛ sran kun kó klé i wun yalɛ kɛ ɔ́ súɛn i silɛ yɛ? Nanwlɛ, Ɲanmiɛn kunndɛ kɛ e si i. Ɔ klo ekun kɛ e nin i e kaci kɛ janvuɛ nɲɔn mɔ be ti koko nɲa nun’n ɔ timan’n sa. Ɲanmiɛn flɛli Abraamu m’ɔ suli i kpa’n kɛ “min janvuɛ.” Izraɛli Famiɛn Davidi kusu klɛli i kɛ: ‘Anannganman kan i klun ndɛ kle be bɔ be nyin yi i’n, afin be ti i janvuɛ.’—Ezai 41:8; Jue Mun 25:14.

?Kɛ be kan kɛ sran kun nin Ɲanmiɛn be kwla yo janvuɛ kpa’n, ɔ bo amun nuan? Kɔlɛ’n, ɔ yo amun sɔ. Sanngɛ maan amun bu ndɛ ng’ɔ o Sa Nga Be Yoli’n 17:27 nun’n i akunndan be nian. I waan: “[Ɲanmiɛn] nin e nun wie fi nun-man mmua.” ?Ndɛ sɔ’n i bo’n yɛle benin? Ɲanmiɛn sin Biblu’n i lika kle e wafa nga e kwla si i kpa’n. *

Ɔ se e kɛ be flɛ i “Zoova.” (Ezai 42:8, NW) Ɔ kannin wafa nga laa ɔ nin klɔ sran’m be trannin’n i ndɛ Biblu’n nun naan y’a wun sran’n i wafa ng’ɔ ti’n. W’a kaman i sɔ’n su. E nin i e nantilɛ’n nun’n, wafa nga i wun fa yo i’n ɔ yi i nglo kle e wie. Ɔ seli kɛ: “N ti Nyanmiɛn aklunyefuɛ, nin aunnvuɛ sifuɛ, n fa-man ya ndɛndɛ. Min aklunye’n ti dan, yɛ sa nga n kan kɛ ń yó be’n, ń yó be.” (Ezipt Lɔ Tulɛ 34:6) E aeliɛ’n kwla klɔklɔ Ɲanmiɛn i ya’n annzɛ ɔ yo maan i klun jɔ. I wie yɛle kɛ kɛ laa Izraɛlifuɛ’m be nun wie’m be jasoli i wun’n, i sɔ’n “klɔklɔli i” ya’n. Sanngɛ kɛ sran wie’m be fa akunndan mɔ be nanti i mmla’n su’n, i klun jɔ.—Jue Mun 78:40; Nyanndra Mun 27:11.

[Ja ngua lɛ ndɛ’n]

[Ndɛ kwle, bue 4]

?Sɛ Ɲanmiɛn ti atre nsan naan be kwlá simɛn i’n, be kwla kɛn i silɛ ndɛ?

[Foto cifuɛ mun, bue 4]

The Trinity c.1500, Flemish School, (16th century) / H. Shickman Gallery, New York, USA / The Bridgeman Art Library International