B’a tra sran ng’ɔ fia sie mɛn’n

CƐN kun’n, Zezi seli sran nga be o i wun lɛ’n be kɛ: “Bé wá kán sran ng’ɔ sie mɛn nga’n i bo.” I sin’n, ɔ kan guali su kɛ ‘sran ng’ɔ sie mɛn nga’n, ɔ kwlá yo-mɛn i [bɔbɔ] i like fi mlɔnmlɔn,’ naan “Nyanmiɛn a bu sran ng’ɔ sie mɛn nga’n i fɔ.” (Zan 12:31; 14:30; 16:11) ?Wan ndɛ yɛ Zezi su kan ɔn?

Kɛ e bu “sran ng’ɔ sie mɛn nga’n” i su ndɛ nga Zezi kannin’n i akunndan’n, ɔ ti weiin kɛ nɛ́n i Si Ɲanmiɛn Zoova i ndɛ yɛ ɔ kan ɔn. ?Yɛ nn wan yɛle “sran ng’ɔ sie mɛn nga’n”? ?Wafa sɛ yɛ ‘bé wá kɛ́n i bo’ ɔ? ?Yɛ wafa sɛ yɛ ‘Nyanmiɛn buli i fɔ’ ɔ?

“Sran ng’ɔ sie mɛn nga’n” i bɔbɔ maan y’a wun i wlɛ

Ɔ ju wie’n, be nga be si sa tɛ yolɛ’n i wun ngwlɛlɛ’n, be fa ninnge nga be kwla yo be’n di be nuan. I nun mɔ Satan sá Ɲanmiɛn i Wa Zezi nían’n, i kunngba’n wie yɛ ɔ yoli ɔ. Ɔ fali “mɛn’n i famiɛn diwlɛ’n kwlaa” kleli Zezi. Kpɛkun ɔ seli i kɛ: “Ń fá mɛn nga i kwlaa mán wɔ kɛ a sie be, yɛ ń fá anyrunnyan ninnge’n kwlaa mán wɔ, afin be fa mannin min, yɛ n kusu ń fá mán sran nga n klo kɛ ń fá mɛ́n i’n. I sɔ’n ti’n, sɛ a koto m bo’n, i kwlaa’n káci ɔ liɛ.”​—Lik 4:5-7.

?Sɛ ɔ ti kɛ sa tɛ ng’ɔ o sran nun’n yɛ be flɛ i mmusu’m be si Satan kɛ nga sran wie’m be fa kan’n sa’n, nn be wun ndɛ sɔ’n i wlɛ sɛ yɛ ɔ yo ye ɔ? ?Kɛ be yoli Zezi i batɛmu wieli’n akunndan tɛ wie annzɛ i wla yɛ ɔ boli yɛ ɔ su sɛ i nian ɔn? ?Sɛ ɔ ti sɔ’n nn Biblu’n kwla se kɛ “sa tɛ kaan sa bɔn-mɛn i wun” annzɛ sa tɛ kaan sa nunmɛn i nun? (1 Zan 3:5) Zezi kleli weiin kɛ Satan le kwlalɛ klɔ sran’m be su. Afin ɔ seli kɛ “sran ng’ɔ sie mɛn nga’n” yɛle Satan. Yɛ ɔ seli ekun kɛ Satan “ti sran kunfuɛ,” naan “ɔ bua ato.”​—Zan 14:30; 8:44.

Kɛ Klist nin Satan be yiali nun sɔ’n m’ɔ dili afuɛ 60 tra su’n, akoto Zan kpɛnnin Klistfuɛ’m be wla kɛ Satan te le tinmin kpa. Ɔ seli kɛ: “Klunwifuɛ’n sie mɛn wunmuan’n.” Zan seli ekun kɛ Satan sɔ’n “ɔ laka mɛn wunmuan nunfuɛ’m be kwlaa.” (1 Zan 5:19; Sa Nglo Yilɛ 12:9) Ɔ ti weiin kɛ, kɛ Biblu’n kan “sran ng’ɔ sie mɛn nga’n” i ndɛ’n, aolia nun sran kun i ndɛ yɛ ɔ kan ɔn. ?Sanngɛ yoo, nin yɛ Satan i tinmin ng’ɔ le i sran’m be su’n ɔ kɔ lele ju ɔ?

Mɛn’n i siefuɛ’n man i sran’m be kwlalɛ

Akoto Pɔlu klɛli kplilɛ nga Klistfuɛ’m be kpli naan b’a kwla lafi Ɲanmiɛn su titi’n i su ndɛ. Ndɛ sɔ’n nun’n ɔ kannin be kpɔfuɛ’m be nun tɛtɛ kpa’m be ndɛ. Ɔ kɛnnin i weiin kleli be kɛ: “Nán e nin klɔ sran yɛ e kun-ɔn, sanngɛ e nin mmusu mun, nin aosin tuun nga e o nun yɛ’n i min’n i kpɛnngbɛn mun, yɛ mmusu tɛtɛ bɔ be o nglo lɔ’n yɛ e kun-ɔn.” (Efɛzfuɛ Mun 6:12) Kɛ nga e fa wun i lɛ’n, alɛ sɔ’n nunman Klistfuɛ mun nin “klɔ sran” mun be afiɛn. Afin be nin “mmusu tɛtɛ” mun yɛ be kun ɔn.

Biblu kun mɔ be klɛli ɔ nin a cɛman kpa sɔ liɛ’n, ɔ flɛ “mmusu tɛtɛ” sɔ’m be kɛ ‘wawɛ tɛtɛ mun mɔ be o nglo lɔ’n lika nun’n.’ (Anuãsɛ Fuflɛ) Ɔ maan nán sa tɛ wie m’ɔ o sran nun’n yɛ be flɛ i mmusu mun ɔn. I sɔ’n kle kɛ mmusu’m be si Satan sin anzi ɲin keklefuɛ kɛ i sa’n be lika sie sran mun. Be yɛle anzi nga “bɔ be yacili be lika’n,” be bali asiɛ’n su wa’n.​—Zid 6.

Wafa nga “aosin tuun nga e o nun yɛ’n i min’n i kpɛnngbɛn mun” be sɔli sran’m be sielɛ lele andɛ’n, Biblu’n nun fluwa nga be flɛ i Daniɛl ɔ yiyi nun. Ɲanmiɛn nuan ijɔfuɛ Daniɛli i wiengu Zuifu nga be fin lomuɛn  Babilɔni bali Zerizalɛmu afuɛ nga be flɛ i 537 ka naan b’a wu Zezi’n i nun’n, be ndɛ loli i kpa. Ɔ maan ɔ srɛli be ti Ɲanmiɛn lele le mɔcuɛ nsan. Kɛ ɔ yoli sɔ’n, anzi kun mɔ Ɲanmiɛn sunmɛnnin i kɛ ɔ wa fɔnvɔ Daniɛli’n, ɔ cɛli atin nun. Ɔ kannin like ti yɛ ɔ cɛli’n i ndɛ seli kɛ: “Wawɛ ng’ɔ sasa Pɛrs famiɛn diwlɛ’n, ɔ buli min nyrun cɛn ba ablaɔn-nin-kun.”—Daniɛl 10:2, 13.

?Wan yɛle “wawɛ ng’ɔ sasa Pɛrs famiɛn diwlɛ’n”? Saan mmusu’m be si Satan i sa nun sran kun cɛ yɛle wawɛ sɔ m’ɔ tanndannin anzi’n i ɲrun’n. Wawɛ sɔ’n yɛle mmusu kun mɔ Satan fɛli i sieli i Pɛrsifuɛ’m be famiɛn diwlɛ’n su’n. Daniɛli i ndɛ kunngba sɔ’n nun’n, Ɲanmiɛn i anzi’n seli ekun kɛ ɔ nin “wawɛ ng’ɔ sasa Pɛrs mɛn’n” sɔ’n bé kó kún ekun. Naan ɔ nin “wawɛ ng’ɔ sasa Grɛk mɛn’n” bé kún wie.—Daniɛl 10:20.

?I kwlaa sɔ’n kle e sɛ? Ɔ kle e kɛ aolia nun sran wie’m be o lɛ sakpa naan be yɛ be ti “aosin tuun nga e o nun yɛ’n i min’n i kpɛnngbɛn mun” ɔn. Naan be jran Satan m’ɔ ti be su kpɛn’n i ja nun yɛ be sie mɛn’n niɔn. ?Sanngɛ lele m’ɔ́ fá jú andɛ’n, ngue yɛ be kunndɛ ɔ?

Mɛn i siefuɛ’n kle wafa nga i klun’n ti’n

Biblu’n nun fluwa kasiɛn’n mɔ yɛle Sa Nglo Yilɛ fluwa’n i nun’n, akoto Zan kannin wafa nga Zezi mɔ yɛle anzi kpɛnngbɛn Misɛli’n ɔ kwlali mmusu’m be si Satan nin i mmusu mun’n i ndɛ. Kɛ ɔ kwlali be’n ɔ kannin be bo ɲanmiɛn su lɔ. I sin ɲrɛnnɛn sa nga be juli’n, Zan kannin be ndɛ wie. Ɔ klɛli i kɛ: ‘Asiɛ’n i yako! Afin mmusu’m be si Satan’n w’a ba ɔ wun wa ya su yɛlɛ kɛ ɔ si kɛ i cɛn’n w’a sɔn-man kun.’​—Sa Nglo Yilɛ 12:9, 12.

?Wafa sɛ yɛ Satan yi ya dan m’ɔ fali’n i nglo ɔ? Kɛ sa tɛ yofuɛ sunman be ɲin ko mian’n, be yo abɔlɛ kwlaa nga be kwla yo naan be klun sa’n w’a kpɛn su’n. I kunngba’n Satan nin i mmusu’m b’a gugu kɛ sɛ bé núnnún be’n be nin asiɛ’n nin i su sran mun ɔn. Satan si kɛ blɛ ng’ɔ le i’n w’a sɔnman kun. I sɔ’n ti’n, ɔ fa aata dilɛ dandan m’ɔ ti klɔ sran’m be like cinnjin kun mɔ i sa o su’n, ɔ yo naan sran’m be toto ninnge’m be finfin. I sɔ’n kusu’n, ɔ yo maan asiɛ’n i bo lɔ ninnge mun yɛ i su ninnge’m be wie. Asiɛ bɔbɔ ba’n su saci. Ɔ maan klɔ sran’m be nguan nun tranlɛ’n su yo kekle kɔ.​—Sa Nglo Yilɛ 11:18; 18:11-17.

Kɛ Ɲanmiɛn boli klɔ sran lele m’ɔ́ fá jú andɛ’n, kwlalɛ dan mɔ Satan kunndɛ i titi’n, i ɲin fite politiki nin Ɲanmiɛn sulɛ’n nun. Sa Nglo Yilɛ fluwa’n fali famiɛn diwlɛ mun sunnzunnin blo nnɛn mɔ Satan mɛnnin i “kwlalɛ dan’n.” Ɔ kɛn i ekun kɛ Ɲanmiɛn sulɛ wafa’m be nin politikifuɛ’m be bo ti kun. Naan i sɔ’n ti ɲannzuɛn like. Fluwa’n sɔ nun’n, be fa be aeliɛ sɔ’n sunnzun tekle bolɛ. (Sa Nglo Yilɛ 13:2; 17:1, 2) Sran’m be wunnin ɲrɛnnɛn, be fali wie yoli kanga. Nvlenvle’m be kunnin be wun, sran wie’m be dili be aniɛn’n i ti alɛ. Be yoli i sɔ afuɛ kpanngban. I kwlaa sɔ’n ti’n, sran akpinngbin kpanngban wuli. ?Kɛ ɔ fɛ i laa lele andɛ’n, sa ɲrɛnnɛnɲrɛnnɛn nga sran’m be yo be’n, sran nanwlɛfuɛ kun kwla se kɛ klɔ sran’m be ɲin su klonglo yɛ be yoli i sɔ sa mun ɔn? ?Kɛ e niɛn i lɛ’n, nán mmusu mun yɛ be wlawlali be ɔ?

Sran ng’ɔ wlawla klɔ sran’m be su kpɛn mun nin famiɛn mun’n, Biblu’n yi i nglo weiin. Kannzɛ be si sɔ o annzɛ be siman sɔ o, sanngɛ be nzuɛn’n fa be siefuɛ m’ɔ yo like kwlaa ng’ɔ ko yo naan i klun sa’n w’a kpɛn su’n i liɛ’n. ?Sanngɛ klɔ sran’m bé wún ɲrɛnnɛn mmusu’m be si Satan i sielɛ’n bo lele cɛn benin?

Satan i ɲrun a ka koko

Junman nga Klist dili i asiɛ’n su wa’n, ɔ kle kɛ Satan nin i mmusu’m be kunlɛ’n w’a mantan koko. Kɛ Zezi i sɔnnzɔnfuɛ’m be kannin wafa nga be fuannin mmusu mun’n i ndɛ kleli i’n, ɔ seli be kɛ: “N wunnin Satan ɔ fin nyanmiɛn su lɔ kɛ nyanmiɛn b’ɔ kpa sin’n sa,  ɔ tɔli.” (Lik 10:18) Ndɛ sɔ mɔ Zezi kannin’n kle kɛ ɔ su di kwlalɛ nga ɔ́ wá kwlá mɛn nga i siefuɛ’n i su aklunjuɛ. Kɛ ɔ ko sɛ i sin ɲanmiɛn su lɔ m’ɔ ko kaci anzi kpɛnngbɛn nga be flɛ i Misɛli’n, yɛ ɔ́ kwlá mɛn’n i siefuɛ sɔ’n niɔn. (Sa Nglo Yilɛ 12:7-9) Ɲanmiɛn nuan ijɔfuɛ’m be ndɛ nga be kannin’n be su like suanlɛ’n kle e kɛ afuɛ nga be flɛ i 1914 * nun annzɛ kɛ afuɛ sɔ’n sinnin kan’n, yɛ Zezi kwlali mɛn’n i siefuɛ’n niɔn.

Kɛ ɔ fɛ i blɛ sɔ’n nun’n, mmusu’m be si Satan si kɛ i ɲrun a ka koko. Kannzɛ ɔ “sie mɛn wunmuan’n,” sanngɛ andɛ’n sran akpinngbin kpanngban be liɛ’n i ɲin ng’ɔ mian naan ɔ́ síe be’n, ɔ yoman ye. Afin Biblu’n tikeli sran sɔ’m be ɲin. Ɔ maan be si wafa nga i klun fa ti’n, ɔ nin i nzuɛn’n. (2 Korɛntfuɛ Mun 2:11) Ndɛ nga Pɔlu kan kleli i wiengu Klistfuɛ mun’n, ɔ cici sran sɔ’m be wla. Ɔ seli be kɛ: “Ɔ cɛ kaan Nyanmiɛn b’ɔ maan sran di alaje’n, ɔ maan amún tía Satan su yɛ amún núnkun i.” *—Rɔmfuɛ Mun 16:20.

Ɔ cɛ kaan sa’n, Satan ká nun! Kɛ Klist wá síe klɔ sran mun klolɛ’n su’n, bé yó maan asiɛ’n káci mɛn klanman. Nzaje sa mun nin sran kpɔlɛ’n ɔ nin aɲinkpli’n bé wíe mlɔnmlɔn. Biblu’n waan: “Kɛ ɔ ko yo sɔ’n, be su bo-man laa sa’m be su be di-man jɔlɛ kun.” (Ezai 65:17) Nanwlɛ blɛ sɔ’n nun’n, be kwlaa nga be floli sran ng’ɔ fia sie mɛn nga’n i sa nun’n, bé dí alaje dan!

[Ja ngua lɛ ndɛ mun]

[Ndɛ kwle, bue 9]

Kɛ Klist wá síe klɔ sran mun klolɛ’n su’n, bé yó maan asiɛ’n káci mɛn klanman.