Maan e suan Ɲanmiɛn Ndɛ’n nun like

?Ngue ti yɛ Ɲanmiɛn yaci sran’m be lɛ mɔ be yo sa tɛ yɛ be wun ɲrɛnnɛn’n niɔn?

Ndɛ akpasua nga tɛ kosan wie mɔ atrɛkpa’n amun fa usali amun wun’n be su. Yɛ ɔ kle e Biblu’n i bue nga e kwla kanngan nun naan y’a wun kosan sɔ’m be su tɛlɛ’n. Zoova i Lalofuɛ’m be klo kɛ bé yíyí ndɛ sɔ’m be nun klé amun.

1. ?Wafa sɛ yɛ sa tɛ yolɛ’n boli i bo ɔ?

Kɛ Satan buali ato klikli’n, yɛ sa tɛ yolɛ’n boli i bo ɔ. Kɛ Ɲanmiɛn yí aolia nun sran ng’ɔ kacili Satan’n, ɔ timan sa tɛ yofuɛ. Ɔ ti anzi kun mɔ fɔ nunmɛn i nun ɔn. Sanngɛ w’a “di-man nanwlɛ mlɔnmlɔn” yɛle kɛ w’a kaman nanwlɛ’n nun. (Zan 8:44) Ɲanmiɛn yɛ ɔ fata kɛ sran’m be su i ɔ, sanngɛ Satan ɲin bloli i sɔ liɛ’n i wun. Ɔ buali ato kleli Ɛvu m’ɔ ti bla klikli’n. Ɔ yoli maan Ɛvu yacili Ɲanmiɛn lɛ, ɔ yoli Satan klun sa’n. Adam kusu wa yoli ɲin kekle Ɲanmiɛn su kɛ Ɛvu sa. Ajalɛ nga Adam fali’n i bo nzuɛn’n yɛle ɲrɛnnɛn’n nin wie’n.—An kanngan Bo Bolɛ 3:1-6, 17-19 nun.

Kɛ Satan wlawlali Ɛvu naan ɔ yo ɲin kekle Ɲanmiɛn su’n, like ng’ɔ kunndɛli’n yɛle kɛ Ɛvu kaci i sin si Ɲanmiɛn i sielɛ’n. Klɔ sran’m be sunman lika be suli Satan su. Be kunndɛman kɛ Ɲanmiɛn yo be Siefuɛ. Ɔ maan Satan kacili “sran ng’ɔ sie mɛn nga’n.”—An kanngan Zan 14:30 nin Sa Nglo Yilɛ 12:9 nun.

2. ?Fɔ o ninnge nga Ɲanmiɛn yili be’n be nun?

Klɔ sran nin anzi nga Ɲanmiɛn yili be’n be kwla fa Ɲanmiɛn i mmla’m be su sɛsɛsɛ guɛ i ti nin i bo. (Mmla’n 32:5) Kɛ Ɲanmiɛn yili e’n, ɔ mannin e atin naan sa kpa annzɛ sa tɛ’n be yolɛ’n nun’n, y’a kwla fa e tiaun ajalɛ. I sɔ liɛ’n yo maan e kwla kle kɛ e klo Ɲanmiɛn.—An kanngan Zak 1:13-15 nin 1 Zan 5:3 nun.

3. ?Ngue ti yɛ Ɲanmiɛn yaci sran’m be lɛ mɔ be wun ɲrɛnnɛn ɔn?

Zoova mannin Satan nin sran’m be atin kan naan be kaci be sin be si i sielɛ’n. ?Ngue ti ɔ? Ɔ yoli sɔ naan be wun i wlɛ kɛ sɛ nán i bɔbɔ’n yɛ ɔ sie e’n, sran’m be ɲin nga be mian naan bé síe be wun’n ɔ́ yó ngbɛn. (Zeremi 10:23) Kɛ afuɛ 6.000 sinnin’n, ndɛ’n ti kpɛli. Klɔ sran’m be siefuɛ’m b’a kwlá nunnunman alɛ’n nin sa tɛ yolɛ’n nin ndrunmun dilɛ’n ɔ nin tukpacɛ’n.—An kanngan Akunndanfuɛ’n 7:29 nin Aku. 8:9 ɔ nin Rɔmfuɛ Mun 9:17 nun.

Be nga be kplin su kɛ Ɲanmiɛn sie be’n, be liɛ’n be ɲan su mmlusuɛ. (Ezai 48:17, 18) Ɔ cɛ kaan sa’n, Zoova wá núnnún klɔ sran’m be awa’m be kwlaa. Saan be nga be kplin su kɛ Ɲanmiɛn sie be’n yɛ bé trán asiɛ’n su ɔ.—Ezai 2:3, 4; 11:9; an kanngan Daniɛl 2:44 nun.

  4. ?Ɲanmiɛn i awlɛn m’ɔ trali’n ti’n, ngue yɛ e kwla yo ɔ?

Satan waan klɔ sran’m be ɲin kwlá yiman Zoova lele guɛmɛn i ti nin i bo. Ɲanmiɛn i awlɛn m’ɔ trali’n ti’n, e kwla fa ajalɛ kun. Yɛle kɛ sɛ Ɲanmiɛn i sielɛ’n yɛ ɔ ti e cinnjin, annzɛ sɛ klɔ sran’m be liɛ’n nin o, e kwla kle kun. Wafa nga e di e mɛn’n yɛ ɔ kle ng’ɔ ti e cinnjin’n niɔn.—An kanngan Zɔb 1:8-11 nin Nyanndra Mun 27:11 nun.

5. ?Wafa sɛ yɛ e kwla fa Ɲanmiɛn e yo e Siefuɛ ɔ?

Kɛ e kunndɛ Ɲanmiɛn sulɛ kpafuɛ’n m’ɔ taka Biblu’n m’ɔ ti Ɲanmiɛn i Ndɛ’n su’n, mɔ e nian su e su i’n, yɛ ɔ kle kɛ Ɲanmiɛn’n ti e Siefuɛ ɔ. (Zan 4:23) Asa ekun’n, kɛ Zezi sa’n, e faman e wun e wlaman politiki’n nin alɛ’m be nun.—An kanngan Zan 17:14 nun.

Satan fɛ i kwlalɛ’n yo naan sran’m be yo finfin ninnge mun ɔ nin ninnge nga be kwla fa ɲrɛnnɛn yi be su’n. Sɛ e waan e yomɛn i sɔ ninnge mun’n, e janvuɛ nin e osufuɛ wie’m be kwla yo e finfin annzɛ be kwla tanndan e ɲrun. (1 Piɛr 4:3, 4) Ɔ maan ɔ fata kɛ e fa ajalɛ kun. ?E nin be nga be klo Ɲanmiɛn mun yɛ é sán nun ɔn? ?I mmla ng’ɔ kpɛli be klolɛ su’n, é fá be su? Sɛ e yo sɔ’n, é klé kɛ, kɛ Satan waan sran fi su yoman like nga Ɲanmiɛn waan ɔ yo’n, ɔ buali ato.—An kanngan 1 Korɛntfuɛ Mun 6:9, 10 nin 1 Kor. 15:33 nun.

Sɛ amun kunndɛ kɛ amún sí nun ekun’n, amun klwa nian fluwa ?Ngue like yɛ Biblu’n kle i sakpasakpa ɔ? i i ndɛ tre 11 nun. Zoova i Lalofuɛ mun yɛ be yili ɔ.

[Foto, bue 12]

Adam fali ajalɛ tɛ.

[Foto, bue 13]

Sɛ e waan Ɲanmiɛn yo e Siefuɛ’n, e ajalɛ’m bé yí i nglo.