Zezi ?Ngue ti yɛ ɔ wuli ɔ?

‘M bɔ n kacili Sran’n m bali naan ń fá min wun [min nguan’n] ń kpɔ́ sran sunman be ti.’—MARK 10:45.

ZEZI sili sa ng’ɔ́ wá jú i su’n. Ɔ wunnin i wlɛ kɛ ɔ su kwlá tranman fɔundi nun sa. Ɔ sili kɛ, kɛ ɔ ko ɲan afuɛ 30 tra su kan’n, yɛ bé kún i ɔ. Ɔ maan ɔ buɛbuɛli i wun sieli.

Biblu’n kle kɛ Zezi i wie’n ti cinnjin kpa. Fluwa kun waan Biblu’n i bue nga laa be klɛli i Glɛki aniɛn nun’n, i nun’n, be kannin Zezi i wie’n i ndɛ kpɛ kɔe 175. ?Sanngɛ ngue ti li yɛ ɔ fata kɛ Zezi wun ɲrɛnnɛn naan ɔ wu sɔ ɔ? Ɔ fata kɛ e si sa nga ti yɛ ɔ yoli sɔ’n. Afin Zezi i wie ndɛ’n kwla ɲan ta dan kpa e su.

▪ Sa nga Zezi si kɛ ɔ́ jú i su’n Afuɛ kasiɛn nga Zezi dili i asiɛ’n su’n, i nun’n, ɔ seli i sɔnnzɔnfuɛ’m be kpɛ sunman kɛ bé wá klé i ɲrɛnnɛn naan bé kún i. I nun m’ɔ nin i akoto 12 bé kɔ́ Zerizalɛmu bé kó dí delɛ cɛn kasiɛn ng’ɔ ko di’n, ɔ seli be kɛ: “Bé wá fá m bɔ n kacili Sran’n mán Nyanmiɛn nyrun jranfuɛ dandan mun nin mmla klefuɛ mun. Bé sé kɛ m’an di fɔ naan be kun min, bé fá min mán be nga be ti-man Zuif’n, bé yó n finfin, bé gúa min wun ngɔsrɛ, bé bó min nin ngble, yɛ bé kún min.” * (Mark 10:33, 34) ?Ngue ti yɛ Zezi lafili su kpa kɛ i sɔ sa liɛ’n jú i su ɔ?

Wafa nga Zezi fá wú’n, i su ndɛ nga Ɲanmiɛn nuan ijɔfuɛ’m be kannin’n, m’ɔ o Biblu’n i bue nga laa be klɛli i Ebre nun’n i nun’n, Zezi si be kpa. (Lik 18:31-33) Ɲanmiɛn nuan ijɔfuɛ’m be ndɛ sɔ mun, ɔ nin Biblu’n nun ndɛ mma nga be kan wafa nga be kpɛnnin su’n be ndɛ’n, be nun wie mun yɛ.

Like nga bé fá yó Mɛsi’n

▪ Jɛtɛ ufue 30 ti’n, be fɛ i mannin.—ZAKARI 11:12; MATIE 26:14-16.

▪ Be boli i yɛ be guɛli i wun ngɔsrɛ.—EZAI 50:6; MATIE 26:67; 27:26, 30.

▪ Be boboli i waka’n su.—JUE MUN 22:17; MARK 15:24, 25.

▪ Kɛ be boboli i waka’n su’n be dili i tɛ.—JUE MUN 22:8, 9; MATIE 27:39-43.

▪ Kɛ be kunnin i’n, i owie ba kun sa w’a buman.—JUE MUN 34:21; ZAN 19:33, 36.

Ɲanmiɛn nuan ijɔfuɛ’m be ndɛ ngalɛ mun ɔ nin be ndɛ uflɛ’m be kpɛnnin su Zezi i lika. Nán Zezi bɔbɔ yɛ ɔ siesieli ninnge mun naan b’a kpɛn su i lika ɔ. Ndɛ kwlaa sɔ mɔ be kpɛnnin su Zezi i lika’n, ɔ kle kɛ Ɲanmiɛn yɛ ɔ sunmɛnnin i sakpa ɔ. *

?Sanngɛ ngue ti li yɛ ɔ fata kɛ Zezi wun ɲrɛnnɛn naan ɔ wu ɔ?

▪ Zezi wuli naan w’a kpɛ ndɛ cinnjin wie’m be nun Zezi si ndɛ cinnjin ng’ɔ tɔli Edɛni fie’n nun lɔ’n. Aolia nun sran ɲin keklefuɛ kun yoli maan Adam nin Ɛvu be yoli ɲin kekle Ɲanmiɛn su. Ɲin kekle sɔ mɔ be yoli’n, ɔ kpɛli ndɛ kun ba. ?Yɛle kɛ Ɲanmiɛn i sielɛ’n ti kpa annzɛ ɔ timan kpa? Be sa tɛ sɔ’n kpɛli ndɛ uflɛ ba ekun. ?Yɛle kɛ sɛ kekle tɔ klɔ sran’m be su’n, bé kpɔ́ci Ɲanmiɛn annzɛ be su kpɔcimɛn i?—Bo Bolɛ 3:1-6; Zɔb 2:1-5.

Zoova i klɔ sran’m be sielɛ’n ɔ nin klɔ sran’m be Ɲanmiɛn sulɛ’n i su ndɛ ng’ɔ tɔli’n, Zezi kpɛli  nun klanman kpa. Kɛ mɔ Zezi i ɲin yili Ɲanmiɛn lele ‘ɔ fa wuli waka’n su’n’ ti’n, ɔ suannin atin nga Ɲanmiɛn le i sie klɔ sran mun’n i bo. (Filipfuɛ Mun 2:8) Asa ekun’n, Zezi kleli kɛ kannzɛ be kle sran kun mɔ fɔ nunmɛn i nun’n i ɲrɛnnɛn sɛ’n, ɔ nin Zoova be kwla nanti klanman lele guɛ i ti nin i bo.

▪ Zezi wuli naan klɔ sran’m b’a ɲan be ti Ɲanmiɛn nuan ijɔfuɛ Ezai dun mmua kannin kɛ ɲrɛnnɛn nga Mɛsi ng’ɔ́ bá’n ɔ́ wún i’n ɔ nin i wie’n ti’n, Ɲanmiɛn yáci klɔ sran’m be sa tɛ’n cɛ́ be. (Ezai 53:5, 10) Zezi wunnin i sɔ liɛ’n i wlɛ weiin. Ɔ maan i klunklo su ɔ ‘fɛli i wun kpɔli sran sunman be ti.’ (Matie 20:28) Tɛ sɔ m’ɔ yili’n ti’n, klɔ sran mɔ fɔ o be nun’n, be nin Zoova be afiɛn’n kwla sɛ, kpɛkun be kwla ɲan be ti sa tɛ’n nin wie’n be sa nun. Zezi i wie’n yoli maan sran’m be kwla ɲan like ng’ɔ fili Adam nin Ɛvu be sa’n ekun. Yɛle kɛ be kwla tran asiɛ mɔ i su like kwlaa yó kpa’n i su ekun tititi. *—Sa Nglo Yilɛ 21:3, 4.

▪ ?Ngue yɛ amun kwla yo ɔ? Lika nga Zezi fin’n, ɔ nin wafa ng’ɔ fa dili i mɛn liɛ’n, ɔ nin sa nga ti yɛ ɔ wuli’n, be su ndɛ nga Biblu’n kan’n, ndɛ nga be sinnin yɛ’n be yiyili be nun. Ndɛ nanwlɛ sɔ’m be silɛ’n ɔ uka amun naan amun a lafiman Zezi i su ato ndɛ nga sran’m be kle’n su. Sanngɛ nɛ́n i ngba ɔ. Sɛ amun nian ndɛ nanwlɛ sɔ’m be su be nanti’n, amun mɛn dilɛ’n yó kpa dɔ nga su. Kpɛkun cɛn wie lele’n, amún ɲán anannganman nguan. Biblu’n kle e like ng’ɔ fata kɛ e yo naan y’a ɲɛn i sɔ mmlusuɛ mun’n.

▪ Amun suan Zezi Klist nin junman ng’ɔ di i Zoova i klun sa’n i yolɛ’n nun’n, be su like kpa ekun.—ZAN 17:3.

▪ Amun kle kɛ amun lafi Zezi su. Yɛle kɛ maan amun yi i nglo amun mɛn dilɛ’n nun kɛ Zezi ti amun Defuɛ.—ZAN 3:36; SA NGA BE YOLI’N 5:31.

Zezi Klist m’ɔ ti Ɲanmiɛn i “Wa kunngba cɛ’n,” yɛ maan Ɲanmiɛn kwla man e “anannganman nguan” ɔn. Sɛ amun kunndɛ kɛ amún súɛn i su like ekun’n, Zoova i Lalofuɛ’m bé úka amun aklunjuɛ su.—Zan 3:16.

[Ja ngua lɛ ndɛ mun]