1. ?Ngbaciɛ benin yɛ ɔ o Zoova i sufuɛ mun nin be nga be tɔn be wun suɛn kɛ be ti Klisifuɛ’n be afiɛn-ɔn?

 LIKE kun m’ɔ kle kɛ Zoova i sufuɛ’m be timan kɛ be nga be tɔn be wun suɛn kɛ be ti Klisifuɛ’n be sa’n, yɛle kɛ be bo jasin fɛ’n i juejue su. (Tit. 2:14) Sanngɛ atrɛkpa’n, ɔ ju wie’n jasin fɛ’n i bolɛ’n yoman ɔ fɛ kpa. Sɛ ɔ ti sɔ’n, nán ɔ kunngba yɛ ɔ yo wɔ sɔ-ɔ. Asɔnun kpɛnngbɛn kun m’ɔ tu i klun di i junman’n, ɔ seli kɛ: “Ɔ ju wie’n, jasin fɛ bolɛ’n yoman min fɛ.”

2. ?Ngue ti yɛ wie liɛ’n, jasin fɛ bolɛ’n yoman e fɛ kpa-ɔ?

² Zoova i junman uflɛ wie’m be dilɛ’n kwla yo e fɛ tra jasin fɛ’n i bolɛ’n. I wie yɛle Ɲanmiɛn sulɛ sua’m be kplanlɛ nin be lika nianlɛ’n, nin be nga sanvuɛsa tɔ be su’n be ukalɛ’n, ɔ nin aniaan’m be fɔnvɔlɛ nin be fanngan wlalɛ’n. Afin e ja nun lɛ’n, e wun kɛ junman sɔ’m be bo gua klanman. Kpɛkun e bɔbɔ e di su aklunjɔɛ. Asa’n kɛ e nin e niaan mun e di junman likawlɛ’n, e wun kɛ anuansɛ nin klolɛ o e afiɛn. Yɛ e si kɛ bé klé kɛ be si ye, junman nga e di e man be’n ti. Kusu’n atrɛkpa’n, y’a bo jasin fɛ’n lika wie nun lele, sanngɛ be nga be kle kɛ Ɲanmiɛn ndɛ’n lo be’n b’a sɔnman. Atrɛkpa bɔbɔ’n, be sɔman jasin mɔ e bo’n nun. Asa’n e si kɛ, kɛ mɛn’n i awieliɛ’n mántan koko kpa’n, sran’m bé tánndan e ɲrun trá laa’n. (Mat. 10:22) ?Ɔ maan é yó sɛ naan y’a kwla bo jasin fɛ’n i juejue su titi y’a tra laa’n?

3. ?Wafa sɛ yɛ ndɛ ng’ɔ o Liki 13:​6-9 nun’n, ɔ kle kɛ Zezi boli jasin fɛ’n i juejue su-ɔ?

³ Zezi i ajalɛ’n kwla e uka e naan y’a bo jasin fɛ’n i juejue su. I nun mɔ Zezi o asiɛ’n su wa’n, w’a yaciman jasin fɛ’n i juejue su bolɛ le. I kpa bɔbɔ’n kɛ blɛ’n sín’n, nn ɔ́ wlɛ́ i wun ase dí junman sɔ’n i kpa trá laa’n. (An kanngan Liki 13:​6-9 nun.) Zezi  i ɲanndra kun nun’n, ɔ fali junman ng’ɔ di’n sunnzunnin viɲin fie’n nun junman difuɛ kun liɛ’n. Viɲin fie’n nun junman difuɛ sɔ’n fali afuɛ lele nsan fa niannin figie waka kun i lika. Sanngɛ w’a suman. Ɔ nin i sɔ ngba’n, i sa sin w’a bubumɛn i le, yɛ w’a yaciman figie waka’n i lika nianlɛ. I wafa kunngba’n, Zezi fali afuɛ nsan boli jasin fɛ’n kleli Zifu mun. Sanngɛ be nun sunman b’a sɔman nun klanman. Ɔ nin i sɔ ngba’n, Zezi i sa sin w’a bubumɛn i le, yɛ w’a cuɛncuɛnmɛn i ja ase jasin fɛ’n i bolɛ’n nun le. I kpa bɔbɔ’n, ɔ tuli i klun ukali Zifu mun naan be sɔ jasin fɛ’n nun klanman.

4. ?Like nnan benin mun yɛ Zezi yoli be mɔ é wá fá e ɲin é síe su-ɔ?

⁴ Anglo nsiɛn kasiɛn nga Zezi dili i asiɛ’n su wa’n be nun’n, wafa ng’ɔ boli jasin fɛ’n i juejue su’n, é wá kɛ́n i ndɛ. Sɛ e suan ndɛ ng’ɔ kannin be’n be su like’n, naan e niɛn i ajalɛ’n su’n, i sɔ’n úka e naan e kusu y’a bo jasin fɛ’n i juejue su wie. I lɛ nun’n, é wá fá e ɲin é síe i like nnan mɔ Zezi yoli be’n be su. (1) Zoova i klun sa’n i yolɛ’n yoli i cinnjin. (2) Ɔ fɛli i ɲin sieli i ndɛ nga Ɲanmiɛn nuan ijɔfuɛ’m be kannin’n su. (3) Ɔ lafili su kɛ Zoova súɛn i bo. (4) Ɔ seli i wun titi kɛ sran wie’m bé tíe i ndɛ’n.

ZOOVA I KLUN SA’N I YOLƐ’N YOLI I CINNJIN

5. ?Wafa sɛ yɛ Zezi kleli kɛ jasin fɛ’n i bolɛ’n ti i cinnjin tra like kwlaa-ɔ?

⁵ Zezi boli “Ɲanmiɛn Sielɛ’n i jasin fɛ’n” i juejue su, afin ɔ si kɛ junman sɔ’n yɛ Ɲanmiɛn kunndɛ kɛ ɔ di-ɔ. (Lik. 4:43) Jasin fɛ’n i bolɛ’n yoli Zezi i cinnjin trali like kwlaa. Kɛ ɔ ka kan bé kún i bɔbɔ’n, ɔ ɔli “klɔ dandan nin klɔ kanngan’m” be su sran’m be like klelɛ. (Lik. 13:22) Asa’n ɔ kleli i sɔnnzɔnfuɛ wie mun ekun be like naan be nin i bo jasin fɛ’n.—Lik. 10:1.

6. ?Ngue ti yɛ e kwla se kɛ junman onga nga e di be Zoova i sulɛ’n nun’n, be suan jasin fɛ bolɛ junman’n i bo-ɔ? (An nian foto’n wie.)

⁶ Andɛ kusu’n junman cinnjin nga Zoova nin Zezi be kunndɛ kɛ e di’n, yɛle jasin fɛ’n i bolɛ’n. (Mat. 24:14; 28:​19, 20) Junman kwlaa nga e di i Zoova i sulɛ’n nun’n, ɔ suan jasin fɛ bolɛ junman’n i bo. I wie yɛle kɛ Ɲanmiɛn sulɛ sua nga e kplan be’n, ɔ nin junman nga be di i Betɛli’m be nun’n, be suan jasin fɛ bolɛ  junman’n i bo. Asa’n kɛ sanvuɛsa wie tɔ’n, nán e niaan’m be ye yolɛ ngunmin ti yɛ e uka be-ɔ. Sanngɛ kɛ ɔ ko yo naan b’a kwla yo ninnge ng’ɔ fata kɛ be yo be Ɲanmiɛn sulɛ’n nun’n, i wie ti yɛ e uka be-ɔ. Yɛ ninnge sɔ’m be nun kun yɛle jasin fɛ bolɛ’n. Sɛ e wun i wlɛ kɛ junman cinnjin kpafuɛ nga Zoova kunndɛ kɛ e di’n yɛle jasin fɛ bolɛ’n, i sɔ’n wlá e fanngan naan y’a bo jasin fɛ’n i titi. Asɔnun kpɛnngbɛn kun m’ɔ suan Yanɔsu m’ɔ fin Ɔngli’n, ɔ seli kɛ: “N se min wun titi kɛ Ɲanmiɛn i junman uflɛ fi kwlá kaciman jasin fɛ bolɛ junman’n. Junman klikli ng’ɔ mannin e’n, yɛ ɔ o lɛ-ɔ.”

7. ?Ngue ti yɛ Zoova kunndɛ kɛ e bo jasin fɛ’n i titi-ɔ? (1 Timote 2:​3, 4)

⁷ Wafa nga Zoova bu sran mun’n, sɛ e bu be sɔ wie’n, i sɔ’n yó maan é bó jasin fɛ’n i juejue su. Ɔ kunndɛ kɛ sran kpanngban be tie jasin fɛ’n naan be nian su be nanti. (An kanngan 1 Timote 2:​3, 4 nun.) Kɛ mɔ jasin sɔ’n kwla yo maan sran’m be ɲan nguan’n ti’n, Zoova kle e like naan y’a kwla bo i kɛ ɔ nin i fata’n sa. I wie yɛle kɛ, kɛ ɔ ko yo naan y’a uka be naan b’a kaci Zezi i sɔnnzɔnfuɛ’n, e fluwa Klo sran mun—Yo maan be kaci Zezi i sɔnnzɔnfuɛ kle e wafa nga e nin be e kwla bo yalɛ kokolɛ bo’n. Sɛ dɔ nga su’n be sɔman jasin fɛ’n nun klanman’n, lele nin i kɛ ɲrɛnnɛn dan’n fá wíe’n, atrɛkpa’n bé káci. Ndɛ nga e kan kle be andɛ’n, cɛn wie lele’n be wla kwla kpɛn su. Kpɛkun be kwla kunndɛ kɛ bé sú Zoova wie. Sanngɛ ɔ fata kɛ e bo jasin fɛ’n i titi naan b’a kwla yo sɔ.

Ɔ FƐLI I ƝIN SIELI I NDƐ NGA ƝANMIƐN NUAN IJƆFUƐ’M BE KANNIN’N SU

8. ?Kɛ mɔ Zezi si i su ndɛ nga be klɛli’n ti’n, ngue yɛ ɔ fɛli i blɛ’n yoli-ɔ?

⁸ Wafa nga Ɲanmiɛn nuan ijɔfuɛ’m be ndɛ’m bé kpɛ́n su’n, Zezi wunnin i wlɛ. Ɔ si kɛ ɔ́ bó jasin fɛ’n afuɛ nsan nin sin cɛ. (Dan. 9:​26, 27) Asa’n, wafa ng’ɔ́ wú’n, ɔ nin blɛ ng’ɔ́ wú’n, i su ndɛ nga Ɲanmiɛn nuan ijɔfuɛ’m be klɛli’n ɔ si i. (Lik. 18:​31-34) Kɛ mɔ Zezi si i kwlaa sɔ’n ti’n, w’a sacimɛn i blɛ’n. Ɔ fɛli i blɛ’n boli jasin fɛ’n i juejue su naan w’a kwla gua junman nga be fa mɛnnin i’n i bo.

9. ?Ngue ti yɛ sɛ e bu ndɛ nga Ɲanmiɛn nuan ijɔfuɛ’m be kannin’n i su akunndan kpa’n, é bó jasin fɛ’n i juejue su-ɔ?

⁹ Sɛ e bu Ɲanmiɛn nuan ijɔfuɛ’m be ndɛ nga be kannin m’ɔ su kpɛn su’n i su akunndan kpa’n, é bó jasin fɛ’n i juejue su. E si kɛ y’a ju mɛn’n i bue nuan. E wun kɛ sa nga be ju andɛ’n nin sran’m be ayeliɛ’n, be nin mɛn’n awieliɛ’n i su ndɛ nga Biblu’n kannin’n ti kun sɛsɛsɛ. Asa’n Biblu’n se kɛ ngua lɔ famiɛn’n, nin nglo lɔ famiɛn’n bé fá be ɲin cí be wiengu ‘blɛ’n i awieliɛ lɔ.’ I sɔ kusu yɛ e wun i andɛ-ɔ. E wun kɛ ndɛnngan o Angle nin Amlɛnkɛn mɔ be bo ti kun’n, be nin Risi nin i bo suanfuɛ’m be afiɛn. (Dan. 11:40) Asa’n e wun i wlɛ kɛ waka sran’n i ja ngbabua nga Daniɛli 2:​43-45 kɛn i ndɛ’n, ɔ ti Angle nin Amlɛnkɛn’m be kwlalɛ’n i nzɔliɛ. Yɛ e wun i wlɛ kɛ, kɛ nga Ɲanmiɛn nuan ijɔfuɛ Daniɛli fa kleli’n sa’n, ɔ cɛ kan’n Ɲanmiɛn Sielɛ’n wá núnnún klɔ sran’m be awa mun. Ɲanmiɛn nuan ijɔfuɛ’m be ndɛ kwlaa sɔ’m be kle kɛ mɛn’n w’a ju i bue nuan koko kpa. I sɔ’n ti’n, ɔ fataman kɛ e cuɛncuɛn e ja ase jasin fɛ’n i bolɛ’n nun.

10. ?Wafa sɛ yɛ ndɛ nga Biblu’n kan’n, ɔ kwla wla e fanngan naan y’a bo jasin fɛ’n i juejue su titi-ɔ?

¹⁰ Asa’n, ndɛ ng’ɔ o Biblu’n nun’n ɔ yo e fɛ dan ti’n, e kunndɛman kɛ é sísí e bo naan y’a kan y’a kle sran mun. Aniaan bla kun mɔ be flɛ i Kɛri m’ɔ o Repibliki Dominikɛnin’n seli kɛ: “Kɛ n bu ninnge nglanman nga Zoova seli kɛ ɔ́ wá yó be cɛn wie lele’n be akunndan’n, n wun kɛ ɔ fata kɛ n kan be ndɛ n kle min wiengu mun. [...] Kɛ n wun afɛ ng’ɔ o sran’m be su  andɛ’n, n wun i wlɛ kɛ ninnge sɔ’m be timan min ngunmin min liɛ, ɔ ti be liɛ wie.” Biblu’n nun ndɛ’n wla e fanngan naan y’a muanmuan e nuan. Afin e si kɛ Zoova uka e jasin fɛ’n i bolɛ’n nun. Aniaan bla kun m’ɔ suan Leila m’ɔ fin Ɔngli’n, ɔ seli kɛ: “Ndɛ ng’ɔ o Ezai 11:​6-9 nun’n, ɔ wla min fanngan naan m’an bo jasin fɛ’n m’an kle be nga ɔ yo min kɛ be su sɔman Ɲanmiɛn ndɛ’n nun bɔbɔ’n. N si kɛ Zoova fanngan nun’n, sran kwlakwla kwla kaci.” Be flɛ aniaan bian kun ekun kɛ Klisitɔfu, ɔ fin Zanbi. Ɔ seli kɛ: “Kɛ nga Marki 13:10 fa kannin’n sa’n, be bo jasin fɛ’n mɛn wunmuan’n nun. Yɛ n o be nga be yo naan ndɛ sɔ’n w’a kpɛn su’n be nun wie. Nanwlɛ, i sɔ’n ti min cenjele like.” ?Yɛ ɔ li? ?Biblu’n nun ndɛ benin yɛ ɔ wla ɔ fanngan naan w’a bo jasin fɛ’n i titi-ɔ?

Ɔ LAFILI SU KƐ ZOOVA SÚƐN I BO

11. ?Ngue ti yɛ ɔ fata kɛ Zezi lafi Zoova su naan w’a kwla bo jasin fɛ’n i juejue su titi-ɔ? (Liki 12:​49, 53)

¹¹ Zezi lafili su kɛ Zoova súɛn i bo naan w’a kwla bo jasin fɛ’n i juejue su titi. Ɔ kan ndɛ kleli sran mun amanniɛn su. Sanngɛ ɔ si kɛ Ɲanmiɛn Sielɛ’n i jasin fɛ’n ti’n, sran’m bé fɛ́ i wun ya dan, yɛ bé tɛ́nndɛn i ɲrun. (An kanngan Liki 12:​49, 53 nun.) Jasin fɛ mɔ Zezi boli’n ti’n, Zifu’m be kpɛnngbɛn’m be kunndɛli kpɛ sunman kɛ bé kún i. (Zan 8:59; 10:​31, 39) Sanngɛ Zezi w’a yaciman jasin fɛ’n i bolɛ le. Afin ɔ si kɛ Zoova jin i sin. Ɔ seli kɛ: “Min Si m’ɔ sunmannin min’n wo min sin. […] W’a yaciman min. Afin n yo ninnge ng’ɔ klo be’n titi.”—Zan 8:​16, 29.

12. ?Wafa sɛ yɛ Zezi ukɛli i sɔnnzɔnfuɛ mun naan kannzɛ be kle be yalɛ’n, b’a kwla bo jasin fɛ’n i titi-ɔ?

¹² Zezi kpɛnnin i sɔnnzɔnfuɛ’m be wla kɛ be kwla lafi su kɛ Zoova súan be bo. Ɔ seli be titi kɛ kannzɛ bɔbɔ be kle be yalɛ’n, sanngɛ Zoova úka be. (Mat. 10:​18-20; Lik. 12:​11, 12) I sɔ’n ti’n, ɔ seli be kɛ be nian be wun su. (Mat. 10:16; Lik. 10:3) Asa’n ɔ seli be kɛ sɛ sran kun kunndɛman kɛ ɔ́ tíe Ɲanmiɛn ndɛ’n, nán maan be fa tintin i wun. (Lik. 10:​10, 11) Ɔ seli be ekun kɛ sɛ be kle be yalɛ’n, maan be wanndi wɔ lika uflɛ. (Mat. 10:23) Kannzɛ bɔbɔ Zezi boli jasin fɛ’n i juejue su naan ɔ lafili Zoova su’n, sanngɛ i bɔbɔ i ɲinfu w’a fɛmɛn i nguan w’a siemɛn i wie nuan sa ngbɛn.—Zan 11:​53, 54.

13. ?Ngue ti yɛ a kwla lafi su kɛ Zoova súan ɔ bo-ɔ?

¹³ Andɛ’n sran kpanngban be tanndan e ɲrun. Ɔ maan ɔ fata kɛ Zoova uka e naan y’a  kwla bo jasin fɛ’n i juejue su titi. (Ngl. 12:17) ?Ngue ti yɛ a kwla lafi su kɛ Zoova súan ɔ bo-ɔ? Ndɛ wie mɔ kɛ Zezi srɛ́ Ɲanmiɛn’n, ɔ kannin’n ti-ɔ. Ndɛ sɔ’n o Zan ndɛ tre 17 nun. Zezi srɛli Zoova kɛ ɔ niɛn i akoto’m be su. Zoova tɛli i srɛlɛ sɔ’n su. Kɛ bé klé akoto’m be yalɛ’n, wafa ng’ɔ ukali be naan b’a bo jasin fɛ’n i juejue su’n, Sa Nga be Yoli’n fluwa’n kɛn i ndɛ. Zezi i srɛlɛ sɔ’n nun’n, ɔ seli Zoova kɛ ɔ nian be nga bé fá jasin nga akoto’m be bo’n su’n be su wie. A wo sran sɔ’m be nun wie. Lele nin andɛ’n, Zoova te tɛ Zezi i srɛlɛ sɔ’n su. Ɔ maan ɔ́ úka ɔ, kɛ ng’ɔ fa ukali akoto mun’n sa.—Zan 17:​11, 15, 20.

14. ?Ngue ti yɛ e si kɛ é kwlá bó jasin fɛ’n titi-ɔ? (An nian foto’n wie.)

¹⁴ Kɛ é mántan mɛn’n i awieliɛ’n i koko’n, jasin fɛ’n i bolɛ’n kwla yo kekle. Sanngɛ Zezi seli kɛ é ɲán ukafuɛ. (Lik. 21:​12-15) Kɛ nga Zezi nin i sɔnnzɔnfuɛ’m be fa yoli’n sa’n, e mianman sran’m be kɛ be sie be su e nuan bo, yɛ e nin be e kanman ndɛnngan. Lika nga be tanninnin e jasin fɛ’n i bolɛ lɔ bɔbɔ’n, e niaan’m be kwla boli jasin fɛ’n i lɔ. Afin be lafiman be bɔbɔ be wun su, Zoova su yɛ be lafi-ɔ. Klisifuɛ klikli’m be blɛ su’n, Zoova tinnin be. Andɛ’n ɔ tin e wie naan ‘y’a tu e klun y’a kan Ɲanmiɛn ndɛ’n i kwlaa’ kɛ ng’ɔ fa klo’n sa. (2 Tim. 4:17) A kwla lafi su kɛ, sɛ a fa ɔ wla gua Zoova su’n, á kwlá bó jasin fɛ’n i juejue su titi.

Ɔ SELI I WUN TITI KƐ SRAN WIE’M BÉ TÍE NDƐ’N

15. ?Ngue yɛ ɔ kle kɛ Zezi seli i wun titi kɛ sran wie’m bé sɔ́ jasin fɛ’n nun-ɔn?

¹⁵ Zezi seli i wun titi kɛ sran wie’m bé síe be su bé tíe jasin fɛ’n. I sɔ’n ukɛli i maan ɔ tuli i klun boli jasin’n aklunjɔɛ su titi. I wie yɛle kɛ, kɛ ɔ boli jasin fɛ’n i bolɛ bo’n i afuɛ kun m’ɔ́ jú’n, ɔ wunnin kɛ sran kpanngban be kunndɛ kɛ bé tíe i ndɛ’n. Ɔ seli kɛ sran sɔ’m be ti kɛ fie su ninnge mɔ b’a blo mɔ be kpɛlɛ blɛ’n w’a ju’n sa. (Zan 4:35) Kɛ afuɛ kun sinnin’n, ɔ seli i sɔnnzɔnfuɛ’m be kɛ: “Fie’n i su ninnge’m be kpɛlɛ junman’n ti dan.” (Mat. 9:​37, 38) I sin’n ɔ seli ekun kɛ: “Fie’n i su ninnge’m be kpɛlɛ junman’n ti dan. […] Amun srɛ junman’n i su Kpɛn’n naan ɔ kunndɛ sran naan be ko di junman’n.” (Lik. 10:2) Zezi w’a semɛn i wun le kɛ  sran’m be su faman jasin fɛ’n su. Kɛ be fali su kusu’n, ɔ yoli i fɛ dan.—Lik. 10:21.

16. ?Wafa sɛ yɛ Zezi kleli kɛ jasin fɛ mɔ e bo’n, ɔ́ bá nvlɛ-ɔ? (Liki 13:​18-21) (An nian foto’n wie.)

¹⁶ Zezi kleli i sɔnnzɔnfuɛ’m be kɛ maan be lafi su titi kɛ jasin fɛ mɔ be bo’n ɔ́ bá nvlɛ. Yɛ i sɔ’n wlali be fanngan naan b’a kwla bo jasin fɛ’n i juejue su titi. Maan e fa e ɲin e sie i ɲanndra ng’ɔ buli’n, be nun nɲɔn be su. (An kanngan Liki 13:​18-21 nun.) Zezi i ɲanndra kun nun’n, ɔ seli kɛ Ɲanmiɛn Sielɛ’n i jasin fɛ’n ti kɛ Mutadi mma kaan m’ɔ fifi, kpɛkun ɔ ɲin lele ɔ kaci waka dan’n sa. I sɔ’n kle kɛ like fi kwlá jranman jasin fɛ’n, naan sran kpanngban bé wá sɔ́ nun. I ɲanndra kun ekun nun’n, ɔ seli kɛ Ɲanmiɛn Sielɛ’n i jasin fɛ’n ti kɛ levii’n sa. Afin jasin fɛ’n wá trú mɛn wunmuan’n nun. Kpɛkun ɔ́ yó maan sran’m bé káci. Yɛ wafa nga bé káci’n, atrɛkpa’n be wiengu’m be su kaman lɛ siemɛn i nzɔliɛ. I lɛ nun’n, Zezi ukɛli i sɔnnzɔnfuɛ mun naan be wun i wlɛ kɛ jasin nga be bo’n, ɔ́ úka sran kpanngban.

17. ?Ngue ti yɛ ɔ fata kɛ e lafi su titi kɛ jasin fɛ mɔ e bo’n, ɔ́ bá nvlɛ-ɔ?

¹⁷ Kɛ e bu jasin fɛ mɔ e bo i mɛn wunmuan’n nun’n, i su ye nga sran’m be ɲɛn i’n i akunndan’n, i sɔ’n wla e fanngan. Afuɛ kwlaa nun’n, sran miliɔn kpanngban kpa be tran e Wla Kpɛnlɛ aɲia’n i bo, yɛ e kle be Biblu’n nun like. Be yo sran akpiakpi ya tra su be batɛmun, yɛ be nin e bo jasin fɛ’n. Be nga bé wá sɔ́ jasin fɛ’n nun ekun’n, e siman be nuan. Nga e si i’n, yɛle kɛ Zoova su yiayia sran kpanngban kpa naan ɲrɛnnɛn dan’n nun’n, b’a fite nun. (Ngl. 7:​9, 14) Zoova m’ɔ ti junman’n i su kpɛn’n, ɔ si kɛ sran kpanngban kpa ekun bé wá sɔ́ jasin fɛ’n nun wie. I sɔ’n ti’n, ɔ fata kɛ e bo i titi.

18. ?Ngue yɛ e kunndɛ kɛ sran’m be sie i nzɔliɛ-ɔ?

¹⁸ Like kun mɔ be fa sie Zezi i sɔnnzɔnfuɛ nanwlɛfuɛ’m be nzɔliɛ’n, yɛle kɛ be bo jasin fɛ’n i juejue su titi. Akoto’m be blɛ su’n, kɛ sran’m be wunnin wafa nga be bo jasin fɛ’n i yakpa su’n, “be wunnin i wlɛ kɛ be nin Zezi be sannin nun.” (Yol. 4:13) I sɔ’n ti’n, maan e bo jasin fɛ’n i juejue su. I liɛ’n, sran’m bé wún i wlɛ kɛ e ti Zezi i sɔnnzɔnfuɛ sakpa.