I afuɛ kɔe 3.500 yɛ, Zoova kannin like nga i sufuɛ’m be kwla yo naan be liɛ w’a yo ye’n i ndɛ kleli be. Ɔ seli be kɛ: “Nguan’n nin wie’n yɛ m’an fa sie amun nyrun lɛ-ɔ. Muae nin sa yalɛ’n yɛ m’an fa sie amun nyrun lɛ-ɔ. […] Amun nin amun osu nunfuɛ mun, amun fa nguan’n naan amun tran nguan nun.”​—Mmla’n 30:19.

Sɛ Ɲanmiɛn i sufuɛ sɔ’m be kunndɛ kɛ be liɛ yo ye’n, ɔ fata kɛ be fa ajalɛ kpa. Andɛ kusu’n ɔ fata kɛ e fa ajalɛ wie. Biblu’n kwla uka e naan y’a fa ajalɛ kpa naan e liɛ w’a yo ye. Ɔ se kɛ: “Amun klo Anannganman amun Nyanmiɛn’n, amun fɛ i nuan ndɛ’n su.”​—Mmla’n 30:20.

SUAN BIBLU’N NUN LIKE: Sɛ ɔ waan á kló Zoova’n, ɔ fata kɛ a suan Biblu’n nun like naan a si i. Sɛ a suan Biblu’n nun like’n, á wún i wlɛ kɛ Zoova klo wɔ yɛ ɔ kunndɛ kɛ ɔ liɛ yo ye. Asa’n, ɔ kunndɛ kɛ a srɛ i afin ‘ɔ ndɛ lo i.’ (1 Piɛli 5:7) Biblu’n se kɛ sɛ a fa ɔ wun mɛntɛn i’n, i kusu ‘ɔ́ fɛ́ i wun mántan wɔ.’​—Zaki 4:8.

NANTI LIKE NGA A SUAN’N SU: Sɛ ɔ waan á fá Ɲanmiɛn i nuan ndɛ’n su’n, ɔ fata kɛ a nanti ndɛ ng’ɔ o Biblu’n nun’n i su. Sɛ a yo sɔ’n, ‘like nga á yó’n ɔ́ yó ye.’​—Zozie 1:8.