1-2. (1) ?Kɛ Zakɔbu wunnin kɛ ɔ su wa wu’n, ngue yɛ ɔ yoli-ɔ? (2)?Yɛ ngue ti yɛ ɔ yoli sɔ-ɔ? (An nian desɛn ng’ɔ o fluwa’n i bui’n su’n wie.)

 I NUN mɔ Zakɔbu ti oke’n, ɔ nin i awlofuɛ’m be kwlaa be tuli Kanaan be ko trannin Ezipti. Kɛ be ɔli lɔ’n, ɔ suli Zoova lele afuɛ 17 ekun. (Bob. 47:28) Afuɛ 17 sɔ’n nun’n, ɔ dili aklunjɔɛ dan. Afin ɔ wa wunnin i wa Zozɛfu m’ɔ buli i kɛ ɔ wuli’n. Kpɛkun ɔ nin i mma’m be kwlaa be wa trannin likawlɛ. Sanngɛ ɔ si kɛ ɔ su wa wu. I sɔ’n ti’n, ɔ yiɛli i mma mun naan ɔ́ kán ndɛ cinnjin wie mun klé be.—Bob. 49:28.

² Blɛ sɔ’n nun’n, blɛ sunman’n kɛ siɛ kun wun kɛ ɔ su wa wu’n, ɔ yiɛ i awlobo’n nunfuɛ’m be kwlaa naan ɔ́ kɛ́n i klun ndɛ klé be. (Eza. 38:1) Asa’n ɔ kwla kle sran nga sɛ ɔ wu’n, ɔ́ sín i ja nun yó awlobo’n i su kpɛn’n.

3. ?Kɛ nga Bo Bolɛ 49:1, 2 fa kan’n sa’n, ngue ti yɛ e kwla se kɛ ndɛ nga Zakɔbu kan kleli i mma mun’n, ɔ ti ndɛ cinnjin-ɔn?

³ An kanngan Bo Bolɛ 49:​1, 2 nun. Sanngɛ yialɛ ng’ɔ yiali be’n, ɔ ti i liɛ ngunmin. Zakɔbu ti Ɲanmiɛn nuan ijɔfuɛ. Ɔ maan kɛ be yiali’n, Zoova maan Zakɔbu m’ɔ la wie bɛ’n su’n, ɔ kannin sa nga bé wá jú i mma mun nin be osu’n nunfuɛ’m be su’n, be ndɛ kleli be.

4. ?Sɛ e fa e ɲin e sie i ndɛ nga Zakɔbu kan kleli i mma mun’n su’n, i su ye benin yɛ é ɲɛ́n i-ɔ? (An nian kuku nga be flɛ i kɛ “Zakɔbu i awlobo’n” nun wie.)

 ⁴ Like suanlɛ nga nun’n, é wá fá e ɲin é síe i ndɛ nga Zakɔbu kan kleli i mma’m be nun nnan’n su. Be yɛle Ribɛnin nin Simeɔn, nin Levi, nin Zida. Like suanlɛ ng’ɔ́ bá lɔ’n nun’n, é wá fá e ɲin é síe i ndɛ ng’ɔ kan kleli i mma yasua mɔcuɛ onga mun’n su. É wá wún kɛ nɛ́n i mma’m be ngunmin be ndɛ yɛ ɔ kannin-ɔn. Sanngɛ ɔ kɛnnin i mma sɔ’m be osu’n nunfuɛ mɔ bé wá yó Izraɛli nvle’n be ndɛ wie. Sɛ e fa e ɲin e sie i sa nga be juli Izraɛli nvle’n su’n be su’n, é wún wafa nga Zakɔbu i ndɛ’n kpɛnnin su’n. Asa’n ndɛ ng’ɔ kannin be’n, be man e afɔtuɛ cinnjin wie mun naan y’a kwla yo sa ng’ɔ jɔ e Si Zoova klun’n.

RIBƐNIN

5. ?Aja like benin yɛ Ribɛnin buli i kɛ i si fá mɛ́n i-ɔ?

⁵ Ribɛnin yɛ Zakɔbu dun mmua kan ndɛ kleli i-ɔ. Ɔ seli i kɛ: “A ti min wa kpɛn.” (Bob. 49:3) Kɛ mɔ Ribɛnin yɛ ɔ ti ba kpɛn’n ti’n,  atrɛkpa’n ɔ buli i kɛ aja like nga i si fá mɛ́n i’n, ɔ́ trɛ́ i niaan’m be liɛ’n kpɛ nɲɔn. Asa’n ɔ kwla bu i kɛ, kɛ i si ko wu’n, i yɛ ɔ́ yó awlobo kpɛn’n niɔn, naan i osu’n nunfuɛ mun yɛ bé yó awlobo kpɛn titi-ɔ.

6. ?Ngue ti yɛ aja like ng’ɔ fata kɛ be fa man ba kpɛn’n, b’a fa manman Ribɛnin-ɔn? (Bo Bolɛ 49:3, 4)

⁶ Sanngɛ aja like ng’ɔ fata kɛ be fa man ba kpɛn’n, b’a fa manman Ribɛnin. (1 Ɲol. 5:1) ?Ngue ti-ɔ? Afin kɛ Rasɛli wuli’n, w’a cɛman, Ribɛnin kunndɛli Rasɛli i junman difuɛ nga be flɛ i kɛ Bila’n. Bila sɔ’n ti Zakɔbu i yi, Rasɛli yɛ ɔ fɛ i mɛnnin i-ɔ. (Bob. 35:​19, 22) ?Ngue ti yɛ Ribɛnin kunndɛli Bila-ɔ? Rasɛli i niaan bla Lea i wa yɛle Ribɛnin sɔ’n. Ɔ maan atrɛkpa’n, Ribɛnin kunndɛli Bila naan Bila i wun yo i si i tɛ, i liɛ’n i nin yɛ i si kló i kpa-ɔ. Atrɛkpa kusu’n, ɔ kloli Bila dan yɛ w’a kwlá trɛmɛn i awlɛn. Sanngɛ i kwlaa yoli-o, sa nga Ribɛnin yoli’n, ɔ yoli Zoova nin Zakɔbu be ya dan.—An kanngan Bo Bolɛ 49:3, 4 nun.

7. ?Ribɛnin nin i osu’n nunfuɛ’m be su ndɛ benin yɛ e si i-ɔ? (An nian kuku nga be flɛ i kɛ “ Ndɛ nga Ɲanmiɛn maan Zakɔbu kannin’n” nun wie.)

⁷ Zakɔbu seli Ribɛnin kɛ: “A su yoman kpa traman ɔ niaan mun.” Ndɛ sɔ’n kpɛnnin su. Biblu’n kleman kɛ Ribɛnin i osu’n nunfuɛ kun sa yoli famiɛn, annzɛ Ɲanmiɛn ɲrun jranfuɛ, annzɛ Ɲanmiɛn nuan ijɔfuɛ. Sanngɛ Zakɔbu w’a yimɛn i wa sɔ’n i blo. I kpa bɔbɔ’n, i osu’n nunfuɛ’m be yoli akpasua klonglo kun Izraɛli nvle’n nun. (Zoz. 12:6) Sa uflɛ wie’m be nun’n, Ribɛnin yili nzuɛn kpa wie’m be nglo. Asa’n, like fi kleman kɛ ɔ kunndɛli bla sukusuku ekun.—Bob. 37:20-22; 42:37.

8. ?Afɔtuɛ benin yɛ Ribɛnin i su ndɛ’n man e-ɔ?

⁸ ?Afɔtuɛ benin yɛ ndɛ sɔ’n man e-ɔ? Maan e mian e ɲin kpa naan e tra e awlɛn naan y’a kunndɛman bla annzɛ bian sukusuku. Sɛ e konvi sɔ sa tɛ wie yolɛ’n, maan e jran kan naan e bu akunndan. Yɛle kɛ maan e bu wafa nga sa sɔ’n kwla yo Zoova nin e awlofuɛ mun nin e wiengu mun’n i akunndan. Asa’n, maan ɔ tran e klun kɛ “like nga sran kun lua’n, yɛ ɔ́ tí-ɔ.” (Gal. 6:7) Asa kusu’n, sa ng’ɔ juli Ribɛnin su’n, ɔ kle e kɛ Zoova si aunnvɔɛ dan. I yo, sɛ e yo sa tɛ’n, Zoova su yoman naan y’a wunmɛn i su afɛ. Sanngɛ sɛ e mian e ɲin e yo sa ng’ɔ ti kpa’n, ɔ́ yáci e sa tɛ’n cɛ́ e, kpɛkun ɔ́ yrá e su.

SIMEƆN NIN LEVI

9. ?Ngue ti yɛ Zakɔbu i klun w’a jɔman Simeɔn nin Levi be wun-ɔn? (Bo Bolɛ 49:5-7)

⁹ An kanngan Bo Bolɛ 49:5-7 nun. I sin’n, Zakɔbu kan ndɛ kleli Simeɔn nin Levi. Sanngɛ ndɛ ng’ɔ kannin’n ɔ kle kɛ i klun jɔman be wun. Laa kun’n, Kanaanfuɛ kun m’ɔ suan Sisɛmun’n, ɔ tɔli Zakɔbu i wa bla nga be flɛ i kɛ Dina’n i gblu. Sa ng’ɔ juli be niaan bla’n su’n, ɔ yoli Zakɔbu i mma’m be kwlaa be ya dan. I sɔ’n kusu ti su. Sanngɛ Simeɔn nin Levi be liɛ’n, b’a kwlá nianman be wun su. Be lakali Sisɛmun nin i klɔ’n sufuɛ’m be kɛ sɛ be wla be klɛn’n, be nin bé trán klanman. Be kusu be kplinnin su. Kɛ be wlali sran sɔ’m be klɛn mɔ be wun kannin’n te yo be ya’n, Simeɔn nin Levi “be tinuntinun be fali be tokofi’n yɛ be wluli klɔ’n nun blɛlɛlɛ. Kpɛkun be kunnin yasua’m be kwlakwla.”—Bob. 34:25-29.

10. ?Wafa sɛ yɛ Simeɔn nin Levi be su ndɛ nga Zakɔbu kannin’n, ɔ kpɛnnin su-ɔ? (An nian kuku nga be flɛ i kɛ “ Ndɛ nga Ɲanmiɛn maan Zakɔbu kannin’n” nun wie.)

¹⁰ Sran kpanngban nga Simeɔn nin Levi be kunnin be’n, ɔ yoli Zakɔbu i ya dan. Ɔ seli kɛ cɛn wie lele’n, be osu’n nunfuɛ’m bé bó sánndi Izraɛli nvle’n nun. Kɛ afuɛ 200 tra su sinnin mɔ Izraɛlifuɛ’m be wuli mɛn nga Ɲanmiɛn tali nda kɛ ɔ́ fá mán be’n nun’n, yɛ ndɛ sɔ’n kpɛnnin su-ɔ. Simeɔn akpasua’n  nunfuɛ’m be lika liɛ nga be fa mannin be’n, ɔ o Zida akpasua liɛ’n nun. (Zoz. 19:1) Yɛ Levi i akpasua nunfuɛ’m be ɲannin klɔ 48. Klɔ sɔ’m be o Izraɛlifuɛ’m be lika’m be nun.—Zoz. 21:41.

11. ?Ngue yɛ Simeɔn nin Levi akpasua’n nunfuɛ’m be yoli m’ɔ ti kpa-ɔ?

¹¹ Simeɔn nin Levi be akpasua nunfuɛ’m b’a nianman be nannan’m be ajalɛ tɛ’n su. Levi i akpasua’n nunfuɛ’m be suli Zoova kɛ ng’ɔ nin i fata’n sa. I nun mɔ Zoova fá Mmla’n mán Moizi Sinai Oka’n su lɔ’n, Izraɛlifuɛ kpanngban kpa be sɔli nannin ba nga be yoli’n. Sanngɛ Levifuɛ’m be liɛ’n be suannin Moizi bo. Yɛ be ukɛli i naan w’a nunnun be nga be yoli tete like sɔ’n. (Tul. 32:26-29) Zoova kpali Levi akpasua’n nunfuɛ mun sieli be ngunmin naan be yo i ɲrun jranfuɛ Izraɛli nvle’n nun. (Tul. 40:12-15; Kal. 3:11, 12) I sin’n, kɛ Izraɛlifuɛ’m be juli mɛn nga Zoova tali nda kɛ ɔ́ fá mán be’n nun’n, Simeɔn akpasua’n nunfuɛ’m be ukali Zida akpasua nunfuɛ mun naan b’a kwla Kanaanfuɛ nga be tran lɔ’n.—Jɔl. 1:3, 17.

12. ?Afɔtuɛ benin yɛ Simeɔn nin Levi be su ndɛ’n man e-ɔ?

¹² ?Afɔtuɛ benin yɛ ndɛ sɔ’n man e-ɔ? Nán maan e fa ajalɛ annzɛ e yo like wie ya su. Sɛ be yoli e bɔbɔ annzɛ e awlɛn su sran wie i tɛtɛ naan i sɔ’n yo e ya’n, ɔ ti su. (Jue. 4:4) Sanngɛ maan ɔ tran e klun titi kɛ Zoova kloman kɛ e fa ya ble e kan ndɛ annzɛ e yo like. (Zak. 1:20) Kɛ sran kun yo e sa wie m’ɔ timan su’n, sɛ sran sɔ’n su Zoova-o annzɛ ɔ suman Zoova-o, maan e nian Biblu’n nun mmla’m be su e nanti. I liɛ’n e su kanman ndɛ wie, annzɛ e su yoman like wie fa tuman e klunngbɔ. (Rɔm. 12:17, 19; 1 Piɛ. 3:9) Sɛ e si annzɛ e nin bɔbɔ yo sa ng’ɔ timan Zoova liɛ’n su’n, nán maan e niɛn i ayeliɛ’n su. Nán e se e wun kɛ be yo e sa fi-ɔ, ɔ yoman ye kun naan Zoova i klun kwlá jɔman e wun. Sɛ e mian e ɲin’n, Zoova úka e naan e yo sa ng’ɔ ti kpa’n, kpɛkun ɔ́ yrá e su.

ZIDA

13. ?Kɛ Zida tili ndɛ nga be si kan kleli i ɲrun kpɛnngbɛn mun’n, ngue ti yɛ i klun kwla titi i kan-ɔn?

¹³ Kɛ Simeɔn nin Levi be liɛ’n wieli’n, sran nga Zakɔbu kan ndɛ kleli i’n, yɛle Zida. Kɛ ɔ tili ndɛ nga be si kan kleli i ɲrun kpɛnngbɛn mun’n, atrɛkpa’n i klun titili i kan. Afin i kusu yoli sa tɛtɛ wie mun. Ɔ fɛnnin Sisɛmun i klɔ’n nunfuɛ’m be bo ninnge mun wie. (Bob. 34:27) Ɔ nin i niaan’m be bo yoli kun be yoli Zozɛfu i atɛ kpɛkun be kpɛli be si i gblɛ. (Bob. 37:31-33) I sin’n, ɔ nin Tamaa m’ɔ ti i sewi’n be lali. Afin ɔ buli i kɛ ɔ ti tekle bla.—Bob. 38:15-18.

14. ?Ngue yɛ Zida yoli m’ɔ ti kpa-ɔ? (Bo Bolɛ 49:8, 9)

¹⁴ Sanngɛ Zakɔbu yili Zida i ayɛ, kpɛkun muae yɛ ɔ bo mɛnnin i-ɔ. (An kanngan Bo Bolɛ 49:8, 9 nun.) Zida kleli kɛ i si oke’n i ndɛ lo i dan. Asa’n ɔ kleli kɛ ɔ si Bɛnzamɛn m’ɔ ti be sinma’n i aunnvɔɛ.—Bob. 44:18, 30-34.

15. ?Wafa sɛ yɛ Zida i su ndɛ nga Zakɔbu kannin’n, ɔ kpɛnnin su-ɔ?

¹⁵ Zakɔbu seli kɛ Zida yɛ ɔ́ wá síe i niaan mun-ɔn. Kɛ afuɛ kɔe 200 sinnin’n, yɛ ndɛ sɔ’n i su kpɛnlɛ’n boli i bo-ɔ. Yɛle kɛ, kɛ Izraɛlifuɛ’m be fɛli i aawlɛ flɛnnɛn’n nun lɛ mɔ bé kɔ́ mɛn nga Ɲanmiɛn waan ɔ́ fá mán be’n nun’n, akpasua klikli ng’ɔ dun be ɲrun mmua mɔ Biblu’n kɛn i ndɛ’n, yɛle Zida akpasua’n. (Kal. 10:14) Kɛ afuɛ kpanngban sinnin mɔ be juli mɛn sɔ’n nun lɔ’n, Zida akpasua’n nunfuɛ mun yɛ be dun mmua fali alɛ wlali Kanaanfuɛ’m be sin-ɔn. (Jɔl. 1:1, 2) Asa’n, Davidi m’ɔ ti Zida i osu’n nunfuɛ’n, ɔ yoli famiɛn kpanngban nga be fin akpasua sɔ’n nun’n be  nun klikli’n. Sanngɛ wafa nga Zida i su ndɛ nga Zakɔbu kannin’n ɔ kpɛnnin su’n, nɛ́n i ngba yɛle ngalɛ’n.

16. ?Wafa sɛ yɛ ndɛ ng’ɔ o Bo Bolɛ 49:10 nun’n kpɛnnin su-ɔ? (An nian kuku nga be flɛ i kɛ “ Ndɛ nga Ɲanmiɛn maan Zakɔbu kannin’n” nun wie.)

¹⁶ Zakɔbu seli kɛ Zida i osu’n nunfuɛ kun yɛ ɔ́ wá síe klɔ sran mun tititi-ɔ. (An kanngan Bo Bolɛ 49:10 nin ja ngua lɔ ndɛ’n nun.) Siefuɛ sɔ mɔ Zakɔbu flɛli i kɛ Silo’n, yɛle Zezi Klisi. Kɛ anzi kun kán Zezi i ndɛ’n, ɔ seli kɛ: “Ɲanmiɛn Zoova wá fɛ́ i si Davidi i famiɛn bia’n mɛ́n i.” (Lik. 1:32, 33) Asa ekun’n, be flɛ Zezi wie kɛ ‘asɔmɔli m’ɔ fin Davidi osu’n nun’n.’—Ngl. 5:5.

17. ?Wafa sɛ yɛ e kwla nian Zoova i ajalɛ’n su-ɔ?

¹⁷ ?Afɔtuɛ benin yɛ ndɛ sɔ’n man e-ɔ? Zida yoli sa tɛtɛ wie mun. Sanngɛ Zoova yrɛli i su. Atrɛkpa’n, Zida i niaan’m be usali be wun kɛ: ‘?Ngue kpa li yɛ Zoova wunnin i Zida i lika mɔ i ti yɛ ɔ yrɛli i su sɔ-ɔ?’ I kwla yoli-o, Zoova wunnin like kpa Zida i lika. I sɔ’n ti’n, ɔ yrɛli i su. ?Wafa sɛ yɛ e kwla nian Zoova i ajalɛ’n  su-ɔ? Sɛ be man aniaan kun i junman cinnjin wie asɔnun’n nun’n, sɛ y’a nianman e wun kpa’n, like klikli nga é dún mmua fá e ɲin síe su’n, yɛle sa ng’ɔ yoli be mɔ be timan su’n. Sanngɛ maan e wla kpɛn su kɛ ɔ yo ninnge wie mɔ be ti kpa mɔ Zoova i klun jɔ su-ɔ. Zoova liɛ’n, ɔ fɛ i ɲin sie i like nga i sufuɛ’m be yo m’ɔ ti kpa’n su. Maan e mian e ɲin e yo sɔ wie.

18. ?Ngue ti yɛ ɔ ti cinnjin kɛ e tra e awlɛn e minndɛ-ɔ?

¹⁸ Afɔtuɛ kun ekun mɔ Zida i su ndɛ’n man e’n, yɛle kɛ maan e tra e awlɛn e minndɛ. Zoova yia nda kwlaa ng’ɔ ta be’n be nuan. Sanngɛ wafa ng’ɔ yo sɔ’n nin blɛ nga i nun yɛ ɔ yo sɔ’n, ɔ nin e liɛ nga e sunnzun’n ɔ timan kun. Be nga be dun mmua sieli Izraɛli nvle’n be fiman Zida osu’n nun. Sanngɛ be suannin sran nga Zoova fa be sieli i Izraɛlifuɛ’m be su’n, be bo. I wie yɛle kɛ be suannin Moizi m’ɔ fin Levi akpasua’n nun’n, nin Zozie m’ɔ fin Efraimun akpasua’n nun’n, nin famiɛn Saili m’ɔ fin Bɛnzamɛn akpasua’n nun’n be bo. Maan e kusu e suan sran kwlaa nga Zoova fɛ i sie e su andɛ’n i bo.—Ebr. 6:12.

19. ?Ngue like yɛ ndɛ kasiɛn nga Zakɔbu kan kleli i mma mun’n, ɔ kle e-ɔ?

¹⁹ ?Ngue like yɛ ndɛ kasiɛn nga Zakɔbu m’ɔ la wie bɛ’n su’n, ɔ kan kleli i mma mun’n, ɔ kle e-ɔ? Yɛle kɛ “wafa nga klɔ sran wun ninnge mun’n, ɔ nin Ɲanmiɛn liɛ’n timan kun.” (1 Sam. 16:7) Zoova trɛ i awlɛn dan, yɛ ɔ yaci sa cɛ. Kɛ e yo e sa tɛ’n, i sɔ’n yomɛn i fɛ. Sanngɛ kusu ɔ kunndɛman kɛ i sufuɛ’m be yo ninnge mun kɛ fɔ nunman be nun’n sa. Be nga be yoli sa tɛ dan laa’n, sɛ be kaci be akunndan’n sakpa naan be yo sa ng’ɔ ti kpa’n, ɔ kwla yra be su. Like suanlɛ ng’ɔ́ bá lɔ’n nun’n, é wá fá e ɲin é síe i ndɛ ng’ɔ kan kleli i mma yasua mɔcuɛ onga mun’n su.