LIKE SUANLƐ 33
JUE 130 An yaci sran wun sa cɛ i
Wafa nga Zoova kunndɛ kɛ e bu aniaan nga be yoli sa tɛ dan’n
“Sɛ amun nun wie yo sa tɛ’n, e le ukafuɛ kun.” —1 ZAN 2:1.
NDƐ CINNJIN’N
?Kɛ laa Korɛnti lɔ’n aniaan kun yoli sa tɛ dan’n, ngue yɛ wafa nga be siesieli ndɛ sɔ’n asɔnun’n nun’n, ɔ kle e-ɔ?
1. ?Ngue yɛ Zoova kunndɛ kɛ sran’m be kwlaa be yo-ɔ?
KƐ Zoova yí klɔ sran mun’n, ɔ mannin be atin kɛ be fa be klunklo ajalɛ. Cɛn kwlakwla’n e fa ajalɛ. Ajalɛ’m be nun cinnjin kpafuɛ nga sran kun kwla fa’n, yɛle kɛ ɔ fɛ i wun man Zoova naan ɔ kaci i sufuɛ. Zoova kunndɛ kɛ e kwlakwla e fɛ i sɔ ajalɛ’n. Afin ɔ klo klɔ sran mun yɛ ɔ kunndɛ kɛ be liɛ yo ye. Ɔ kunndɛ kɛ be kaci i janvuɛ naan be ɲan nguan m’ɔ leman awieliɛ’n.—Mml. 30:19, 20; Gal. 6:7, 8.
2. ?Ngue yɛ Zoova kunndɛ kɛ be nga be yoli sa tɛ dan’n be yo-ɔ?
2 Sanngɛ Zoova mianman sran fi kɛ ɔ su i. Ɔ man e tinuntinun e atin kɛ e fa e klunklo ajalɛ. ?Yɛ sɛ Klisifuɛ kun yo sa tɛ dan’n nin? ?Ngue yɛ ɔ fata kɛ asɔnun kpɛnngbɛn’m be yo-ɔ? Sɛ ɔ kacimɛn i akunndan’n, ɔ fata kɛ be tu i asɔnun’n nun. (1 Kor. 5:13) Sanngɛ kannzɛ bɔbɔ be tu i asɔnun’n nun’n, Zoova kunndɛ kpa kɛ ɔ kaci i akunndan’n naan ɔ nin i be afiɛn mantan ekun. I kpa bɔbɔ’n, sa cinnjin nga ti yɛ ɔ yili e ti kpɔlɛ tɛ’n, i kun yɛ ɔ o lɛ-ɔ. Ɔ yili tɛ sɔ’n naan w’a kwla yaci sa tɛ yofuɛ nga be kaci be akunndan’n, be sa tɛ mun w’a cɛ be. (An kanngan 1 Zan 2:1 nun.) Zoova klo sran dan. Ɔ maan ɔ wla sa tɛ yofuɛ’m be fanngan kɛ be kaci be akunndan’n.—Zkr. 1:3; Rɔm. 2:4; Zak. 4:8.
3. ?Ngue yɛ é wá kɛ́n i ndɛ like suanlɛ nga nun-ɔn?
3 Zoova kunndɛ kɛ e bu sa tɛ’n nin sa tɛ yofuɛ’m be wun akunndan kunngba ng’ɔ bu’n wie. Like suanlɛ nga wá klé e wafa nga e kwla yo sɔ’n. Laa Korɛnti lɔ asɔnun’n nun’n, kɛ aniaan kun yoli sa tɛ dan’n, like nga akoto Pɔlu seli asɔnun’n nunfuɛ’m be kɛ be yo’n, é wá fá e ɲin é síe su. I sin’n, kɛ sa tɛ yofuɛ sɔ’n kacili i akunndan’n, like nga Pɔlu seli be kɛ be yo’n, é wá kɛ́n i ndɛ. Kpɛkun é wá wún wafa nga Zoova bu be nga be yo sa tɛ dan’n.
?KƐ KLISIFUƐ KUN YOLI SA TƐ DAN’N, NGUE YƐ BE YOLI I-Ɔ?
4. ?Klisifuɛ klikli’m be blɛ su’n, sa benin yɛ ɔ tɔli Korɛnti lɔ asɔnun’n nun-ɔn? (1 Korɛntifuɛ Mun 5:1, 2)
4 An kanngan 1 Korɛntifuɛ Mun 5:1, 2 nun. I nun mɔ Pɔlu tú i ajalɛ nsan su’n, ɔ tili i kɛ Klisifuɛ kun w’a yo sa tɛ dan Korɛnti lɔ asɔnun’n nun. Kɛ ɔ́ yó sɔ’n, nn be takali asɔnun sɔ’n ɔ nin-a cɛman. Klisifuɛ sɔ’n nin i si i yi be la. Sa sɔ’n ti tɛ dan. “Be nga be timan Zifu bɔbɔ’n be yoman sɔ.” Sanngɛ aniaan’m be bluli sa sɔ’n su. I kpa bɔbɔ’n be fa dili be nuan. Atrɛkpa’n, be nun wie’m be seli be wun kɛ i sɔ mɔ be yo’n ɔ kle kɛ be si sran aunnvɔɛ kɛ Zoova sa. Kusu nn Zoova kloman kɛ i sufuɛ’m be yo sa tɛ. Ɲannzuɛn sa nga Klisifuɛ sɔ’n yoli’n, ɔ saci asɔnun’n i dunman. Asa’n, atrɛkpa’n i nzuɛn’n su saci Klisifuɛ nga be fa be wun be mɛntɛn i’n. ?I sɔ’n ti’n, ngue yɛ Pɔlu seli asɔnun’n nunfuɛ’m be kɛ be yo-ɔ?
5. (1) ?Ngue yɛ Pɔlu seli asɔnun’n nunfuɛ’m be kɛ be yo-ɔ? (2) ?Yɛ ngue yɛ i ndɛ sɔ’n kle-ɔ? (1 Korɛntifuɛ Mun 5:13) (An nian desɛn’n wie.)
5 An kanngan 1 Korɛntifuɛ Mun 5:13 nun. Ɲanmiɛn maan Pɔlu klɛli be fluwa naan be tu sa tɛ yofuɛ sɔ m’ɔ kacimɛn i akunndan’n asɔnun’n nun. ?I lɛ nun’n, wafa sɛ yɛ ɔ fata kɛ asɔnun’n nunfuɛ’m be nin i be tran-ɔn? Pɔlu seli be kɛ ‘nán be nin i be san nun kun,’ yɛ ‘nán be nin i sɔfuɛ’n be di like bɔbɔ.’ (1 Kor. 5:11) Kɛ e nin sran kun é dí like’n, ɔ cɛman naan e nin i y’a koko yalɛ. Pɔlu i ndɛ sɔ’n kle kɛ ɔ fataman kɛ asɔnun’n nunfuɛ’m be fa be wun be mɛntɛn i. I liɛ’n sa tɛ yofuɛ’n i nzuɛn’n su saman be. (1 Kor. 5:5-7) Asa’n, i sɔ’n úkɛ i naan w’a wun i wlɛ kɛ ɔ yoli sa tɛ dan. Ɔ maan sa sɔ’n kwla yo i nsisɔ, yɛ ɔ kwla kaci i akunndan’n.
Ɲanmiɛn maan Pɔlu seli kɛ be tu sa tɛ yofuɛ kun m’ɔ kacimɛn i akunndan’n asɔnun’n nun. (An nian ndɛ kpɔlɛ 5 nun.)
6. ?Kɛ Pɔlu klɛli fluwa ko mannin Korɛntifuɛ mun’n, ngue yɛ asɔnun’n nunfuɛ mun nin sa tɛ yofuɛ’n be yoli-ɔ?
6 Kɛ Pɔlu klɛli fluwa’n ko mannin Korɛntifuɛ mun’n, ɔ usɛli i wun sɛ be fali su-o. Kɛ ɔ́ kɔ́ i ɲrun’n, Titi wa boli jasin kun kleli Pɔlu. Yɛ jasin sɔ’n yoli i fɛ dan. Yɛle kɛ ɔ seli Pɔlu kɛ asɔnun’n nunfuɛ’m be fali ndɛ ng’ɔ kan kleli be’n su, naan be tuli sa tɛ yofuɛ’n asɔnun’n nun. (2 Kor. 7:6, 7) Asa’n kɛ Pɔlu klɛli be fluwa mɔ anglo nɲɔn kun sinnin’n, sa tɛ yofuɛ’n kacili i akunndan’n. Ɔ wlɛli i ayeliɛ’n i ase, kpɛkun ɔ wa nantili Zoova i mmla’m be su kɛ laa’n sa. (2 Kor. 7:8-11) ?Kɛ ɔ yoli sɔ’n, ngue yɛ Pɔlu seli asɔnun’n nunfuɛ’m be kɛ be yo i siɛn’n niɔn?
WAFA NG’Ɔ FATA KƐ BE NIN SA TƐ YOFUƐ M’Ɔ KACILI I AKUNNDAN’N BE TRAN’N
7. ?Kɛ be tuli sa tɛ yofuɛ’n asɔnun’n nun’n, wafa sɛ yɛ i sɔ’n ukɛli i-ɔ? (2 Korɛntifuɛ Mun 2:5-8)
7 An kanngan 2 Korɛntifuɛ Mun 2:5-8 nun. Pɔlu seli be kɛ: “Fɔ nga amun nun sunman be tuli sran sɔ’n, ɔ ju i.” I sɔ’n kle kɛ fɔ nga be tuli i’n ɔ ukɛli i sakpa. Yɛle kɛ ɔ kacili i akunndan’n.—Ebr. 12:11.
8. ?Ngue ekun yɛ Pɔlu seli asɔnun kpɛnngbɛn’m be kɛ be yo-ɔ?
8 Kɛ mɔ bian’n kacili i akunndan’n ti’n, Pɔlu seli asɔnun kpɛnngbɛn’m be kɛ be mɛn i atin naan ɔ sɛ i sin asɔnun’n nun. Ɔ seli be ekun kɛ: “An yaci i wun sa’n cɛ i klun ufue su, yɛ an yo maan i wla gua ase.” Pɔlu kunndɛli kɛ aniaan’m be ayeliɛ’n nin be ijɔlɛ’n nun’n, be kle bian’n kɛ be yacili i sa tɛ’n be cɛli i sakpa naan be klo i. Sɛ be yo sɔ’n, bian’n wún kɛ i sin mɔ w’a sɛ i asɔnun’n nun’n, ɔ yo be fɛ.
9. ?Ngue ti yɛ atrɛkpa’n, wie’m be sisili be bo naan b’a sɔ bian m’ɔ kacili i akunndan’n i nun klanman-ɔn?
9 ?Klisifuɛ wie’m be sisili be bo naan b’a sɔ sa tɛ yofuɛ m’ɔ kacili i akunndan’n i nun klanman? Biblu’n tɛman su trele. Sanngɛ atrɛkpa’n, be nun wie’m be yoli sɔ. Afin ndɛ m’ɔ kpɛ yili i asɔnun’n nun’n ti’n, atrɛkpa’n be nun wie’m be te fɛ i wun ya. Asa’n atrɛkpa’n i ayeliɛ’n ti’n, aniaan wie’m be wunnin ɲannzuɛn dan. Asa ekun’n, aniaan wie’m be kplin be ɲin kpa naan b’a yoman sa tɛ. Ɔ maan be kwla se be wun kɛ ɔ fataman kɛ sran kun m’ɔ yoli sa tɛ dan kɛ ngalɛ’n sa’n, ɔ sɛ i sin asɔnun’n nun. (An nian Liki 15:28-30.) ?Sanngɛ ngue ti yɛ ɔ ti cinnjin kɛ be sɔ be niaan mɔ w’a sɛ i sin’n i nun klanman, naan be kle kɛ be klo i-ɔ?
10-11. ?Sɛ asɔnun kpɛnngbɛn’m be waan be yaciman bian’n i sa tɛ’n cɛmɛn i’n, wafa sɛ yɛ i bo’n kwla gua-ɔ?
10 ?Sɛ asɔnun kpɛnngbɛn’m be waan be kplinman su kɛ bian’n sɛ i sin asɔnun’n nun’n, kusu nn w’a kaci i akunndan’n, wafa sɛ yɛ i sɔ’n yó i-ɔ? ?Annzɛ kusu sɛ ɔ sɛ i sin naan ɔ wunman kɛ asɔnun’n nunfuɛ’m be te klo i’n, i sɔ’n yó i sɛ? I wla kwla ‘bo i wun tratra su.’ Ɔ kwla se i wun kɛ i liɛ w’a wie mlɔnmlɔn, naan ɔ nin Zoova i sulɛ fataman kun. I kpa bɔbɔ’n, ɔ kwla se i wun kɛ ɔ nunman nun kɛ ɔ miɛn i ɲin naan ɔ fɛ i wun mantan Ɲanmiɛn kun.
11 Ng’ɔ ti tɛ dan bɔbɔ’n, yɛle kɛ sɛ aniaan wie’m be waan be yaciman bian mɔ w’a kaci i akunndan’n i sa tɛ’n cɛmɛn i’n, be nin Zoova be afiɛn kwla saci. Afin sɛ be yo sɔ’n, nn Satan mɔ i klun yo wi m’ɔ yaciman sa cɛman’n, i ajalɛ’n su yɛ be nian-ɔn, nán Zoova liɛ’n niɔn. Yɛ Satan kwla sin be lika bubu bian’n i sa sin naan w’a suman Zoova kun.—2 Kor. 2:10, 11; Efɛ. 4:27.
12. ?Wafa sɛ yɛ aniaan nga be o Korɛnti lɔ’n, be kwla kle kɛ be nian Zoova i ajalɛ’n su-ɔ?
12 ?Wafa sɛ yɛ aniaan nga be o Korɛnti lɔ’n, be kwla kle kɛ Zoova i ajalɛ’n su yɛ be nian-ɔn, naan nán Satan liɛ’n su-ɔ? Yɛle kɛ maan be nin sa tɛ yofuɛ m’ɔ kacili i akunndan’n be tran kɛ nga Zoova fa klo’n sa. Maan e fa e ɲin e sie i Zoova i su ndɛ wie mɔ Biblu’n i klɛfuɛ wie’m be kannin’n su. Davidi seli kɛ ɔ ‘ti kpa, yɛ ɔ klo kpa kɛ ɔ́ yáci sa cɛ́.’ (Jue. 86:5) Mise seli kɛ: “?Wan yɛ ɔ ti Ɲanmiɛn kɛ wɔ sa m’ɔ yaci i nvlefuɛ’m be onga’n i sa tɛ’n cɛ, m’ɔ blu i fɔnlɛ’n su’n niɔn?” (Mis. 7:18) Ezai kusu seli kɛ: “Maan klunwifuɛ’n ɔ kaci i ayeliɛ’n, yɛ maan sa tɛ yofuɛ’n ɔ kaci i akunndan’n. Maan ɔ sɛ i sin Zoova wun, ɔ́ wá sí i aunnvɔɛ, maan ɔ sɛ i sin e Ɲanmiɛn’n i wun, afin ɔ́ wá yáci i wun sa’n ɔ́ cɛ́ i klun ufue su.”—Eza. 55:7.
13. ?Ngue ti yɛ ɔ fata kɛ be man bian m’ɔ kacili i akunndan’n i atin kɛ ɔ sɛ i sin asɔnun’n nun-ɔn? (An nian kuku nga be flɛ i kɛ “ ?Kɛ be tuli bian’n asɔnun’n nun’n, ɔ dili anglo nɲɛ naan w’a sɛ i sin?” nun.)
13 Kɛ ɔ ko yo naan aniaan nga be o Korɛnti lɔ’n b’a kle kɛ be nian Zoova i ajalɛ’n su’n, ɔ fata kɛ be sɔ bian m’ɔ kacili i akunndan’n i nun klanman, yɛ be kle i kɛ be klo i. Pɔlu seli kɛ sɛ be yaci bian’n i sa tɛ’n cɛ i sakpa’n, bé klé kɛ be nanti ndɛ ng’ɔ kan kleli be’n su “sa’n kwlaa nun.” (2 Kor. 2:9) Kɛ be tuli bian’n i asɔnun’n nun’n, w’a cɛman sɔ liɛ naan w’a kaci i akunndan’n. I sɔ’n ti’n, ɔ fataman kɛ asɔnun kpɛnngbɛn’m be cuɛncuɛn be ja ase naan b’a mɛn i atin kɛ ɔ sɛ i sin asɔnun’n nun ekun.
WAFA NGA E KWLA KLE KƐ E YO SA NUAN SU YƐ E SI AUNNVƆƐ KƐ ZOOVA SA’N
14-15. ?Ngue yɛ sa ng’ɔ juli Korɛnti lɔ asɔnun’n nun’n, ɔ kle e-ɔ? (2 Piɛli 3:9) (An nian foto’n wie.)
14 Be klɛli wafa nga be siesieli sa ng’ɔ juli Korɛnti lɔ asɔnun’n nun’n, i su ndɛ naan “e si sa.” (Rɔm. 15:4) Ndɛ sɔ’n kle kɛ Zoova kloman kɛ sa tɛ yofuɛ ng’ɔ kacimɛn i akunndan’n, ɔ ka asɔnun’n nun. Ɔ su seman le kɛ ɔ si aunnvɔɛ dan ti’n, ɔ fata kɛ i sɔfuɛ’n kɛ i sufuɛ’m be afiɛn. I yo, Zoova si aunnvɔɛ sakpa. Sanngɛ ɔ timan kɛ siɛ kun m’ɔ blu sa tɛtɛ kwlaa nga i mma’m be yo’n su’n sa. Asa’n, sa kpa’n nin sa tɛ’n be su mmla ng’ɔ kpɛli be’n be kaciman. (Zid. 4) Sɛ Zoova yaci sa tɛ yofuɛ nga be kaciman be akunndan’n i sufuɛ’m be afiɛn’n, i sɔ’n timan sran aunnvɔɛ silɛ. Afin i sɔ’n sáci asɔnun’n.—Ɲan. 13:20; 1 Kor. 15:33.
15 Sanngɛ e si kɛ Zoova kunndɛman kɛ sran ba kun sa nunnun. Ɔ klo kpa kɛ ɔ́ dé sran mun. Be nga be kaci be akunndan mɔ be kunndɛ kɛ be nin i be afiɛn sɛ’n, ɔ si be aunnvɔɛ. (Eze. 33:11; An kanngan 2 Piɛli 3:9 nun.) Kɛ Korɛnti lɔ bian’n kacili i akunndan m’ɔ yacili sa tɛ yolɛ’n, Zoova maan Pɔlu yiyili nun kleli asɔnun’n nunfuɛ’m be kɛ ɔ fata kɛ be yaci be cɛ i, naan be sɔ i nun klanman.
Kɛ sran kun sɛ i sin asɔnun’n nun mɔ e sɔ i nun klanman’n, e kle kɛ e klo sran, yɛ e si sran aunnvɔɛ kɛ Zoova sa. (An nian ndɛ kpɔlɛ 14-15 nun.)
16. ?Kɛ a bu wafa nga be siesieli sa ng’ɔ juli Korɛnti lɔ’n i akunndan’n, i sɔ liɛ’n yo wɔ sɛ?
16 Wafa nga be siesieli sa ng’ɔ tɔli laa Korɛnti lɔ asɔnun’n nun’n, ɔ kle kɛ Zoova klo sran, ɔ yo sa ng’ɔ ti kpa’n, yɛ ɔ yo sa i nuan su sɛsɛ. (Jue. 33:5) I sɔ m’ɔ yo’n ti’n, ɔ fata kɛ e mɛnmɛn i kpa tra laa’n. Afin i kwlaa yoli-o, e kwlaa e ti sa tɛ yofuɛ. Yɛ ɔ fata kɛ ɔ si e aunnvɔɛ naan ɔ yaci e sa tɛ mun cɛ e. Zoova yili e ti tɛ naan w’a kwla yaci e sa tɛ mun w’a cɛ e. I sɔ’n ti’n, ɔ fata kɛ e kle i kɛ e si ye. Nanwlɛ, kɛ e si kɛ Zoova klo i sufuɛ mun sakpa naan ɔ kunndɛ kɛ be liɛ yo ye’n, i sɔ’n fɔnvɔ e, yɛ ɔ gua e awlɛn su nzue dan.
17. ?Kosan benin mun yɛ é wá tɛ́ su like suanlɛ ng’ɔ́ bá lɔ’n nun-ɔn?
17 ?Sɛ andɛ’n Klisifuɛ kun yo sa tɛ dan wie’n, wafa sɛ yɛ asɔnun kpɛnngbɛn’m be kwla kle kɛ be klo sran kɛ Zoova sa-ɔ? ?Yɛ wafa sɛ yɛ, kɛ Zoova sa’n, be kwla ukɛ i naan w’a kaci i akunndan’n niɔn? ?Sɛ be tu sran kun asɔnun’n nun’n, annzɛ kusu sran kun sɛ i sin asɔnun’n nun’n, ngue yɛ ɔ fata kɛ asɔnun’n nunfuɛ’m be yo-ɔ? Like suanlɛ ng’ɔ́ bá lɔ’n nun’n, é wá tɛ́ kosan sɔ’m be su.
JUE 109 Maan e tu e klun e klo sran
