Ajalɛ ng’ɔ fata kɛ a fa’n
Sɛ e nanti like nga Biblu’n kle e’n su’n, annzɛ sɛ like nga e bɔbɔ e bu i kɛ ɔ ti kpa annzɛ ɔ ti tɛ’n i su yɛ e jran e fa ajalɛ’n, é wún wafa nga cɛn wie lele i bo’n gúa’n. Ɲanmiɛn Zoova si sɔ. I sɔ’n ti yɛ ɔ kunndɛ kɛ e niɛn i mmla’m be su e nanti’n niɔn.
Zoova kunndɛ kɛ e wla gua ase yɛ e di aklunjɔɛ.
“Min Zoova, n ti amun Ɲanmiɛn, n kle amun like amun bɔbɔ amun kpa yolɛ ti, n kle amun atin ng’ɔ fata kɛ amun fa su’n. Sɛ ɔ ti kɛ amun sie amun su min mmla’m be bo sa’n, nn fɔundi nga amún dí’n, ɔ́ sónji kɛ nzue ba sa, yɛ amun sa nuan su sɛsɛ yolɛ’n ɔ́ yó kɛ jenvie’n i bolɛ’n sa.”—Ezai 48:17, 18.
Kɛ mɔ Ɲanmiɛn yɛ ɔ yili e’n ti’n, ɔ si like nga sɛ e yo-ɔ e liɛ yó ye’n. E bɔbɔ e kpa yolɛ’n ti’n, ɔ wla e fanngan kɛ e niɛn i mmla’m be su e nanti. Kɛ e nian Ɲanmiɛn i mmla’m be su e nanti’n, e si kɛ ajalɛ nga e fa be’n, saan be bo’n gúa kpa. Yɛ ajalɛ kpa nga é fá be’n ti’n, e wla gúa ase yɛ é dí aklunjɔɛ.
Zoova seman e kɛ e yo like nga e kwlɛmɛn i yo’n.
“Mmla nga n su fa man amun andɛ’n, ɔ timan kekle ngboko manman amun. Nán kɛ amun kwlá faman su-ɔ.”—Mmla’n 30:11.
Kɛ ɔ ko yo naan y’a kwla nanti Ɲanmiɛn i mmla’m be su’n, ɔ fata kɛ e kaci akunndan nga e bu’n ɔ nin e ayeliɛ’n. Sanngɛ i sɔ liɛ mɔ Zoova se e kɛ e yo’n, ɔ timan kekle ngboko. Kɛ mɔ i yɛ ɔ yili e’n ti’n, ɔ si like nga e kwla yo’n. Sɛ e si Zoova’n, é wún i wlɛ kɛ “i mmla’m be su falɛ yoman ya.”—1 Zan 5:3.
Zoova seli kɛ ɔ́ úka be nga be niɛn i mmla’m be su nanti’n.
“Min Zoova mɔ n ti ɔ Ɲanmiɛn’n, n tra ɔ sa fama’n nun, n se wɔ kɛ: ‘Nán srɛ kun wɔ. Ń úka wɔ.’”—Ezai 41:13.
E kwla nian Ɲanmiɛn i mmla’m be su e nanti. Afin ɔ́ úka e naan y’a kwla yo sɔ. Ɔ fa Biblu’n fa uka e. Biblu’n nun ndɛ’n wla e fanngan yɛ ɔ yo maan e wla o like kpa kun su.
Mɛn wunmuan’n nun’n, sran miliɔn kpanngban be wunnin kɛ, kɛ be nantili Biblu’n nun ndɛ’n su’n, be liɛ yoli ye. ?I sɔ’n ti’n, a kunndɛman kɛ á sí afɔtuɛ nga be o Biblu’n nun mɔ be kwla yo ɔ ye’n? Sɛ ɔ ti sɔ’n, a kwla fa fluwa pɛplɛpɛ kun m’ɔ yiyi Biblu’n nun ndɛ’n nun’n bo i bo. Be flɛ i kɛ A kwla di aklunjɔɛ tititi! A kwla fɛ i jw.org su, yɛ be tuaman sika. Ndɛ nga be o nun’n, be yɛ:
-
?Wafa sɛ yɛ Biblu’n kwla uka wɔ-ɔ?
-
Biblu’n kle kɛ e ɲrun lɔ’n yó kpa
-
?A kwla lafi Biblu’n nun ndɛ’n su?
Kɛ á súan Biblu’n nun like kɔ́’n, á wá wún i wlɛ kɛ i nun ndɛ’n nin-a sinman, naan “be kwla lafi be su blɛ kwlaa nun.” (Jue Mun 111:8) Like cinnjin kpa nga e kwla yo naan y’a di aklunjɔɛ’n yɛle Biblu’n nun mmla’m be su nantilɛ. Sanngɛ Ɲanmiɛn su mianman e kɛ e yo sɔ. (Mmla’n 30:19, 20; Zozie 24:15) E tinuntinun yɛ ɔ fata kɛ e fɛ i sɔ ajalɛ’n niɔn.
