Ɲanmiɛn sua’n i ɲrun lika fleiin’n, i nun yɛ be sin be kɔ Sua Ba m’ɔ ti Ɲanmiɛn liɛ Klonglo’n nun-ɔn. Mɛn Uflɛ Biblu’n ng’ɔ fiteli kwlaa naan afuɛ 2023 w’a ju’n i nun’n, be seli kɛ sua’n i ɲrun lika fleiin’n i tɛnndɛn nun’n ti kude 20 naan ɔ nin sua’n i tɛtrɛ nun’n be sɛ. Kpɛkun i nglonglo su’n ti kude 120. (2 Ɲol. 3:4) Biblu uflɛ wie mun ekun be se kɛ sua’n i ɲrun lika fleiin’n ti kude 120 annzɛ mɛtri 53.

Sanngɛ afuɛ 2023 Mɛn Uflɛ Biblu’n i nun’n, kɛ bé kán Ɲanmiɛn sua nga Salomɔn kplannin’n i lika fleiin’n i ndɛ’n, be seli kɛ “i nglonglo su’n ti kude ablaɔn (20)” yɛle kɛ mɛtri kɔe ngwlan. a Maan e fa e ɲin e sie i sa nga ti yɛ be kacili ndɛ sɔ’n i su.

1 Famiɛn Mun ndɛ tre 6 i mma 3 nun’n, b’a kanman sua’n i ɲrun’n i nglonglo su’n i ndɛ. Ndɛ mma sɔ’n nun’n, Zeremin kannin sua’n i ɲrun lika fleiin’n i tɛnndɛn nun nin i tɛtrɛ nun’n be ndɛ, sanngɛ w’a kɛnmɛn i nglonglo su’n i ndɛ. Sanngɛ ndɛ tre nso’n nun’n, ɔ kannin Ɲanmiɛn i sua’n i nun ninnge uflɛ wie’m be ndɛ weinwein. Be wie yɛle jenvie mɔ be kloli aaba be yoli’n, nin kakaklolo blu mun ɔ nin sua ja mlomlo mɔ aaba yɛ be fa yoli’n, mɔ be to be naan b’a to sua’n i ɲrun lika fleiin’n. (1 Fam. 7:​15-37) ?Sɛ sua’n i ɲrun lika fleiin tra mɛtri ablenun’n (50) naan ɔ tra Ɲanmiɛn i sua’n i lika onga’m be su’n, nn ngue ti yɛ Zeremin w’a kɛnmɛn i nglonglo su’n i ndɛ-ɔ? I kpa bɔbɔ’n, kɛ afuɛ kpanngban sinnin’n, Zifu be fluwa klɛfuɛ wie’m be klɛli i kɛ sua’n i ɲrun lika fleiin sɔ’n, ɔ traman Ɲanmiɛn sua’n i lika onga’m be su.

Fluwa sifuɛ wie’m be waan sɛ sua’n i ɲrun lika fleiin’n i nglonglo su’n ti kude ya kun ablaɔn (120) sakpa’n, nn be bumɛn i kɛ talɛ’m bé kwlá súɛn i bo. Laa kpa nun’n, kɛ bé fá yɔbuɛ nin bliki dandan’m bé fá kplán sua fleiin mun’n, be bo ase nga be wla’n, ɔ ti tɛtrɛ kpa. Kpɛkun i ti lika’n ti kaan. I wie yɛle wafa nga be kplannin Ezipti lɔ amuin sua’m be anuan mun’n. Sanngɛ Salomɔn w’a kplanman Ɲanmiɛn sua’n i kɛ ngalɛ’n sa. Fluwa sifuɛ wie’m be waan atrɛkpa’n, Ɲanmiɛn sua’n i talɛ mun be tɛtrɛ nun’n traman kude nsiɛn annzɛ mɛtri 2,7. Bian kun mɔ be flɛ i kɛ Teodɔru Businki m’ɔ suan sua nga be kplan be lalafuɛ nun’n be su like’n, ɔ seli kɛ: “Kɛ e bu Ɲanmiɛn i sua’n i lika nga be sin lɛ be wlu lɔ’n i talɛ’m be tɛtrɛ’n i akunndan’n, e wun i wlɛ kɛ sua’n i ɲrun lika fleiin’n, i nglonglo su’n ɔ juman kude ya kun ablaɔn (120).”

Atrɛkpa’n sran ng’ɔ niannin 2 Be Ɲoliɛ 3:4 su m’ɔ klɛli i fluwa uflɛ su’n, ɔ fɔnnin. Ndɛ mma sɔ’n nun’n, ndɛ nga be klɛli be be sa nun lalafuɛ nun’n, be nun wie’m be nun’n be se kɛ sua’n i ɲrun lika fleiin’n i nglonglo su’n ti “kude ya kun ablaɔn (120).” Sanngɛ fluwa kɛ Codex Alexandrinus nin Codex Ambrosianus mɔ be kwla lafi be nun ndɛ’m be su’n be nun’n, be seli kɛ sua’n i ɲrun lika fleiin’n i nglonglo su’n ti “kude ablaɔn (20).” ?Ngue ti yɛ atrɛkpa’n sran ng’ɔ niannin ndɛ su’n klɛli i fluwa uflɛ su’n ɔ fɔnnin m’ɔ klɛli ya kun ablaɔn-ɔn? Ebre nun’n kɛ be se kɛ “ya kun” ɔ nin kɛ be se kɛ “kude’n” ndɛ nɲɔn sɔ’m be fa be wun. Ɔ maan atrɛkpa’n sran ng’ɔ niannin ndɛ su’n klɛli i fluwa uflɛ su’n, ɔ klɛli “ya kun” kusu nn “kude” yɛ ɔ fata kɛ ɔ klɛ-ɔ.

E mian e ɲin naan y’a wun Ɲanmiɛn i sua nga Salomɔn kplannin’n i su ndɛ tɛkɛtɛkɛ wie’m be wlɛ, naan kusu i su desɛn nga e yi be’n b’a yo su. Sanngɛ kɛ é yó sɔ’n, e wla kpɛn su kɛ like ng’ɔ ti cinnjin kpafuɛ’n yɛle like nga sua sɔ’n fa e ɲin sie su’n. Like sɔ’n yɛle Ɲanmiɛn i sua mɔ nán sran yɛ ɔ kplannin’n. Nanwlɛ kɛ Zoova yia e kɛ e bla naan e su i sua sɔ’n nun’n, i sɔ’n yo e fɛ dan.—Ebr. 9:​11-14; Ngl. 3:12; 7:​9-17.