1. ?Ngue ti yɛ Zoova faman e sunnzunman e wiengu mun-ɔn?

KƐ NINNGE’M be ti fanunfanun’n, ɔ yo Zoova i klanman. I sɔ’n ti yɛ ɔ yili ninnge mun fanunfanun’n niɔn. Klɔ sran mun bɔbɔ’n ɔ yili be fanunfanun wie. Sanngɛ sran kun ti i liɛ ngunmin kun. I sɔ’n ti’n, Zoova faman e sunnzunman e wiengu mun. Ɔ nian e awlɛn’n nun yɛ ɔ si sran wafa nga e ti’n. (1 Sam. 16:7) Asa ekun’n, ɔ si ninnge nga e si be yo kpa’n, nin nga e siman be yo’n ɔ nin wafa nga be tali e’n. I sɔ’n ti’n, ɔ seman e kɛ e yo like nga e kwlɛmɛn i yo’n. Ɔ fata kɛ e nian Zoova i ajalɛ’n su. Yɛle kɛ e bu e wun kɛ nga i bɔbɔ fa bu e’n sa. Sɛ e yo sɔ’n ‘akunndan nga é bú’n, ɔ́ yó i nuan su sɛsɛ.’ Yɛle kɛ e su buman e wun sran tratraman su yɛ e su bumɛn i kɛ e nunman sran nun.​—Rɔm. 12:3.

2. ?Ngue ti yɛ ɔ fataman kɛ e fa e wun e sunnzun e wiengu mun-ɔn?

² E kwla nian e wiengu’m be ajalɛ kpa’n su. I wie yɛle kɛ sɛ aniaan kun si jasin fɛ’n i bo kpa’n, e kwla niɛn i ajalɛ’n su. (Ebr. 13:7) I sɔ’n úka e naan e kusu y’a si jasin fɛ’n i bo kpa wie. (Fp. 3:17) Sanngɛ kɛ be se kɛ be nian sran kun i ajalɛ’n su’n, ɔ nin kɛ be fa be wun be sunnzun i’n, ngbaciɛ dan kpa o be afiɛn. Sɛ e fa e wun e sunnzun e wiengu mun’n é káci aɲinblɔɛfuɛ annzɛ e sa sin búbú e annzɛ kusu e su buman e wun sran kun. Asa’n, kɛ nga e fa wunnin i like suanlɛ ng’ɔ sinnin lɛ’n nun sa’n, sɛ e fa e wun sunnzun e wiengu mun’n, ɔ cɛman naan e nin Zoova e afiɛn w’a saci. I sɔ’n ti’n, Zoova se e kɛ: “Maan sran kun bu like nga i bɔbɔ yo’n i sin nian. I liɛ’n, sɛ ɔ́ dí aklunjuɛ’n, like nga i bɔbɔ yo’n i ti yɛ ɔ́ dí aklunjuɛ-ɔ. Nán maan ɔ fa like nga sran uflɛ yo’n sunnzun i liɛ’n.”​—Gal. 6:4.

3. ?Ninnge benin wie mun yɛ a yoli be m’ɔ fata kɛ a di su aklunjɔɛ-ɔ?

 ³ Zoova kunndɛ kɛ e klun jɔ like nga e bɔbɔ e yo e mɛn i’n su. I wie yɛle kɛ sɛ be yoli ɔ batɛmun’n, ɔ fata kɛ a di su aklunjuɛ. Afin ɔ bɔbɔ yɛ a fɛli i sɔ ajalɛ’n niɔn. Klolɛ mɔ a klo Ɲanmiɛn’n ti yɛ a yoli sɔ-ɔ. Kɛ ɔ fɛ i lɛ’n wafa nga a ɔli ɔ ɲrun Ɲanmiɛn i sulɛ’n nun’n, bu i akunndan kan nian. I wie yɛle kɛ atrɛkpa’n a klo Biblu’n nun kannganlɛ’n nin i nun like suanlɛ’n kpa. Annzɛ a srɛ Ɲanmiɛn tankaan kpa tra laa’n. (Jue. 141:2) Annzɛ kusu a si jasin fɛ’n i bo kpa yɛ a si ninnge nga e fa bo jasin fɛ’n be nun junman di kpa. Sɛ a le awlobo kusu’n atrɛkpa’n Zoova fanngan nun’n, a ti bian annzɛ bla kpa annzɛ kusu a ti siɛ annzɛ niɛn kpa. Ninnge kwlaa sɔ mɔ a kwla yoli be’n ti’n, ɔ fata kɛ a di su aklunjɔɛ.

4. ?Ngue yɛ é wá kɛ́n i ndɛ like suanlɛ nga nun-ɔn?

⁴ E kwla uka e wiengu mun naan be klun w’a jɔ ninnge nga be yo be man Zoova’n be su. Kpɛkun sɛ be fa be wun be sunnzun be wiengu mun’n, e kwla uka be naan b’a yaci i sɔ yolɛ. Like suanlɛ nga nun’n, é wá kán wafa nga siɛ nin niɛn’m be kwla uka be mma mun naan b’a yo sɔ’n i ndɛ. Asa’n é wá fá e ɲin é síe i like nga be nga b’a ja bla annzɛ bian’n be kwla yo naan be wiengu kun’n w’a bu i wun sran’n i su. Kpɛkun é wá wún wafa nga asɔnun kpɛnngbɛn mun nin aniaan onga’m be kwla ukauka be wiengu naan b’a bu be wun sran’n. Asa ekun’n, é wá kán Biblu’n nun ndɛ mma wie mɔ be kwla uka e naan y’a fa e ɲin y’a sie i like nga e kwla yo’n su kpa’n, be ndɛ.

5. ?Kɛ nga Efɛzifuɛ Mun 6:4 fa kan’n sa’n, ngue yɛ ɔ fataman kɛ siɛ nin niɛn’m be yo-ɔ?

⁵ Ɔ fata kɛ siɛ nin niɛn’m be nian be wun su naan b’a faman be mma’m b’a sunnzunman be wiengu mun. Kpɛkun nán be se be kɛ be yo like nga be kwlá yoman’n. Afin sɛ be yo sɔ’n ba’m be sa sin búbú be. (An kanngan Efɛzifuɛ Mun 6:4 nun.) I sɔ sa’n juli aniaan bla kun mɔ be flɛ i kɛ Sakiko’n * i su. Ɔ seli kɛ: “Suklu lɔ’n, e like klefuɛ’m be kunndɛ kɛ n di junman n tra min wiengu suklu ba’m be kwlaa. Awlo lɔ kusu’n, min manmin waan n mian min ɲin n di junman kpa suklu lɔ. I liɛ’n, min like klefuɛ mun nin min si m’ɔ suman Zoova’n bé kán Zoova i Lalofuɛ’m be ndɛ kpa. I waan kɛ be bo e ta’n,  ɔ fata kɛ n di junman n tra min wiengu suklu ba’m be kwlaa. Kusu nn n kwlɛmɛn i sɔ’n i yo. N wieli suklu di w’a cɛ. Sanngɛ andɛ nin andɛ ɔ yo min kɛ like kwlaa nga n yo’n, ɔ jɔman Zoova i klun sa.”

6. ?Ngue yɛ ndɛ ng’ɔ o Jue Mun 131:1, 2 nun’n, ɔ kle siɛ nin niɛn mun-ɔn?

⁶ Ndɛ ng’ɔ o Jue Mun 131:1, 2 nun’n kwla uka siɛ nin niɛn’m be kpa. (An kanngan nun.) Ndɛ mma sɔ’n nun’n, Famiɛn Davidi seli kɛ ‘like ng’ɔ timɛn i wunsu liɛ’n, ɔ yoman.’ Kɛ m’ɔ wunnin i wlɛ kɛ ɔ kwlá yoman ninnge ngba’n ti’n, i wla guali ase. ?Ngue yɛ ndɛ sɔ’n kle siɛ nin niɛn mun-ɔn? I sɔ’n kle be kɛ ɔ fataman kɛ be yo ninnge nga be wunmiɛn’n juman nun’n. Kpɛkun nán be se be mma’m be kɛ be yo ninnge nga be kwlá yoman’n. Sanngɛ ɔ fata kɛ be uka be mma mun naan be wun ninnge nga be kwlɛ i yo’n nin nga be kwlá yoman’n be wlɛ. Kpɛkun be uka be naan be yo ninnge nga be kwlɛ i yo’n. I liɛ’n ba’m bé bú be wun sran. I sɔ yɛ aniaan bla kun m’ɔ suan Marina’n i manmin yoli-ɔ. Marina seli kɛ: “Min manmin w’a faman min w’a sunnzunman min niaan annzɛ min janvuɛ mun le. Ɔ seli min titi kɛ ɔ le sran kun nin i like liɛ m’ɔ si i yo-ɔ. Asa ekun’n, ɔ seli min kɛ e kwlakwla e ti cinnjin Zoova ɲrun. I sɔ m’ɔ yoli’n ti’n, n faman min wun n sunnzunman min wiengu mun.”

7-8. ?Wafa sɛ yɛ aniaan kun kwla kle kɛ ɔ bu i yi’n i sran-ɔn?

⁷ Ɔ fata kɛ aniaan nga b’a ja bla’n be bu be yi’m be sran. (1 Piɛ. 3:7) I wie yɛle kɛ ɔ fata kɛ be yo be cɛcɛ yɛ be ɲin yi be. Nán be se be kɛ be yo ninnge nga be kwlá yoman’n. Asa’n, nán be fa be sunnzun bla uflɛ. ?Sɛ be yo sɔ’n, wafa sɛ yɛ i bo’n kwla gua-ɔ? Maan e kan aniaan bla kun m’ɔ suan Roza’n i ndɛ kan. I wun’n suman Zoova yɛ ɔ ju wie’n ɔ fɛ i sunnzun bla uflɛ. Ndɛ tɛtɛ ng’ɔ kan kle aniaan bla’n ti’n, ɔ bumɛn i wun sran yɛ ɔ lafiman su kɛ sran kwla klo i. Aniaan bla’n seli kɛ: “I sɔ’n ti’n, ɔ fata kɛ n se min wun titi kɛ Zoova klo min naan ɔ bu min sran.” Aniaan nga b’a ja bla’n be timan kɛ bian ngalɛ’n sa. Be liɛ’n, be bu be yi’m be sran. Afin be si kɛ sɛ be yo sɔ’n, be yi’m be nin be trán klanman. Kpɛkun Zoova i klun jɔ́ be wun. *

⁸ Yasua ng’ɔ bu i yi’n i sran’n ɔ yi i ayɛ, ɔ yi i nglo kɛ ɔ klo i yɛ ɔ yo i mo. (Nya. 31:28) I sɔ yɛ aniaan bla Katerina mɔ e kɛnnin i ndɛ like suanlɛ ng’ɔ sinnin lɛ’n nun’n, i wun’n yo-ɔ. I wun’n ukɛli i naan w’a bu i wun sran. Katerina i bakan nun’n, i manmin kan ndɛ tɛtɛ kle i kpɛkun ɔ fɛ i sunnzun i janvuɛ mun titi. I sɔ’n ti’n, Katerina wa fɛli i wun sunnzunnin i wiengu mun. Kɛ ɔ kacili Zoova i Lalofuɛ bɔbɔ’n, w’a yacimɛn i sɔ yolɛ. Sanngɛ i wun’n ukɛli i naan w’a yaci i sɔ yolɛ. Aniaan bla’n seli kɛ: “Min wun’n klo min. Kpɛkun kɛ n di junman’n ɔ yo min mo yɛ ɔ srɛ Ɲanmiɛn man min. Asa ekun’n, ɔ fa min ɲin sie i Zoova i nzuɛn’m be su. I sɔ’n uka min naan m’an bu akunndan kpa.”

9-10. ?Wafa sɛ yɛ asɔnun kpɛnngbɛn’m be ukali aniaan bla kun naan w’a fɛmɛn i wun w’a sunnzunmɛn i wiengu mun kun-ɔn?

⁹ ?Wafa sɛ yɛ asɔnun kpɛnngbɛn’m be kwla uka be nga be fa be wun be sunnzun be wiengu mun’n niɔn? Maan e kan aniaan bla kun mɔ be flɛ i kɛ Anin’n i ndɛ. I bakan nun’n, kɛ ɔ di junman’n i si nin i nin be yomɛn i mo le. Ɔ seli kɛ: “N bakan nun’n n sa ɲan. Yɛ n fa min wun sunnzun min wiengu mun. I sɔ’n ti’n, n buli i kɛ min wiengu kanngan’m be ti kpa tra min.” Kɛ Anin kacili Zoova i sufuɛ  bɔbɔ’n, ɔ fɛli i wun sunnzunnin i wiengu mun titi. I sɔ’n ti’n, ɔ yo i kɛ ɔ yoman like kpa kun sa asɔnun’n nun. Sanngɛ kɛ é sé yɛ’n, aniaan bla’n ti atin bofuɛ yɛ ɔ di aklunjɔɛ. ?Ngue yɛ ɔ ukɛli i naan w’a kaci i ayeliɛ’n niɔn?

¹⁰ Anin seli kɛ asɔnun kpɛnngbɛn mun yɛ be ukɛli i-ɔ. Be seli i kɛ be sieli i nzɔliɛ kɛ ɔ su Zoova kpa. I sɔ’n ti’n be yoli i mo. Anin seli kɛ: “Kpɛ sunman’n, asɔnun kpɛnngbɛn’m be seli min kɛ n wla aniaan bla wie’m be fanngan. Junman sɔ’n ti’n n ma buli min wun sran. Min wla kpɛn su kɛ kɛ n yoli sɔ’n, be yoli min mo. Kpɛkun be kanngannin 1 Tesalonikifuɛ Mun 1:2, 3 nun kleli min. Like nga be yoli’n ɔ yoli min fɛ dan. Be dunman nun ti’n, kɛ n wo Zoova i anuannzɛ’n nun’n, i sɔ’n yo min fɛ.”

11. ?Kɛ nga Ezai 57:15 fa kan’n sa’n, wafa sɛ yɛ e kwla suan ‘be nga b’a fɛ’n’ be bo-ɔ?

¹¹ An kanngan Ezai 57:15 nun. Ndɛ mma sɔ’n kle kɛ Zoova suan ‘be nga b’a fɛ’n’ be bo. E kwlakwla e kwla suan aniaan nga sa o be su’n be bo. Nán asɔnun kpɛnngbɛn’m be ngunmin yɛ be kwla yo sɔ-ɔ. Sɛ e waan é yó sɔ kusu’n, ɔ fata kɛ e kle be kɛ be ndɛ lo e. Afin Zoova kunndɛ kɛ e yi i nglo kɛ e klo be. (Nya. 19:17) Asa ekun’n, nán e fa ninnge nga e si be yo’n e di e nuan. Sɛ e yo sɔ’n ɔ cɛman naan aniaan’m b’a yo aɲinblɔɛfuɛ. Sanngɛ maan e fa ninnge nga e si be yo’n e fa uka be.​—1 Piɛ. 4:10, 11.

12. ?Ngue ti yɛ be nga be leman wie’n be fali be wun be mantannin Zezi-ɔ? (An nian desɛn ng’ɔ o fluwa’n i bui’n su’n.)

¹² Sɛ e waan e nin aniaan mun é trán fɛfɛ’n, maan e nian wafa nga Zezi nin i sɔnnzɔnfuɛ’m be nantili’n i su. Zezi leman wunsu asiɛ wunmuan’n su. Ɔ nin i sɔ ngba’n ɔ ‘ti wɛtɛɛfuɛ, yɛ ɔ ti wun ase kanfuɛ.’ (Mat. 11:28-30) Zezi si ngwlɛlɛ dan yɛ ɔ si ninnge kaka. Sanngɛ w’a fa dimɛn i nuan le. Kɛ ɔ́ klé sran’m be like’n ndɛ ng’ɔ kannin be’n, be wlɛ wunlɛ timan kekle. Asa ekun’n, ɔ fali ninnge nga sran’m be si be kpa’n be su sunnzun ase. Ɔ maan ndɛ ng’ɔ kannin’n wluwluli sran’m be wun. (Lik. 10:21) Zezi timan kɛ i blɛ su Ɲanmiɛn sulɛ wafawafa’m be su kpɛnngbɛn mɔ be tu be wun’n be sa. Zezi liɛ’n, ɔ yoli maan sran’m be wunnin i wlɛ kɛ Ɲanmiɛn bu be sran. (Zan 6:37) Yɛ ɔ buli be nga sran’m be buman be wie’n, be sran.

13. ?Wafa sɛ yɛ Zezi kleli i sɔnnzɔnfuɛ’m be kɛ i klun ti ufue naan ɔ klo sran-ɔn?

¹³ Wafa nga Zezi nin i sɔnnzɔnfuɛ’m be nantili’n, ɔ kle kɛ i klun ti ufue naan ɔ klo sran. Ɔ si kɛ ɔ le sran kun nin i like liɛ m’ɔ si i yo-ɔ. Kpɛkun ɔ si kɛ be su sa’m be ti fanunfanun naan be wunmiɛn’n timan kun. I sɔ’n ti’n ɔ niɛnnin i sɔ’n su yɛ ɔ mannin be junman’n niɔn. W’a seman kɛ ɔ fata kɛ junman nga be di i jasin fɛ’n i bolɛ nun’n i kwlaa sɛ. Sanngɛ kɛ sran kun tu i klun yo i liɛ ng’ɔ kwlɛ i yo’n, i sɔ’n yo i fɛ. I sɔ’n i ɲin fite talan’n i su sunnzun ase ng’ɔ fali’n nun. Sunnzun ase sɔ’n nun’n, famiɛn’n niannin junman difuɛ’m be like nga be kwla yo’n su naan w’a man be junman. Be nɲɔn nga be dili junman kpa’n, be min’n mannin be nun kun i junman trali kunfuɛ’n. Ɔ nin i sɔ ngba’n kɛ ɔ́ yó be mo’n, ndɛ kunngba’n yɛ ɔ kannin-ɔn. Ɔ seli kɛ: “Nja mo! A ti junman difuɛ kpa, kpɛkun a ti nanwlɛfuɛ.”​—Mat. 25:14-23.

14. ?Wafa sɛ yɛ e nin e wiengu mun e nantilɛ’n nun’n e kwla yo kɛ Zezi sa-ɔ?

¹⁴ Zezi yi i klun ufue nin i sran klolɛ’n be nglo e lika wie. Ɔ si ninnge nga e kwla yo be’n nin sa nga be o e su’n. Yɛ kɛ e tu e klun e su Ɲanmiɛn’n ɔ yo i fɛ. E kusu e nin e wiengu mun e nantilɛ nun’n, maan e yo kɛ Zezi sa. Sɛ aniaan kun kwlá yoman ninnge mun kɛ aniaan onga  mun sa’n, nán maan e yo naan ɔ bu i kɛ ɔ nunman sran nun. Sanngɛ i ɲin m’ɔ mian su Zoova’n ti’n, e yo i mo.

15-16. ?Kɛ aniaan bla kun fɛli i ɲin sieli i ninnge ng’ɔ kwla yo be’n be su’n, i su ye benin yɛ ɔ ɲɛnnin i-ɔ?

¹⁵ Kɛ sran kun sunnzun kɛ ɔ́ yó ninnge wie mun mán Zoova’n, ɔ su Zoova juejue su yɛ ɔ di aklunjɔɛ. Sanngɛ ninnge nga e wunmiɛn’n ju nun’n yɛ ɔ fata kɛ e sunnzun kɛ é yó be-ɔ. Nán maan e se kɛ aniaan nga yoli sa ti’n e kusu é yó sɔ wie. Sɛ e yo sɔ’n ɔ cɛman naan e sa sin w’a bubu e. (Lik. 14:28) Maan e kan aniaan bla kun mɔ be flɛ i kɛ Midori’n i ndɛ kan.

¹⁶ I nun mɔ Midori te yo bakan’n, i baba m’ɔ suman Zoova’n se i titi kɛ i niaan mun nin i wiengu suklu ba’m be si fluwa trɛ i. Midori seli kɛ: “I sɔ’n ti’n m’an buman min wun sran kun.” Sanngɛ kɛ ɔ ɲinnin’n w’a bumɛn i sɔ akunndan liɛ’n kun. Ɔ kannin like ng’ɔ ukɛli i’n i ndɛ seli kɛ: “N kanngan Biblu’n nun cɛn kwlaa. Kɛ n yo sɔ’n n wun i wlɛ kɛ Zoova klo min.” Asa ekun’n, aniaan bla Midori fɛli i ɲin sieli i ninnge ng’ɔ kwla yo be’n be su. Yɛ ɔ srɛli Ɲanmiɛn kɛ ɔ ukɛ i naan w’a kwla yo ninnge sɔ mun. I sɔ’n ti’n ɔ di aklunjɔɛ Zoova i sulɛ’n nun.

17. (1) ?Ngue yɛ e kwla yo naan e ‘akunndan’n w’a kaci naan w’a yo uflɛ titi’ ɔ? (2) ?Sɛ e yo sɔ’n wafa sɛ yɛ i bo’n gúa-ɔ?

¹⁷ Kɛ sran kun bumɛn i wun sran’n, kɛ ɔ ko yo naan w’a yaci akunndan sɔ’n i bulɛ’n ɔ timan pɔpɔ yɛ ɔ fa blɛ. I sɔ’n ti’n, Zoova se e kɛ: “Maan amun akunndan’n kaci naan ɔ yo uflɛ titi.” (Efɛ. 4:23, 24) Kɛ ɔ ko yo naan y’a kwla yo sɔ’n, ɔ fata kɛ e suan Biblu’n nun like yɛ e bu su akunndan. Yɛ maan e srɛ Zoova kɛ ɔ uka e naan y’a kwla yo ninnge sɔ mun titi.  Sɛ e yo sɔ’n, ɔ́ fɛ́ i wawɛ’n úka e naan y’a faman e wun y’a sunnzunman e wiengu mun kun. Yɛ sɛ e su yo aɲinblɔɛfuɛ annzɛ e su tu e wun’n, ɔ́ úka e naan y’a wun i wlɛ. Kpɛkun ɔ́ úka e naan y’a kaci e sa ndɛndɛ.

18. ?Wafa sɛ yɛ ndɛ ng’ɔ o 2 Be Nyoliɛ 6:28-30 nun’n kwla wla e fanngan-ɔn?

¹⁸ An kanngan 2 Be Nyoliɛ 6:28-30 nun. Ndɛ mma sɔ’n kle kɛ Zoova si e klun akunndan’n. Asa ekun’n, ɔ si kɛ fɔ m’ɔ o e nun’n kle e yalɛ naan e mian e ɲin kpa naan y’a yoman kɛ mɛn’n nunfuɛ mun sa. Kɛ ɔ wun kɛ e mian e ɲin kpa naan y’a nanti seiin titi’n, ɔ klo e kpa tra laa’n.

19. ?Sunnzun ase benin yɛ Zoova fali naan y’a wun i wlɛ kɛ ɔ klo e-ɔ?

¹⁹ Kɛ ɔ ko yo naan y’a wun wafa nga Zoova klo e’n i wlɛ’n, ɔ fa e ɲin sie i wafa nga bla ta kun klo i wa’n i su. (Eza. 49:15) Maan e kan sa ng’ɔ tɔli niɛn kun mɔ be flɛ i kɛ Rasɛli’n su’n i ndɛ. Ɔ seli kɛ: “Min anglo w’a juman yɛ n wuli min wa Sitefanin-ɔn. Kɛ n wuli i’n, ɔ ti kaan dan yɛ ɔ leman wunmiɛn. Ɔ maan be fɛli i wlɛli i mannzin kun nun. Sanngɛ dɔɔtrɔ’m be mannin min atin kɛ n fɛ i. N yoli sɔ cɛn kwlakwla lele anglo kun. Blɛ sɔ’n nun’n, e nin min wa’n e afiɛn mantannin kpa. Dɔ nga su’n, ɔ le afuɛ nsiɛn yɛ ɔ timan kɛ i wiengu kanngan’m be sa. Sanngɛ n klo i kpa, afin min wa’n fɛli. Kɛ n wun i sa’n min klun jɔ dan.” Kɛ e tu e klun e su Zoova’n, ɔ klo e kɛ bla ta kun fa klo i wa’n sa. I sɔ’n man e aklunjɔɛ.

20. ?Ngue ti yɛ Zoova i sufuɛ’m be di aklunjɔɛ-ɔ?

²⁰ Kɛ mɔ e ti Zoova i sufuɛ’n ti’n, e ti e liɛ ngunmin kun. Sɛ Zoova yoli maan e bɛli i sulɛ’n nán kɛ e ti kpa tra e wiengu mun ti-ɔ. Sanngɛ ɔ sieli i nzɔliɛ kɛ e ti wun ase kanfuɛ naan e kunndɛ kɛ ɔ kle e like ti-ɔ. (Jue. 25:9) Ɔ maan sɛ e mian e ɲin e su i’n i klun jɔ́ e wun. Sɛ blɛ kekle nun’n e tra e awlɛn e su i titi’n, é klé kɛ “e awlɛn ti kpa.” (Lik. 8:15) I sɔ’n ti’n, maan e tu e klun e su Zoova titi. I liɛ’n é dí ‘like nga e bɔbɔ e yo’n i su aklunjɔɛ.’