1-2. (1) ?Ngbaciɛ benin yɛ ɔ o Akabu nin Manase be afiɛn-ɔn? (2) ?Kosan benin mun yɛ é wá tɛ́ be su like suanlɛ nga nun-ɔn?

MAAN e fa e ɲin e sie i famiɛn nɲɔn mɔ be trannin Izraɛli lɔ laa’n be su. Kun sieli Izraɛli nvle’n nun akpasua blu mun, yɛ kun sieli Zida nvle’n nun akpasua nɲɔn mun. Kannzɛ b’a yoman blɛ kunngba nunfuɛ’n, sanngɛ be yoli ninnge kunngba mun. Be nɲɔn’n be kacili be sin be sili Zoova yɛ be suli nvlefuɛ’m be bo naan be kaci be sin be si i wie. Asa’n, be nɲɔn’n be sɔli amuin yɛ be kunnin sran. Sanngɛ ngbaciɛ o be afiɛn. Yɛle kɛ be nun kun yoli sa tɛ lele ɔ fa wuli. Sanngɛ kun liɛ’n, i sa tɛ’n yoli i nsisɔ yɛ ɔ kacili i sa. Ɔ maan Ɲanmiɛn yacili i wun sa’n cɛli i. ?Sanngɛ wan yɛle famiɛn nɲɔn sɔ mun?

² Famiɛn sɔ’m be nun kun suan Akabu, yɛ kun’n suan Manase. Akabu yoli Izraɛli famiɛn. Yɛ Manase liɛ’n, ɔ yoli Zida famiɛn. Be su ndɛ’n kwla uka e naan y’a wun ninnge nga be kle kɛ sran kun i ayeliɛ’n yo i nsisɔ sakpa’n be wlɛ. (Yol. 17:30; Rɔm. 3:23) ?Ninnge benin mun yɛ be kle kɛ sran kun i ayeliɛ’n yo i nsisɔ-ɔ? Ɔ fata kɛ e si kosan sɔ’n i su tɛlɛ’n. Afin sɛ e yo sa tɛ naan e kleman kɛ ɔ yo e nsisɔ’n, Zoova su yaciman e wun sa’n cɛman e. Kɛ ɔ ko yo naan y’a wun kosan sɔ’n i su tɛlɛ’n, é wá fá e ɲin é síe i famiɛn nɲɔn sɔ’m be su. Kpɛkun é wá wún like nga be su ndɛ’n kle e’n. Asa’n, é wá fá e ɲin é síe ndɛ kun mɔ Zezi kannin’n su. Ndɛ sɔ’n wá úka e naan y’a wun ninnge nga sran nga i ayeliɛ’n yo i nsisɔ’n ɔ yo’n be wlɛ.

3. ?Ngue yɛ Akabu yoli-ɔ?

³ Famiɛn nga be sieli Izraɛli nvle’n nun akpasua blu mun’n, be nso su’n yɛle Akabu. Akabu jali Sidɔn famiɛn i wa bla Zezabɛli. Sidɔn nvle’n wo Izraɛli nvle’n i nglo lɔ lika’n nun,  yɛ i nunfuɛ’m be le sika. Ɔ maan kɛ Akabu jali Zezabɛli’n, Izraɛlifuɛ’m be kwla yoli ninnge wie mɔ be ɲannin nun sika kaka kpa-ɔ. Sanngɛ aja kunngba sɔ’n ti’n, be nin Zoova be afiɛn sacili tɛtɛ kpa. Yɛle kɛ Zezabɛli sɔ Baali. Ɔ maan ɔ wlɛwlɛli i wun Akabu naan ɔ yo maan nvlefuɛ’m be sɔ amuin sɔ’n wie. Amuin sɔ’n i sɔlɛ nun’n, sran’m be bo tekle yɛ be fa be mma’m be yi tɛ. Zezabɛli blɛ su’n, Ɲanmiɛn nuan ijɔfuɛ wie fi w’a wunmɛn i wun fɛ. Afin ɔ kunnin be nun sunman. (1 Fam. 18:13) Akabu liɛ’n, ‘i sa tɛ ng’ɔ yoli’n, ɔ trali be kwlaa nga be dunnin mmua i ɲrun’n be liɛ’n.’ (1 Fam. 16:30) Zoova wunnin sa tɛtɛ nga Akabu nin i yi Zezabɛli be yoli’n be kwlaa kpan. Sanngɛ ɔ sili be aunnvɔɛ. Yɛle kɛ ɔ sunmɛnnin i nuan ijɔfuɛ Eli kɛ ɔ ko se i nvlefuɛ’m be kɛ be kaci be sa naan be su i. Sanngɛ Akabu nin i yi Zezabɛli be buli be su nun waka.

4. (1) ?Ngue yɛ Ɲanmiɛn waan ɔ́ fá yó Akabu-ɔ? (2) ?Kɛ Akabu tili ndɛ sɔ’n, ngue yɛ ɔ yoli-ɔ?

⁴ I agualiɛ su’n, Zoova w’a kwlá trɛmɛn i awlɛn kun. I sɔ’n ti’n, ɔ sunmɛnnin i nuan ijɔfuɛ Eli kɛ ɔ ko kan like ng’ɔ́ fá yó Akabu nin i yi Zezabɛli’n i ndɛ kle be. Eli seli Akabu kɛ Zoova wá núnnún i awlo nunfuɛ’m be wunmuan’n. Ndɛ nga Eli kannin’n wluwluli Akabu wun dan. I sɔ’n ti’n Akabu m’ɔ tu i wun titi’n, cɛn sɔ’n nun’n “ɔ kɛnnin i wun ase” Ɲanmiɛn bo.—1 Fam. 21:19-29.

5-6. ?Ngue yɛ ɔ kle kɛ sa nga Akabu yoli’n w’a yomɛn i nsisɔ sakpa-ɔ?

⁵ Kannzɛ Akabu kɛnnin i wun ase Ɲanmiɛn bo’n, sanngɛ i sin’n like ng’ɔ yoli’n kle kɛ i ayeliɛ’n w’a yomɛn i nsisɔ sakpa. Yɛle kɛ w’a seman Izraɛlifuɛ’m be kɛ be yaci Baali sɔlɛ naan be su Zoova. I kpa bɔbɔ’n, ɔ yoli sa tɛ uflɛ.

⁶ Cɛn kun’n, Akabu seli Zozafati m’ɔ ti Zida famiɛn’n kɛ be bo yo kun naan be fa alɛ be ko wla Sirifuɛ’m be sin. Kɛ ɔ yoli sɔ’n, Zozafati seli i kɛ be ko usa Ɲanmiɛn nuan ijɔfuɛ kun i sa ka. Sanngɛ Akabu w’a kplinman su. Ɔ seli kɛ: ‘Ɲanmiɛn nuan ijɔfuɛ kun te o lɛ, sanngɛ i wun yoman min fɛ, afin min wun ndɛ liɛ ng’ɔ kan kle min’n, wie fi timan kpa.’ Sanngɛ i sin’n, ɔ wa kplinnin su. Ɔ maan ɔ sunmannin sran kɛ be ko se Ɲanmiɛn nuan ijɔfuɛ Mise kɛ ɔ bla. Kɛ Mise bali’n, sakpasakpa ndɛ ng’ɔ kan kleli Akabu’n, w’a yoman ndɛ fɛ. Kɛ Akabu kaci i sa naan ɔ kpata Ɲanmiɛn’n, w’a yoman sɔ. Famiɛn klunwifuɛ sɔ’n seli i sonja’m be kɛ be tra Mise naan be wlɛ i bisua. (1 Fam. 22:7-9, 23, 27) Kannzɛ ɔ wlali Mise bisua’n, sanngɛ ndɛ nga Mise kannin’n kpɛnnin su. Yɛle kɛ kɛ be ɔli alɛ kunlɛ’n, Akabu wuli.—1 Fam. 22:34-38.

7. ?Akabu i su ndɛ benin yɛ Zoova kannin-ɔn?

⁷ Akabu wuli, sanngɛ Zozafati liɛ’n like fi w’a yomɛn i. Ɔ maan ɔ sɛli i sin i awlo. Kɛ ɔ juli lɔ’n, Zoova sinnin i nuan ijɔfuɛ Zei i lika kannin wafa ng’ɔ bu Akabu’n i ndɛ kleli i. Ɲanmiɛn nuan ijɔfuɛ sɔ’n seli i kɛ: “?Ɔ yo sɛ ti yɛ a ɔli klunwifuɛ nga i ukalɛ-ɔ? ?A klo be nga be kpɔ Anannganman’n?” (2 Nyo. 19:1, 2) ?Sɛ ɔ ti kɛ Akabu i sa tɛ’n yoli i nsisɔ sakpa’n, nn Ɲanmiɛn nuan ijɔfuɛ Zei kɛ́n i ndɛ kɛ nga sa? Ɔ si’ɛ. I sɔ’n kle kɛ kannzɛ blɛ wie nun’n Akabu yoli kɛ i ayeliɛ’n yo i nsisɔ sa’n, sanngɛ w’a yomɛn i nsisɔ sakpa.

8. ?Ngue yɛ Akabu i su ndɛ’n kle e-ɔ?

⁸ ?Ngue yɛ Akabu i su ndɛ’n kle e-ɔ? Kɛ Akabu tili like nga Zoova waan ɔ́ fá yó i awlo nunfuɛ mun’n, ɔ kɛnnin i wun ase i bo. Like kpa yɛ ɔ yoli i lɛ-ɔ. Sanngɛ i sin’n like ng’ɔ yoli’n kle kɛ i ayeliɛ’n w’a yomɛn i nsisɔ sakpa. Ndɛ sɔ’n kle kɛ sɛ e yo sa tɛ wie naan e yo e wun kɛ ɔ yo e nsisɔ’n, i sɔ’n ngunmin kleman kɛ ɔ yo e nsisɔ sakpa. ?Sɛ ɔ ti sɔ’n niɔn, ngue yɛ ɔ kle kɛ sran kun i ayeliɛ’n yo i nsisɔ sakpa-ɔ? Maan e fa e ɲin e sie i sran uflɛ su naan e wun kosan sɔ’n i su tɛlɛ’n.

9. ?Sa tɛtɛ benin wie mun yɛ Manase yoli-ɔ?

⁹ Kɛ Akabu wuli m’ɔ dili afuɛ kɔe ya nɲɔn’n, Manase kacili Zida famiɛn. Kɔlɛ’n, i sa tɛ liɛ ng’ɔ yoli’n trali Akabu liɛ’n. Afin Biblu’n se kɛ: “Ɔ yoli sa sunman bɔ Anannganman kloman be’n, ɔ fa be fɔkɔli i awlɛn.” (2 Nyo. 33:1-9) Manase kplannin amuin sɔwlɛ mun. I kpa bɔbɔ’n, ɔ sɛli waka kun fa yoli amuin kpɛkun ɔ fa ko sieli i Zoova bɔbɔ i sua’n nun. Atrɛkpa’n, ba wulɛ amuin kun yɛ ɔ yoli-ɔ. Asa’n, Manase yili atrɛ wie mun, ɔ yili wunnzue, yɛ ɔ dili bae. Biblu’n se kɛ: ‘Sran nga b’a yoman sa m’ɔ kunnin be’n, be sɔnnin kpa.’ I wie yɛle kɛ ‘ɔ fɛli i bɔbɔ i klun ba fa yili tɛ’ mɛnnin i amuin mun.—2 Fam. 21:6, 7, 10, 11, 16.

10. (1) ?Wafa sɛ yɛ Zoova tuli Manase i fɔ-ɔ? (2) ?Kɛ Zoova tuli i fɔ’n, ngue yɛ ɔ yoli-ɔ?

¹⁰ Kɛ Akabu sa’n, kɛ Zoova i nuan ijɔfuɛ’m be mannin Manase i afɔtuɛ’n, ɔ buli i su nun waka. Ɔ maan i agualiɛ su’n ‘Zoova yoli maan Asiri famiɛn’n i sonja’m be su kpɛnngbɛn’m be wa tɔli [Zidafuɛ’m] be su. Be trali Manase, be fali nga wie mun wlɛli i aoje’n nun, kpɛkun be cili i klɛnnɛnklɛnnɛn nin aaba mɔ be yoli i tianmantianman kɛ ɲanman sa’n, naan b’a fɛ i b’a ɔ Babilɔnin.’ Kɛ be wlali Manase bisua Babilɔnin lɔ’n, kɔlɛ’n ɔ tran buli ninnge ng’ɔ yoli be’n be akunndan kpa. Ɔ maan ɔ “kɛnnin i wun ase i nannan’m be Nyanmiɛn’n nyrun.” I kpa bɔbɔ’n, ‘ɔ srɛli Zoova kɛ ɔ si i aunnvɔɛ.’ Ɔ srɛli sɔ kpɛ sunman. I sɔ’n kle kɛ famiɛn klunwifuɛ sɔ’n i akunndan’n su kaci. Siɛn’n ɔ wun i wlɛ kɛ Zoova yɛ ɔ ti ‘Ɲanmiɛn’n niɔn.’—2 Nyo. 33:10-13.

11. ?Kɛ nga 2 Be Nyoliɛ 33:15, 16 fa kan’n sa’n, ngue yɛ Manase yoli fa kleli kɛ i sa tɛ’n yoli i nsisɔ sakpa-ɔ?

¹¹ Ndɛ nga Manase kɛnnin i srɛlɛ nun’n ti’n, Zoova wunnin i wlɛ kɛ w’a kaci i sa. I sɔ’n ti’n, Zoova yacili i wun sa’n cɛli i kpɛkun ɔ yoli maan ɔ sɛli i sin yoli famiɛn ekun. Kɛ ɔ fɛ i lɛ’n, Manase wlɛli i wun ase yoli ninnge wie mun fa kleli kɛ i sa tɛ’n yo i nsisɔ sakpa. I wie yɛle kɛ ɔ kacili i nzuɛn’n mlɔnmlɔn. Asa’n, ɔ bubuli nvle’n nun amuin sɔwlɛ mun yɛ w’a kplinman su kɛ sran’m be sɔ amuin kun. I kpa bɔbɔ’n, ɔ wlali nvlefuɛ’m be fanngan kɛ be su Zoova. (An kanngan 2 Be Nyoliɛ 33:15, 16 nun.) Sɛ ɔ ti kɛ Manase w’a yoman yakpafuɛ’n yɛ w’a lafiman Ɲanmiɛn su kpa’n, nn w’a kwlá yoman ninnge sɔ mun. Afin kwlaa naan w’a kaci i sa’n, w’a klemɛn i osufuɛ mun nin i awlo lɔ sran dandan mun ɔ nin nvlefuɛ onga’m be ajalɛ kpa. Yɛ kannzɛ w’a yo kpɛnngbɛn’n, sanngɛ ɔ kunndɛ kɛ ɔ́ yó sa kpa naan ɔ́ fá káta sa tɛtɛ ng’ɔ yoli be’n be su. Atrɛkpa’n, sa kpakpa ng’ɔ yoli be’n be ti yɛ i anunman Zoziasi kwla suli Zoova kpa-ɔ.—2 Fam. 22:1, 2.

12. ?Ngue yɛ Manase i su ndɛ’n kle e-ɔ?

¹² ?Ngue yɛ Manase i su ndɛ’n kle e-ɔ? Kɛ Manase wunnin i wlɛ kɛ ɔ yoli sa tɛ’n,  ɔ kɛnnin i wun ase Ɲanmiɛn bo. Sanngɛ w’a kaman ngalɛ’n su. Ɔ srɛli Ɲanmiɛn yɛ ɔ seli i kɛ ɔ si i aunnvɔɛ. Asa ekun’n, ɔ kacili i nzuɛn’n kpɛkun ɔ miɛnnin i ɲin yoli sa kpa. I wie yɛle kɛ ɔ suli Zoova yɛ ɔ wlali nvlefuɛ’m be fanngan kɛ be su i wie. Manase i su ndɛ’n kwla uka be nga be yoli sa tɛtɛ kpanngban’n be kpa. Afin ɔ kle kɛ e Ɲanmiɛn Zoova ‘ti kpa naan ɔ yaci sran wun sa cɛ i.’ (Jue. 86:5) Sanngɛ be nga be ayeliɛ’n yo be nsisɔ sakpa’n be ngunmin cɛ yɛ ɔ yaci be wun sa’n cɛ be-ɔ.

13. An fa sunnzun ase kun be yiyi wafa nga sran kun kwla kle kɛ sa ng’ɔ yoli’n yo i nsisɔ’n i nun.

¹³ Kɛ Manase wunnin i wlɛ kɛ sa ng’ɔ yoli’n ti tɛ’n, i sɔ’n yoli i ya. Sanngɛ nɛ́n i ngba-ɔ. Ɔ yoli ninnge uflɛ wie mun fa kleli kɛ i ayeliɛ’n yo i nsisɔ sakpa. I sɔ’n kle e like cinnjin kpa kun. Yɛle kɛ sɛ e yo sa tɛ naan ɔ yo e ya’n, ɔ ti kpa. Sanngɛ ɔ fata kɛ e yo ninnge uflɛ wie mun e fa kle kɛ sa tɛ sɔ mɔ e yoli’n yo e nsisɔ sakpa. Maan e fa sa kun e yiyi nun: Wienun-ɔn, w’a ɔ plakali tolɛ. Kpɛkun sran ng’ɔ yo plakali atɛ’n man wɔ agba mɔnnɛn kun. Kpɛkun ɔ se wɔ kɛ agba mɔnnɛn yɛ be fa yo plakali’n niɔn. ?Ɔ́ yó ɔ fɛ? E si kɛ ɔ su yoman ɔ fɛ mlɔnmlɔn. Afin kannzɛ bɔbɔ agba yɛ be fa tɔn plakali’n, sanngɛ ɔ fata kɛ be di i wun junman ka naan w’a kaci plakali. I kunngba’n yɛle sran ng’ɔ yo sa tɛ’n i liɛ’n. Sɛ sa tɛ ng’ɔ yoli’n yo i ya’n, ɔ ti kpa. Afin i sɔ’n kle kɛ ɔ kunndɛ kɛ ɔ́ káci i sa. Sanngɛ Zoova kunndɛ kɛ ɔ yo like uflɛ fa uka su. Like sɔ’n i ɲin fite sunnzun ase kun mɔ Zezi fali’n i nun.

14. ?Sunnzun ase nga Zezi fali’n nun’n, ngue yɛ ɔ kle kɛ ba wanzofuɛ’n kunndɛli kɛ ɔ́ káci i sa-ɔ?

¹⁴ Cɛn kun’n, Zezi kannin ba kun m’ɔ yoli i aja like’n i wanzo’n i ndɛ. Ndɛ sɔ’n wo Liki 15:11-32 nun. Gbanflɛn sɔ’n yoli ɲin kekle i si su, kpɛkun ɔ tuli awlo’n nun ɔli “mɛn wie nun mmuammua kpa.” Kɛ ɔ juli lɔ’n, ɔ yoli sa sukusuku kpanngban yɛ ɔ sacili i sika’n. Ɔ maan lika’n wa yoli kekle kpa i su. Kɛ ɔ yoli sɔ’n, ɔ wa tran buli akunndan kpa. Ɔ wa wunnin i wlɛ kɛ i nun m’ɔ o i si i awlo lɔ’n, ɔ di aklunjɔɛ tra siɛn liɛ’n. Ɔ maan ɔ fali ajalɛ kɛ ɔ́ sɛ́ i sin awlo naan ɔ́ kó kpɛ́tɛ i si. Kɛ ba sɔ’n wunnin i wlɛ kɛ w’a faman ajalɛ kpa’n, i lɛ nun’n ɔ wunnin like cinnjin kpa kun wlɛ. Sanngɛ ɔ fataman kɛ ɔ ka ngalɛ’n su. Ɔ fata kɛ ɔ yo ninnge uflɛ wie mun fa yi i nglo kɛ i ayeliɛ’n yo i nsisɔ sakpa.

15. ?Wafa sɛ yɛ ba wanzofuɛ’n kleli kɛ sa ng’ɔ yoli’n yo i nsisɔ sakpa-ɔ?

¹⁵ Ba wanzofuɛ’n yoli ninnge wie mun fa kleli kɛ i ayeliɛ’n yo i nsisɔ sakpa. I wie yɛle kɛ kannzɛ bɔbɔ lika ng’ɔ wo’n nin be awlo’n be afiɛn ti nun dan’n, sanngɛ ɔ sɛli i sin awlo. Asa’n, kɛ ɔ juli awlo lɔ’n, ɔ seli i si kɛ: “N fɔnnin Ɲanmiɛn m’ɔ o nglo lɔ’n i wun, yɛ n fɔnnin ɔ wun wie. Kɛ be se kɛ n ti ɔ wa’n, min nin i sɔ’n fataman kun.” (Lik. 15:21) Ndɛ ng’ɔ kannin’n kle kɛ ɔ kunndɛ kɛ ɔ nin Zoova be afiɛn sɛ kpa ekun. Asa’n, ɔ wunnin i wlɛ kɛ ɔ fɔnnin i si i wun naan ɔ yoli i tɛ. Ɔ maan ɔ kunndɛli kɛ ɔ́ yó like kwlaa ng’ɔ kwla yo  naan i si i klun w’a jɔ i wun ekun’n. Sɛ ɔ fata kɛ ɔ di junman kekle kɛ i si i sa nun junman difuɛ onga mun sa bɔbɔ’n, ɔ́ yó. (Lik. 15:19) Nán ngbɛn ti yɛ Zezi fali sunnzun ase sɔ’n niɔn. Sunnzun ase sɔ’n kwla uka asɔnun kpɛnngbɛn’m be kpa. Yɛle kɛ ɔ kwla uka be naan b’a wun i wlɛ sɛ aniaan kun i sa tɛ’n yo i nsisɔ sakpa-o.

16. ?Ngue ti yɛ kɛ ɔ ko yo naan asɔnun kpɛnngbɛn’m b’a wun i wlɛ kɛ aniaan kun i sa tɛ’n yo i nsisɔ sakpa’n, ɔ timan pɔpɔ-ɔ?

¹⁶ Kɛ ɔ ko yo naan asɔnun kpɛnngbɛn’m b’a wun i wlɛ kɛ aniaan kun i sa tɛ’n yo i nsisɔ sakpa’n, ɔ timan pɔpɔ. Afin be kwlá wunman like ng’ɔ o sran kun i awlɛn nun’n. I sɔ’n ti’n, be mian be ɲin kpa naan b’a kwla wun i wlɛ sɛ like nga aniaan sɔ’n yoli’n ɔ yo i nsisɔ sakpa-o. Aniaan kun kwla yo sa tɛ dan kun. Kpɛkun ɔ yo ninnge wie mun fa kle kɛ ɔ yo i nsisɔ. Sanngɛ kɛ ɔ ko yo naan asɔnun kpɛnngbɛn’m b’a lafi i su’n ɔ kwla yo kekle kan.

17. (1) ?Sa benin yɛ ɔ kle kɛ sɛ sran kun se kɛ i ayeliɛ’n yo i nsisɔ’n, i sɔ ngunmin kleman kɛ ɔ yo i nsisɔ sakpa-ɔ? (2) ?Kɛ nga 2 Korɛntifuɛ Mun 7:11 fa kan’n sa’n, ngue yɛ ɔ kle kɛ sran kun i ayeliɛ’n yo i nsisɔ sakpa-ɔ?

¹⁷ Maan e fa e ɲin e sie i sa kun su e nian. Wienun-ɔn, aniaan bian kun fia kunndɛ bla i yi bo afuɛ kpanngban kpa. Ɔ maan i yi nin i janvuɛ mun nin asɔnun kpɛnngbɛn’m be siman sɔ. Kpɛkun kasiɛn su’n, asɔnun kpɛnngbɛn’m b’a ti nun. Be ko wun i wun yɛ be se i kɛ be si kɛ ɔ fia kunndɛ bla i yi bo. Ɔ maan ɔ di i sa tɛ’n i nanwlɛ kle be. Kpɛkun ɔ yo kɛ sa sɔ’n yo i ya sa. ?Sanngɛ i sɔ’n kle kɛ ɔ yo i nsisɔ sakpa? Kannzɛ bɔbɔ ɔ se kɛ i ayeliɛ’n yo i nsisɔ’n, sanngɛ asɔnun kpɛnngbɛn’m be su jranman ngalɛ’n su ngunmin be seman kɛ ɔ yo i nsisɔ sakpa. Afin w’a yoman sa tɛ sɔ’n kpɛ kunngba. Ɔ yoli sɔ kpɛ sunman yɛ ɔ yoli sɔ afuɛ kpanngban. Asa ekun’n, nɛ́n i bɔbɔ yɛ ɔ ko kan kleli be-ɔ. Sran uflɛ-ɔ. Ɔ maan ɔ fata kɛ asɔnun kpɛnngbɛn’m be bo be ɲin ase be nian ndɛ’n nun kpa naan b’a wun i wlɛ sɛ w’a kaci i akunndan’n nin i nzuɛn’n sakpa-o. (An kanngan 2 Korɛntifuɛ Mun 7:11 nun.) Kɛ ɔ yo naan aniaan sɔ’n w’a kle kɛ w’a kaci i sa sakpa’n, ɔ́ fá blɛ. Ɔ maan kpɛ sunman’n be tu i asɔnun’n nun. Yɛ ɔ́ cɛ́ kan ka naan w’a sɛ i sin.—1 Kor. 5:11-13; 6:9, 10.

18. (1) ?Sɛ be tuli sran kun asɔnun’n nun’n, ngue yɛ ɔ fata kɛ ɔ yo naan w’a kle kɛ sa ng’ɔ yoli’n yo i nsisɔ sakpa-ɔ? (2) ?Sɛ ɔ yo i kwlaa sɔ’n, wafa sɛ yɛ i bo’n gúa-ɔ?

¹⁸ Sɛ be tuli sran kun asɔnun’n nun naan ɔ kunndɛ kɛ ɔ́ klé kɛ sa ng’ɔ yoli’n yo i nsisɔ sakpa’n, maan ɔ tran aɲia’m be kwlaa be bo. Kpɛkun maan ɔ nanti afɔtuɛ nga asɔnun kpɛnngbɛn’m be mɛn i’n su. Yɛle kɛ ɔ srɛ Ɲanmiɛn yɛ ɔ suan Biblu’n nun like titi. Asa ekun’n, maan ɔ miɛn i ɲin naan w’a tɔman sa tɛ kunngba’n nun ekun. Sɛ ɔ miɛn i ɲin naan ɔ nin Zoova be afiɛn mantan kpa ekun’n, ɔ kwla lafi su kɛ Zoova wá yáci i wun sa’n cɛ́ i.  Kpɛkun asɔnun kpɛnngbɛn’m bé úkɛ i naan w’a sɛ i sin asɔnun’n nun ekun. Kɛ asɔnun kpɛnngbɛn’m bé dí sran ng’ɔ yoli sa tɛ’n i jɔlɛ’n, ɔ fata kɛ be nian sa ng’ɔ yoli’n su naan b’a kan ndɛ. Ɔ fataman kɛ be fɛ i su sa’n be fa sunnzun sran uflɛ liɛ. Asa ekun’n, nán maan be kpli be di i jɔlɛ.

19. ?Sɛ sran kun yo sa tɛ naan ɔ kunndɛ kɛ ɔ́ klé kɛ sa ng’ɔ yoli’n yo i nsisɔ sakpa’n, ngue yɛ ɔ fata kɛ ɔ yo-ɔ? (Ezekiɛl 33:14-16)

¹⁹ E wunnin i kɛ sɛ sran kun yo sa tɛ naan ɔ kɛn i nuan nun kɛ ɔ yo i nsisɔ’n, i sɔ’n ngunmin kleman kɛ ɔ yo i nsisɔ sakpa. Ɔ fata kɛ ɔ yo ninnge trele wie mun fa yi i nglo kɛ ɔ yo i nsisɔ. I wie yɛle kɛ ɔ fata kɛ ɔ wlɛ i ayeliɛ tɛ’n i ase yɛ ɔ nanti Zoova i mmla’m be su. (An kanngan Ezekiɛl 33:14-16 nun.) Yɛ ng’ɔ ti cinnjin kpa’n yɛle kɛ ɔ yo like kwlaa ng’ɔ kwla yo naan ɔ nin Zoova be afiɛn w’a mantan kpa ekun’n.

20-21. ?Wafa sɛ yɛ e kwla uka sa tɛ yofuɛ kun-ɔn?

²⁰ Zezi kannin ninnge nga ti yɛ ɔ bali asiɛ’n su wa’n, be nun kun i ndɛ seli kɛ: “N bali kɛ ń má sé sa tɛ yofuɛ’m be kɛ be kaci be akunndan’n.” (Lik. 5:32) Ɔ fata kɛ e kusu e uka sa tɛ yofuɛ mun naan be kaci be akunndan’n wie. ?Wafa sɛ yɛ e kwla yo sɔ-ɔ? Wienun-ɔn, a tili i kɛ ɔ janvuɛ kpa kun yoli sa tɛ dan kun. ?I lɛ nun’n, ngue yɛ ɔ fata kɛ a yo-ɔ?

²¹ A kwla se kɛ á fíɛ i sa tɛ’n su. Sanngɛ sɛ a yo sɔ’n, á yó ɔ janvuɛ sɔ’n i tɛ. Asa’n, kannzɛ bɔbɔ a fia su lele’n sanngɛ cɛn kun’n ɔ́ tɛ́ nglo. Afin Zoova si nun. (Nya. 5:21, 22; 28:13) Sɛ a kunndɛ kɛ á úka ɔ janvuɛ’n sakpa’n, ɔ fata kɛ a se i kɛ ɔ ko wun asɔnun kpɛnngbɛn’m be wun naan be ukɛ i. Sɛ i waan ɔ kplinman su’n, ɔ bɔbɔ ko wun asɔnun kpɛnngbɛn’m be wun. Sɛ a yo sɔ’n, á klé kɛ a klo ɔ janvuɛ’n naan a kunndɛ kɛ á úkɛ i. Afin sɛ w’a yoman sɔ’n, ɔ nin Zoova be afiɛn sáci.

22. ?Ngue yɛ é wá kɛ́n i ndɛ like suanlɛ nga i sin liɛ’n nun-ɔn?

²² Ɔ ju wie’n, sran kun yo sa tɛ dan kun afuɛ kpanngban. Ɔ maan asɔnun kpɛnngbɛn’m be fa ajalɛ kɛ bé tú i. ?Sɛ be tu i sakpa’n, é sé kɛ b’a simɛn i aunnvɔɛ? Like suanlɛ nga i sin liɛ’n nun’n, é wá wún i kɛ kɛ be tu sa tɛ yofuɛ kun asɔnun’n nun’n, i sɔ’n kle kɛ Zoova si e aunnvɔɛ. Kpɛkun é wá kán wafa nga e kwla si sran aunnvɔɛ kɛ Zoova sa’n i ndɛ wie.