1. (1) ?Ngue yɛ sran ng’ɔ si sran aunnvɔɛ’n ɔ yo-ɔ? (2) ?Sran aunnvɔɛ silɛ’n i su sunnzun ase benin yɛ Zezi fali-ɔ?

SRAN ng’ɔ si sran aunnvɔɛ’n, i klun ti ufue yɛ ɔ yo i wiengu’m be ye. Asa’n, kɛ ɔ wun kɛ sran kun su fɛ’n ɔ ukɛ i. I sɔ’n i ɲin fite Samari bian’n i su sunnzun ase nga Zezi fali’n nun. Sunnzun ase sɔ’n nun’n, Zifu bian kun ko tɔli awiefuɛ’m be nun. Awiefuɛ’m be boli i lele ɔ́ wá lé wú. Kɛ Samari bian kun sín lɛ m’ɔ wunnin i’n, “ɔ yoli i annvɔ” naan w’a niɛn i lika. (Lik. 10:29-37) Sunnzun ase sɔ’n yi e Ɲanmiɛn’n i nzuɛn cinnjin kpa kun nglo: yɛle i sran aunnvɔɛ silɛ’n. Like nga ti yɛ Ɲanmiɛn si e aunnvɔɛ’n yɛle kɛ ɔ klo e. Asa’n, aliɛ ba kwlaa nun’n ɔ yo ninnge sunman fa kle kɛ ɔ si e aunnvɔɛ.

2. ?Like uflɛ benin yɛ sran ng’ɔ si sran aunnvɔɛ’n ɔ yo-ɔ?

² Sran ng’ɔ si sran aunnvɔɛ’n ɔ yo like kun ekun. Yɛle kɛ sɛ sran kun yo sa tɛ naan ɔ fata kɛ be tu i fɔ’n, ɔ kwla yaci sran sɔ’n i wun sa’n cɛ i. I sɔ yɛ Zoova yo i e lika-ɔ. Jue tofuɛ kun kɛnnin i sɔ liɛ’n i ndɛ seli kɛ: “Ɔ nianman e sa tɛ’m be su yoman e sa.” (Jue. 103:10) Sanngɛ ɔ ju wie’n, Zoova tu sran ng’ɔ yo sa tɛ’n i fɔ kekle kpa.

3. ?Kosan benin mun yɛ é wá tɛ́ be su like suanlɛ nga nun-ɔn?

³ Like suanlɛ nga nun’n, é wá tɛ́ kosan nga’m be su: ?Ngue ti yɛ Zoova si sran aunnvɔɛ-ɔ? ?Sɛ be tu sran kun i fɔ kekle kpa’n, e kwla se kɛ be sili i aunnvɔɛ? ?Ngue yɛ ɔ kwla uka e naan y’a si e wiengu’m be aunnvɔɛ-ɔ? Maan e nian wafa nga Ɲanmiɛn Ndɛ’n tɛ kosan sɔ’m be su’n.

4. ?Ngue ti yɛ Zoova si e aunnvɔɛ-ɔ?

⁴ Zoova klo sran aunnvɔɛ silɛ. Akoto Pɔlu seli kɛ Ɲanmiɛn “si aunnvɔɛ dan.” Like nga ti yɛ Pɔlu waan Ɲanmiɛn si aunnvɔɛ dan’n, yɛle kɛ ɔ kpali klɔ sran mɔ fɔ o be nun’n be nun wie mun kɛ be ko tran ɲanmiɛn su lɔ. (Efɛ. 2:4-7)  Sanngɛ nán sran sɔ’m be ngunmin yɛ Zoova si be aunnvɔɛ-ɔ. Jue tofuɛ Davidi seli kɛ: “Anannganman ti kpa man sran’m be kwlakwla. Ɔ klo ninnge b’ɔ yili be’n be ngba.” (Jue. 145:9) Kɛ mɔ Zoova klo sran aunnvɔɛ silɛ ti’n, sɛ ɔ wun i kɛ sran kun nin aunnvɔɛ silɛ fata’n, ɔ sisimɛn i bo naan w’a si i aunnvɔɛ.

5. ?Ngue yɛ ɔ ukali Zezi naan w’a si kɛ Zoova klo sran aunnvɔɛ silɛ-ɔ?

⁵ Zezi si kɛ Zoova klo sran aunnvɔɛ silɛ kpa. Afin kwlaa naan w’a ba asiɛ’n su’n, ɔ nin i Si be trannin ɲanmiɛn su lɔ afuɛ akpi kpanngban kpa. (Nya. 8:30, 31) Ɔ wunnin i kɛ i Si yacili sran wie’m be wun sa’n cɛli be kpɛ sunman. (Jue. 78:37-42) Ɔ maan kɛ ɔ bali asiɛ’n su wa’n, ɔ kɛnnin i Si i nzuɛn sɔ’n i ndɛ kleli sran mun kpɛ kaka.

6. ?Sunnzun ase benin yɛ Zezi fali fa kleli kɛ i Si klo sran aunnvɔɛ silɛ-ɔ?

⁶ Like suanlɛ ng’ɔ sinnin lɛ nun’n, e kannin ba wanzofuɛ’n i su sunnzun ase nga Zezi fali’n i ndɛ. Zezi fali sunnzun ase sɔ’n naan e wun i wlɛ kɛ Zoova klo sran aunnvɔɛ silɛ kpa. Sunnzun ase sɔ’n nun’n, ba kun jasoli i si i wun, yɛ ɔ tuli awlo’n nun. Kɛ ɔ ɔli’n, ‘ɔ ko dili mɛn sukusuku, yɛ ɔ yoli i ninnge’m be wanzo.’ (Lik. 15:13) Sanngɛ i sin’n, i ayeliɛ’n yoli i nsisɔ naan w’a kaci i sa. Kpɛkun kasiɛn su’n ɔ sɛli i sin awlo. ?Kɛ ɔ bali’n, ngue yɛ i si yoli-ɔ? Zezi seli kɛ: “Kɛ ɔ́ bá mmua lɔ’n, i si wunnin i. Ɔ yoli i annvɔ naan w’a wanndi w’a ko tɔ i nun.” Ɔ maan i si w’a guɛmɛn i ɲin ase. Sanngɛ ɔ sili i aunnvɔɛ yɛ ɔ yacili i wun sa’n cɛli i. Ba sɔ’n yoli sa tɛ dan. Sanngɛ kɛ mɔ i sa tɛ’n yoli i nsisɔ m’ɔ kacili i sa’n ti’n, i si yacili i wun sa’n cɛli i. Sunnzun ase sɔ’n nun’n, siɛ’n yɛle Zoova. Zezi fali sunnzun ase sɔ’n fa kleli kɛ Zoova kunndɛ kɛ ɔ́ yáci be nga be sa tɛ’n yo be nsisɔ’n be wun sa’n cɛ́ be.—Lik. 15:17-24.

7. ?Ngue ti yɛ e kwla se kɛ kɛ mɔ Zoova si sran aunnvɔɛ’n ti’n ɔ si ngwlɛlɛ dan-ɔn?

⁷ Zoova si e aunnvɔɛ afin ɔ si ngwlɛlɛ dan. Biblu’n waan ‘ngwlɛlɛ m’ɔ fin ɲanmiɛn su’n, sɛ ɔ ti sran’n, nn é sé kɛ ɔ si aunnvɔɛ dan, yɛ ɔ yo sa kpakpa mun.’ (Zak. 3:17) Kɛ siɛ kpa kun sa’n, Zoova si i mma’m be aunnvɔɛ. Afin ɔ si kɛ kɛ ɔ yo sɔ’n, be ɲan su ye. (Jue. 103:13; Eza. 49:15) Kɛ mɔ Ɲanmiɛn si e aunnvɔɛ’n ti’n, ɔ yacili e tɛ mun cɛli e. Ɔ maan e wla o like kpa kun su. Asa’n, blɛ kwlaa ng’ɔ wun i kɛ i sran kun nin aunnvɔɛ silɛ fata’n, ɔ sisimɛn i bo naan w’a si i aunnvɔɛ. Sanngɛ sɛ ɔ wun i kɛ sran sɔ’n nin aunnvɔɛ silɛ fataman’n ɔ simɛn i aunnvɔɛ. I sɔ’n kle kɛ ɔ si ngwlɛlɛ dan.

8. (1) ?Ngue yɛ be fa yo be nga be yo sa tɛ mɔ be kaciman be sa’n niɔn? (2) ?Ngue ti-ɔ?

 ⁸ Wienun-ɔn, Zoova i sufuɛ kun yo sa tɛ kpɛkun ɔ kunndɛman kɛ ɔ́ káci i sa. ?Wafa sɛ yɛ ɔ fata kɛ e nin i sɔ sran liɛ’n e nanti-ɔ? Ɲanmiɛn maan akoto Pɔlu seli kɛ: “Nán amun nin i san nun kun.” (1 Kor. 5:11) Be nga be yo sa tɛ mɔ be kunndɛman kɛ bé káci be sa’n, be tu be asɔnun’n nun. Be yo sɔ naan be nzuɛn tɛ’n w’a saman aniaan onga mun. Asa ekun’n, be yo sɔ naan Zoova i dunman’n w’a saciman. Sanngɛ sran wie’m be kwla se kɛ kɛ be tu sran kun asɔnun’n nun’n, i sɔ’n timɛn i aunnvɔɛ silɛ. ?Be ndɛ sɔ’n ti su? Maan e fa e ɲin e sie i ndɛ sɔ’n su kpa e nian.

9-10. ?Kɛ nga Ebre Mun 12:5, 6 fa kan’n sa’n, ngue ti yɛ e kwla se kɛ kɛ be tu sran kun asɔnun’n nun’n, i sɔ’n yo i wun sa ye-ɔ? An fa sa kun yiyi nun.

⁹ Sɛ e kɔ aɲia bo naan be se kɛ e awlɛn su sran kun “timan Zoova i Lalofuɛ kun’n,” i sɔ’n kwla bo e wla dan. Kpɛkun e kwla se e wun kɛ asɔnun kpɛnngbɛn’m b’a simɛn i aunnvɔɛ. ?Sɛ be tuli sran kun asɔnun’n nun’n, i sɔ’n kle kɛ b’a simɛn i aunnvɔɛ? Cɛcɛ, nɛ́n i sɔ-ɔ. ?Ngue ti yɛ e se sɔ-ɔ? Like nga ti yɛ e se sɔ’n yɛle kɛ sɛ sran kun yo sa tɛ naan be tumɛn i fɔ’n, i sɔ’n timan ngwlɛlɛ ayeliɛ. Kpɛkun i sɔ’n kle kɛ e kloman sran sɔ’n. (Nya. 13:24) Asa ekun’n, kɛ be tu sran kun asɔnun’n nun’n, i sɔ’n kwla ukɛ i naan w’a kaci i sa. Kɛ aniaan kpanngban be yoli sa tɛ mɔ be tuli be asɔnun’n nun’n, be wa tran buli akunndan. Ɔ maan be wunnin i wlɛ kɛ like nga be yoli’n ti tɛ dan. I sɔ’n ti’n, be kacili be sa yɛ be sali be sin Zoova wun.—An kanngan Ebre Mun 12:5, 6 nun.

¹⁰ Maan e fa sa kun e yiyi ndɛ sɔ’n nun kpa ekun. Wienun-ɔn, bua tafuɛ kun sie i nzɔliɛ kɛ tukpacɛ wie kle i bua kun i yalɛ. Kɛ ɔ ko yo naan w’a yo i ayre’n, ɔ fata kɛ ɔ yi i bua onga’m be afiɛn naan ɔ sie i ngunmin. Kusu e si kɛ bua’m be ti nnɛn mɔ kɛ be ngunmin be o’n, be wun kpajaman be. ?Sanngɛ sɛ bua tafuɛ’n fa bua sɔ’n sie i ngunmin’n, é sé kɛ i klun yo wi? Cɛcɛ. Afin i ayre yolɛ ti yɛ ɔ sie i ngunmin-ɔn. Asa ekun’n, sɛ w’a yoman sɔ’n tukpacɛ’n sá bua onga mun. Ɔ maan kɛ ɔ fa bua’n sie i ngunmin’n, i sɔ’n sasa bua onga mun.—An nian Saun Yolɛ 13:3, 4 nun.

11. (1) ?Ngue ti yɛ e kwla fa sran kun mɔ b’a tu i asɔnun’n nun’n e sunnzun bua kun m’ɔ kpinndinman’n niɔn? (2) ?Ngue yɛ sran nga be tuli i asɔnun’n nun’n ɔ kwla yo-ɔ? (3) ?Wafa sɛ yɛ asɔnun kpɛnngbɛn’m be kwla ukɛ i-ɔ?

¹¹ E kwla fa sran kun mɔ be tuli i asɔnun’n nun’n, e sunnzun bua sɔ m’ɔ kpinndinman’n. Afin Zoova ɲrun’n, sran sɔ’n kpinndinman. (Zak. 5:14) Kɛ tukpacɛ yo sran kun’n, ɔ kwla sɛ i wiengu mun. I wafa kunngba’n, sran ng’ɔ yoli sa tɛ’n i nzuɛn tɛ’n kwla sa aniaan onga mun. I sɔ’n ti’n, ɔ fata kɛ be sie i ngunmin. Yɛle kɛ be tu i asɔnun’n nun. Ajalɛ sɔ mɔ Zoova fali’n kle kɛ ɔ klo i sufuɛ nga be te su i kpa’n. Asa’n, i sɔ’n kwla uka sa tɛ yofuɛ’n naan w’a kaci i sa. Kɛ be tu sran kun asɔnun’n nun’n, sran sɔ’n kwla tran aɲia’m be bo. Ndɛ nga be kɛn i aɲia’m be bo’n, ɔ kwla ukɛ i naan ɔ nin Ɲanmiɛn be afiɛn w’a sɛ ekun. Asa’n, ɔ kwla fa e fluwa mun naan w’a kanngan be nun annzɛ w’a suan be nun like. Kpɛkun ɔ kwla nian JW Televiziɔn^® wie. Asa kusu’n, asɔnun kpɛnngbɛn’m bé mɛ́n i afɔtuɛ cɛn kunngun. I sɔ’n úkɛ i naan ɔ nin Zoova be afiɛn w’a mantan kpa ekun naan w’a yo Zoova i Lalofuɛ ekun. *

12. ?Wafa sɛ yɛ asɔnun kpɛnngbɛn’m be kle kɛ sa tɛ yofuɛ’n i ndɛ lo be-ɔ?

¹² Nán e wla fi su kɛ be nga be yo sa tɛ mɔ be kunndɛman kɛ bé káci be sa’n,  be ngunmin yɛ be tu be asɔnun’n nun-ɔn. Asɔnun kpɛnngbɛn’m be si kɛ ndɛ sɔ’n timan aɔwi ndɛ. Ɔ maan kwlaa naan b’a fɛ i sɔ ajalɛ’n, be bu i sin kpa. Asa ekun’n, be si kɛ Zoova kunndɛ kɛ ‘be nian sa nga sran kun yoli’n su be tu i fɔ.’ (Zer. 30:11) Be klo aniaan mun, yɛ be kunndɛman kɛ bé yó naan be nun kun nin Zoova be afiɛn saci. Sanngɛ ɔ ju wie’n, be lemɛn i yowlɛ. Kɛ ɔ ko yo naan b’a kle kɛ be klo aniaan mun naan be ndɛ lo be’n, ɔ fata kɛ be tu sa tɛ yofuɛ’n asɔnun’n nun.

13. ?Ngue ti yɛ Pɔlu seli kɛ be tu Korɛnti lɔ aniaan kun asɔnun’n nun-ɔn?

¹³ Maan e fa e ɲin e sie i wafa nga Pɔlu siesieli ndɛ kun m’ɔ tɔli Korɛnti lɔ asɔnun’n nun’n i su. Yasua kun nin i si i yi’n be si sua, yɛ ɔ kunndɛman kɛ ɔ́ káci i ayeliɛ’n. Nanwlɛ, i sɔ’n ti tete like dan. Kusu nn Zoova seli Izraɛlifuɛ’m be kɛ: “Sɛ sran kun kunndɛ i si i yi’m be nun kun’n, ɔ ti i si’n i sokpalɛ. Ɔ fata kɛ be kun be nɲɔn’n mɔ be yoli sa’n.” (Sau. 20:11) I yo, Pɔlu w’a seman kɛ be kun Klisifuɛ sɔ’n. Sanngɛ ɔ seli kɛ be tu i asɔnun’n nun. Afin i ayeliɛ sɔ’n wa ɲannin ta aniaan onga’m be su. Yɛle kɛ be nun wie’m b’a bumɛn i kun kɛ i ayeliɛ’n ti tɛ.—1 Kor. 5:1, 2, 13.

14. (1) ?Ngue yɛ ɔ kle kɛ Pɔlu sili Korɛnti lɔ aniaan sɔ’n i aunnvɔɛ-ɔ? (2) ?Ngue ti yɛ ɔ yoli sɔ-ɔ? (2 Korɛntifuɛ Mun 2:5-8, 11)

¹⁴ Kɛ i osu lali nun kan’n, Pɔlu tili i kɛ Klisifuɛ sɔ’n w’a kaci i sa. Kannzɛ bɔbɔ i dunman nun’n aniaan’m be dunman sacili’n, sanngɛ Pɔlu seli asɔnun kpɛnngbɛn’m be kɛ nán be yo be ɲrun wiwi i wun. Sanngɛ maan be ‘yaci i wun sa’n cɛ i klun ufue su, yɛ be yo maan i wla gua ase.’ ?Ngue ti yɛ Pɔlu seli be sɔ-ɔ? I bɔbɔ tɛli su kɛ: “Kɛ ɔ ko yo naan i wla w’a bomɛn i wun w’a tratraman su’n ti.” Nanwlɛ, Pɔlu sili Klisifuɛ sɔ’n i aunnvɔɛ dan. Afin ɔ wunnin i wlɛ kɛ ɔ kunndɛ kɛ be yaci i wun sa’n be cɛ i. Ɔ maan sɛ b’a yoman sɔ’n, ɔ cɛman naan i sa sin w’a bubu i.—An kanngan 2 Korɛntifuɛ Mun 2:5-8, 11 nun.

15. ?Wafa sɛ yɛ asɔnun kpɛnngbɛn’m be kwla kle kɛ be si sran aunnvɔɛ naan be kunngba’n be sisiman be bo naan b’a tu sa tɛ yofuɛ kun i fɔ-ɔ?

¹⁵ Asɔnun kpɛnngbɛn’m be klo sran aunnvɔɛ silɛ kɛ Zoova sa. Sanngɛ sɛ sran kun yo sa tɛ naan ɔ fata kɛ be tu i fɔ kekle kpa’n, be sisiman be bo naan b’a yo sɔ. I sɔ yolɛ nun’n, sɛ be wun kɛ be kwla si i aunnvɔɛ’n, be si i aunnvɔɛ. Sɛ sran kun yo sa tɛ naan be tumɛn i fɔ’n, i sɔ’n timɛn i aunnvɔɛ silɛ. Ɔ ti kɛ be su wlɛ i fanngan kɛ  ɔ yo sa tɛ titi sa. Sanngɛ nán asɔnun kpɛnngbɛn’m be ngunmin yɛ ɔ fata kɛ be si be wiengu’m be aunnvɔɛ-ɔ.

16. ?Kɛ nga Nyanndra Mun 21:13 fa kan’n sa’n, wafa sɛ yɛ Zoova bu be nga be siman sran aunnvɔɛ’n niɔn?

¹⁶ Ɔ fata kɛ e kwlakwla e si e wiengu’m be aunnvɔɛ kɛ Zoova sa. ?Ngue ti-ɔ? Afin sɛ e siman e wiengu’m be aunnvɔɛ’n, Zoova kusu su tieman e srɛlɛ mun. (An kanngan Nyanndra Mun 21:13 nun.) E nun wie fi kunndɛman kɛ Zoova yo sɔ i lika. I sɔ’n ti’n, maan e si e wiengu’m be aunnvɔɛ. I wie yɛle kɛ sɛ sa wie o aniaan kun su naan ɔ kɛn i ndɛ kle e’n, nán e bu e su nun waka. Sanngɛ maan e sie e su i nuan bo kpa. Asa ekun’n, nán e wla fi ndɛ nga su: “Sran ng’ɔ siman sran aunnvuɛ’n, kɛ bé wá dí i jɔlɛ’n, be su simɛn i aunnvuɛ wie.” (Zak. 2:13) Kɛ mɔ e kunndɛ kɛ e wiengu’m be si e aunnvɔɛ’n ti’n, maan e kusu e si be aunnvɔɛ wie. I li kɛ aniaan kun yo sa tɛ m’ɔ kaci i sa m’ɔ sɛ i sin asɔnun’n nun’n, yɛ ɔ fata kɛ e si i aunnvɔɛ kpa’n niɔn.

17. ?Wafa sɛ yɛ Davidi kleli kɛ ɔ si sran aunnvɔɛ-ɔ?

¹⁷ Be nga Biblu’n kan be ndɛ’n, be su ndɛ’n kwla uka e naan y’a si e wiengu’m be aunnvɔɛ. Be nun kun yɛle Famiɛn Davidi. Saili kunndɛli kɛ ɔ́ kún i. Sanngɛ i liɛ’n, w’a kunndɛman le kɛ ɔ́ kún i annzɛ ɔ́ tú i klunngbɔ. I lɛ nun’n, Davidi kleli kɛ ɔ si sran aunnvɔɛ.—1 Sam. 24:9-12, 18, 19.

18-19. ?Sa nɲɔn benin nun yɛ Davidi w’a siman sran aunnvɔɛ-ɔ?

¹⁸ Sanngɛ nán blɛ kwlaa nun yɛ Davidi sili sran aunnvɔɛ-ɔ. I wie yɛle kɛ cɛn kun’n, ɔ srɛli Nabali i aliɛ. Sanngɛ klunwifuɛ sɔ’n w’a kplinman su. I kpa bɔbɔ’n ɔ kannin ndɛ tɛtɛ kleli i. Kɛ ɔ yoli sɔ’n, Davidi fali ya dan kpa. Ɔ maan ɔ fali ajalɛ kɛ ɔ́ kún Nabali nin i awlo nunfuɛ’m be kwlaa. Ɲanmiɛn sa, Nabali i yi Abigaili m’ɔ ti klun ufuefuɛ’n, ɔ fali aliɛ kpanngban ko mannin Davidi nin i sran mun. I sɔ’n ti’n, Davidi w’a kunman Nabali nin i awlofuɛ mun kun.—1 Sam. 25:9-22, 32-35.

¹⁹ Blɛ uflɛ nun’n, Ɲanmiɛn nuan ijɔfuɛ Natan ko toli Davidi. Kpɛkun ɔ seli i kɛ aɲanbeunfuɛ kun ko deli bua tafuɛ yalɛfuɛ kun i bua kunngba cenje’n i sa nun. Kɛ Davidi tili ndɛ sɔ’n, ɔ fali ya dan kpa naan w’a se kɛ: “N kan Nyanmiɛn, sran ng’ɔ yoli i sɔ sa’n, ɔ nin wie wulɛ yɛ ɔ fata-ɔ.” (2 Sam. 12:1-6) Davidi si Moizi Mmla’n i kpa. Mmla’n se kɛ sɛ sran kun wua sran kun i bua’n, ɔ fata kɛ ɔ fa bua nnan sie ng’ɔ wuali’n i osu. (Tul. 21:37) Sanngɛ Davidi liɛ’n i waan be kun sran sɔ’n bɔbɔ. Nanwlɛ, Davidi w’a siman aɲanbeunfuɛ’n i aunnvɔɛ kaan sa. Kannzu Davidi ndɛ yɛ Natan su kan-ɔn. Natan fali sunnzun ase sɔ’n naan ɔ wun i wlɛ kɛ sa ng’ɔ yoli be’n be ti tɛ tra aɲanbeunfuɛ’n i liɛ’n leleele. Ɔ nin i sɔ ngba’n, Zoova yacili i wun sa’n cɛli i. Sanngɛ i liɛ’n w’a siman aɲanbeunfuɛ’n i aunnvɔɛ. I lɛ nun’n, Zoova kleli kɛ ɔ si sran aunnvɔɛ tra Davidi.—2 Sam. 12:7-13.

20. ?Ngue yɛ Davidi i su ndɛ’n kle e-ɔ?

²⁰ E sieli i nzɔliɛ kɛ kɛ mɔ Davidi fali ya’n, i ti yɛ ɔ fali ajalɛ kɛ ɔ́ kún Nabali nin i awlo nunfuɛ’m be kwlaa’n niɔn. Asa ekun’n, kɛ Natan kannin aɲanbeunfuɛ’n i ndɛ kleli i’n,  be ja nun lɛ’n ɔ seli kɛ be kun aɲanbeunfuɛ’n. Kusu e si kɛ Davidi i klun ti ufue. Ɔ maan e kwla usa e wun kɛ: ?Yɛ nn ngue ti yɛ w’a sisimɛn i bo naan w’a se kɛ be kun aɲanbeunfuɛ’n niɔn? Ɔ fin sa ng’ɔ o Davidi bɔbɔ i su’n. Blɛ sɔ’n nun’n, nn w’a yo sa tɛ dan. Ɔ maan i akunndan’n bu i fɔ sa trilili. Davidi i su ndɛ’n kle e like cinnjin kpa kun. Yɛle kɛ kɛ sran kun kpli di sran’m be jɔlɛ kekle’n, i sɔ’n kle kɛ ɔ nin Zoova be afiɛn mantanman kpa. I sɔ’n ti’n, Zezi wlɛli i sɔnnzɔnfuɛ’m be su nun kpa kɛ: “Amun yaci amun wiengu’m be jɔlɛ dilɛ naan b’a diman amun jɔlɛ. Afin wafa nga amun di sran jɔlɛ’n, i su yɛ bé nían bé dí amun jɔlɛ-ɔ.” (Mat. 7:1, 2) I sɔ’n ti’n, maan e mian e ɲin naan y’a diman e wiengu’m be jɔlɛ. Sanngɛ maan e ‘si be aunnvɔɛ’ kɛ e Ɲanmiɛn fa yo’n sa.

21-22. ?Ninnge trele benin wie mun yɛ e kwla yo fa kle kɛ e si sran’m be aunnvɔɛ-ɔ?

²¹ Sran ng’ɔ si sran aunnvɔɛ’n, kɛ ɔ wun kɛ sran kun su fɛ’n, sran sɔ’n yomɛn i annvɔ ngbɛn. Sanngɛ ɔ yo ninnge wie mun fa uka sran sɔ’n. I sɔ’n ti’n, maan e kwlakwla e fa e ɲin e sie i e awlofuɛ mun nin e mantanfuɛ mun nin aniaan’m be su. I liɛ’n, sɛ be nun kun i sa w’a mian’n é kwlá úkɛ i. Nanwlɛ, e kwla yo like kaka fa kle kɛ e si e wiengu’m be aunnvɔɛ. I wie yɛle kɛ sɛ e wiengu kun i wla bo i wun’n, maan e fɔnvɔ i. Asa’n, sɛ é nían naan e kwla tɔn aliɛ kan e ko man aniaan kun annzɛ e yo like uflɛ e mɛn i’n, maan e yo. Sɛ kusu be tu aniaan kun asɔnun’n nun naan ɔ sɛ i sin’n, maan e fa e wun e mɛntɛn i yɛ e wlɛ i fanngan. Asa ekun’n, ninnge nga e kwla yo e fa kle kɛ e si sran’m be aunnvɔɛ’n, be nun cinnjin kpa kun yɛle jasin fɛ’n i bolɛ.—Zɔb 29:12, 13; Rɔm. 10:14, 15; Zak. 1:27.

²² Sɛ e fa e ɲin e sie i e wiengu’m be su’n, é sí ninnge nga e kwla yo fa kle be kɛ be ndɛ lo e’n. Sɛ e yo sɔ’n, e Si m’ɔ o ɲanmiɛn su lɔ m’ɔ ‘si aunnvɔɛ dan’n’ i klun jɔ́ e wun.