1. ?Kwlaa naan sran kun w’a bo sua kplanlɛ bo’n, ngue yɛ ɔ fata kɛ ɔ yo-ɔ?

WIENUN-ƆN, sran kun waan ɔ́ kplán sua kun. Yɛ ɔ si sua wafa ng’ɔ kunndɛ kɛ ɔ́ kplán’n. ?I sɔ’n ti’n, ɔ́ ká lɛ kɔ́ gua bo kó tótó sua kplanlɛ ninnge mun naan ɔ́ bó sua’n i kplanlɛ bo? Ɔ si’ɛ! Afin ɔ fata kɛ ɔ dun mmua bu sika ng’ɔ́ fá kplán sua’n i akunndan ka. Sɛ ɔ yo sɔ’n, ɔ́ wún i wlɛ sɛ sika ng’ɔ le i’n ɔ́ jú sua’n i kplanlɛ-o.

2. ?Kɛ nga Liki 14:27-30 fa kan’n sa’n, ngue yɛ ɔ fata kɛ a bu i akunndan ka naan b’a yo ɔ batɛmun-ɔn?

² ?Atrɛkpa’n, kɛ mɔ a klo Zoova mɔ a kunndɛ kɛ á sí like ng’ɔ yo mannin e’n i su ye’n ti’n, a bu batɛmun yolɛ’n i akunndan? Sɛ ɔ ti sɔ sakpa’n, a ti kɛ sran ng’ɔ kunndɛ kɛ ɔ́ kplán sua’n sa. ?Ngue ti yɛ e se sɔ-ɔ? Maan e fa e ɲin e sie i ndɛ nga Zezi kannin m’ɔ o Liki 14:27-30 nun’n su. (An kanngan nun.) Ndɛ mma sɔ’m be nun’n, Zezi kannin like ng’ɔ fata kɛ i sɔnnzɔnfuɛ kun yo’n i ndɛ. Yɛle kɛ sɛ e kunndɛ kɛ é káci Zezi i sɔnnzɔnfuɛ’n, ɔ fata kɛ e jran sa wie’m be ɲrun kekle yɛ e kpɔci ninnge wie mun. (Lik. 9:23-26; 12:51-53) Ɔ maan, kwlaa naan b’a yo ɔ batɛmun’n ɔ fata kɛ a bu ninnge ng’ɔ fata kɛ Zezi i sɔnnzɔnfuɛ kun yo’n be akunndan kpa. I liɛ’n, sɛ be yo ɔ batɛmun’n á kwlá sú Ɲanmiɛn kpa titi.

3. ?Ngue yɛ é wá kɛ́n i ndɛ like suanlɛ nga nun-ɔn?

³ ?Ɔ ti cinnjin kɛ be yo sran kun i batɛmun? Ɛɛn. Ɔ ti cinnjin kpa. Afin kɛ be yo sran kun i batɛmun’n, Ɲanmiɛn yrɛ i su dan dɔ nga su. Kpɛkun cɛn wie lele’n ɔ́ yrɛ́ i su ekun. Siɛn’n, maan e fa e ɲin e sie i batɛmun yolɛ’n i su kosan wie’m be su. Kosan sɔ’m bé yó maan á kwlá tɛ́ kosan nga su: “?M’an ju batɛmun yolɛ?”

4. (1) ?Ngue yɛle be wun Ɲanmiɛn fa manlɛ’n? (2) ?Kɛ nga Matie 16:24 fa kan’n sa’n, kɛ be se kɛ sran kun “klɛn i wun” man Ɲanmiɛn’n i bo’n yɛle benin?

⁴ ?Ngue yɛle be wun Ɲanmiɛn fa manlɛ’n? Kwlaa naan b’a yo ɔ batɛmun’n, ɔ fata kɛ a fa ɔ wun man Ɲanmiɛn. Kɛ sran kun fɛ i wun man Ɲanmiɛn’n, ɔ srɛ Ɲanmiɛn kɛ ɔ́ tú i klun yó i klun sa lele ɔ́ fá wú. Asa ekun’n, “ɔ klɛn i wun” mɛn i. (An kanngan Matie 16:24 nun.) Kɛ ɔ ko yo sɔ’n, sran sɔ’n kaci Zoova liɛ mlɔnmlɔn. I sɔ’n ti i cenjele like kusu. (Rɔm. 14:8) Asa ekun’n, sran sɔ’n se Zoova kɛ, kɛ ɔ fɛ i cɛn sɔ’n nun’n, i sulɛ’n yó i cinnjin trɛ́ i bɔbɔ i klun sa yolɛ’n. Ɔ maan kɛ sran kun fɛ i wun man Ɲanmiɛn’n nn w’a ta nda. Kusu Zoova mianman sran kun kɛ ɔ tɛ i nda. Sanngɛ sɛ sran kun tɛ i nda’n, ɔ kunndɛ kɛ ɔ yiɛ i nuan.​—Jue. 116:12, 14.

5. ?Ngue ti yɛ e kwla se kɛ be wun Ɲanmiɛn fa manlɛ’n nin batɛmun yolɛ’n be kɔ likawlɛ-ɔ?

⁵ ?Ngue ti yɛ e kwla se kɛ be wun Ɲanmiɛn fa manlɛ’n nin batɛmun yolɛ’n be kɔ likawlɛ-ɔ? Be wun Ɲanmiɛn fa manlɛ’n ti nvialiɛ nun like. Ɔ ti sran kun nin Ɲanmiɛn be afiɛn ndɛ. Sanngɛ batɛmun yolɛ’n ti nzra nun like. Titi’n akpasua kun aɲia nin nvle kun aɲia’m be bo yɛ be yo sran’m be batɛmun-ɔn. Kɛ be yo sran kun i batɛmun’n, i sɔ’n kle kɛ w’a dun mmua w’a fɛ i wun w’a man Zoova. * Ɔ maan sran sɔ’n yi i nglo sran’m be kwlaa be ɲrun kɛ ɔ klo Zoova nin i awlɛn’n kwlaa, ɔ nin i nguan’n kwlaa, ɔ nin i akunndan’n kwlaa, ɔ nin i wunmiɛn’n kwlaa. Yɛ ɔ kunndɛ kɛ ɔ́ sú i tititi.​—Mar. 12:30.

6-7. ?Kɛ nga 1 Piɛli 3:18-22 fa kan’n sa’n, ngue ti yɛ batɛmun yolɛ’n ti cinnjin-ɔn?

⁶ ?Batɛmun yolɛ’n ti cinnjin sakpa? Maan e fa e ɲin e sie i ndɛ ng’ɔ o 1 Piɛli 3:18-22 nun’n su. (An kanngan nun.) Mmeli nga Nowe boboli’n kle weiin kɛ ɔ lafi Ɲanmiɛn su. Batɛmun yolɛ’n kusu yɛ ɔ kle kɛ sran’n w’a fɛ i wun w’a man Zoova-ɔ. ?Sanngɛ batɛmun yolɛ’n ti cinnjin sakpa? Ɛɛn, ɔ ti cinnjin. Piɛli kannin sa nga ti yɛ batɛmun yolɛ’n ti cinnjin’n i ndɛ. I klikli’n yɛle kɛ ɔ “de” sran. Sɛ e kle kɛ e lafi Zezi su, yɛ e lafi su kɛ ɔ yili e ti tɛ, yɛ e lafi su kɛ Ɲanmiɛn cɛnnin i naan dɔ nga su’n, ɔ o ‘Ɲanmiɛn i sa fama su’n,’ batɛmun’n dé e.

⁷ I nɲɔn su’n, yɛle kɛ batɛmun yolɛ’n yo maan ‘e akunndan’n buman e fɔ.’ Kɛ e fa e wun man Ɲanmiɛn mɔ be yo e batɛmun’n, i sɔ’n yo maan wafa nga e nin Ɲanmiɛn e nanti siɛn’n ɔ ti i liɛ ngunmin kun. Afin e wlali sa tɛ yolɛ i ase yɛ e lafi e ti kpɔlɛ tɛ’n su. Ɔ maan Ɲanmiɛn yaci e sa tɛ mun cɛ e. I sɔ’n ti’n, e akunndan’n buman e fɔ.

8. ?Ngue su yɛ ɔ fata kɛ ajalɛ mɔ á fɛ́ i kɛ be yo wɔ batɛmun’n ɔ taka-ɔ?

⁸ ?Ngue su yɛ ɔ fata kɛ ajalɛ mɔ á fɛ́ i kɛ be yo ɔ batɛmun’n ɔ taka-ɔ? Kɛ mɔ a suannin Biblu’n nun like’n ti’n, a sili Zoova i nzuɛn’n, ɔ nin wafa ng’ɔ yo ninnge mun’n. Zoova i su like nga a sili i’n ɔ wluwluli ɔ wun dan. I sɔ’n ti’n a kloli i trali laa’n. Yɛ i klolɛ’n su yɛ ɔ fata kɛ ajalɛ mɔ á fɛ́ i kɛ be yo ɔ batɛmun’n ɔ taka-ɔ.

9. Zezi seli kɛ e yo sran’m be batɛmun Siɛ’n nin Ba’n nin Ɲanmiɛn i wawɛ’n be dunman nun. ?Ngue yɛ ndɛ sɔ’n kle e-ɔ?

⁹ Sa nga ti yɛ a kwla fa ajalɛ kɛ be yo ɔ _batɛmun’n, i wie yɛle kɛ a lafi Biblu’n nun like nga a suannin’n su. Kɛ Zezi sé i sɔnnzɔnfuɛ’m be kɛ be yo naan sran’m be kaci i sɔnnzɔnfuɛ’n, ndɛ ng’ɔ kannin’n, maan e fa e ɲin e sie su. (An kanngan  Matie 28:19, 20 nun.) Zezi seli kɛ ɔ fata kɛ be yo sran’m be batɛmun “Siɛ’n nin Ba’n nin Ɲanmiɛn i wawɛ’n be dunman nun.” ?Ngue yɛ ndɛ sɔ’n kle e-ɔ? Ndɛ sɔ’n kle kɛ ɔ fata kɛ a lafi ndɛ nanwlɛ nga Biblu’n kɛn i Zoova nin i Wa Zezi yɛ Ɲanmiɛn wawɛ’n be su’n, i su tankaan kpa. Afin ndɛ sɔ’m be ti cinnjin kpa yɛ be kwla yo maan a kaci ɔ nzuɛn’n. (Ebr. 4:12) Maan e fa e ɲin e sie i ndɛ sɔ’m be su.

10-11. ?E Si Ɲanmiɛn i su ndɛ nanwlɛ benin wie mun yɛ a sili be kpɛkun a lafili be su-ɔ?

¹⁰ Bu blɛ mɔ a sili e Si Ɲanmiɛn i su ndɛ nanwlɛ wie mun’n i akunndan kan nian. I wie yɛle kɛ a sili kɛ i dunman’n yɛle Zoova naan ‘like fi nunmɛn i sin asiɛ wunmuan’n su’ yɛ ‘i kunngba yɛ ɔ ti asiɛ’n kwlaa su Ɲanmiɛn’n niɔn.’ (Rɔm. 10:13; Eza. 37:16) Ɔ ti e Yifuɛ yɛ delɛ’n fin i. (Jue. 3:9; 36:10) Ɔ fali ajalɛ wie mun naan e ɲan e ti sa tɛ’n nin wie’n be sa nun naan e ɲan nguan m’ɔ leman awieliɛ’n. (Zan 17:3) Kɛ a fa ɔ wun man Ɲanmiɛn mɔ be yo ɔ batɛmun’n a kaci Zoova i Lalofuɛ’m be nun kun. (Eza. 43:10-12) Sran sɔ’m be ti kɛ awlobo kun nunfuɛ mun sa. Yɛ kɛ Zoova i dunman’n wo be su’n, ɔ yo be fɛ kpa. Kpɛkun be kan Zoova i ndɛ be kle sran mun.​—Jue. 86:12.

¹¹ Nanwlɛ, kɛ e wun like nga Biblu’n kle e, e Si Ɲanmiɛn su’n i wlɛ’n, i sɔ’n ti e cenjele like dan. Kɛ a lafi su kɛ ndɛ sɔ’m be ti nanwlɛ’n, a kunndɛ kɛ á fá ɔ wun mán Zoova naan be yo ɔ batɛmun.

12-13. ?Ɲanmiɛn i Wa’n i su ndɛ nanwlɛ benin wie mun yɛ a sili be kpɛkun a lafili be su-ɔ?

¹² Kɛ a sili Ɲanmiɛn i Wa’n i su ndɛ nanwlɛ’n, bu wafa ng’ɔ wun yoli wɔ’n i akunndan kan nian. I wie yɛle kɛ a wunnin i wlɛ kɛ Zezi ti sran cinnjin kpa kun. Afin sɛ Zoova nunman lɛ’n, i yɛ ɔ o lɛ-ɔ. Kpɛkun i klun klo su’n, ɔ fɛli i wun yili e ti tɛ. Kɛ e yi i nglo kɛ e lafi e ti tɛ sɔ’n su’n, Zoova yaci e sa tɛ mun cɛ e. Kpɛkun e nin i e kwla tra janvuɛ yɛ e kwla ɲan nguan m’ɔ leman awieliɛ’n. (Zan 3:16) Zezi ti Ɲanmiɛn ɲrun jranfuɛ dan. Yɛ ɔ kunndɛ kɛ ɔ́ úka e naan e ɲan e ti tɛ m’ɔ fɛli i wun yili’n i su ye naan e nin Ɲanmiɛn e afiɛn mantan. (Ebr. 4:15; 7:24, 25) Zezi m’ɔ ti Ɲanmiɛn i Famiɛn diwlɛ’n i su famiɛn’n ɔ́ wá yó maan Zoova i dunman’n yó sanwun, yɛ ɔ́ núnnún klunwifuɛ mun. Kpɛkun ɔ́ yrá sran’m be su mɛn klanman’n nun. (Mat. 6:9, 10; Ngl. 11:15) Asa ekun’n, Zezi ti e ajalɛ klefuɛ. (1 Piɛ. 2:21) Yɛle kɛ ɔ miɛnnin i ɲin yoli Ɲanmiɛn klun sa blɛ kwlaa nun. I sɔ’n ti ajalɛ klanman m’ɔ fata kɛ e nanti su-ɔ.​—Zan 4:34.

¹³ Kɛ a lafi ndɛ nga Biblu’n kɛn i Ɲanmiɛn i Wa Zezi su’n, i su’n a kloli Zezi kpa. Ɔ maan kɛ Zezi sa’n, a kunndɛ kɛ á yó Ɲanmiɛn i klun sa. I sɔ’n ti’n, a kunndɛ kɛ á fá ɔ wun mán Zoova naan be yo ɔ batɛmun.

14-15. ?Ɲanmiɛn wawɛ’n i su ndɛ nanwlɛ benin wie mun yɛ a sili be kpɛkun a lafili be su-ɔ?

¹⁴ Kɛ a sili Ɲanmiɛn i wawɛ’n i su ndɛ nanwlɛ’n, bu wafa nga i sɔ’n yoli wɔ’n i akunndan kan nian. I wie yɛle kɛ a wunnin i wlɛ kɛ ɔ timan sran. Sanngɛ ɔ ti wunmiɛn mɔ Ɲanmiɛn fa yo ninnge mun’n. Zoova fɛli i wawɛ sɔ’n mannin be nga be klɛli Biblu’n. Kpɛkun wawɛ sɔ’n uka e y’a wun Biblu’n nun ndɛ’n i wlɛ naan y’a nanti su wie. (Zan 14:26; 2 Piɛ. 1:21) Zoova fɛ i wawɛ’n man e ‘wunmiɛn m’ɔ tra klɔ sran liɛ’n.’ (2 Kor. 4:7) Zoova i wawɛ’n ti’n e kwla bo jasin fɛ’n, yɛ e yaci sa tɛtɛ’m be yolɛ. Kpɛkun kɛ e sa sin bubu e’n annzɛ kɛ sa’m be tɔ e su’n, i wawɛ sɔ’n ti’n e kwla jran kekle. Asa ekun’n, ɔ kwla uka e naan y’a yi nzuɛn wie’m be nglo. (Gal. 5:22)  Asa’n, Zoova fɛ i wawɛ’n man be nga be lafi i su mɔ be srɛ i’n.​—Lik. 11:13.

¹⁵ Nanwlɛ, kɛ Zoova i sufuɛ’m be si kɛ be kwla lafi su kɛ ɔ́ fɛ́ i wawɛ’n mán be naan b’a kwla su i titi’n, i sɔ’n yo be fɛ dan. Kɛ a lafi su kɛ ndɛ nga Biblu’n kɛn i Ɲanmiɛn wawɛ’n su’n ɔ ti nanwlɛ’n, i sɔ’n yo maan a kunndɛ kɛ á fá ɔ wun mán Ɲanmiɛn naan be yo ɔ batɛmun.

16. ?Kɛ e boli like suanlɛ bo lele m’ɔ́ fá jú yɛ’n, ngue like yɛ e wunnin i-ɔ?

¹⁶ Ajalɛ nga a fɛli i kɛ á fá ɔ wun mán Ɲanmiɛn naan be yo ɔ batɛmun’n ɔ ti cinnjin kpa. Kɛ nga e fa wunnin i sa’n, a si kɛ kɛ a fa ajalɛ sɔ’n, ɔ fata kɛ a yaci ninnge wie’m be yolɛ, yɛ a jran sa wie’m be ɲrun kekle. Sanngɛ wafa nga Ɲanmiɛn wá yrá ɔ su’n, i dan trá ninnge nga a yacili be’n. I wie yɛle kɛ batɛmun yolɛ’n kwla de wɔ yɛ ɔ yo maan Ɲanmiɛn ɲrun’n, ɔ akunndan’n buman ɔ fɔ. Like nga ti yɛ a fɛ i sɔ ajalɛ’n, yɛle kɛ a klo Zoova. Yɛ ɔ fata kɛ a lafi e Si Ɲanmiɛn nin i Wa’n yɛ i wawɛ’n be su ndɛ nanwlɛ nga a si be’n, be su tankaan kpa. ?Kɛ a bu ninnge fanunfanun nga e kannin be ndɛ’n be akunndan’n, wafa sɛ yɛ á tɛ́ kosan nga su-ɔ? “?M’an ju batɛmun yolɛ?”

17. ?Kwlaa naan b’a yo sran kun i batɛmun’n, ngue yɛ ɔ fata kɛ ɔ yo-ɔ?

¹⁷ Sɛ a bu i kɛ w’a ju batɛmun yolɛ’n, nn atrɛkpa’n w’a fa ajalɛ wie mun naan a nin Zoova amun afiɛn mantan kpa. * I wie yɛle kɛ Biblu’n nun like suanlɛ’n ti’n, a sili Zoova nin Zezi be su like kpanngban. Ɔ maan a lafi Ɲanmiɛn su kpa siɛn’n. (Ebr. 11:6) Asa ekun’n, a lafi nda nga Zoova tali be’n be su kpa. Kpɛkun a lafi su kɛ Zezi i tɛ’n ti’n e kwla ɲan e ti sa tɛ’n nin wie’n be sa nun. Asa’n, a wlali sa tɛ yolɛ’n i ase. Yɛ a srɛ Zoova kɛ ɔ yaci sa tɛ nga a yoli’n cɛ ɔ. Ɔ maan siɛn’n, a yoman ninnge mun kɛ laa’n sa kun. Sanngɛ ninnge nga be jɔ Ɲanmiɛn i klun’n yɛ a yo be-ɔ. (Yol. 3:19) Yɛ a kunndɛ kɛ á kán like nga a lafi su siɛn’n, i ndɛ klé sran mun. I sɔ’n ti’n, a fali ajalɛ kɛ á yó jasin bofuɛ nga be nin-a yomɛn i batɛmun’n naan a nin aniaan’m bé bó jasin fɛ’n likawlɛ. (Mat. 24:14) Ajalɛ cinnjin sɔ mɔ a fali be’n ti’n, Zoova i klun jɔ ɔ wun dan.​—Nya. 27:11.

18. ?Ninnge uflɛ benin wie mun yɛ ɔ fata kɛ a yo be ka naan b’a yo ɔ batɛmun-ɔn?

¹⁸ Kwlaa naan b’a yo ɔ batɛmun’n, ɔ fata kɛ a yo ninnge uflɛ wie mun ekun. Kɛ nga e fa wunnin i sa’n, ɔ fata kɛ a fa ɔ wun man Ɲanmiɛn. Yɛle kɛ a srɛ i kɛ á yó i klun sa’n titi. (1 Piɛ. 4:2) I sin’n, ɔ fata kɛ a kan kle asɔnun kpɛnngbɛn’m be lika siesiefuɛ’n kɛ a kunndɛ kɛ be yo ɔ batɛmun. I kusu, ɔ́ bó su klé i wiengu asɔnun kpɛnngbɛn mun kpɛkun bé kó wún ɔ  wun. Sanngɛ ɔ fataman kɛ i sɔ’n kun ɔ srɛ. Afin aniaan sɔ’m be si ɔ kpa yɛ be klo wɔ. Amún wá kókó Biblu’n nun like nga a suannin’n i su yalɛ. Afin be kunndɛ kɛ bé nían sɛ a wun like nga a suannin’n i wlɛ kpa-ɔ. Asa’n be klo kɛ bé nían sɛ a wun i wlɛ kɛ be wun Ɲanmiɛn fa manlɛ’n ɔ nin batɛmun yolɛ’n be ti cinnjin-o. Sɛ be nian naan be kwla yo ɔ batɛmun’n, bé bó su klé ɔ kɛ bé wá yó ɔ batɛmun akpasua kun aɲia annzɛ nvle kun aɲia nga amún wá yó’n i bo.

19-20 (1) ?Kɛ be ko yo ɔ batɛmun’n ngue yɛ ɔ fata kɛ a yo-ɔ? (2) ?Wafa sɛ yɛ a kwla yo i sɔ liɛ’n niɔn?

¹⁹ ?Kɛ be ko yo ɔ batɛmun’n ngue yɛ ɔ fata kɛ a yo-ɔ? * Nán ɔ wla fi su kɛ kɛ a fa ɔ wun man Zoova’n nn w’a tɛ i nda. Ɔ maan Zoova kunndɛ kɛ a yia nda sɔ’n i nuan. I sɔ’n ti’n, kɛ be ko yo ɔ batɛmun’n, ɔ fata kɛ a mian ɔ ɲin naan a nanti ndɛ nga a kannin’n su. ?Wafa sɛ yɛ a kwla yo i sɔ liɛ’n niɔn?

²⁰ Fa ɔ wun mantan aniaan mun. Afin kɛ be ko yo ɔ batɛmun’n, a kaci Zoova i Lalofuɛ’m be nun kun. (1 Piɛ. 2:17) Ɔ maan a nin be kaci kɛ awlobo kun nunfuɛ mun sa. I sɔ’n ti’n, sɛ a kɔ aɲia’m be bo titi’n, amun afiɛn mántan kpa. Asa’n, kanngan Ɲanmiɛn Ndɛ’n nun cɛn kwlakwla yɛ bu su akunndan kpa. (Jue. 1:1, 2) I liɛ’n ndɛ’n wlúwlú ɔ wun. Kpɛkun “srɛ Ɲanmiɛn titi.” (Mat. 26:41) Sɛ a kan ɔ klun ndɛ kle Zoova titi’n, amun afiɛn mántan. Asa ekun’n, “dun mmua kunndɛ Ɲanmiɛn i Famiɛn diwlɛ’n.” (Mat. 6:33) I wie yɛle kɛ maan jasin fɛ bolɛ’n yo ɔ cinnjin tra like kwlaa. Kɛ a bo jasin fɛ’n titi’n, a lafi Ɲanmiɛn su kpa kpɛkun a uka ɔ wiengu mun naan be ɲan nguan m’ɔ leman awieliɛ’n wie.​—1 Tim. 4:16.

21. ?Sɛ be yo ɔ batɛmun’n, ngue yɛ á ɲɛ́n i-ɔ?

²¹ Ajalɛ kwlaa nga á fá be’n, be nun cinnjin kpafuɛ’n yɛle ajalɛ nga a fɛ i kɛ á fá ɔ wun mán Zoova naan be yo ɔ batɛmun’n. E si kɛ ajalɛ sɔ’n i su nantilɛ’n timan pɔpɔ. Sanngɛ sɛ a mian ɔ ɲin yo ajalɛ nga a fali’n i nuan su like’n, ɔ su kaman ngbɛn. Afin ɲrɛnnɛn kwlaa nga a kwla wun i mɛn nga nun’n, “ɔ su cɛman yɛ ɔ ti kaan sa.” (2 Kor. 4:17) Sanngɛ sɛ be yo ɔ batɛmun’n, á dí aklunjuɛ dɔ nga su yɛ cɛn wie lele’n, á kwlá “ɲán nguan kpafuɛ’n.” (1 Tim. 6:19) I sɔ’n ti’n, é srɛ́ ɔ kɛ a bu wafa nga á tɛ́ kosan nga su’n, i akunndan kpa. Kosan sɔ’n yɛ: “?M’an ju batɛmun yolɛ?”