1. (1) ?Wafa sɛ yɛ aniaan bian Sali Risɛli nin i wiengu’m be suannin like-ɔ? (2) ?Yɛ ngue ti yɛ like suanlɛ wafa sɔ’n ti kpa-ɔ?

I AFUƐ ya tra su yɛ aniaan bian Sali Risɛli nin i wiengu wie’m be yia be suan Biblu’n nun like. Be waan bé yó sɔ naan bé wún like nga Biblu’n kle i sakpasakpa Zoova, nin Zezi Klisi be su’n, i wlɛ. Asa ekun’n, be waan bé wún be nga be wuli’n nin e ti kpɔlɛ tɛ’n be su ndɛ’n, i wlɛ kpa wie. Wafa nga be suannin like’n yɛ: Sran kun usa kosan kun kpɛkun be ngba’n be kunndɛ Biblu’n nun ndɛ mma kwlaa ng’ɔ nin ndɛ sɔ’n be kɔ likawlɛ’n. I sin’n, be klɛ wafa nga Biblu’n tɛ kosan sɔ’n su’n, be sie. Zoova fanngan nun’n, Klisifuɛ sɔ’m be wunnin ndɛ nga Biblu’n kɛn i sakpasakpa sa wie’m be su’n i wlɛ kpa. Andɛ nin andɛ’n, ndɛ sɔ’m be te yo e cinnjin.

2. ?Ngue ti yɛ ɔ ju wie’n, e wunman Ɲanmiɛn nuan ijɔfuɛ’m be ndɛ nga be kannin’n be wlɛ kɛ ng’ɔ nin i fata’n sa-ɔ?

² Biblu’n nun like suanfuɛ sɔ’m be wa wunnin i wlɛ kɛ Ɲanmiɛn nuan ijɔfuɛ’m be ndɛ nga be kannin’n, i wlɛ wunlɛ ti kekle tra Biblu’n nun ndɛ onga mun. ?Ngue ti yɛ ɔ ti sɔ-ɔ? Afin Ɲanmiɛn nuan ijɔfuɛ’m be ndɛ nga be kannin’n, kpɛ sunman’n kɛ be su kpɛn su’n, annzɛ kɛ be ko kpɛn su ko wie’n, yɛ e wun be wlɛ kpa-ɔ. Sanngɛ like uflɛ ekun ti yɛ e se sɔ-ɔ. Sɛ e waan é wún Ɲanmiɛn nuan ijɔfuɛ’m be ndɛ nga be kannin’n be wlɛ kpa’n, ɔ fata kɛ e fa e ɲin e sie i ndɛ’n i ɲrun’n nin i sin’n su. Sɛ y’a yoman sɔ naan e fa e ɲin e sie i ndɛ’n i bue kun su ngunmin’n, e su wunmɛn i wlɛ kpa kɛ ng’ɔ nin i fata’n sa. Ɔ maan kɛ e niɛn i kpa sa’n, laa’n kɛ é yíyí ndɛ kun mɔ Ɲanmiɛn nuan ijɔfuɛ Zoɛli kannin’n i nun’n, e ɲin kpali ndɛ wie’m be su. Siɛn’n, maan e fa e ɲin e sie i ndɛ sɔ’n su kpa ekun naan e wun like nga ti yɛ ɔ fata kɛ e yiyi nun uflɛ’n.

3-4. ?Kɛ ɔ fɛ i laa lele andɛ’n, wafa sɛ yɛ e wunnin ndɛ ng’ɔ o Zoɛl 2:7-9 nun’n i wlɛ-ɔ?

 ³ An kanngan Zoɛl 2:7-9 nun. Zoɛli kɛnnin i kɛ blɛ wie wá jú’n, lalo’m bé wá sáci ninnge kwlaa nga be o Izraɛli mɛn’n nun’n. Kpɛkun ɔ seli ekun kɛ, kakaa sɔ mɔ be je’n ti kɛ asɔmɔli’m be liɛ’n sa’n, bé wá dí like kwlaa nga be wun i’n. (Zoɛ. 1:4, 6) Laa’n, e buli i kɛ ndɛ nga Zoɛli kannin’n ti Zoova i sufuɛ mɔ be bo jasin fɛ’n be nzɔliɛ. Afin kɛ lalo mɔ like fi kwlá jranman be ɲrun sa’n, be kusu like fi kwlá yoman naan b’a yaci jasin fɛ’n i bolɛ. E buli i kɛ jasin fɛ nga e bo’n, sɛ é kwlá sé’n ɔ́ sáci “mɛn’n.” Mɛn sɔ’n yɛle be nga Ɲanmiɛn sulɛ wafa ng’ɔ timan su’n be su kpɛnngbɛn’m be sie be’n. *

⁴ Sɛ e fa e ɲin e sie i Zoɛl 2:7-9 ngunmin su’n, e kwla se kɛ wafa nga e yiyili ndɛ’n nun laa’n ti su. Sanngɛ kɛ e fa e ɲin e sie i ndɛ’n i ɲrun nin i sin’n su’n, e wun i wlɛ kɛ ɔ fata kɛ e yiyi nun uflɛ. Maan e kan ninnge nnan nga ti yɛ ɔ fata kɛ e yiyi ndɛ’n nun uflɛ’n be ndɛ.

5-6. ?Kɛ e kanngan Zoɛl 2:20, 25 nun’n, ngue ndɛ yɛ e kwla kan-ɔn?

⁵ I klikli nun’n, maan e fa e ɲin e sie i ndɛ nga Zoova kannin’n su. Ɔ seli kɛ: “Amun kpɔfuɛ [lalo mun] nga be fin mɛn’n i nglo lɔ be bali’n, ń fúan be.” (Zoɛ. 2:20) ?Sɛ ɔ ti kɛ lalo’m be ti Zoova i Lalofuɛ mɔ Zezi seli be kɛ be bo jasin fɛ’n, yɛ be kle sran’m be like naan be kaci i sɔnnzɔnfuɛ’n be nzɔliɛ’n, nn ngue ti yɛ Zoova tali nda kɛ ɔ́ fúan be-ɔ? (Eze. 33:7-9; Mat. 28:19, 20) E si kɛ Zoova fuɛnmɛn i sufuɛ mun. Sanngɛ ɔ kpalo ninnge nga be kwla tɛnndɛn i sufuɛ’m be ɲrun’n annzɛ ɔ fuan be nga be kpɔ i sufuɛ mun’n.

⁶ I nɲɔn su’n, maan e fa e ɲin e sie i ndɛ nga Zoɛl 2:25 kan’n su. Ndɛ mma sɔ’n nun’n, Zoova seli kɛ: ‘Amun ninnge nga be sacili’n, ń síe be osu. Amun fie su ninnge nga ndro’m be dili, nga lalo’n be wa sacili be’n, nga klannan nin aɛcɛ’m be dili’n, i sɔ ninnge liɛ mɔ kakaa fa ɔklɔɔ nga n sunmannin be’n be wa sacili be’n, ń síe be kwlaa be osu.’ Ndɛ mma sɔ’n nun’n, e wun kɛ Zoova seli kɛ ‘ɔ́ síe ninnge nga lalo’m be sacili be’n, be osu.’ Sɛ ɔ ti kɛ lalo sɔ’m be ti Zoova i sufuɛ’m be nzɔliɛ sakpa’n, nn é sé kɛ jasin fɛ nga be bo’n ɔ yoman sran’m be ye. Kusu nn ndɛ nga be kan’n, ɔ kwla yo maan sran’m be ɲan be ti yɛ klunwifuɛ’m be wla sa tɛ’n i ase. (Eze. 33:8, 19) Asa ekun’n, be nga e bo jasin fɛ’n e kle be mɔ be sɔ nun klanman’n, be ɲan su ye.

7. Zoɛl 3:1-2 nun’n Zoova seli kɛ “kɛ ɔ ko yo sɔ’n.” ?Ndɛ sɔ’n kle sɛ?

⁷ An kanngan Zoɛl 3:1-2 nun. Like’n i nsan su’n, yɛle wafa nga sa’m be lɔngɔ be wun su be ju’n. Maan e fa e ɲin e sie i ndɛ nga Zoova kannin’n su. Ɔ seli kɛ: “Kɛ ɔ ko yo sɔ’n, kpɛkuun ń fá min wawɛ’n ḿ mán sran’m be kwlaa.” I sɔ’n kle kɛ, kɛ lalo’m be ko wie junman nga be fa mannin be’n i di’n, yɛ ɔ́ yó i sɔ like liɛ’n niɔn. ?Sɛ lalo’m be ti Zoova i Lalofuɛ’m be nzɔliɛ’n, nn ngue ti yɛ bé wíe be junman’n i di ka naan Zoova w’a fɛ i wawɛ’n w’a man be-ɔ? Kusu nn e si kɛ sɛ Zoova w’a fɛmɛn i wawɛ’n w’a mɛnmɛn i sufuɛ mun’n, be kwlá boman jasin fɛ’n. Afin junman sɔ’n i dilɛ nun’n, sran’m be kle be yalɛ yɛ wie liɛ bɔbɔ’n be tannin be jasin fɛ’n i bolɛ.

8. ?Lalo nga Sa Nglo Yilɛ 9:1-11 kan be ndɛ’n, be ti wan nzɔliɛ? (An nian foto ng’ɔ o fluwa’n i bui’n su’n.)

⁸ An kanngan Sa Nglo Yilɛ 9:1-11 nun. Siɛn’n, maan e fa e ɲin e sie i like’n i nnan  su’n su. Laa’n, e seli kɛ lalo nga Zoɛli kannin be ndɛ’n be junman nga be di’n ti jasin fɛ nga e bo’n i nzɔliɛ. Afin ndɛ nga Zoɛli kannin’n i wunsu o Sa Nglo Yilɛ fluwa’n nun. Lɔ’n be seli kɛ lalo’m be ɲrun’n fa klɔ sran liɛ. Yɛ “like wie o be ti’m be su kɛ sika ɔkwlɛ famiɛn kle sa.” (Ngl. 9:7) Be mannin lalo sɔ’m be atin kɛ be kle “sran nga Ɲanmiɛn i nzɔliɛ’n nunman be ngban’n su’n,” mɔ be yɛle Ɲanmiɛn i kpɔfuɛ mun’n, be ɲrɛnnɛn anglo nnun. Anglo nnun kusu ti blɛ mɔ lalo kun di ka naan w’a wu’n. (Ngl. 9:4, 5) Atrɛkpa’n, be nga be kan be ndɛ’n yɛle be nga be kpali be sieli be ngunmin’n. Yakpa su’n, be kan jɔlɛ nga Ɲanmiɛn wá dí mɛn tɛ nga’n i ndɛ. Yɛ ndɛ nga be kan’n ti’n, mɛn nunfuɛ’m be wun faman be feke kaan sa.

9. ?Ngbaciɛ benin yɛ ɔ o lalo nga Zoɛli kan be ndɛ’n, ɔ nin nga Zan kan be ndɛ’n be afiɛn-ɔn?

⁹ Lalo’m be su ndɛ nga Sa Nglo Yilɛ fluwa’n kan’n, ɔ nin nga Zoɛl fluwa’n kan’n be fa be wun sanngɛ ngbaciɛ o be afiɛn. Maan e fa e ɲin e sie i ndɛ nɲɔn sɔ’m be su e nian. Zoɛl fluwa’n kɛn i kɛ lalo’m be dili ijre’m be kwlaa. (Zoɛ. 1:4, 6, 7) Sanngɛ aolia nun like nga Zan wunnin i’n nun’n, be seli lalo’m be kɛ “nán be saci asiɛ’n i su ijre mun annzɛ nɲa mɔnnɛn fi annzɛ waka fi.” (Ngl. 9:4) Lalo nga Zoɛli wunnin be’n be fin mɛn’n i nglo lɔ lika’n nun yɛ be ba-ɔ. (Zoɛ. 2:20) Sanngɛ lalo nga Zan wunnin be’n, be fin kunman dan kun mɔ be simɛn i bo’n, i nun. (Ngl. 9:2, 3) Lalo nga Zoɛli wunnin be’n,  be fuannin be. Sanngɛ nga Sa Nglo Yilɛ fluwa’n kan be ndɛ’n be liɛ’n b’a fuanman be. I kpa bɔbɔ’n, be mannin be atin kɛ be gua be junman’n i bo. Afin Biblu’n nun’n, like fi kleman kɛ Zoova i klun jɔman be wun.​—An nian kuku nga be flɛ i kɛ “ Lalo’m be su ndɛ nga Ɲanmiɛn nuan ijɔfuɛ’m be kannin’n, be fa be wun sanngɛ be timan kun” nun.

10. ?Biblu’n nun ndɛ benin yɛ e kwla jran su e se kɛ lalo nga Zoɛli wunnin be’n, ɔ nin nga Zan wunnin be’n be timan like kunngba’n i nzɔliɛ-ɔ?

¹⁰ Ngbaciɛ ng’ɔ o lalo nga Zoɛli wunnin be’n, ɔ nin nga Zan wunnin be’n be afiɛn’n, ɔ uka e naan y’a wun i wlɛ kɛ nán ndɛ kunngba’n yɛ be kan-ɔn. Ɔ maan e kwla se kɛ lalo nga Zoɛl fluwa’n kan be ndɛ’n, ɔ nin lalo nga Sa Nglo Yilɛ fluwa’n kan be ndɛ’n be timan kun. Kpɛ sunman’n, Biblu’n nun’n be kwla fa like kunngba’n be kan ninnge fanunfanun ndɛ. I wie yɛle kɛ Sa Nglo Yilɛ 5:5 nun’n, be flɛ Zezi kɛ “Zida akpasua’n nun Asɔmɔli’n.” Kusu nn 1 Piɛli 5:8 nun’n, be se kɛ Satan ti kɛ “asɔmɔli m’ɔ wlanwlan sin m’ɔ kpan’n sa.” Ɔ maan ninnge nnan nga e kannin be ndɛ’n, ɔ nin ninnge uflɛ wie mun ekun be ti’n, e wun i wlɛ kɛ ɔ fata kɛ e yiyi ndɛ ng’ɔ o Zoɛl fluwa’n nun’n i nun uflɛ. ?Wafa sɛ yɛ e kwla yiyi nun-ɔn?

11. ?Wafa sɛ yɛ Zoɛl 1:6 nin 2:1, 8, 11 be uka e naan y’a wun be nga lalo’m be ti be nzɔliɛ’n be wlɛ-ɔ?

¹¹ Kɛ e fa e ɲin e sie i ndɛ nga Zoɛli kannin’n i ɲrun nin i sin’n su kpa’n, e wun i wlɛ kɛ ɔ su kan alɛ kunfuɛ wie’m be ndɛ. (Zoɛ. 1:6; 2:1, 8, 11) Zoova seli kɛ ɔ́ fá “kakaa fa ɔklɔɔ” mɔ be yɛle Babilɔnin sonja mun’n, ɔ́ tú Izraɛlifuɛ nga be ɲin su ti kekle’n be fɔ. (Zoɛ. 2:25) Asa ekun’n, kakaa sɔ’m be ‘fin mɛn’n i nglo lɔ lika’n’ nun yɛ be ba-ɔ. Afin Izraɛli nvle’n i nglo lɔ lika’n nun yɛ Babilɔninfuɛ’m be sinnin be utuli klɔ’n niɔn. (Zoɛ. 2:20) Be fa Babilɔnin sonja sɔ mun sunnzun lalo mun. Ndɛ nga Zoɛli kɛnnin i be su’n yɛ: “Sran nga nanti i atin liɛ’n su, nga nanti i liɛ’n su. [...] Be sanndi klɔ’n nun. Be fu klɔ’n i wun talɛ’n su be wanndi su. Be wluwlu sua’m be nun, be sin fenɛtri’m be nun kɛ awiefuɛ’m be sa.” (Zoɛ. 2:8, 9) Maan e bu sa sɔ’n i akunndan kan e nian. Sonja’m be sanndi klɔ’n nun. Ɔ leman lika kun sa mɔ sran kun kwla fia mɔ be su wunmɛn i-ɔ. I sɔ’n kle kɛ sran fi kwlá wanndiman Babilɔnin sonja’m be ɲrun.

12. ?Wafa sɛ yɛ lalo’m be su ndɛ nga Zoɛli kannin’n kpɛnnin su-ɔ?

¹² Kɛ lalo’m be sa’n, afuɛ 607 nun ka naan Klisifuɛ’m be blɛ’n w’a ju’n Babilɔnin sonja’m be utuli Zerizalɛmun klɔ’n. Biblu’n se kɛ: “Ɔ yoli maan Babilɔni famiɛn’n wa fali be mɛn’n. [...] Gbanflɛn mun, talua mun o, kpɛnngbɛn mun o, sran oke mun o, Babilɔni famiɛn’n w’a yaci-man wie fi lɛ. Anannganman yili be kwlaa mɛnnin i. Babilɔnifuɛ’m be wɔli Nyanmiɛn i sua’n nun. Be bubuli Zerizalɛm klɔ’n wun talɛ’n. Be wɔli famiɛn’n i sua’m be kwlaa be nun, yɛ be sacili klɔ’n nun ninnge kpakpa’m be kwlaa kpan.” (2 Nyo. 36:17, 19) Kɛ Babilɔninfuɛ’m bé wá wíe klɔ’n i núnnún’n, ndɛ nga sran’m bé wá kán’n yɛle kɛ ‘klɔ nga Babilɔninfuɛ’m b’a fa’n, w’a tɔ srolo yɛ sran nin nnɛn nunman su kun.’​—Zer. 32:43.

13. Amun yiyi ndɛ ng’ɔ o Zeremi 16:16, 18 nun’n i nun.

¹³ Kɛ Zoɛli kɛnnin i ndɛ liɛ m’ɔ dili afuɛ kɔe 200, Zoova maan Zeremin kannin alɛ kunfuɛ sɔ’m be su ndɛ uflɛ wie mun ekun. Zoova seli kɛ Babilɔnin sonja’m bé wá kúnndɛ Izraɛlifuɛ nga be yoli sa tɛtɛ’n yɛ bé trá be. I sin’n, Zoova seli ekun kɛ: “Ń wá súnman jue trafuɛ kpanngban kɛ be ko tra be. I sin ń súnman koniɛn difuɛ kpanngban  kɛ be di be wun koniɛn oka mun, nin kpɔlɛ’m be su mun, ɔ nin yɛbuɛ buɛ’m be kwlakwla be nun. [...] Ń dún mmua ń mán be sa tɛ’n i akatua sɔ fa nnyɔn min mɛn bɔ be yoli i fiɛn’n ti.” Ndɛ sɔ’n kle kɛ i jenvie-o, i bo-o be nun wie fi su kwlá yoman naan Izraɛlifuɛ’m b’a ɲan be ti Babilɔninfuɛ’m be sa nun.​—Zer. 16:16, 18.

14. ?Blɛ benin nun yɛ ndɛ ng’ɔ o Zoɛl 3:1, 2 nun’n kpɛnnin su-ɔ?

¹⁴ Kɛ Zoɛli wieli lalo’m be ndɛ kan’n, ɔ kannin ndɛ fɛ kun. I waan asiɛ’n ɔ́ wá yó like ye ekun. (Zoɛ. 2:23-26) Kpɛkun sɛ é kwlá sé’n, cɛn wie lele’n Ɲanmiɛn sulɛ nun aliɛ’n ɔ́ bú gúa. Afin Zoova seli kɛ: “Ń fá min wawɛ’n ń mán sran’m be kwlaa. Amun mma yasua mun, nin amun mma mmla’m bé íjɔ min nuan. [...] Yɛ cɛn sɔ’m be nun’n, ń fá n wawɛ’n ń mán afanniɛn yasua mun nin afanniɛn mmla mun.” (Zoɛ. 3:1, 2) Nán blɛ mɔ Izraɛlifuɛ’m be sali be sin be nvle’n nun’n yɛ ndɛ sɔ’n kpɛnnin su-ɔ. Afuɛ 33 nun Pantekɔtu nun yɛ ɔ kpɛnnin su-ɔ. Ɔ maan ka naan ndɛ sɔ’n w’a kpɛn su’n ɔ dili afuɛ kɔe 600. ?Ngue ti yɛ e se sɔ-ɔ?

15. (1) ?Kɛ nga Sa Nga Be Yoli’n 2:16, 17 fa kan’n sa’n, kɛ Piɛli bó Zoɛli i ndɛ ng’ɔ kannin su’n, ngue ndɛ yɛ ɔ kannin-ɔn? (2) ?Ngue yɛ ndɛ sɔ’n kle e-ɔ?

¹⁵ Ɲanmiɛn maan akoto Piɛli seli kɛ ndɛ ng’ɔ o Zoɛl 3:1, 2 nun’n, ɔ kpɛnnin su Pantekɔtu cɛn’n nun. Cɛn sɔ’n nun’n, nglɛmun nun dɔ 9 su’n, Ɲanmiɛn fɛli i wawɛ’n mɛnnin i sufuɛ mun kpɛkun be boli “ninnge ɲɛnmɛn nga Ɲanmiɛn yo be’n,” be ndɛ kanlɛ bo. (Yol. 2:11) Sanngɛ Ɲanmiɛn maan kɛ Piɛli bó Zoɛli i ndɛ ng’ɔ kannin su’n, w’a nianman ndɛ nga Zoɛli kannin’n i su sɛsɛsɛ yɛ ɔ kannin-ɔn. ?Amun sieli wafa nga Piɛli kannin ndɛ’n i nzɔliɛ? (An kanngan Sa Nga Be Yoli’n 2:16, 17 nun.)  Kɛ Zoɛli bó i ndɛ’n i kanlɛ bo’n, ɔ seli kɛ “kɛ ɔ ko yo sɔ’n.” Sanngɛ kɛ Piɛli kɛ́n i ndɛ liɛ’n, ɔ seli kɛ “mɛn’n i awieliɛ blɛ nun’n.” Ndɛ sɔ’n kle blɛ ng’ɔ ka kwlaa naan b’a nunnun Zerizalɛmun klɔ’n nin Ɲanmiɛn i sua’n, i nun yɛ Ɲanmiɛn fɛ́ i wawɛ’n mán ‘sran wafa kwlaa-ɔ.’ Ndɛ sɔ’n kle kɛ blɛ kaka sinnin ka naan Zoɛli i ndɛ ng’ɔ kannin’n w’a kpɛn su.

16. (1) ?Kɛ Ɲanmiɛn fɛli i wawɛ’n mannin Klisifuɛ klikli mun’n, ngue yɛ be yoli-ɔ? (2) ?Andɛ’n jasin fɛ bolɛ nun’n, ngue yɛ Zoova fanngan nun’n e kwla yo-ɔ?

¹⁶ Kɛ Ɲanmiɛn fɛli i wawɛ’n mannin Klisifuɛ klikli mun’n, be boli jasin fɛ’n i bolɛ bo. Kɛ ɔ́ kɔ́ i ɲrun’n, Zoova i sufuɛ’m bé wá bó jasin fɛ sɔ’n mɛn’n wunmuan’n nun. Kɛ afuɛ 61 nun akoto Pɔlu klɛ́ Kolɔsufuɛ’m be fluwa m’ɔ́ kán jasin fɛ’n i ndɛ’n, ɔ seli kɛ b’a bo “jasin sɔ’n lika kwlaa nun ɲanmiɛn’n bo wa.” (Kol. 1:23) Lika nga Pɔlu kɛn i ndɛ’n yɛle lika nga i bɔbɔ Pɔlu, ɔ nin aniaan uflɛ be boli jasin fɛ’n nun’n. Dɔ nga su’n, Zoova fanngan nun’n y’a bo jasin fɛ’n lele y’a “ju asiɛ’n i tiwatiwa’m be su.”​—Yol. 13:47; an nian kuku nga be flɛ i kɛ “‘ Ń fá min wawɛ’n ń mán’ min sufuɛ mun” nun.

17. ?Wafa sɛ yɛ e wun ndɛ ng’ɔ o Zoɛl 2:7-9 nun’n, i wlɛ siɛn’n niɔn?

¹⁷ Siɛn’n, e wun ndɛ ng’ɔ o Zoɛl 2:7-9 nun’n i wlɛ kpa. Ndɛ mma sɔ’m be kanman jasin bolɛ junman’n i ndɛ. Sanngɛ Babilɔninfuɛ mɔ be utuli Zerizalɛmun klɔ’n afuɛ 607 ka naan Klisifuɛ’m be blɛ’n w’a ju’n, be ndɛ yɛ ɔ kan-ɔn.

18. ?Ngue yɛ Zoova i sufuɛ’m bé yó i titi-ɔ?

¹⁸ I yo, wafa nga e wun ndɛ ng’ɔ o Zoɛl 2:7-9 nun’n i wlɛ’n, w’a kaci. Sanngɛ e su yaciman jasin fɛ’n i bolɛ juejue su le. (Mat. 24:14) Kannzɛ mɛn siefuɛ’m bé tánndan e ɲrun sɛ, sanngɛ e su yaciman jasin fɛ’n i bolɛ le. Zoova fanngan nun’n, é bó i Famiɛn dilɛ’n i jasin fɛ’n yakpa su titi. Kpɛkun Zoova úka e naan y’a wun Ɲanmiɛn nuan ijɔfuɛ’m be ndɛ nga be kannin’n i wlɛ titi. Afin e si kɛ blɛ ng’ɔ nin i fata nun’n, ɔ́ klé ‘e ndɛ nanwlɛ’n i kwlaa.’​—Zan 16:13.