1-2. ?Ngue yɛ aniaan bian Anzelito i su ndɛ’n wla e fanngan kɛ e yo-ɔ?

ATRƐKPA’N, ɔ si nin ɔ nin mɔ be su Zoova’n yɛ be tali wɔ. Sɛ ɔ ti sɔ’n, nán bu i kɛ kɛ mɔ be nin Zoova be ti janvuɛ’n ti’n, ɔ kusu a nin i be ti janvuɛ wie. Kannzɛ e si nin e nin be su Ɲanmiɛn-o, annzɛ be sumɛn i-o, ɔ fata kɛ e tinuntinun e mian e ɲin naan e nin Zoova e afiɛn mantan kpa.

² Aniaan bian Anzelito i su ndɛ’n uka e naan y’a wun ndɛ sɔ’n i wlɛ kpa. Aniaan bian’n tran Azi mɛn’n nun. Yɛ i si nin i nin be ti Zoova i sufuɛ. Sanngɛ i gbanflɛn nun’n, ɔ nin Ɲanmiɛn be afiɛn mantanman kpa. I bɔbɔ seli kɛ: “Kɛ mɔ min osufuɛ’m be su Zoova’n, i ti yɛ n su i wie-ɔ.” Sanngɛ aniaan bian’n wa fali ajalɛ kɛ ɔ́ kánngan Ɲanmiɛn Ndɛ’n nun naan ɔ́ bú su akunndan trá laa’n, yɛ ɔ́ srɛ́ Zoova kpɛ sunman. ?Kɛ ɔ yoli sɔ’n, ngue yɛ ɔ wa wunnin i wlɛ-ɔ? I bɔbɔ tɛli su kɛ: “N wunnin i wlɛ kɛ like kunngba cɛ ng’ɔ kwla uka min naan e nin Zoova e afiɛn w’a mantan kpa’n, yɛle i silɛ’n.” Aniaan bian Anzelito i su ndɛ’n ti’n e usa e wun kɛ: ?Ngbaciɛ benin yɛ ɔ o Zoova i su ndɛ silɛ’n, ɔ nin Zoova bɔbɔ ba’n i silɛ’n be afiɛn-ɔn? ?Ngue yɛ e kwla yo naan y’a si Zoova kpa-ɔ?

3. ?Ngbaciɛ benin yɛ ɔ o Zoova i su ndɛ silɛ’n, ɔ nin Zoova bɔbɔ ba’n i silɛ’n be afiɛn-ɔn?

³ Wie liɛ’n, kɛ mɔ e si Ɲanmiɛn i dunman’n, mɔ e si ndɛ ng’ɔ kannin be’n, nin ninnge ng’ɔ yoli be’n, be nun wie mun ti’n, e kwla se e wun kɛ e si Zoova. Sanngɛ i sɔ’n kleman kɛ e si Zoova sakpa. Afin i klikli nun’n, ɔ fata kɛ e fa blɛ e suan Zoova  i su like naan e si i nzuɛn’n. I sin’n, ɔ fata kɛ e wun like nga ti yɛ ɔ kan ndɛ kun, annzɛ ɔ yo like kun’n, i wlɛ kpa. Kɛ e wun i wlɛ sɔ’n, sɛ akunndan nga e bu’n, nin ajalɛ nga e fa be’n, nin like nga e yo’n, be jɔ i klun-o, annzɛ be jɔmɛn i klun-o, e wun i wlɛ. Kɛ e ko si like nga Zoova kunndɛ kɛ e yo’n, kpɛkun e su mian e ɲin e yo i siɛn’n.

4. ?Ngue yɛ sran nga Biblu’n kan be ndɛ’n, be su ndɛ’n kle e-ɔ?

⁴ Ɔ ju wie’n, kɛ e waan é sú Zoova’n, sran’m be yo e finfin. Kpɛkun kɛ e fa ajalɛ kɛ é yó i nvle nunfuɛ’m be nun kun’n, be tanndan e ɲrun tɛtɛ kpa. Sanngɛ sɛ e lafi Zoova su’n, ɔ su yiman e ase le. Ɔ maan, e nin i é kwlá trá janvuɛ yɛ e su titiman nun le. Sanngɛ e kwla usa e wun kɛ e kwla si Zoova sakpa. Sran wie mɔ Biblu’n kan be ndɛ’n, be su ndɛ kle weiin kɛ e kwla si i sakpa. É wá kán be nun nɲɔn be ndɛ. Be yɛle Moizi nin Famiɛn Davidi. Kɛ é kán be ndɛ’n, é wá tɛ́ kosan nɲɔn nga’m be su: ?Ngue yɛ be yoli naan b’a kwla si Zoova-ɔ? ?Ngue like yɛ be su ndɛ’n kle e-ɔ?

5. ?Ngue yɛ Moizi kunndɛli kɛ ɔ́ yó-ɔ?

⁵ Moizi fali ajalɛ kɛ ɔ́ sú Ɲanmiɛn. Kɛ Moizi ɲannin afuɛ 40 “w’a kplinman su kɛ be flɛ i Faraɔn i wa bla’n i wa.” Sanngɛ ɔ fali ajalɛ kɛ ɔ́ sú Ɲanmiɛn kɛ Izraɛlifuɛ mun sa. (Ebr. 11:24) Moizi w’a kplinman su kɛ ɔ́ yó sran dan Ezipti mɛn’n nun. Kɛ ɔ fɛli i wun wlali Izraɛlifuɛ mɔ blɛ sɔ’n nun’n be ti kanga’n, be nun’n, ɔ si kɛ Ezipti famiɛn’n, ɔ́ fá ya dan kpa i wun. Ezipti famiɛn’n le kwlalɛ kpa kpɛkun Eziptifuɛ’m be ɲrun’n ɔ ti kɛ Ɲanmiɛn sa. Ɔ nin i sɔ’n ngba’n, Moizi kacili Ɲanmiɛn i sufuɛ. I lɛ nun’n, ɔ yili i nglo kɛ ɔ lafi Ɲanmiɛn su tankaan kpa. Zoova i sulafilɛ sɔ’n ti’n ɔ nin i be afiɛn mantannin kpa titi.​—Nya. 3:5.

6. ?Ngue yɛ Moizi i su ndɛ’n kle e-ɔ?

⁶ ?Ngue yɛ ndɛ sɔ’n kle e-ɔ? Kɛ Moizi sa’n ɔ fata kɛ e tinuntinun e fa ajalɛ kun. Yɛle kɛ e nin Ɲanmiɛn i sufuɛ mun e bo yó kun é sú i likawlɛ annzɛ e su yoman sɔ. Sɛ e waan é sú Ɲanmiɛn kusu’n, saan é kpɔ́ci ninnge wie mun. Asa ekun’n, be nga be siman Zoova’n be kwla tanndan e ɲrun. Sanngɛ sɛ e lafi e Si m’ɔ o ɲanmiɛn su lɔ’n i su tankaan kpa, e kwla lafi su kɛ ɔ́ súan e bo.

7-8. ?Ngue yɛ Moizi yoli i titi-ɔ?

⁷ Moizi suannin Zoova i su like titi kpɛkun ɔ yoli Zoova i klun sa’n titi. Kɛ Zoova seli Moizi kɛ ɔ ko fa Izraɛlifuɛ mun Ezipti lɔ fite’n, ɔ seli Zoova kpɛ sunman kɛ ɔ su kwlá diman junman sɔ’n. Sanngɛ Ɲanmiɛn sili Moizi i aunnvuɛ. Yɛle kɛ ɔ wunnin wafa nga Moizi i wun yo i’n i wlɛ yɛ ɔ ukɛli i. (Tul. 4:10-16) Ɔ maan Moizi kwla ɔli Ezipti famiɛn’n i ɲrun ko kannin Zoova i ndɛ’n kleli i. I sɔ mɔ Moizi yoli’n ti’n, kɛ Zoova yili i tinmin’n i nglo m’ɔ fali ɲrɛnnɛn blu guali Eziptifuɛ’m be su’n ɔ wunnin nun. Kpɛkun kɛ Zoova núnnún Eziptifuɛ’m be famiɛn’n m’ɔ bu i wun kɛ ɔ ti Ɲanmiɛn’n, ɔ nin i sonja mun jenvie ɔkwlɛ nun’n, ɔ wunnin nun wie.​—Tul. 14:24-28; Jue. 136:15.

⁸ Kɛ Moizi fali Izraɛlifuɛ mun Ezipti lɔ fiteli’n, b’a yaciman planlɛ le. Sanngɛ Moizi wunnin wafa nga Zoova trɛli i awlɛn ukɛli i nvle’n nunfuɛ m’ɔ deli be kanga nun’n. (Jue. 78:40-43) Asa ekun’n, Moizi wunnin i wlɛ kɛ Zoova ti wun ase kanfuɛ dan. Yɛle kɛ cɛn kun’n, ɔ seli Zoova kɛ nán maan ɔ nunnun Izraɛlifuɛ mun. Kɛ ɔ kɛnnin i sɔ’n, Zoova tili i aniɛn’n. Ɔ maan w’a nunnunman be.​—Tul. 32:9-14.

9. ?Moizi nin Zoova be nantilɛ nun’n, ngue yɛ ndɛ ng’ɔ o Ebre Mun 11:27 nun’n yi i nglo-ɔ?

⁹ Kɛ Moizi nin Izraɛlifuɛ’m be tuli Ezipti mɛn’n nun’n, ɔ nin Zoova be afiɛn wa mantannin dan kpa. Ɔ maan ɔ ti kɛ w’a wun i Si  m’ɔ o ɲanmiɛn su lɔ’n sa. (An kanngan Ebre Mun 11:27 nun.) Asa ekun’n, Biblu’n kan wafa nga Zoova nin Moizi be afiɛn mantannin juli’n i ndɛ. Ɔ se kɛ: “Moiz o sa, Anannganman o sa, yɛ be ijɔ kɛ sran kun nin i janvuɛ be su koko yalɛ sa.”​—Tul. 33:11.

10. ?Sɛ e waan é sí Zoova kpa’n, ngue yɛ ɔ fata kɛ e yo-ɔ?

¹⁰ ?Ngue yɛ ndɛ sɔ’n kle e-ɔ? Sɛ e kunndɛ kɛ é sí Zoova kpa’n, ɔ fata kɛ e si i nzuɛn’n. Sanngɛ nɛ́n i ngba-ɔ. Ɔ fata kɛ e yo i klun sa’n wie. Andɛ’n, like nga Zoova kunndɛ’n yɛle kɛ “sran wafawafa’n kwlaa be ɲan be ti naan be wun ndɛ ng’ɔ ti nanwlɛ’n i wlɛ kpa.” (1 Tim. 2:3, 4) Sɛ e waan é yó Zoova i klun sa’n, ɔ fata kɛ e kɛn i ndɛ e kle sran mun.

11. ?Ngue ti yɛ e kwla se kɛ kɛ e kan Zoova i ndɛ e kle sran mun’n, e si i kpa-ɔ?

¹¹ Kpɛ sunman’n, kɛ e kan Zoova i ndɛ e kle sran mun’n, e si i kpa tra laa’n. I wie yɛle kɛ kɛ Zoova uka e mɔ e wun be nga be kunndɛ kɛ bé yó i janvuɛ’n, e wun i wlɛ kɛ ɔ si sran aunnvuɛ dan. (Zan 6:44; Yol. 13:48) Asa ekun’n, kɛ e kle sran sɔ’m be like mɔ be wla be ayeliɛ tɛtɛ’m be ase’n, e wun i wlɛ kɛ i nuan ndɛ’n le ta kpa. (Kol. 3:9, 10) Kpɛkun kɛ ɔ man e blɛ kɛ e fa uka sran mun naan be si i kpa naan b’a kwla fite nun’n, e wun i wlɛ ekun kɛ ɔ trɛ i awlɛn sran’m be wun.​—Rɔm. 10:13-15.

12. (1) ?Kɛ nga Ezipt Lɔ Tulɛ 33:13 fa kan’n sa’n, ngue ndɛ yɛ Moizi kan kleli Zoova-ɔ? (2) ?Ngue ti-ɔ?

¹² Moizi nin Zoova be afiɛn m’ɔ mantannin’n ɔ yoli i cinnjin kpa. Zoova maan Moizi kwla yoli ninnge kaka kpa. Ɔ maan e kwla se kɛ ɔ si Zoova kpa. Sanngɛ cɛn kun’n, Moizi seli Zoova kɛ ɔ ukɛ i naan ɔ si i kpa ekun tra laa’n. (An kanngan Ezipt Lɔ Tulɛ 33:13 nun.) I nun mɔ Moizi kán ndɛ sɔ’n klé Zoova’n nn ɔ le afuɛ 80 tra su. Sanngɛ ɔ si kɛ Zoova i su ndɛ kpanngban ekun o lɛ m’ɔ fata kɛ ɔ si i-ɔ.

13. ?Ngue like yɛ e kwla yo fa kle kɛ sulɛ mɔ e su Zoova’n, ɔ ti e cenjele like-ɔ?

¹³ ?Ngue yɛ ndɛ sɔ’n kle e-ɔ? Kannzɛ e su Zoova w’a cɛ kpa bɔbɔ’n, ɔ fataman kɛ e se e wun le kɛ e si Zoova i su ninnge ngba. Asa ekun’n, sɛ e waan é yí i nglo kɛ sulɛ mɔ e su Zoova’n, ɔ ti e cenjele like’n, ɔ fata kɛ e srɛ i titi.

14. ?Sɛ e waan é sí Zoova kpa’n, ngue ti yɛ i srɛlɛ’n ti cinnjin-ɔn?

¹⁴ Sɛ e kunndɛ kɛ e nin sran kun e janvuɛ’n tra kpa’n, ɔ fata kɛ e nin sran sɔ’n e koko yalɛ kpɛ sunman. I wafa kunngba’n, sɛ e kunndɛ kɛ e nin Ɲanmiɛn e afiɛn mantan kpa’n, ɔ fata kɛ e kan e klun ndɛ’n kwlaa e kle i kpɛ sunman. Yɛ nán srɛ kun e i sɔ yolɛ’n nun. (Efɛ. 6:18) Aniaan bla kun suan Klista. Ɔ tran nvle nga be flɛ i kɛ Tirki’n su. Ɔ seli kɛ: “Kɛ n tu n klun n srɛ Zoova mɔ n wun i kɛ ɔ uka min’n, n klo i kpa tra laa’n yɛ n lafi i su tankaan kpa. Kɛ n wun wafa nga Zoova tɛ min srɛlɛ’m be su’n, e nin i e afiɛn mantan kpa. Ɔ maan siɛn’n, min ɲrun’n Zoova ti kɛ min Si nin min Janvuɛ sa.”

15. ?Kɛ Zoova kán Davidi i ndɛ’n, ɔ seli sɛ?

¹⁵ Kɛ bé wú Famiɛn Davidi’n, nn i si nin i nin ɔ nin be nga be nin be tran’n be su Zoova. Sanngɛ nán kɛ Davidi i osufuɛ’m be su Zoova’n, i ti yɛ i kusu suli i wie-ɔ. I bɔbɔ miɛnnin i ɲin naan ɔ nin Ɲanmiɛn be afiɛn mantan kpa. I sɔ’n ti’n, Zoova kloli i sa dan. Ɔ maan kɛ ɔ́ kán Davidi i ndɛ’n, ɔ seli kɛ Davidi ti i “awlɛn su sran.” (Yol. 13:22) ?Ngue yɛ Davidi yoli m’ɔ nin Zoova be afiɛn mantannin dan sɔ-ɔ?

16. ?Kɛ Davidi bu ninnge nga Zoova yili be’n, be akunndan’n, ngue yɛ ɔ sie i nzɔliɛ-ɔ?

¹⁶ Kɛ Davidi fɛli i ɲin sieli i ninnge nga Zoova yili be’n be su’n, ɔ sili Zoova kpa. I nun mɔ Davidi te yo gbanflɛn kan’n, i yɛ  ɔ niɛn i si i bua’m be su-ɔ. Ɔ maan blɛ sunman’n, ɔ la gua su. Atrɛkpa’n, blɛ sɔ’n nun yɛ ɔ boli ninnge nga Zoova yili be’n, be su akunndan bulɛ bo-ɔ. I wie yɛle kɛ kɛ Davidi mɛn i ti’n su kɔnguɛ’n, ɔ wun nzraama kpanngban kpa. Sanngɛ nán nzraama’m be ngunmin yɛ ɔ wun be-ɔ, ɔ wun sran ng’ɔ yili ninnge sɔ mun’n i sran wafa ng’ɔ ti’n wie. I sɔ’n ti’n, ɔ seli kɛ: “Kɛ a nian nyanmiɛn’n b’ɔ la nglo lɔ plaii’n, a wun Nyanmiɛn Kpli’n i nyrun b’ɔ lɛ i’n. Kɛ a nian nyanmiɛn’n b’ɔ la nglo lɔ plaii’n, a wun ninnge nga Nyanmiɛn yili be’n.” (Jue. 19:1, 2) Kɛ Davidi bu yilɛ klanman mɔ Ɲanmiɛn yili i bɔbɔ nin sran onga mun’n, ɔ wun i wlɛ kɛ Zoova si ngwlɛlɛ dan. (Jue. 139:14) Asa ekun’n, kɛ ɔ bu ninnge nga Zoova yili be’n, be su akunndan’n ɔ wun i wlɛ kɛ ɔ timan like fi naan ɔ fata kɛ ɔ kɛn i wun ase.​—Jue. 139:6.

17. ?Sɛ e fa e ɲin e sie i ninnge nga Zoova yili be’n be su’n, ngue yɛ be kwla kle e-ɔ?

¹⁷ ?Ngue yɛ ndɛ sɔ’n kle e-ɔ? Maan e fa e ɲin e sie i ninnge ɲɛnmɛnɲɛnmɛn nga Ɲanmiɛn yili be’n, be su kpa. Sɛ e yo sɔ’n, e kwla wun sran wafa nga Zoova ti’n. I sɔ’n ti’n, cɛn kwlakwla’n maan e bu ninnge nga be bo sin yia e’n, be su akunndan. Ɔ kwla yo ijre nin waka mun, annzɛ nnɛn nin sran mun. Sɛ e yo sɔ cɛn kwlakwla’n, é sí e Si m’ɔ o ɲanmiɛn su lɔ’n i su ndɛ kpanngban. (Rɔm. 1:20) Kpɛkun klolɛ mɔ e klo i’n, ɔ́ yó tankaan kpa.

18. ?Kɛ nga Jue Mun 18 fa kan’n sa’n, ngue yɛ Davidi wunnin i wlɛ-ɔ?

¹⁸ Davidi sieli i nzɔliɛ kɛ Zoova ukɛ i. Cɛn kun’n, ɔ kunnin asɔmɔli kun mɔ i waan ɔ́ dí i si i nnɛn’m be nun kun’n. Kpɛkun cɛn kun ekun liɛ’n nnɛn nga be flɛ i kɛ ursu m’ɔ bali i nnɛn’m be dilɛ’n yɛ ɔ kunnin i-ɔ. I kwlaa sɔ’n nun’n, Davidi dili i nanwlɛ kɛ Zoova dunman nun ti yɛ ɔ kwla kunnin nnɛn wlɛfuɛ sɔ mun-ɔn. Kpɛkun kɛ ɔ kwla kunnin alɛ kunfuɛ Goliati’n, ɔ wunnin i wlɛ weiin kɛ Zoova o i sin. (1 Sam. 17:37) Asa ekun’n, kɛ ɔ ɲɛnnin i ti Famiɛn Saili m’ɔ fɛli i ɲin cili i’n i sa nun’n, ɔ seli kɛ Zoova yɛ maan ɔ kwla ɲɛnnin i ti-ɔ. (Jue. 18 i su fitilɛ’n.) Sɛ ɔ ti kɛ Davidi tu i wun’n, nn ɔ seli kɛ i bɔbɔ yɛ ɔ yoli ninnge kwlaa sɔ mun-ɔn. Sanngɛ ɔ ti wun ase kanfuɛ. Ɔ maan ɔ wunnin i wlɛ weiin kɛ Zoova m’ɔ ukɛli i’n, i ti yɛ ɔ kwla yoli ninnge sɔ mun-ɔn.​—Jue. 138:6.

19. ?Ngue yɛ Davidi i su ndɛ’n kle e-ɔ?

¹⁹ ?Ngue yɛ ndɛ sɔ’n kle e-ɔ? Sɛ sa wie o e su’n, maan e srɛ Zoova kɛ ɔ uka e. Sanngɛ nán e ka ngalɛ’n su, ɔ fata kɛ e sie blɛ nin wafa nga Zoova uka e’n be nzɔliɛ wie. Sɛ e ti wun ase kanfuɛ’n, é dí e wun nanwlɛ kɛ e kwlá yoman ninnge ngba naan Zoova fanngan nun ti yɛ e kwla yo ninnge nga e kwlá yoman’n niɔn. Ɔ maan, blɛ kwlaa nga e sie i nzɔliɛ kɛ Zoova ukali e sa wie nun’n, e nin i e afiɛn mántan kpa. Aniaan bian Izaaki m’ɔ tran Fiji’n ɔ seli kɛ ndɛ sɔ’n ti nanwlɛ. Aniaan bian sɔ’n ɔ su Zoova w’a cɛ kpa. Ɔ seli kɛ: “Kɛ n bu i akunndan kpa sa’n, n wun i wlɛ weiin kɛ kɛ ɔ fin cɛn mɔ n boli Biblu’n nun like suanlɛ bo lele m’ɔ́ fá jú andɛ’n, Zoova yɛ ɔ ukali min blɛ kwlaa sɔ’n nun-ɔn. Ɔ maan min ɲrun’n Zoova ti sran jreiin kun.”

20. ?Ngue yɛ Davidi nin Ɲanmiɛn be afiɛn m’ɔ mantannin kpa’n ɔ kle e-ɔ?

²⁰ Davidi niannin Zoova i nzuɛn’n su. Wafa nga Zoova yili e’n ti’n, e kwla niɛn i nzuɛn’n su. (Bob. 1:26) Ɔ maan, sɛ e si Zoova i nzuɛn’n kpa’n, é kwlá yó ninnge mun kɛ i sa. I sɔ yɛ Davidi yoli-ɔ. Kɛ m’ɔ sili i Si Ɲanmiɛn i nzuɛn’n ti’n, ɔ yili nzuɛn sɔ’m be nglo ɔ nin i wiengu’m be nantilɛ’n nun. Maan e kan sa kun ndɛ. Blɛ kun nun’n, Davidi fɔnnin  Zoova wun. Yɛle kɛ ɔ kunndɛli Batseba kpɛkun ɔ kunnin i wun’n ukali su. Kannzɛ Davidi yoli sa tɛ dan’n, sanngɛ Zoova sili i aunnvuɛ. (2 Sam. 11:1-4, 15) Like nga ti yɛ Zoova yoli sɔ’n yɛle kɛ Davidi niɛn i nzuɛn su. Yɛle kɛ ɔ sili i wiengu’m be aunnvuɛ wie. Davidi nin Zoova be afiɛn mantannin dan ti’n, Izraɛlifuɛ’m be kloli i kpa. Kpɛkun Zoova fali Izraɛli famiɛn onga’m be ɲin sieli Davidi i ajalɛ klanman’n su.​—1 Fam. 15:11; 2 Fam. 14:1-3.

21. ?Kɛ nga Efɛzifuɛ Mun 4:24; 5:1 fa kan’n sa’n, sɛ e nian ‘like nga Ɲanmiɛn yo’n su e yo wie’n’ wafa sɛ yɛ i bo’n gúa-ɔ?

²¹ ?Ngue yɛ ndɛ sɔ’n kle e-ɔ? Ɔ ti cinnjin kɛ e nian ‘like nga Ɲanmiɛn yo’n su e yo wie.’ Afin kɛ e yo sɔ’n, e bɔbɔ e ɲan su ye kpɛkun e si Ɲanmiɛn kpa. Asa ekun’n, kɛ e nian Ɲanmiɛn i nzuɛn’n su’n, e kle kɛ e ti i mma mun.​—An kanngan Efɛzifuɛ Mun 4:24; 5:1 nun.

22-23. ?Sɛ e nanti like nga e suɛn i Zoova su’n i su’n, wafa sɛ yɛ i bo’n gúa-ɔ?

²² Kɛ nga e fa wunnin i sa’n, sɛ e fa e ɲin e sie i ninnge nga Zoova yili be’n be su naan e suan Biblu’n nun like’n, é sí i kpa. Biblu’n m’ɔ ti fluwa ngunmin kun’n, ɔ kan Ɲanmiɛn i sufuɛ wie mɔ e kwla nian be ajalɛ’n su’n, be ndɛ. Sran sɔ’m be nun nɲɔn yɛle Moizi nin Davidi. Like nga Zoova ko yo naan y’a si i kpa’n, ɔ yoli. Ɔ fata kɛ e kusu e yo e liɛ nga e kwla yo naan y’a si i kpa’n.

²³ E su yaciman Zoova i su like suanlɛ le. (Aku. 3:11) Nán Zoova i su ninnge kaka nga e si i’n yɛ ɔ ti cinnjin-ɔn. Sanngɛ kɛ e si ninnge sɔ mun’n, like nga e yo’n yɛ ɔ ti cinnjin-ɔn. Ɔ maan sɛ e nanti like nga e suan’n su’n kpɛkun e mian e ɲin e sɔnnzɔn e Si Ɲanmiɛn m’ɔ klo e’n, ɔ́ fɛ́ i wun mantan e titi. (Zak. 4:8) Asa ekun’n, i nuan Ndɛ’n nun’n ɔ se e kɛ ɔ su yiman be nga be kunndɛ kɛ bé sí i’n, be ase le.