1-2. (1) ?Ɔ cɛ kan’n, mɛn siefuɛ’m bé wá sé sɛ? (2) ?Kosan benin mun yɛ é wá tɛ́ be su like suanlɛ nga nun-ɔn?

MAAN ɔ yo e kɛ mɛn siefuɛ’m b’a se kɛ ‘be su di fɔundi, srɛ kunman be kun!’ sa. Atrɛkpa blɛ sɔ nun’n, bé wá dí be nuan bé sé kɛ b’a yo maan mɛn’n w’a tɔ fɔuun sakpa. Asa ekun’n, bé wá yó naan e bu i kɛ be bɔbɔ be kwla siesie mɛn’n nun sa’n kwlaa. Sanngɛ kɛ be se sɔ cɛ’n sa ng’ɔ́ wá bɛ́ i sin’n, be su wunmɛn i trawlɛ kaan sa. Afin Biblu’n se kɛ: “Bé ká lɛ bé núnnún be kpɛ kunngba. [...] Be nun wie fi su fiteman nun.”​—1 Tes. 5:3.

² Sanngɛ kosan cinnjin wie’m be o lɛ m’ɔ fata kɛ e tɛ be su-ɔ. Kosan sɔ mun yɛ: ?Sa benin mun yɛ bé wá jú “ɲrɛnnɛn dan’n” nun-ɔn? ?Ngue yɛ Zoova wá kúnndɛ kɛ i sufuɛ’m be yo i blɛ sɔ’n nun-ɔn? ?Wafa sɛ yɛ e kwla siesie e wun dɔ nga su naan y’a kwla jran kekle ɲrɛnnɛn dan’n nun-ɔn?​—Mat. 24:21.

3. ?Kɛ nga Sa Nglo Yilɛ 17:5, 15-18 fa kan’n sa’n, wafa sɛ yɛ Ɲanmiɛn wá núnnún “Babilɔni klɔ dan’n” niɔn?

³ An kanngan Sa Nglo Yilɛ 17:5, 15-18 nun. Biblu’n se kɛ bé wá núnnún ‘Babilɔnin klɔ dan’n.’ ?Wafa sɛ? Yɛle kɛ Ɲanmiɛn wá fɛ́ i akunndan’n wlá nvlenvle’m be nunfuɛ’m be klun naan be yo i klun sa’n. ?Ɲanmiɛn i akunndan sɔ’n  yɛle benin? Yɛle kɛ ɔ́ wá yó maan bé núnnún Ɲanmiɛn sulɛ wafawafa kwlaa nga be timan su’n, ɔ nin be nga be tɔn be wun suɛn kɛ be ti Klisifuɛ’n. Ɲanmiɛn wá fɛ́ i akunndan’n wlɛ́ i ‘nnɛn ɔkwlɛ bioun i wɛ blu’m’ be klun. Wɛ blu’m be ti politiki anuannzɛ nga be suan “nnɛn ɔkwlɛ bioun” i bo’n i nzɔliɛ. Kpɛkun “nnɛn ɔkwlɛ bioun” kusu ti nvlenvle’m be anuannzɛ nga be flɛ i kɛ ONU i nzɔliɛ. (Ngl. 17:3, 11-13; 18:8) Kɛ politiki anuannzɛ sɔ’m bé wá fá alɛ wlá Ɲanmiɛn sulɛ wafawafa nga be timan su’n be sin’n, i lɛ nun yɛ ɲrɛnnɛn dan’n ɔ́ bó i bo-ɔ. Nanwlɛ, sa sɔ’n ɔ́ yó sro yɛ ɔ́ fú sran nga be o asiɛ’n wunmuan’n su’n be kwlaa be nun.

4. (1) ?Atrɛkpa’n ngue ti yɛ nvlenvle’m bé wá fá alɛ wlá Ɲanmiɛn sulɛ wafawafa nga be timan su’n be sin-ɔn? (2) ?Yɛ ngue yɛ Ɲanmiɛn sulɛ wafawafa nga be timan su’n be nunfuɛ’m bé wá yó-ɔ?

⁴ E siman like nga ti yɛ nvlenvle’m be nunfuɛ’m bé wá fá alɛ wlá Babilɔnin klɔ dan’n i sin’n. Atrɛkpa’n bé wá sé kɛ be dunman nun ti yɛ fɔundi kwlá tranman asiɛ’n su-ɔ. Afin be nuan o mɛn siefuɛ’m be ndɛ kwlaa nga be kan’n nun. Annzɛ kusu bé wá sé kɛ Ɲanmiɛn sulɛ wafawafa nga be timan su’n b’a tiantian aɲanbeun ninnge kpanngban kpa nuan wie pɛ. (Ngl. 18:3, 7) Sanngɛ i sɔ’n kleman kɛ, kɛ bé wá fá alɛ wlá Ɲanmiɛn sulɛ wafawafa nga be timan su’n be sin’n, bé núnnún be nunfuɛ’m be kwlaa. Atrɛkpa’n be anuannzɛ’m be kwlakwla yɛ bé núnnún be-ɔ. Kɛ bé wá núnnún anuannzɛ sɔ mun’n, be nunfuɛ’m bé wá wún i wlɛ kɛ be su kpɛnngbɛn’m be kpɛli be gblɛ. I sɔ’n ti’n be nin be kpɛ́ duo nun.

5. (1) ?Ngue yɛ Zoova seli kɛ ɔ́ yó i ɲrɛnnɛn dan’n nun-ɔn? (2) ?Yɛ ngue ti-ɔ?

⁵ Biblu’n kanman blɛ trele nga Babilɔnin klɔ dan’n i nunnunlɛ’n i ndɛ. Sanngɛ e si kɛ ɔ su cɛman dan. (Ngl. 18:10, 21) Afin Zoova seli kɛ, kɛ ɔ ko yo naan i sulɛ kpafuɛ’n, nin “be nga be kpali be sieli mɔ be ti i liɛ’n” b’a nunnunman’n ti’n kpɛ́ blɛ sɔ’n su. (Mar. 13:19, 20) ?Sanngɛ kɛ ɔ fɛ i ɲrɛnnɛn dan’n i bobolɛ nun lele m’ɔ́ fá jú Aamagedɔn alɛ’n nun’n, ngue yɛ Zoova wá kúnndɛ kɛ e yo i blɛ sɔ’n nun-ɔn?

6. ?Kɛ e ko fin Babilɔnin klɔ dan’n nun e ko fite’n, ngue yɛ ɔ fata kɛ e yo i ekun-ɔn?

⁶ Kɛ nga e fa wunnin i like suanlɛ ng’ɔ sinnin lɛ nun’n sa’n, Zoova kunndɛ kɛ i sufuɛ’m be fin Babilɔnin klɔ dan’n nun fite. Sanngɛ nɛ́n i ngba-ɔ. Ɔ kunndɛ kɛ be fua kpa kɛ bé sú i kpa titi. Maan e fa e ɲin e sie i ninnge nɲɔn mɔ e kwla yo’n, be su.

7. (1) ?Wafa sɛ yɛ e kwla nanti Zoova i mmla’m be su titi-ɔ? (2) ?Kɛ nga Ebre Mun 10:​24, 25 fa kan’n sa’n, ngue ti yɛ ɔ ti cinnjin kɛ e tran aɲia’m be bo andɛ-ɔ?

⁷ Like klikli ng’ɔ fata kɛ e yo’n yɛle kɛ maan e nanti Zoova i mmla’m be su titi. Ɔ fataman kɛ e nian mɛn’n nunfuɛ’m be ayeliɛ’n yɛ nán e klun jɔ su. I wie yɛle kɛ nán e fa e wun e wlɛ i bla nin bian kunndɛlɛ sukusuku nin i wunsu ɲannzuɛn sa’m be nun. Ɲannzuɛn sa sɔ’m be nun wie yɛle yasua ng’ɔ nin i wiengu yasua be ja’n, annzɛ bla ng’ɔ nin i wiengu bla be ja’n, ɔ nin be nga be kunndɛ be wiengu yasua annzɛ be wiengu bla’n. (Mat. 19:4, 5; Rɔm. 1:26, 27) Like’n i nɲɔn su’n yɛle kɛ maan e nin e wiengu Klisifuɛ mun e yia e su Ɲanmiɛn likawlɛ. Maan ɔ wie Ɲanmiɛn sulɛ sua’m be nun-o, annzɛ aniaan wie i awlo lɔ-o, annzɛ kusu nvialiɛ nun-o, maan e nin niaan mun e yia titi. Kannzɛ sa nga be o e su’n be ti sɛ ti sɛ-o, sanngɛ nán e kpɛ aɲia’m be bo kɔlɛ nun cɛn. Like nga ti yɛ ɔ fataman kɛ e yo sɔ’n, yɛle kɛ ‘cɛn’n su mantan koko.’​—An kanngan Ebre Mun 10:24, 25 nun.

8. ?Ngue yɛ ɔ kle kɛ ɲrɛnnɛn dan’n nun’n e su boman jasin fɛ’n kun-ɔn?

⁸ Ɲrɛnnɛn dan’n nun’n, ndɛ nga é wá kán kle sran mun’n ɔ́ káci. Dɔ nga su’n, e bo Ɲanmiɛn i Famiɛn dilɛ’n i jasin fɛ’n, yɛ e wla e wun ase e uka sran mun naan be kaci Zezi i sɔnnzɔnfuɛ. Sanngɛ ɲrɛnnɛn dan’n nun’n, ndɛ nga é wá kán kle sran mun’n ɔ́ yó kɛ “nzraama nga kɛ nzue tɔ́’n ɔ gua’n” sa. (Ngl. 16:21) Atrɛkpa’n, é wá kán klé sran’m be kɛ ɔ ka kan’n, bé wá núnnún Satan i mɛn’n mlɔnmlɔn. Sanngɛ kɛ i blɛ’n wá jú’n, yɛ é wá sí ndɛ trele nga é wá kán’n, ɔ nin wafa nga é kán ndɛ sɔ’n niɔn. ?É wá nían ajalɛ nga be kle e dɔ nga su’n, be su yɛ é kán ndɛ sɔ’n niɔn? ?Annzɛ bé wá klé e ajalɛ uflɛ? Sɛ blɛ sɔ’n ju’n, é sí like trele nga é yó. I kwlaa yoli-o kɛ Zoova wá sé e kɛ e bo jɔlɛ ng’ɔ́ wá dí sran mun i jɔ e kle be’n, ɔ́ yó e cenjele like dan.​—Eze. 2:3-5.

9. (1) ?Ɲrɛnnɛn dan’n nun’n ndɛ nga é wá kán’n ɔ́ yó nvlenvle’m be nunfuɛ’m be sɛ? (2) ?Sanngɛ ngue yɛ Zoova wá yó-ɔ?

⁹ Atrɛkpa’n ndɛ nga é wá kɛ́n i ɲrɛnnɛn dan’n nun’n, ɔ́ wá klɔ́klɔ́ nvlenvle’m be nunfuɛ’m be ya. Ɔ maan bé wá yó naan e yaci ndɛ sɔ’n i kanlɛ. ?Blɛ sɔ nun’n é yó sɛ naan y’a kwla kan ndɛ sɔ’n? Dɔ nga su’n, Zoova man e wunmiɛn ti yɛ e kwla bo jasin fɛ’n niɔn. Blɛ sɔ nun’n, ɔ́ wá mán e wunmiɛn naan y’a kwla kan ndɛ sɔ’n y’a kle sran mun.​—Mis. 3:8.

10. ?Kɛ nga Liki 21:25-28 fa kan’n sa’n, ɲrɛnnɛn dan’n nun’n wafa sɛ yɛ sran’m be wun wá yó be-ɔ?

¹⁰ An kanngan Liki 21:25-28 nun. Ɲrɛnnɛn dan’n nun’n, kɛ sran’m bé wá wún kɛ mɛn nun ninnge kwlaa nga be fali be wla guali su’n, i kwlaa ti ngbɛn’n, be su wunman like kun nga bé fá yó be wun-ɔn. Be wla bó be wun trátrá su. Kpɛkun bé wá wún i wlɛ weiin kɛ ɔ ka kan be liɛ wíe. (Sof. 1:14, 15) Blɛ sɔ nun’n, i Zoova sufuɛ-o, i sran onga mun-o lika’n yó kekle kpa be kwlaa be su. Kpɛkun kɛ mɔ e timan mɛn nunfuɛ’n ti’n sa uflɛ wie’m bé wá tɔ́ e su ekun. Atrɛkpa’n e su ɲanman ninnge nga e sa mian be wun’n be kun.

11. (1) ?Ngue ti yɛ sran mun nin mɛn siefuɛ’m bé wá fá be ɲin bé cí Zoova i sufuɛ mun-ɔn? (2) ?Sanngɛ ngue ti yɛ ɔ fataman kɛ srɛ kun e-ɔ?

 ¹¹ Kɛ Ɲanmiɛn sulɛ wafawafa’m be nunfuɛ’m bé wá wún kɛ Zoova i sufuɛ’m be ngunmin cɛ yɛ be te su Ɲanmiɛn’n, i sɔ’n wá yó be ya dan. I sɔ’n ti’n, bé wá yí be ya’n i nglo ɛntɛnɛti su nin lika kwlakwla. Asa ekun’n, nvlenvle’m be nunfuɛ mun ɔ nin be min Satan bé wá fá be ɲin bé cí e. Afin like nga be sunnzunnin’n kɛ bé yó w’a kpɛnman su. Yɛle kɛ be waan bé núnnún Ɲanmiɛn sulɛ wafawafa kwlaa nga be o asiɛ’n su’n. Kpɛkun b’a kwlá yoman sɔ. Afin e liɛ’n, b’a kwlá nunnunman e wie. Ɔ maan bé wá kúnndɛ kɛ bé núnnún e. I lɛ nun’n be bo wá yó kun bé fá alɛ wlá e sin. Be anuannzɛ sɔ’n yɛ bé wá flɛ́ i kɛ Gɔgu m’ɔ fin Magɔgu’n niɔn. * (Eze. 38:2, 14-16) Atrɛkpa’n, kɛ mɔ e siman sa tɛkɛtɛkɛ kwlaa nga bé wá jú ɲrɛnnɛn dan’n nun ti’n, e kwla koko. Sanngɛ ɔ fataman kɛ e koko kaan sa. Afin blɛ sɔ’n nun’n Zoova wá klé e like ng’ɔ fata kɛ e yo naan y’a fite nun’n. (Jue. 34:20) Ɔ maan é kwlá ‘jáso é jrán yɛ é mán e ti’n su afin e si kɛ e ti ɲanlɛ blɛ’n w’a mantan koko. *

12. ?Wafa sɛ yɛ ‘junman difuɛ nanwlɛfuɛ m’ɔ si ngwlɛlɛ’n’ ɔ uka e naan y’a kwla jran sa nga bé wá jú e ɲrun lɔ’n be ɲrun kekle-ɔ?

¹² ‘Junman difuɛ nanwlɛfuɛ m’ɔ si ngwlɛlɛ’n’ kle e like andɛ naan y’a kwla jran kekle ɲrɛnnɛn dan’n nun. (Mat. 24:45) Wafa nga junman difuɛ sɔ’n kle e like’n, ɔ sɔnnin. I wie yɛle aɲia dandan nga e yoli be afuɛ 2016 lele 2018 nun’n. Aɲia dandan sɔ’m be bo’n, be fali e ɲin be sieli i nzuɛn nga e kwla yi be nglo naan y’a kwla jran kekle Zoova i cɛn’n nun’n, be su. Maan e kan nzuɛn sɔ’m be ndɛ.

13. (1) ?Ngue yɛ e kwla yo naan e nin Zoova y’a nanti klanman titi-ɔ? (2) ?Yɛ ngue ti yɛ dɔ nga su yɛ ɔ fata kɛ e yo sɔ-ɔ?

¹³ Maan e nin Zoova e nanti klanman titi. Afuɛ 2016 nun aɲia dan nga e yoli’n, ɔ fali e ɲin sieli i ndɛ nga su: “Maan e nin Zoova e nanti titi!” Aɲia sɔ’n i bo’n, be seli e kɛ sɛ e nin Zoova e afiɛn mantan kpa’n e nin i é nánti klanman titi. Asa ekun’n, be seli ekun kɛ sɛ e tu e klun e srɛ Zoova naan e suɛn i nuan ndɛ’n i nun like kpa’n yɛ e nin e afiɛn mántan kpa-ɔ. Kpɛkun é kwlá jrán sa kwlaa nga be tɔ e su’n, be ɲrun kekle. Kɛ ɲrɛnnɛn dan’n mántan koko’n e si kɛ sa kekle wie’m bé wá tɔ́ e su. Ɔ maan ɔ su yoman pɔpɔ manman e kɛ e nin Ɲanmiɛn e nanti klanman titi. Asa ekun’n, sran’m bé wá yó e finfin. (2 Piɛ. 3:3, 4) Afin e su faman e wun e wlaman mɛn’n nun ninnge’m be nun. I kwlaa sɔ’n ti’n, maan e nin Zoova e nanti klanman dɔ nga su. I liɛ’n ɲrɛnnɛn dan’n nun’n é yó sɔ titi.

14. (1) ?Wan mun yɛ ɲrɛnnɛn dan’n nun’n bé wá dún e ɲrun-ɔn? (2) ?Blɛ sɔ’n nun’n ngue ti yɛ ɔ fata kɛ e nanti ajalɛ kwlaa nga bé fá’n su-ɔ?

¹⁴ Ɲrɛnnɛn dan’n nun’n, be nga be dun e anuannzɛ’n i ɲrun’n bé káci. Afin be nga be kpali be sieli be ngunmin’n mɔ be te o asiɛ’n su wa’n, be kwlaa be ti yía ɲanmiɛn su lɔ naan b’a kwla kun Aamagedɔn alɛ’n. (Mat. 24:31; Ngl. 2:26, 27) I sɔ’n kle kɛ ɔ cɛ kan’n e su wunman be nga be kpali be  sieli be ngunmin mɔ be ti e ɲrun difuɛ’m be kun. Sanngɛ i sɔ’n kleman kɛ Zoova i sufuɛ nga be o asiɛ’n su wa’n be su ɲanman sran nianman be lika. Bé wá kpá aniaan wie mun bua’m be wie’m be nun naan be dun anuannzɛ’n i ɲrun. Blɛ sɔ’n nun’n, ajalɛ kwlaa nga aniaan sɔ’m bé wá fá’n maan e nanti su. Sɛ e yo sɔ’n é kle kɛ e nin Zoova e nanti klanman. Kpɛkun é ɲán e ti.

15. (1) ?Ngue yɛ é yó naan y’a si e awlɛn tra-ɔ? (2) ?Yɛ ngue ti yɛ i sɔ yolɛ’n ti cinnjin dɔ nga su-ɔ?

¹⁵ Maan e tra e awlɛn. Afuɛ 2017 nun aɲia dan nga e yoli’n fali e ɲin sieli i ndɛ nga su: “Nán ɔ sa sin bubu wɔ!” Aɲia sɔ’n i bo’n, be ukali e naan y’a wun wafa nga kɛ sa’m be tɔ e su’n, e kwla jran kekle’n i wlɛ. Asa ekun’n, e wunnin i wlɛ kɛ sɛ e waan é jrán kekle’n ɔ fata kɛ e lafi Zoova su, nán e lafi e bɔbɔ e wun su. (Rɔm. 12:12) Asa kusu’n, ɔ fataman kɛ e wla fi ndɛ nga Zezi kannin’n su. Ɔ seli kɛ: “Sran ng’ɔ jran kekle lele ju i awieliɛ’n, ɔ́ fíte nun.” (Mat. 24:13) Ndɛ sɔ’n kle e kɛ ɔ fata kɛ e jran sa kwlaa nga be tɔ e su’n be ɲrun kekle. Sɛ e yo sɔ dɔ nga su’n, é láfi Ɲanmiɛn su kpa kwlaa naan ɲrɛnnɛn dan’n w’a bo i bo.

16. (1) ?Sran nga i waan ɔ́ yó yakpafuɛ’n ngue yɛ ɔ fata kɛ ɔ yo-ɔ? (2) ?Wafa sɛ yɛ e kwla yo yakpafuɛ dɔ nga su-ɔ?

¹⁶ Maan e yo yakpafuɛ. Afuɛ 2018 nun aɲia dan nga e yoli’n fali e ɲin sieli i ndɛ nga su: “Maan e ‘yo yakpafuɛ’!” Aɲia sɔ’n i bo’n be seli e kɛ yakpa yolɛ’n finman ninnge nga e si be yo’n. Sanngɛ ɔ fin Zoova su mɔ e lafi’n. ?Wafa sɛ yɛ e kwla lafi Zoova su kpa titi-ɔ? Sɛ e waan é láfi i su kpa’n, ɔ fata kɛ e kɛnngɛn i nuan ndɛ’n nun cɛn kwlakwla, yɛ e bu wafa nga laa’n Zoova deli i sufuɛ wie mun’n, i su akunndan. (Jue. 68:21; 2 Piɛ. 2:9) Kɛ ɲrɛnnɛn dan’n nun’n nvlenvle’m bé wá fá alɛ wlá e sin’n, sɛ e waan é jrán kekle’n ɔ fata kɛ e yo yakpafuɛ yɛ e lafi Zoova su kpa tra laa’n. (Jue. 112:7, 8; Ebr. 13:6) Ɔ maan sɛ dɔ nga su e lafi Zoova su’n, kɛ Gɔgu wá fá alɛ wlá e sin’n é ɲán wunmiɛn é jrán kekle. *

17. ?Ngue ti yɛ ɔ fataman kɛ Aamagedɔn alɛ’n kun e srɛ-ɔ? (An nian foto ng’ɔ o fluwa’n i bui’n su’n.)

¹⁷ Kɛ nga e fa wunnin i like suanlɛ ng’ɔ sinnin lɛ’n nun sa’n, be wuli e nun sunman mɛn’n i awieliɛ blɛ’n nun. Sanngɛ e kwla fin ɲrɛnnɛn dan’n nun’n e fite. Aamagedɔn alɛ nun’n, Zoova wá núnnún mɛn tɛ kain nga e o nun yɛ’n. Sanngɛ ɔ fataman kɛ srɛ kun e. ?Ngue ti-ɔ? Afin Zoova yɛ ɔ́ wá kún alɛ sɔ’n niɔn, nán e bɔbɔ-ɔ. (Nya. 1:33; Eze. 38:18-20; Zkr. 14:3) Kɛ i blɛ’n wá jú’n, Zoova wá sé Zezi nin i sonja’m be kɛ be ko kun alɛ’n. I sonja sɔ mun yɛle be nga be kpali be sieli be ngunmin mɔ be cɛnnin be’n nin anzi kpanngban kpa wie mun. Be kwlaa be bo wá yó kun bé fá alɛ wlá Satan nin i mmusu mun nin i sran nga be o asiɛ’n su wa’n, be sin.​—Dan. 12:1; Ngl. 6:2; 17:14.

18. (1) ?Ngue ndɛ yɛ Zoova kannin-ɔn? (2) ?Wafa sɛ yɛ ndɛ ng’ɔ o Sa Nglo Yilɛ 7:9, 13-17 nun’n, uka e naan y’a lafi like nga e ɲin o i sin’n su kpa-ɔ?

¹⁸ Zoova seli kɛ: “Alɛ ninnge kwlaa nga be yi i kɛ bé fá kún amun’n, ɔ́ yó ngbɛn.” (Eza. 54:17) Ɔ maan “sran kpanngban kpa” mɔ be su Zoova’n bé fín “ɲrɛnnɛn dan’n” nun bé fíte. Kpɛkun bé sú i kɛ ng’ɔ nin i fata’n sa’n titi. (An kanngan Sa Nglo Yilɛ 7:9, 13-17 nun.) Biblu’n kan like nga ti yɛ e kwla lafi su kɛ é ɲán e ti’n, i ndɛ. Kpɛkun e si kɛ “Anannganman nian be bɔ be lafi i su’n be su.” (Jue. 31:24) Ɔ maan be kwlaa nga be klo Zoova mɔ be su i’n, bé wá wún wafa ng’ɔ́ wá yó i dunman’n i sanwun’n.​—Eze. 38:23.

19. ?Like ɲɛnmɛn benin yɛ e ɲin o i sin-ɔn?

¹⁹ Sɛ ɔ ti kɛ e o mɛn klanman’n nun lɔ naan akoto Pɔlu waan ɔ́ kán be nga be o lɔ’n be nzuɛn’n i ndɛ’n, nn ndɛ ng’ɔ kɛnnin i 2 Timote 3:2-5 nun’n i asabesin’n yɛ ɔ́ kán-ɔn. (An nian kuku nga be flɛ i kɛ “ Nzuɛn nga sran’m bé wá yí be nglo’n” i nun.) Aniaan bian Zɔɔzu Gangasi * m’ɔ yoli e Anuannzɛ’n i ɲrun dinfuɛ’m be nun kun laa’n seli kɛ: “Kɛ sran’m be ngba bé wá sú Zoova’n, mɛn’n nun tranlɛ’n wá yó fɛ dan. Ɔ cɛ kan’n é wá trán mɛn klanman’n nun. Ɔ maan sɛ Zoova te o lɛ’n, nn e kusu e te o lɛ. I sɔ’n kle kɛ é trán nguan nun tititi.” Nanwlɛ, i sɔ’n wá yó ɲɛnmɛn dan-o!